“1 Nephi 13:20–42: Yano ug Labing Bililhon nga mga Kamatuoran” Manwal sa Magtutudlo sa Basahon ni Mormon (2024)
“1 Nephi 13:20–42: Yano ug Labing Bililhon nga mga Kamatuoran” Manwal sa Magtutudlo sa Basahon ni Mormon
1 Nephi 13:20–42
Yano ug Labing Bililhon nga mga Kamatuoran
Ang Pagpahiuli sa ebanghelyo sa Manluluwas usa ka panalangin sa daghang paagi. Ang usa ka panalangin mao nga kini nagdala sa kahayag sa daghang yano ug labing bililhon nga mga kamatuoran nga nawala gikan sa Biblia. Si Nephi nakakita sa mga panghitabo sa Pagpahiuli dugay na sa wala pa kini mahitabo ug nakasabot sa importante nga tahas sa iyang rekord diha sa Pagpahiuli. Kini nga leksiyon makatabang nimo nga masabtan kon giunsa sa Basahon ni Mormon ug sa ubang gipadayag nga kasulatan pagtabang sa pagpahiuli sa yano ug labing bililhong mga kamatuoran sa ebanghelyo sa Manluluwas.
Pag-andam sa imong kaugalingon sa pagtudlo. Ang gamhanan nga pagtudlo sa ebanghelyo nagpasabot sa dili lang pag-andam og leksiyon apan pag-andam sa atong mga kaugalingon. Tungod kay ang Espiritu nagpamatuod sa kamatuoran ug mao ang tinubdan sa pagkakabig, ang epektibo nga mga magtutudlo sa ebanghelyo nagpokus sa pagpuno sa ilang mga kasingkasing sa Espiritu Santo sa dili pa sila maghunahuna mahitungod sa pagpuno sa oras sa klase. Ikonsiderar ang pagpangutana sa imong kaugalingon, “Andam na ba ko sa pagtudlo pinaagi sa Espiritu?”
Pagpangandam sa estudyante: Ikonsiderar ang pagdapit sa mga estudyante sa pagtambong nga andam sa pagpaambit og usa ka butang nga bag-o lang nilang nakat-onan gikan sa ilang personal nga pagtuon sa kasulatan.
Posibleng mga Kalihokan sa Pagkat-on
Pagsusi sa kaluwasan
Ipakita sa mga estudyante ang hulagway sa bisikleta o, kon mahimo, ikonsiderar ang pagdala og bisikleta sa klase. Dapita ang mga estudyante sa paghunahuna sa importante nga mga bahin sa usa ka bisikleta ug ilista kini sa pisara.
Ang bisikleta usa ka yano ug epektibo nga paagi sa transportasyon. Ang pagbisikleta mahimo usab nga usa ka makalingaw ug magantihon nga kasinatian. Unsa ang pipila sa mga importanteng bahin nga nagtugot sa usa ka tawo sa pagpaandar sa usa ka bisikleta nga luwas ug epektibo? Hunahunaa nga ikaw nakapanag-iya og bisikleta ug adunay usa ka tawo nga tuyo nga mitangtang sa pipila ka importante nga mga bahin gikan niini.
-
Unsa kaha ang gipakita niadtong mga binuhatan mahitungod sa iyang mga pagbati nganha kanimo?
-
Unsa kaha ang mahitabo kon ikaw misulay sa pagpaandar sa bisikleta nga adunay nangawala nga mga piyesa?
-
Kinsa ang mahimo nimong kontakon aron ayohon ug ipahiuli ang imong bisikleta aron mogana og tarong?
Sa samang paagi, si Satanas nagtinguha sa pagdaot ug paglibog sa mga anak sa Dios pinaagi sa pagtangtang ug pag-usab sa importante nga mga bahin sa ebanghelyo ni Jesukristo. Samtang nagtuon ka sa 1 Nephi 13, pangitaa kon unsay nahimo sa Manluluwas aron sa pagtabang kanato sa pagbuntog sa mga babag ni Satanas.
Daghan ang nangapandol
Si Nephi gipakita diha sa panan-awon sa importante nga mga panghitabo sa ulahing mga adlaw, lakip ang usa ka basahon nga gidala ngadto sa gisaad nga yuta pinaagi sa mga Hentil. Basaha ang libro mahitungod sa 1 Nephi 13:20–25 ug pangitaa kon unsay sulod niini.
Mahimong makatabang ang paglista diha sa pisara sa unsay nadiskobrehan sa mga estudyante, sama sa “mga pakigsaad sa Ginoo,” “mga panagna sa balaan nga mga propeta,” ug “sa kahingpitan sa ebanghelyo” (1 Nephi 13:23–24). Ikonsiderar ang pagpangutana sa mga estudyante kon nahibalo ba sila kon unsa ang libro nga anaa sa bersikulo 20 sa dili pa sila dapiton sa paghimo og mubo nga sulat [note] diha sa ilang mga kasulatan.
-
Unsay imong nakat-onan gikan sa imong pagbasa?
Ikonsiderar ang paghimo og mubo nga sulat [note] sa bersikulo 20 nga ang libro nga nakita ni Nephi nagpasabot sa Balaan nga Biblia. Ang paghimo og mubo nga mga sulat [notes] diha sa imong mga kasulatan makatabang kanimo nga ma-personalize kini ug makadugang sa pagkaepektibo sa imong pagtuon sa kasulatan. Sama pananglit, ang paghimo og mubo nga mga sulat sa imong mga kasulatan mahimong makatabang kanimo sa paghinumdom sa espirituhanong mga panabot sa umaabot o mahimong usa ka panalangin kanimo o sa uban sa panahon sa panginahanglan.
-
Unsay imong namatikdan mahitungod sa paagi sa paghulagway sa Biblia?
Ikonsiderar ang pagtugot sa mga estudyante sa pagtuon sa sunod nga mga bersikulo nga magpares o sa gagmay nga mga grupo ug dapita sila sa paghisgot sa mga pangutana sama sa mosunod. Kon makompleto na sa mga estudyante ang pagbasa, ikonsiderar ang pagdapit kanila sa paghunahuna kon giunsa nila pagkakita sa mga paningkamot ni Satanas sa pagtangtang sa yano ug labing bililhon nga mga kamatuoran nga nakapandol sa mga tawo sa kalibotan.
Basaha ang 1 Nephi 13:26–29, nga mangita kon unsay nahitabo sa Biblia human kini migawas gikan sa “mga apostoles sa Kordero.”
-
Unsay nahitabo sa Biblia?
-
Sa unsang paagi nga ang pagtangtang sa yano ug labing bililhong mga kamatuoran gikan sa Biblia makapandol sa mga tawo sa espirituwal?
-
Sa unsang paagi kini nga mga bersikulo susama sa analohiya sa bisikleta?
“Ang gasa ug gahom sa Kordero”
Human makasaksi nga ang yano ug labing bililhon nga mga kamatuoran giusab o gitangtang gikan sa Biblia, si Nephi nakat-on nga ang Ginoo sa Iyang kaluoy dili motugot sa kalibotan nga magpabilin nga nalibog o nabutaan (tan-awa sa 1 Nephi 13:30–34). Nakita ni Nephi nga ang ebanghelyo ipahiuli sa kahingpitan niini pinaagi sa “gasa ug gahom sa Kordero” (1 Nephi 13:35).
Aron makahibalo kon giunsa kini pagtuman sa Manluluwas, basaha ang 1 Nephi 13:35–39 ug ikonsiderar ang pagmarka sa mosunod nga mga hugpong sa mga pulong ug isulat ang kahulogan niini diha sa imong mga kasulatan o sa journal sa pagtuon.
Imbes nga isulti lang sa mga estudyante ang mosunod nga impormasyon, mahimo nimong ilista ang mga kasulatan ug mga hugpong sa mga pulong sa mga marka sa kinutlo diha sa pisara sa usa ka kolum. Sa ikaduhang kolum, mahimo nimong ilista ang mga interpretasyon sa lahi nga pagkahan-ay kaysa sa gilista dinhi. Dapita ang mga estudyante sa pagtuon sa mga bersikulo ug ipares ang hugpong sa mga pulong sa saktong interpretasyon. Ang mga estudyante mahimo usab nga mahatagan og oportunidad sa pagpangutana mahitungod niini nga mga bersikulo.
|
Pakisayran sa kasulatan ug hugpong sa mga pulong |
Interpretasyon |
|---|---|
Pakisayran sa kasulatan ug hugpong sa mga pulong 1 Nephi 13:35 “kini nga mga butang“ | Interpretasyon Ang Basahon ni Mormon |
Pakisayran sa kasulatan ug hugpong sa mga pulong 1 Nephi 13:39 “lain nga mga basahon” | Interpretasyon Naglakip sa Basahon ni Mormon, sa Doktrina ug mga Pakigsaad, sa Perlas nga Labing Bililhon, ug sa Hubad ni Joseph Smith sa Biblia |
Pakisayran sa kasulatan ug hugpong sa mga pulong 1 Nephi 13:39 “mga talaan sa mga propeta ug sa napulog duha ka mga apostoles sa Kordero” | Interpretasyon Ang Balaang Biblia |
Basaha ang 1 Nephi 13:40–41, nga mangita og paghulagway kon unsa ang ipahibalo sa mga kasulatan sa Pagpahiuli ngadto sa tanang katawhan.
-
Unsay imong nadiskobrehan?
Ikonsiderar ang pagrekord sa mosunod nga kamatuoran diha sa imong mga kasulatan o sa journal sa pagtuon: Ang Basahon ni Mormon ug ang ubang mga kasulatan sa ulahing mga adlaw mipahiuli sa yano ug labing bililhon nga mga kamatuoran nga nagpamatuod ni Jesukristo ug nagtukod sa kahingpitan sa Iyang walay kataposan nga ebanghelyo.
Ikonsiderar ang pagdapit sa mga estudyante sa pagsulat sa ilang mga tubag sa ikaduha ug ikatulo nga mga pangutana sa ubos diha sa usa ka piraso nga papel. Kolektaha ang ilang mga tubag ug i-display kini sa palibot sa kwarto aron mabasa sa uban.
-
Ngano sa imong hunahuna nga ang mga kamatuoran gikan sa ebanghelyo sa Manluluwas gihulagway nga yano ug labing bililhon?
-
Unsay imong nakat-onan mahitungod sa Ginoo gikan sa Iyang tahas sa pagpahiuli sa yano ug labing bililhong mga kamatuoran?
-
Unsa ang kamatuoran o pagtulun-an gikan sa ulahing mga adlaw nga kasulatan nga yano ug labing bililhon kanimo?
-
Sa unsang paagi kana nga kamatuoran nakatabang nimo nga mas mahiduol kang Jesukristo?
Yano ug labing bililhon nga mga kamatuoran napahiuli
Ipakita sa pisara ang mosunod nga mga hilisgotan ug kauban nga mga kasulatan. Ang mga estudyante mamahimong mopili og usa o daghang mga kapilian aron tun-an sa mas detalyado. Ipatuon una sa mga estudyante ang tudling diha sa Biblia ug hunahunaa nga kini ra ang impormasyon bahin sa hilisgotan. Dayon ipatuon nila ang ubang mga tudling, nga mangita kon giunsa niini pagpatin-aw kon unsa ang anaa sa Biblia. Mahimo kining himoon nga magpares, ug ang mga estudyante mahimong maghisgot sa ilang mga obserbasyon sa usag usa. Sa laing paagi, ang mga estudyante mahimong magtuon nga magtinagsa ug maghisgot unya sa ilang mga nahibaloan isip usa ka klase.
Ang Dios nga Kapangulohan (Mateo 3:16–17)
Ang Pag-ula ni Jesukristo (Lucas 22:41–44)
Kinabuhi sa wala pa sa yuta (Jeremias 1:5)
Ang sakramento (Mateo 26:26–28)
Ang ebanghelyo ni Jesukristo (Marcos 1:14–15)
-
Mga Artikulo sa Hugot nga Pagtuo 1:4
Dapita ang buot nga mga estudyante sa pagpaambit unsay ilang nakat-onan. Mahimo nimong gamiton ang mga pangutana sama sa mosunod:
-
Unsa ang imong nakat-onan mahitungod sa imong napili nga hilisgotan?
-
Sa unsang paagi kini nga kamatuoran makatabang kanimo nga magmalipayon ug mas makasunod kang Jesukristo?
-
Nganong mapasalamaton ka nga ang Langitnong Amahan ug si Jesukristo mipadala og dugang nga kasulatan ug gipahiuli ang yano ug labing bililhon nga mga kamatuoran?