Sukda ang Imong Nakat-onan 1

1 Nephi 1–15

Kini nga leksiyon gituyo aron sa pagtabang kanimo sa pagtimbang-timbang sa mga tumong nga imong gitakda ug sa paglambo nga imong nasinati hangtod karon atol sa imong pagtuon sa Basahon ni Mormon.

Pagtabang sa mga estudyante sa pagsusi sa ilang nakat-onan. Hatagi ang mga estudyante og mga oportunidad sa pagsukod sa ilang nakat-onan. Usa ka paagi mao ang pagdapit kanila sa pagpaambit kon giunsa nila pagtubo o paglambo isip resulta sa ilang pagtuon ug hugot nga pagtuo.

Pagpangandam sa estudyante: Dapita ang mga estudyante sa pagtambong sa klase nga andam sa pagpaambit og usa ka butang nga ilang nakat-onan na sa pagkakaron gikan sa Basahon ni Mormon nga nakatabang kanila nga mobati nga mas duol kang Jesukristo.

Posibleng mga Kalihokan sa Pagkat-on

Kini nga leksiyon gituyo aron sa pagtabang sa mga estudyante sa pagsukod sa mga tumong nga ilang gitakda, sa ilang abilidad sa pagpasabot sa mga pagtulun-an sa Basahon ni Mormon, o sa unsang paagi nga ang ilang mga kinaiya, mga tinguha, ug abilidad sa pagsunod sa ebanghelyo nausab. Ang pagtuon sa imong klase sa 1 Nephi 1–15 mahimong mihatag og gibug-aton sa mga kamatuoran gawas niadtong anaa sa mosunod nga mga kalihokan. Kon mao, ang mga kalihokan mahimong ipahiangay sa paglakip niadtong mga kamatuoran.

Tun-i ang Basahon ni Mormon Adlaw-adlaw

Kini nga seksiyon gituyo aron sa pagtabang sa mga estudyante sa pagtimbang-timbang kon kumusta sila sa ilang personal nga mga tumong sa pagtuon sa kasulatan ug mobati sa bili ug kamahinungdanon sa pagtuon sa Basahon ni Mormon.

• Unsa ang pipila ka mga butang nga imong gibuhat kada adlaw o kada gabii?

Mahimong mosanong ang mga estudyante sa mga tubag sama sa pagsepilyo, pagkaon, pagkatulog, ug uban pa.

• Unsa ang mahimong mahitabo kon imong lat-angan kini nga mga kalihokan sulod sa usa ka adlaw o mas dugay pa?

• Ngano nga ang matag adlaw nga pagtuon sa kasulatan usa ka butang nga kinahanglan natong paningkamotan nga buhaton?

Ipakita ang mosunod nga pagtimbang-timbang sa kaugalingon. Ang mga estudyante mahimong mamalandong sa ilang mga tubag sa pribado o irekord ang ilang mga tubag diha sa ilang mga journal sa pagtuon.

Pagpili og usa sa mosunod aron sa paghulagway kon kumusta ang imong inadlaw nga pagtuon sa Basahon ni Mormon:

1. Ang akong pagtuon makahuloganon ug makanunayon.

2. Ang akong pagtuon maayo kon kini mahitabo apan dili kaayo kanunay mahitabo.

3. Ako makanunayon sa akong pagtuon apan dili kaayo makakuha niini.

4. Naglisod ko sa pagsabot sa akong gibasa ug panagsa ra nga magtuon sa akong kaugalingon.

5. Wala koy bisan unsang gibuhat aron makab-ot ang tumong sa pagtuon sa kasulatan.

6. Uban pa: ipasabot ang imong tubag.

Natural lang nga adunay mga babag nga moabot sa usa ka inadlaw nga tumong nga sama niini. Ang importante mao ang padayon nga pagpaningkamot.

Ikonsiderar ang pagsulat sa mga babag sa mga estudyante diha sa pisara ug dapita ang klase sa paghisgot kon giunsa nila pagsanong o mahimong mosanong niini nga mga babag.

• Unsay maayong nahitabo sa imong pagtuon sa Basahon ni Mormon? Unsa ang gusto nimong palamboon o usbon sa lahi nga paagi?

Ikonsiderar ang pagpili og usa o labaw pa sa mosunod nga mga kalihokan aron matabangan ang mga estudyante nga mobati sa bili ug katinuod sa Basahon ni Mormon.

Personal nga mga hunahuna ug mga pagbati mahitungod sa Basahon ni Mormon

Kalihokan 1: Miting sa pagpamatuod

Kon ikaw mohatag sa imong pagpamatuod diha sa miting sa sakramento mahitungod sa Basahon ni Mormon, unsa ang imong isulti aron ipaabot ang imong mga pagbati?

Kalihokan 2: Nganong nagtuon ka?

Hunahunaa nga nagtuon ka sa Basahon ni Mormon sa dihang ang imong manghod misulod ug nangutana, “Unsay imong gibasa?” Mitubag ka, “Ang Basahon ni Mormon.” Ang imong igsoon nangutana, “Ngano?” Pagsulat og duha o tulo ka mga kapahayag nga nagpakita kon unsay imong isulti sa imong manghod aron matabangan siya nga makasabot nganong gipili nimo nga magtuon sa Basahon ni Mormon.

Kalihokan 3: Usa ka post sa social media

Usa ka higala misulat sa mosunod nga post sa social media: “Bag-o lang ko nagsugod sa pagbasa sa Basahon ni Mormon ug ganahan ko niini! Alang ni bisan kinsa kaninyo nga nakabasa na sa Basahon ni Mormon kaniadto, palihog ipaambit kanako ang inyong paborito nga bersikulo ug mubo nga pagpasabot kon nganong ganahan kamo niini?”

Kini mahimo nga usa ka maayong oportunidad sa pagdapit sa mga estudyante sa pagpaambit sa ilang mga hunahuna gikan sa pagpangandam sa estudyante. Ikonsiderar ang pagpaambit sa imong pagpamatuod kon giunsa sa Basahon ni Mormon pagtabang kanimo nga mobati nga mas duol kang Jesukristo niini nga semester.

Damgo ni Lehi

Kini nga seksiyon gituyo aron sa pagtabang sa mga estudyante sa pagpasabot sa mga bahin ug kahulogan sa damgo ni Lehi ug sa pagpamalandong kon asa nila makita ang ilang kaugalingon sa damgo.

Usa ka paagi nga makatabang ka sa imong mga estudyante sa pagrebyo niini nga content mao ang pagdapit kanila sa pagtan-aw sa mosunod nga mga ilustrasyon ug mga pangutana sa tagsa-tagsa. Dayon bahina ang mga estudyante sa managpares ug dapita sila nga magpuli-puli sa pagpasabot ngadto sa ilang pares sa daghang detalye ug kahulogan sa damgo ni Lehi kutob sa ilang mahimo sulod sa 30 ka segundo.

Ang pagpakita sa mga pangutana nga nagsunod sa mga hulagway mahimong makatabang.

• Unsa nga nagkalainlaing bahin o simbolo sa damgo ang imong nahinumdoman?

• Hain sa mga simbolo ang labing mahinungdanon kanimo? Ngano man?

• Sa unsang paagi nga ang damgo ni Lehi susama sa atong kalibotan karon?

Ikonsiderar kon sa unsang paagi nga ang lain-laing mga bahin sa damgo ni Lehi mahimong makatabang sa mga indibidwal sa mosunod nga mga senaryo:

• Ang usa ka batan-ong lalaki migahin og panahon uban sa grupo sa mga tawo kinsa mipili sa paglapas sa Pulong sa Kaalam ug mipugos kaniya sa pagbuhat sa susama.

• Ang usa ka batan-ong babaye naghunahuna nga mas seryosohon niya ang iyang pagtuon sa kasulatan kon mokalma na ang iyang tensiyonado nga kinabuhi.

• Ang usa ka batan-ong lalaki misugod sa pagbati og kaulaw sa iyang pagkamiyembro sa Ang Simbahan ni Jesukristo sa mga Santos sa Ulahing mga Adlaw sa dihang iyang nadungog ang uban nga nagbugalbugal sa mga tawo nga relihiyoso.

• Unsaon nimo paggamit ang damgo ni Lehi sa pagtubag sa matag senaryo?

• Unsa nga pagtulon-an o kamatuoran gikan sa damgo ni Lehi ang imong gibati nga makatabang nimo nga mas mapaduol sa gugma sa Dios sa imong kinabuhi?

Mahimo nimong tumanon ang mga kasugoan

Kini nga seksiyon gituyo aron tugotan ang mga estudyante nga makita kon kumusta sila sa ilang gipambuhat sa ilang plano (gikan sa 1 Nephi 3) sa mas hingpit nga pagbuhat sa mga sugo sa Dios.

Atol sa leksiyon sa 1 Nephi 3, tingali nakahimo ka og tumong nga mahimong mas matinumanon sa usa ka sugo nga lisod tumanon. Pagpamalandong sa imong pag-uswag paingon niini nga tumong, ug irekord ang imong mga hunahuna diha sa imong journal sa pagtuon o personal nga journal. Ikonsiderar ang mosunod nga mga pangutana samtang imong pamalandongan ug isulat:

• Kumusta ang imong pagpaningkamot sa pagsunod niini nga sugo?

• Unsa nga mga kalamposan o mga babag ang imong nasinati?

• Unsaon nimo pagpahiuyon sa imong plano?

• Giunsa ka pagpanalanginan sa imong mga paningkamot?

• Giunsa sa Ginoo pag-andam og paagi aron ikaw magmasulondon?

Kon wala ka naghunahuna og usa ka sugo nga tingali lisod alang kanimo sa pagtuman, paghunahuna na og usa karon. Pagdesisyon kon unsa nga mga aksiyon ang imong mahimo aron sa pagtuman niini sa mas hingpit.

Ikonsiderar ang paghatag sa mga estudyante og oportunidad sa pagpaambit og bisan unsa nga mga tubag niini nga mga pangutana o unsay ilang nakat-onan, kon kini dili ra kaayo personal, diha sa klase. Mahimo nimong ipaambit ang imong pagpamatuod kon unsaon kita pagpanalangin sa Dios sa pagtuman sa Iyang mga sugo samtang kita mohimo og makahuloganong mga paningkamot sa pagsalig ug pagsunod Kaniya.

Si Presidente Henry B. Eyring sa Unang Kapangulohan mitudlo nga ang pagsalig ni Nephi sa Ginoo makahatag kanato og pagdasig kon kita maglisod sa pagsunod sa mga sugo sa Ginoo:

Ang batan-on nga si Nephi sa Basahon ni Mormon nagdasig kanato og usa ka tinguha sa pagpalambo sa pagsalig diha sa Ginoo sa pagsunod sa Iyang mga sugo, bisan unsa pa man kini kalisud tan-awon. Si Nephi miatubang og kakuyaw ug posibleng kamatayon sa dihang siya misulti niining mga pulong sa pagsalig nga kita makabati ug kinahanglang mobati og kalig-on sa atong kasingkasing: “Ako moadto ug mobuhat sa mga butang nga ang Ginoo nagsugo, kay ako nasayud nga ang Ginoo dili mohatag og mga sugo ngadto sa mga katawhan, gawas kon siya moandam og paagi alang kanila nga sila unta makatuman sa butang diin siya misugo kanila” [1 Nephi 3:7]. (Henry B. Eyring, “Salig sa Dios, Dayon Lakaw ug Buhata,” Liahona, Nob. 2010, 71)