Pag-angkon og Espirituhanong Kahibalo, Bahin 3

Tinguhaa ang Dugang nga Panabot pinaagi sa Balaanong Gitudlo nga mga Tinubdan

Ang usa sa mga katuyoan sa doktrinal nga kahanas mao ang pagtabang kanimo sa pagkat-on ug paggamit sa mga baroganan sa pag-angkon og espirituhanong kahibalo. Kini nga leksiyon makatabang nimo nga makasabot sa kamahinungdanon sa pagpangita sa kamatuoran gikan sa mga tinubdan nga mahigugmaong gihatag sa Langitnong Amahan ug ni Jesukristo.

Paggamit sa balaanong gitudlo nga mga tinubdan. Tudloi ang mga estudyante sa pagdangop ngadto sa balaanong gitudlo nga mga tinubdan kon mangita og mga tubag sa espirituhanong mga pangutana. Usa ka paagi sa pagbuhat niini mao ang pagpakita og panig-ingnan kon unsaon ang proseso alang sa mga estudyante. Tabangi sila nga makat-on sa pag-ila sa kamatuoran gikan sa sayop ug sa pagsabot nga ang ubang mga tinubdan sa impormasyon dili kasaligan o nagtinguha sa pagguba sa hugot nga pagtuo.

Pagpangandam sa estudyante: Dapita ang mga estudyante sa paghunahuna mahitungod sa importante nga mga pangutana o mga kabalaka nga anaa kanila ug sa nagkalain-laing mga tinubdan nga mahimo nilang kadangpan alang sa mga tubag. Awhaga sila nga mangandam sa pagpaambit og ehemplo sa usa niini nga mga tinubdan o gani magdala og usa ngadto sa klase.

Posibleng mga Kalihokan sa Pagkat-on

Importante ang mga tinubdan

Ikonsiderar ang paggamit sa tubig isip usa ka butang sa leksiyon. Usa ka opsiyon mao ang pag-ipis og tubig sa tin-aw nga baso ug dapita ang usa ka estudyante sa pag-inom niini atubangan sa klase. Ang laing kapilian mao ang pagdapit sa usa ka estudyante sa paghugas sa iyang mga kamot diha sa planggana sa tubig.

Pagpamalandong sa makadiyot sa kamahinungdanon sa tubig sa imong kinabuhi.

• Kanus-a ang pagbaton og tubig labing importante kanimo?

• Nganong importante ang tinubdan sa tubig nga imong giinom?

Ang pagpangita sa kamatuoran mahimong sama sa tubig nga mainom: ang tinubdan importante. Paghunahuna sa mga tinubdan nga imong dangpan sa higayon nga duna kay mga pangutana o mga kabalaka. Unsa ka kamasaligon nga kini nga mga tinubdan naghatag og tinuod nga mga tubag?

Ikonsiderar ang pag-awhag sa mga estudyante sa pagpaambit sa ilang gihunahuna sa pagpangandam sa estudyante.

Ang pagpangita og mga tubag gikan sa kasaligan nga mga tinubdan makahimo og kalahian tali sa pagkat-on sa kamatuoran ug sa pagkalingla sa sayop nga mga ideya. Mahimong dili nato kanunay mailhan kon ang mga tinubdan adunay sayop nga impormasyon. Ang ubang mga tinubdan mahimo pa gani nga maila nga hinungdan sa kawalay pagsalig, kahadlok, ug pagduhaduha. Ang Langitnong Amahan nagtinguha sa pagtubag sa imong sinsero nga mga pangutana ug naghatag og kasaligan nga mga tinubdan sa paggiya kanimo. Kini nga leksiyon gituyo aron sa pagtabang kanimo nga makat-on ug mangita og mga tubag pinaagi sa balaanong gitudlo nga mga tinubdan.

Pagpangita sa kamatuoran

Sa Basahon ni Mormon, usa ka tawo nga ginganlan og Sherem mikompronta kang Jacob, ang igsuon nga lalaki ni Nephi, sa pagsulay sa “pag-uyog [ni Jacob] gikan sa hugot nga pagtuo” (Jacob 7:5). Si Sherem nangangkon nga si Jacob nagtudlo og sayop nga doktrina mahitungod ni Jesukristo: “Walay tawo nga nasayod sa ingon nga mga butang; kay siya dili makasulti sa mga butang nga umaabot” (Jacob 7:7). Si Jacob mitubag pinaagi sa pagpahayag giunsa niya pagkahibalo sa kamatuoran mahitungod sa umaabot nga Manluluwas.

Basaha ang Jacob 7:8–12, nga mangita sa mga tinubdan nga nakatabang ni Jacob nga makat-on mahitungod ni Jesukristo.

• Ngano sa imong hunahuna nga si Jacob misalig niini nga mga tinubdan sa paghatag og kamatuoran?

Ikonsiderar ang pagsugod og usa ka lista sa balaanong gitudlo nga mga tinubdan sa pisara. Human sa mga tinubdan nga nakita diha sa Jacob 7:8–12, mahimo nimong hangyoon ang mga estudyante sa paglista sa ubang kasaligang mga tinubdan nga ilang nahibaloan. Awhaga ang mga estudyante nga mangandam sa pagdugang ngadto sa lista human makompleto ang mosunod nga kalihokan.

Basaha ang parapo 1, 11–12 diha sa “Pag-angkon og Espirituhanong Kahibalo” nga seksiyon sa Mahinungdanong Dokumento sa Doktrinal nga Kahanas (2022), nga mangita og impormasyon mahitungod sa mga tinubdan sa kahibalo. Ikonsiderar ang pagmarka sa mga pulong ug hugpong sa mga pulong nga makahuloganon kanimo.

• Unsay labing importante alang kanimo niini nga mga parapo?

• Sa unsang paagi kaha nga ang imong gigamit nga mga tinubdan makahimo og kalainan sa impormasyon nga imong makit-an?

• Sa unsang paagi nga ang balaanong gitudlo nga mga tinubdan nagpakita sa gugma sa Langitnong Amahan ug ni Jesukristo alang kanato?

Ang mosunod nga kalihokan, nga nagpadayon sa senaryo ni Adry gikan sa “Pag-angkon og Espirituhanong Kahibalo, Bahin 2,” makatabang sa mga estudyante sa pagpraktis sa paggamit sa balaanong gitudlo nga mga tinubdan. Kon ang mga estudyante masaligon na sa paggamit niini nga mga tinubdan, ikonsiderar ang pagpadayon sa indibidwal nga kalihokan sa pagtuon.

Ang mga estudyante mahimong mobuhat nga magtinagsa , sa managparesan, o diha sa gagmay nga mga grupo. Ikonsiderar ang pagsulat sa pangutana diha sa pisara ug sa pagpakita sa gisugyot nga mga tinubdan o paghatag niini diha sa handout. Tabangi ang mga estudyante sa paggamit sa ilang oras sa epektibong paagi aron sila adunay panahon alang sa indibidwal nga kalihokan sa pagtuon.

Paggamit sa balaanong gitudlo nga mga tinubdan.

Manwal sa Magtutudlo sa Basahon ni Mormon(2024)—“Pag-angkon og Espirituhanong Kahibalo, Bahin 3”

Ang miaging leksiyon mipaila kang Adry, kinsa nangutana nga “Kon tinuod nga adunay usa ka mahigugmaong Dios, nganong gitugotan Niya ang mga tawo nga mag-antos?” Sa pagpraktis sa pagpangita sa kamatuoran gikan sa balaanong gitudlo nga mga tinubdan, paggahin og pipila ka minuto sa pagkompleto sa labing menos duha sa mosunod nga mga kalihokan. Irekord ang unsay imong nakat-onan diha sa imong journal sa pagtuon.

1. Mga ginikanan ug mga lider sa Simbahan: I-text ang pangutana ni Adry ngadto sa usa ka ginikanan o sa lider sa Simbahan, ug ipasabot nga inyong gihisgotan ang pangutana diha sa seminary ug gusto nimong masayran kon unsay iyang hunahuna mahitungod niini.

2. Pag-ampo: Sa hilom nga personal nga pag-ampo, pangayo sa Ginoo og giya ug inspirasyon gikan sa Espiritu Santo niini nga pangutana. Irekord ang mga hunahuna ug mga pagbati nga moabot kanimo.

3. Mga Kasulatan: Pangita og mga kasulatan nga makatabang kang Adry. Sama pananglit, mahimo nimong basahon ang mahitungod sa katawhan ni Alma diha sa Basahon ni Mormon kinsa nakasinati sa pag-antos sa pisikal nga pagkabihag (tan-awa sa Mosiah 23:21–23; 24:8–15).

4. Ang mga propeta sa Ginoo: Pangitag propetikanhong pamahayag nga makatabang kang Adry. Sama pananglit, basaha ang mosunod nga pamahayag ni Elder Joseph B. Wirthlin (1917–2008) sa Korum sa Napulog Duha ka Apostoles:

   

   Ang pagkat-on sa paglahutay sa mga panahon sa pagkawalay kadasig, pag-antos, ug kasubo kabahin sa atong aktwal nga pagbansay sa kinabuhi. Kini nga mga kasinatian, samtang kanunay lisod nga antoson niana nga panahon, mao ang tukma nga mga matang sa mga kasinatian nga molugway sa atong panabot, molig-on sa atong kinaiya, ug modugang sa atong kaluoy alang sa uban.

   Tungod si Jesukristo miantos sa hilabihan, Siya nakasabot sa atong mga pag-antos. Siya nakasabot sa atong kasubo. Kita nagsinati og lisod nga mga butang aron kita usab mahimong modugang og kaluoy ug pagsabot ngadto sa uban. (Joseph B. Wirthlin, “Bisan Unsa ang Mahitabo, ug Dawata Kini,” Liahona, Nob. 2008, 27)

Gamita ang mosunod nga mga pangutana o ang uban pa nga makatabang sa mga estudyante nga mas makasabot kon sa unsang paagi nga ang balaanong gitudlo nga mga tinubdan makahatag og mga tubag sa lisod nga mga pangutana.

• Unsa ang gitudlo niini nga mga tinubdan nga gusto nimong ipaambit kang Adry?

• Unsa ang imong nakat-onan nga makahimo og kalahian kon unsaon nimo pagpangita og mga tubag sa lisod nga mga pangutana?

© 2023 by Intellectual Reserve, Inc.All rights reserved.

Mga pangutana sa kalag

Atol sa mosunod nga kalihokan, matikdi ang mga estudyante nga nagkinahanglan og indibidwal nga tabang. Ikonsiderar ang paggiya kanila ngadto sa makatabang nga mga kapanguhaan o pagpangutana og follow-up nga mga pangutana aron sa pagtabang kanila sa pagtutok sa ilang mga paningkamot.

Si Elder David A. Bednar sa Korum sa Napulog Duha ka Apostoles mipasabot sa lisod nga mga pangutana ug mga kabalaka sa kinabuhi isip “mga pangutana sa kalag” (tan-awa “Kon Nakaila Pa Kamo Kanako,” Liahona, Nob. 2016, 103). Sa imong journal sa pagtuon, ilista ang pipila ka “mga pangutana sa kalag.” Mahimong imo kining mga pangutana o tingale mga pangutana nga anaa sa imong mga higala o mga miyembro sa pamilya.

Pagpili og pangutana nga nagkinahanglan ka og tabang sa Langitnong Amahan aron masabtan. Paggahin og panahon sa pagpangita og dugang nga panabot gikan sa balaanong gitudlo nga mga tinubdan. Dapita ang Espiritu Santo sa paggiya kanimo, ug irekord sa imong study journal ang panabot nga imong nadawat.

Sa pagsugod, mahimo kang mangita sa ChurchofJesusChrist.org, sa Gospel Library nga app, o sa mga isyu sa komperensiya sa mga magasin sa Simbahan aron makakita og mga pamahayag gikan sa mga lider sa Simbahan nga motubag sa imong pangutana. Ang Giya ngadto sa mga Kasulatan, ug ang luyo nga bahin [index] sa triple combination makatudlo usab ngadto sa makatabang nga mga kasulatan.

Hinumdomi, ang pagpangita og mga tubag sa espirituhanong mga pangutana nagkinahanglan og panahon. Samtang imong sundon ang sumbanan sa Ginoo sa pag-angkon og espirituhanong kahibalo, ang Espiritu Santo makatudlo nimo sa “pagtulun-an human sa usa ka pagtulun-an, … diyutay dinhi ug diyutay didto” (2 Nephi 28:30). Pangita og mga oportunidad sa pagpaambit sa unsay imong nakat-onan ngadto sa mga sakop sa pamilya o mga lider sa Simbahan.

Awhaga ang mga estudyante nga buot mopaambit kon sa unsang paagi nga ang pagpangita og mga tubag gikan sa balaanong gitudlo nga mga tinubdan makatabang nila nga mas mahiduol ngadto sa Langitnong Amahan ug ni Jesukristo. Ikonsiderar ang paghatag og pagpamatuod niini nga kamatuoran.

Komentaryo ug Background nga Impormasyon

Unsaon nako nga magiyahan sa akong pagpangita sa kamatuoran?

Si Presidente Henry B. Eyring sa Unang Kapangulohan mitudlo:

Sama nga ang Espiritu [Santo] naglig-on kanato batok sa dautan, Siya usab naghatag nato sa gahom sa pag-ila tali sa kamatuoran gikan sa mga bakak. Ang kamatuoran nga labing mahinungdanon mamatud-an lamang pinaagi sa pagpadayag gikan sa Dios. Ang atong tawhanong pangatarongan ug ang paggamit sa atong pisikal nga pamalatian [senses] dili gayod igo. Kita nagpuyo sa panahon nga bisan ang makinaadmanon maglisod sa pag-ila sa kamatuoran gikan sa inantigo nga pagpanglingla. …

Ang mga kamatuoran nga nagtimaan sa dalan pabalik sa Dios mapamatud-an pinaagi sa Espiritu Santo. (Henry B. Eyring, “Ang Espiritu Santo isip Inyong Kauban,” Liahona, Nob. 2015, 104–5)

Si Presidente Dallin H. Oaks sa Unang Kapangulohan mitudlo nga kita kinahanglang magmabinantayon ug mopili sa husto nga mga tinubdan sa atong pagpangita sa kamatuoran. Kon mangita kita sa kamatuoran mahitungod sa relihiyon, gamiton gayod nato ang mga espirituwal nga paagi niana nga pagsiksik.

Sa unsang paagi ang paggamit sa balaanong gitudlo nga mga tinubdan makapanalangin sa ubang mga bahin sa akong kinabuhi?

Si Presidente Russell M. Nelson adunay gitudlo:

Sukwahi sa mga pagduhaduha sa uban, aduna gayoy samang butang nga husto ug sayop. Aduna gayoy hingpit nga kamatuoran––mahangtorong kamatuoran. Usa sa mga katalagman sa atong panahon mao ang kagamay sa mga tawo nga nahibalo asa mangita alang sa kamatuoran[tan-awa sa Doktrina ug mga Pakigsaad 123:12]. …

Ang putli nga doktrina ni Kristo gamhanan. Kini makapausab sa kinabuhi sa tanan kinsa makasabot niini ug magtinguha sa paggamit niini sa iyang kinabuhi. Ang doktrina ni Kristo makatabang kanato sa pagkaplag ug pagpabilin sa dalan sa pakigsaad. Ang pagpabilin nianang higpit apan maayong pagkahan-ay nga dalan sa kaulahian mopasarang kanato nga makadawat sa tanan nga ang Dios aduna [tan-awa sa Ether 4:14; Doktrina ug mga Pakigsaad 78:17–18; 84:38]. Walay butang nga mas dako pa og bili kay sa tanan nga anaa sa atong Amahan! (Russell M. Nelson, “Putli nga Kamatuoran, Putli nga Doktrina, ug Putli nga Pagpadayag,” Liahona, Nob. 2021, 6–7)

Dugang nga Pagkat-on

Ang mga estudyante mahimong madasig pinaagi sa mga pagpamatuod sa mga batan-on kinsa nakakaplag og gahom sa paggamit sa balaanong gitudlo nga mga tinubdan sa pagtubag sa mga pangutana ug mga kabalaka sa ebanghelyo:

Daghan ang kinahanglan natong salaon aron makab-ot ang kamatuoran, apan ang Langitnong Amahan naghatag kanato og balaanong gitudlo nga mga tinubdan aron sa pagtabang kanato sa pagpalambo sa atong panabot.