1 Nephi 11–15

Kinatibuk-ang Pagpasabot

Samtang si Nephi nakig-istorya sa langitnong mga mensahero, siya adunay usa ka panan-awon sa Manluluwas sa kalibotan ug nakadawat sa iyang kaugalingong panabot sa unsay makahatag og labing kalipay: ang gugma sa Dios. Human gipakita sa usa ka panan-awon sa moabot nga apostasiya ug sa kalaglagan sa iyang mga katawhan, iyang nakita nga ang usa ka dako ug salawayon nga simbahan modaot sa mga pagtulon-an sa Biblia ug makig-away batok sa mga Santos sa Dios. Bisan pa man, nakita usab niya nga ang ebanghelyo ipahiuli, mopanalangin sa tanan nga modawat sa mga pagtulun-an ug mga pakigsaad sa Manluluwas. Si Nephi nakakita sa mga panghitabo sa Pagpahiuli dugay na sa wala pa kini mahitabo ug nakasabot sa importante nga tahas sa iyang rekord diha sa Pagpahiuli.

Pangandam sa Pagtudlo

Ang mosunod nga impormasyon naghatag sa mga magtutudlo og mga ideya kon unsa ang kinahanglan nga andamon daan alang sa matag leksiyon.

1 Nephi 11

Katuyoan sa leksiyon: Kini nga leksiyon makatabang sa mga estudyante nga mobati sa gugma sa Langitnong Amahan ug ni Jesukristo alang kanila.

• Pagpangandam sa estudyante: Dapita ang mga estudyante sa pagdala og butang sa klase nga naghulagway sa usa ka paagi nga ang Dios nagpakita sa Iyang gugma alang kanila.

• Mga hulagway: Lainlaing mga hulagway gikan sa kinabuhi ug pangalagad ni Jesukristo

• Sugyot sa pagtudlo pinaagi sa videoconference: Samtang ang mga estudyante nagsiksik sa 1 Nephi 11:26–33, ipakita ang mga hulagway sa mga panghitabo gikan sa kinabuhi sa Manluluwas nga gihisgotan diha sa mga bersikulo. Dapita ang mga estudyante sa pagpaambit kon giunsa sa matag panghitabo paghulagway sa pagpakig-angay sa Dios.

1 Nephi 13–14

Katuyoan sa leksiyon: Ang katuyoan niini nga leksiyon mao ang pagtabang sa mga estudyante nga makasabot sa kaimportante sa mga pakigsaad ug sa pagpalambo sa tinguha sa mga estudyante sa paghimo ug pagtuman niini.

• Pagpangandam sa estudyante: Ikonsiderar ang pagdapit sa mga estudyante sa pagtambong nga andam sa pagpaambit sa unsay ilang gihunahuna nga pipila sa labing importante nga mga panghitabo sa miaging 500 ka tuig.

• Content nga ipakita: Ang pasulit sa 1 Nephi 13–14, gipakita o gikopya sa pisara

• Sugyot sa pagtudlo pinaagi sa videoconference: Ikonsiderar ang paggamit og quiz app sa paghimo ug pagpaambit sa quiz aron ma-access kini sa mga estudyante gamit ang ilang mga mobile device o mga browser. Ang mga estudyante mahimong motubag sa quiz sa sinugdanan sa leksiyon.

1 Nephi 13:20–42

Katuyoan sa leksiyon: Kini nga leksiyon makatabang sa mga estudyante nga makasabot kon giunsa sa Basahon ni Mormon ug sa ubang gipadayag nga kasulatan pagtabang sa pagpahiuli sa yano ug bililhong mga kamatuoran sa ebanghelyo sa Manluluwas.

• Pagpangandam sa estudyante: Ikonsiderar ang pagdapit sa mga estudyante sa pagtambong nga andam sa pagpaambit og usa ka butang nga bag-o lang nilang nakat-onan gikan sa ilang personal nga pagtuon sa kasulatan.

• Butang: Usa ka bisikleta o hulagway sa usa ka bisikleta

• Content nga ipakita: Ang lista sa mga hilisgotan ug mga kasulatan nga may kalabotan sa yano ug bililhon nga mga kamatuoran, gipakita o gikopya sa pisara

• Sugyot sa pagtudlo pinaagi sa videoconference: Ikonsiderar ang pagbahin sa mga estudyante ngadto sa mga breakout room ug pag-assign sa matag grupo og usa sa mga hilisgotan nga may kalabotan sa yano ug bililhon nga mga kamatuoran. Dapita ang mga estudyante sa paghisgot sa katugbang nga mga tudling sa kasulatan sa ilang grupo ug dayon pagpili og tigpamaba. Ibalik ang klase nga magkauban ug dapita ang matag tigpamaba sa pagpaambit sa unsay gihisgotan sa ilang grupo.

Sukda ang Imong Nakat-onan 1

Katuyoan sa leksiyon: Kini nga leksiyon gituyo aron pagtabang sa mga estudyante sa pagtimbang-timbang sa mga tumong nga ilang gitakda ug sa paglambo nga ilang nasinati hangtod karon atol sa ilang pagtuon sa Basahon ni Mormon.

• Pagpangandam sa estudyante: Dapita ang mga estudyante sa pagtambong sa klase nga andam sa pagpaambit og usa ka butang nga ilang nakat-onan na sa pagkakaron gikan sa Basahon ni Mormon nga nakatabang kanila nga mobati nga mas duol kang Jesukristo.

• Content nga ipakita: Ang pagtuon sa kasulatan nga pagtimbang-timbang sa kaugalingon sa sinugdanan sa leksiyon

• Sugyot sa pagtudlo pinaagi sa videoconference: Para sa “Kalihokan 3: Usa ka post sa social media,” ikonsiderar ang paghatag sa mga estudyante og oportunidad sa pagpaambit og usa ka butang nga ilang nakat-onan na sa pagkakaron gikan sa Basahon ni Mormon. Ikonsiderar usab ang paghatag og personal nga pagpamatuod mahitungod sa pagkahimong mas mapaduol kang Jesukristo pinaagi sa pagtuon sa Basahon ni Mormon.

Pagrebyo sa Doktrinal nga Kahanas 1

Katuyoan sa leksiyon: Kini nga leksiyon gituyo aron sa pagtabang sa mga estudyante sa pagpangita, pagmarka, ug pagbansay sa pagsag-ulo sa mga pakisayran sa kasulatan ug sa mahinungdanon nga mga hugpong sa pulong sa kasulatan alang sa unang 12 ka mga tudling sa kasulatan sa doktrinal nga kahanas sa Basahon ni Mormon.

• Pahinumdom: Lagmit nga ang tudling sa doktrinal nga kahanas kinahanglang itudlo isip puli niining rebyo nga leksiyon. Tan-awa ang eskedyul sa pagtudlo nga gihatag sa area o region director o koordinitor aron maseguro nga matudlo ang matag leksiyon sa tudling sa doktrinal nga kahanas samtang anaa sa sesyon ang seminary.

• Pagpangandam sa estudyante: Dapita ang mga estudyante sa pagrebyo sa mga pakisayran sa kasulatan ug sa mahinungdanon nga mga hugpong sa pulong sa kasulatan alang sa unang 12 ka mga tudling sa doktrinal nga kahanas sa Basahon ni Mormon. Mahimong makita sa mga estudyante kini nga mga tudling diha sa Mahinungdanong Dokumento sa Doktrinal nga Kahanas (2022) o sa Doctrinal Mastery app.

• Content nga ipakita: Usa ka tsart nga nagpakita sa unang 12 ka mga tudling sa kasulatan sa doktrinal nga kahanas

• Sugyot sa pagtudlo pinaagi sa videoconference: Ikonsiderar ang paggamit sa mga breakout room aron makaila ang mga estudyante sa usag usa samtang mangita sila og mga kasulatan ug magsag-ulo sa mahinungdanong hugpong sa mga pulong sa kasulatan.