1 Nephi 10; 11:1–6

“Nga Unta Ako Makakita, ug Makadungog, ug Masayod”

Kanus-a ka nadasig sa pagpangita kon tinuod ba ang imong nadungog? Unsa nga mga paningkamot ang imong gihimo ug kang kinsa ka midangop alang sa panabang? Human makadungog sa iyang amahan, si Lehi, nga nagtudlo mahitungod sa kahoy sa kinabuhi ug nanagna sa pag-anhi ni Jesukristo, si Nephi nagtinguha nga makahibalo sa kamatuoran sa mga pulong sa iyang amahan alang sa iyang kaugalingon. Kini nga leksiyon makatabang kanimo sa imong mga paningkamot sa makugihong pagpangita og kahibalo gikan sa Ginoo.

Pagpangutana og mga pangutana nga nagdapit sa pagdiskobre. Ang pagpangutana og mahinungdanon ug dili matubag sa oo ug dili [open-ended] nga mga pangutana, dayon pagtugot sa mga estudyante sa pagsiksik sa mga kasulatan alang sa mga tubag, makahatag og makahuloganon ug gamhanan nga mga oportunidad sa mga estudyante nga makadiskobre sa doktrina ug mga baroganan alang sa ilang kaugalingon. Kini nga mga matang sa mga pangutana nagpakita sa mga estudyante nga ang mga tubag mahimong mapalgan diha sa mga kasulatan ug nga sila makahimo sa pagpangita niadto nga mga tubag.

Pagpangandam sa estudyante: Dapita ang mga estudyante sa pagpangutana sa usa ka ginikanan o lider sa kabatan-onan kon unsay iyang gibuhat nga makugihong mangita sa kamatuoran gikan sa Dios o giunsa sa Espiritu Santo pagpadayag sa kamatuoran ngadto kaniya. Awhaga ang mga estudyante sa pagtambong nga andam sa pagpaambit og ideya ngadto sa klase.

Posibleng mga Kalihokan sa Pagkat-on

Sa dihang ang mga propeta mamulong

Imbis nga gamiton ang senaryo sa ubos, mahimo nimong sugdan ang leksiyon pinaagi sa pagpaambit og pipila ka mga pamahayag nga gihimo sa kasamtangan nga propeta ug apostoles nga nagpahayag sa doktrina o nagdapit sa mga indibidwal sa paglihok uban sa hugot nga pagtuo. Ipakita o basaha og kusog ang mga pamahayag ug dapita ang mga estudyante sa pribado nga pagtino kon hain sa tulo ka mga pamahayag ang nagpakita sa ilang mga pagbati: (1) Ako mituo niini ug andam sa pagbuhat niini, (2) Ako mituo niini apan wala magtinguha sa pagbuhat niini, ug (3) Dili ko segurado kon mituo ko niana. Seguroha nga ang mga estudyante nakasabot nga walay sakto o sayop nga tubag ug dili nila kinahanglan nga ipaambit kon giunsa nila pag-grado ang ilang kaugalingon.

Hunahunaa nga atol sa tibuok kalibotan nga debosyonal alang sa mga kabatan-onan, ang propeta mihatag og pipila ka mga pagdapit alang sa kabatan-onan sa paglihok uban sa hugot nga pagtuo.

• Unsa kaha ang pipila sa nagkalain-laing mga reaksiyon nga mahimo sa mga kabatan-onan?

• Ngano sa imong hunahuna nga kining nagkalain-laing mga tubag mahitabo?

• Sa unsang paagi kining mga reaksiyon makaimpluwensiya sa ilang kinabuhi karon o sa umaabot?

Hunahunaa kon giunsa nimo pagreak sa mga pagtulun-an sa mga propeta ug ngano. Sa unsang paagi ang imong mga reaksiyon nakaimpluwensiya kanimo? Samtang magtuon ka niini nga leksiyon, tinguhaa ang pagkat-on gikan sa lain-laing mga reaksiyon sa propetikanhong mga pagtulun-an diha sa mga kasulatan ug pagpamalandong kon sa unsang paagi kini magamit kanimo.

Usa ka tinguha nga mahibalo

Human si propeta Lehi miasoy sa iyang panan-awon sa kahoy sa kinabuhi ngadto sa iyang pamilya (tan-awa sa 1 Nephi 8), siya mipamatuod nga si Jesukristo motuman sa Iyang Pag-ula (tan-awa sa 1 Nephi 10:1–16). Ang mga anak nga lalaki ni Lehi adunay lain-laing mga reaksiyon sa iyang dinasig nga mga pagtulun-an.

Aron mapadali ang dugang nga partisipasyon ug diskusyon sa mga estudyante, ikonsiderar ang pagbahin sa klase ngadto sa gagmay nga mga grupo aron dungan nga magtuon niini nga mga bersikulo. Diha nga ang mga estudyante anaa sa mga grupo, matikdi kon unsaon nila pagtinabangay, ug gamita ang imong impluwensiya sa pagtabang kanila nga magmalamposon.

Basaha ang 1 Nephi 10:17–19 ug 15:1–3, 8–9, nga magtandi kon giunsa ni Nephi, Laman, ug Lemuel pagsanong ngadto sa mga pulong sa ilang amahan. Mahimo nimong markahan ang mga pulong ug hugpong sa mga pulong nga mahinungdanon kanimo.

Ikonsiderar ang pagpakita sa mosunod nga mga pangutana aron hisgotan sa mga sakop sa klase. Mahimo kang magtuyok-tuyok tali sa mga grupo ug maminaw kon unsay tubag sa mga estudyante.

• Unsa nga mga kalahian ang imong nakita tali kon giunsa ni Nephi ug sa iyang igsoong mga lalaki pagsanong sa susamang mensahe?

• Unsa ang gituohan ni Nephi mahitungod sa Dios? Unsa ang gituohan ni Laman ug Lemuel? (Tan-awa ang 1 Nephi 10:17–18; 15:9.)

• Sa unsang paagi sa imong hunahuna nga ang ilang nagkalain-laing mga pagtuo ug mga reaksiyon makaimpluwensiya kanila?

Usa sa mga kamatuoran nga nasabtan ni Nephi mao nga ang Dios mopadayag sa kamatuoran ngari kanato pinaagi sa Espiritu Santo kon kita makugihon nga mangita Kaniya.

Ikonsiderar ang pagsulat sa gipabaga [bolded] nga pamahayag diha sa pisara.

• Unsa ang pipila ka mga butang nga nasinati na ni Nephi nga nakatabang kaniya nga makaabot niini nga kahibalo mahitungod sa Dios?

Kon ang mga estudyante maglisod sa pagtubag, mahimo nimong dapiton sila sa pagrebyo sa 1 Nephi 2:16 ug sa 1 Nephi 4:6–13 o sa pag-summarize niini nga mga panghitabo.

Ang paghunahuna mahitungod sa mga kasinatian ni Nephi mahimong makapahinumdom sa nangaging mga kasinatian nga imong nasinati sa dihang ang Langitnong Amahan mipadayag sa kamatuoran kanimo. Mahimo nimong isulat kon giunsa ka Niya sa pagpanalangin diha sa imong journal sa pagtuon.

Mahimong usa kini sa daghang mga oportunidad atol sa leksiyon nga ang mga estudyante mahimong gustong mopaambit og personal nga mga kasinatian.

Pagpangita sa kamatuoran gikan sa Dios

Nakat-onan ni Nephi nga ang Langitnong Amahan mopanalangin kanato sa Espiritu Santo samtang kita mangita sa kamatuoran gikan Kaniya. Sa pagsabot pag-ayo niini nga kamatuoran, paghimo og duha ka kolum sa usa ka pahina sa imong journal sa pagtuon. Butangi og ngalan ang usa ka kolum og “Mga paagi sa makugihong pagpangita sa kamatuoran gikan sa Dios” ug ang pikas “Mga paagi sa pagpadayag sa Dios sa kamatuoran pinaagi sa Espiritu Santo.” Pagdugang og pipila ka mga ideya nga imong mahunahunaan sa matag kolum. Mahimo nimong iapil ang mga panabot nga imong nakat-onan diha sa 1 Nephi 10:17–19.

Usa ka lahi nga kapilian mahimo alang sa gagmay nga mga grupo nga mogamit og usa ka piraso sa papel, diin ipasa ang papel gikan sa tawo ngadto sa laing tawo sa makadaghang mga higayon. Ang matag estudyante modugang og usa ka ideya sa bisan hain nga kolum samtang siya makadawat sa papel. Kini nga kalihokan mahimo usab nga buhaton sa tibuok klase diha sa pisara. Kon itugot sa oras, ikonsiderar ang pag-awhag sa mga estudyante sa paglakip og mga pakisayran sa kasulatan nga nagsuporta sa ilang mga sugyot.

Basaha ang 1 Nephi 11:1–6, nga mangita sa unsay gibuhat ni Nephi sa pagpangita sa kamatuoran ug giunsa pagtabang sa Espiritu kaniya. Markahi ang piho nga mga pulong o hugpong sa mga pulong nga mahinungdanon kanimo. Mahimo kang modugang ngadto sa mga kolum sa imong journal sa pagtuon.

Ikonsiderar ang pagdapit sa mga estudyante sa pagpaambit sa unsay ilang nakita nga makahuloganon. Human sa pagpaambit sa mga estudyante, mahimo kang mangutana og follow-up nga mga pangutana sama sa “Nganong sa imong hunahuna nalipay man ang Espiritu?” (tan-awa sa bersikulo 6) o “Sa imong hunahuna sa unsang paagi nga ang pagpamalandong mahimong mosangpot sa pagpadayag?”

Aron makita kon giunsa sa usa ka moderno nga Apostol pagpangita og mga tubag gikan sa Ginoo isip usa ka batan-ong lalaki, tan-awa ang bidyo nga “Giunsa Nako #Pagpaminaw Kaniya: Elder Ronald A. Rasband” (2:55), makita sa ChurchofJesusChrist.org. Hunahunaa kon giunsa pagsunod ni Elder Rasband ang susama nga sumbanan sa pagpangita sa kamatuoran ug gipanalanginan sa Ginoo. Pagdugang og bisan unsang bag-ong mga ideya diha sa mga kolum sa imong journal sa pagtuon.

Tan-awa kon unsay imong narekord mahitungod kon giunsa sa Dios pagpadayag sa kamatuoran pinaagi sa Espiritu Santo samtang kita makugihong magtinguha Kaniya. Hunahunaa kon giunsa nimo pagkakita ang pipila niini nga nahimong tinuod sa imong kaugalingong kinabuhi. Sa unsang mga paagi nga ang imong relasyon sa Langitnong Amahan nalig-on samtang ikaw kinasingkasing nga nagtinguha Kaniya?

Kon ang mga kasinatian dili kaayo personal, dapita ang pipila ka mga estudyante sa pagpaambit. Ikonsiderar usab ang pagpaambit og personal nga mga kasinatian. Tinguhaa ang pagpasabot pag-ayo kon sa unsang paagi nga ang baroganan niini nga leksiyon tinuod ug mahinungdanon sa atong mga kinabuhi karon.

Ang personal nga pagpadayag importante

Tungod kay si Nephi nagtinguha nga makakat-on alang sa iyang kaugalingon ug midangop sa Ginoo alang sa mga tubag, iyang nakita ang nakita sa iyang amahan, si Lehi, ug gipakita sa daghang umaabot nga mga panghitabo nga mahitabo sa yuta. (Aron makakat-on pa og dugang mahitungod sa panan-awon ni Nephi, tan-awa sa 1 Nephi 11–14.) Ang panan-awon ni Nephi sa higpit ug pig-ot nga dalan nakapausab sa iyang kinabuhi. Sa ulahi iyang girekord ang iyang pagdasig alang sa tanan sa pagsubay nianang samang dalan (tan-awa sa 2 Nephi 31:18–21).

Dapita ang mga estudyante sa pagtubag sa mosunod nga mga pangutana diha sa ilang mga journal sa pagtuon:

• Unsay imong nakat-onan kon nganong importante ang imong mga pagsanong sa dinasig nga mga pagtulun-an?

• Unsaon kaha nimo paggamit ang imong nakat-onan mahitungod sa makugihong pagpangita sa kamatuoran?

• Unsa ang imong nakat-onan mahitungod sa Langitnong Amahan ug ni Jesukristo nga nagdasig kanimo sa pagpaduol ngadto Kanila?

Komentaryo ug Background nga Impormasyon

Unsa ang pipila ka mga rason nganong usahay dili kita mangutana ngadto sa Langitnong Amahan sa atong mga pangutana?

Si Presidente Camille N. Johnson sa Kinatibuk-ang Kapangulohan sa Primary nakabantay:

Tingali tungod kay wala kitay hugot nga pagtuo sa pagdawat sa tubag nga ato unyang madawat. Tingali tungod kay ang kinaiyanhon pagkalalaki o pagkababaye nga anaa kanato nagdumili sa hingpit nga pagtugyan sa mga butang ngadto sa Ginoo ug sa bug-os nga pagsalig Kaniya. (Camille N. Johnson, “Dapita si Jesus nga Mosulat sa Inyong Sugilanon,” Liahona, Nob. 2021, 81)

Unsaon nako pagpamalandong?

Sa wala pa ang iyang tawag sa Seventy, si Elder Gerald N. Lund miobserbar:

Paggahin og panahon sa pagpamalandong ug paghunahuna. Palayo sa kasamok sa kinabuhi. Pangita og hilom nga dapit ug paggahin og panahon sa yanong paglingkod ug paghunahuna, sa pagpaminaw sa imong mga hunahuna ug mga pagbati, sa pag-abli sa imong kaugalingon ngadto sa mga pag-aghat sa Espiritu. …

Usahay kinahanglan natong tinuyo nga ihikling ang mga kabalaka sa kalibotan, ihikling ang kasamok sa atong inadlaw nga kinabuhi, ug mangita og hilom nga dapit ug hilom nga panahon diin kita makalingkod ug mamalandong ug maghinuktok ug maghunahuna—ug maminaw nianang hinay nga hinagawhaw nga tingog. (Gerald N. Lund, “The Voice of the Lord” [Brigham Young University devotional, Dis. 2, 1997], 9–10, speeches.byu.edu)

Dugang nga mga Kalihokan sa Pagkat-on

1 Nephi 9. Ang mga palid ni Nephi

Timan-i: Ang leksiyon sa Mga Pulong ni Mormon maglakip sa mga kasayoran sa 1 Nephi 9. Kon mapuslanon ang pagtudlo niini karon, tan-awa kana nga leksiyon. Kon ang mga estudyante adunay mga pangutana, ikonsiderar ang pagpunting kanila ngadto sa mga kapanguhaan nga anaa sa Dali, Sunod Kanako karong semanaha.

1 Nephi 10:2–16. Si Lehi mipamatuod ni Jesukristo ug sa Iyang misyon

Mahimo nimong ikonektar ang mga pagtulun-an ni Lehi mahitungod sa kahoy sa kinabuhi ngadto sa misyon ni Jesukristo. Ikonsiderar ang pagdapit sa mga estudyante sa pagbasa sa 1 Nephi 10:2–16 ug sa paghunahunaa kon sa unsang paagi kini nga mga pagtulun-an makadala sa mga indibidwal sa pagtuo kang Jesukristo ug pagkaon sa bunga sa kahoy. Ang mga estudyante mahimo usab nga mamalandong kon nganong gusto sa Ginoo nga ang pamilya ni Lehi—ug kitang tanan—makahibalo niini nga mga kamatuoran. Sama sa gitinguha ni Lehi nga ang iyang pamilya makaila ug mahigugma sa Manluluwas, hangyoa ang mga estudyante sa pagkonsiderar kon unsay ilang masulti sa ilang mga minahal aron dapiton sila sa pagdangop ngadto Kaniya.

Usa ka alternatibo nga pagsugod sa leksiyon

Ang mosunod mao ang lain-laing mga reaksiyon nga kalagmitan maanaa sa mga indibidwal sa mensahe gikan sa propeta. Ikonsiderar ang paghangyo og upat ka estudyante sa pagbasa sa matag usa sa mosunod nga mga pamahayag:

• Si Dirk mituo sa daghang gitudlo apan adunay mga pangutana bahin sa pipila niini. Gusto niyang isulti ang iyang mga kabalaka ngadto sa iyang mga ginikanan.

• Gibati ni Abbie nga wala niya hingpit nga masabti ang mga bahin sa mensahe sa propeta. Nagplano siya nga mag-ampo alang sa panabot kon unsaon niya nga magamit ang mga pagtulun-an sa propeta.

• Gusto ni Jayden ang mga bahin sa pakigpulong apan naglisod sa uban. Gipaambit niya ang iyang mga hunahuna ug gibati sa social media.

• Nakita ni Simone nga makapaikag ang pakigpulong. Wala siyay plano nga mohimog bisan unsang aksiyon human kini madungog.

Hangyoa ang mga estudyante sa pagpaambit unsa ang ilang gihunahuna niini nga mga reaksyon ug hisgoti ang mga bentaha ug mga disbentaha sa matag usa. Mahimo usab nilang ipaambit kon asa kini nga mga reaksiyon mahimong mosangpot.