“1 Nīfai 3: ʻOku Teuteu ʻe he ʻOtuá ha Hala,’” Tohi ʻa Molomoná – Tohi Lēsoni ʻa e Faiakó (2024)
“1 Nīfai 3: ʻOku Teuteu ʻe he ʻOtuá ha Hala,’” Tohi ʻa Molomoná – Tohi Lēsoni ʻa e Faiakó
1 Nīfai 3
ʻOku Teuteu ʻe he ʻOtuá ha Hala
Hili ʻenau fononga ʻi ha ngaahi ʻaho ʻi he feituʻu maomaonganoá, naʻe fehangahangai ʻa Nīfai mo hono ngaahi tokouá mo ha sivi ʻo ʻenau talangofua mo e tui ki he ʻOtuá ʻi he taimi naʻe fekauʻi ai kinautolu ke nau foki ki Selusalema ke ʻomai ʻa e ʻū lauʻi peleti palasá meia Lēpaní. ʻI he taimi ʻe niʻihi, ʻe kole atu foki ʻe he ʻEikí ke ke fai ha ngaahi meʻa faingataʻa. ʻE lava ke tokoniʻi koe ʻe he lēsoni ko ʻení ke ke ngāue ʻaki ʻa e tui ki he ʻOtuá ke fakahoko ʻa e meʻa ʻokú Ne kole atu ke ke faí.
Tokoniʻi e kau akó ke nau lava ʻo fakatokangaʻi ʻa e ivi tākiekina ʻo e ʻEikí ʻi heʻenau moʻuí. ʻI he ako ʻa e kau akó fekauʻaki mo e founga naʻe tāpuekina ai ʻe he Fakamoʻuí e moʻui ʻa e kakai ʻi he folofolá, kumi ha ngaahi founga ke tokoniʻi ai kinautolu ke nau lava ʻo fakatokangaʻi ʻEne ngaahi tāpuakí ʻi heʻenau moʻuí. Fakaafeʻi kinautolu ke fakalaulauloto ki he founga ʻe ala tali ai ʻe he Fakamoʻuí ʻenau ngaahi lotú, fakamālohia, pe fakamoʻui kinautolú.
Teuteu ʻa e tokotaha akó: Fakaafeʻi e kau akó ke nau ngāue ki hono ako maʻuloto ʻo e potufolofola fakataukei fakatokāteline 1 Nīfai 3:7 pea fakakaukau ki he founga ʻoku kaunga ai ki he ngaahi tūkunga ʻoku nau fehangahangai mo ia ʻi heʻenau moʻuí.
Ngaahi ʻEkitivitī Ako ʻOku Ala Fakahokó
Ngaahi fekau faingataʻá
Ke tokoniʻi e kau akó ke nau fakafehokotaki mo e talanoa ki hono fekauʻi ʻo e ngaahi foha ʻo Līhaí ke nau fai ha ngaahi meʻa faingataʻá, fakakaukau ke hiki ʻi he palakipoé ʻa e ngaahi tali ʻa e kau akó ki he ngaahi fehuʻi ko ʻení pea lave ki he ngaahi tali ko iá lolotonga e lēsoní.
-
Ko e fē ʻa e ngaahi fekau, tuʻunga moʻui, pe ngaahi fakaafe fakaepalōfita kehe ʻoku faingataʻa taha ke talangofua ki ai e toʻutupú he ʻaho ní? Ko e hā ʻokú ne ʻai ke faingataʻa ange ai e ngaahi meʻá ni ʻi he ngaahi meʻa kehé?
-
Ko e hā te ke talaange ki ha taha ʻokú ne ongoʻi ʻoku fuʻu faingataʻa ke tauhi ha fekau pe tuʻunga moʻui pau?
Ko ha founga ʻe taha ke kamata ʻaki e kalasí ko hono tokoniʻi e kau akó ke nau ʻilo ʻoku tau fiemaʻu e tokoni ʻa e ʻEikí ke fakahoko e meʻa ʻokú Ne kole mai kiate kitautolú. Ko e founga ʻe taha ke fai ai ʻení ko hano kole ki ha tokotaha ako ke ne fai ha meʻa ʻe fiemaʻu ai e tokoni ʻa e faiakó. Hangē ko ʻení, mahalo ʻe fiemaʻu ke nau fakaava ha meʻa ʻoku fie maʻu ki ai ha kī mei he faiakó ko ha konga ʻo ha ngāue.
Kapau ʻoku ʻi ai ha fekau kuo faingataʻa maʻu pē ke ke talangofua ki ai, manatuʻi ia ʻi hoʻo ako ʻa e 1 Nīfai 3. Feinga ke ke ako mei he ngaahi sīpinga ʻokú ke akó, pea fakalaulauloto ki he founga ʻe lava ke tākiekina ai ʻe hoʻo ngaahi filí ho vā fetuʻutaki mo e ʻEikí.
Ko e ʻoange ʻe he ʻEikí ha fekau ki he ngaahi foha ʻo Līhaí
Lau ʻa e 1 Nīfai 3:1–6, ʻo kumi e meʻa naʻe fekauʻi e ngaahi foha ʻo Līhaí ke nau faí.
-
ʻOkú ke pehē ko e hā naʻe tonu ai hono ui ʻe he ongo taʻokete ʻo Nīfaí ʻa e fekau ko ʻení ko ha “meʻa faingataʻá”? (veesi 5).
ʻE lava ke tokoni e palakalafi ko ʻení kapau ʻoku ʻikai fakapapauʻi ʻe he kau akó e founga ke tali ʻaki e fehuʻi kimuʻá.
Fakakaukauloto angé ki he ongo naʻe maʻu ʻe he ngaahi foha ʻo Līhaí ʻi heʻenau mavahe mei honau ʻapí ʻo fononga ʻi ha maile ʻe laungeau ʻi ha fonua pakukā ki he toafá, hili ko iá pea toe kole ange ke nau foki ki Selusalema hili ha taimi nounou mei ai ke ʻomi e ʻū lauʻi peletí meia Lēpani.
Lau ‘a e 1 Nīfai 3:7–8 pea feinga ke ‘iloʻi ‘a e ‘uhinga naʻe fakahā ai ‘e Nīfai ‘ene loto fiemālie ke fakahoko e fekau ‘a e ‘Eikí.
Ko e 1 Nīfai 3:7 ko ha potufolofola fakataukei fakatokāteline ia. Fakakaukau ke fakaʻilongaʻi e ngaahi potufolofola fakataukei fakatokāteliné ʻi ha founga makehe koeʻuhí ke faingofua ange hoʻo maʻu kinautolú. Te ke maʻu ha faingamālie ʻi he lēsoni hokó ke akoako fakaʻaongaʻi e tokāteline ʻoku akoʻi ʻi he potufolofola ko ʻení ki ha fehuʻi pe tūkunga.
-
Ko e hā naʻe mahino kia Nīfai naʻe ʻikai mahino ki hono ongo taʻoketé?
Ko e meʻa ʻe taha ʻoku tau ako mei he veesi 7 ʻoku teuteuʻi ʻe he ʻOtuá ha founga ke tau lavaʻi ai ha meʻa pē ʻokú Ne kole mai ke tau fai.
Fakakaukau ki he founga ʻoku fekauʻaki ai e foʻi moʻoni ko ʻení mo e ngaahi fekau ʻe ala faingataʻa kiate koé.
Neongo ʻe tokoniʻi koe ʻe he ʻOtuá ke ke lavaʻi e meʻa ʻokú Ne kole maí, ka kuo teʻeki ke Ne talaʻofa mai ʻe faingofua pe ʻe ola lelei hoʻo fuofua feingá.
Naʻe fakamatala ʻa Palesiteni Tieta F. ʻUkitofa, ʻi heʻene hoko kimuʻa ko e mēmipa ʻo e Kau Palesitenisī ʻUluakí ʻo pehē:
He ʻikai hanga ʻe he muimui ia ki he Fakamoʻuí ʻo toʻo atu ho ngaahi faingataʻá kotoa. Ka te ne toʻo atu e meʻa ʻokú ne fakafeʻatungiaʻi e tokoni ko ia ʻoku finangalo e Tamai Hēvaní ke ke maʻú. Te ke feʻao mo e ʻOtuá. (Dieter F. Uchtdorf, “Ko ha Fakaʻānaua ki ʻApi,” Liahona, Nōvema 2017, 22)
-
Ko e hā ʻoku tokoni atu e ngaahi fakamatalá ni ke mahino kiate koe fekauʻaki mo e Tamai Hēvaní mo Sīsū Kalaisí?
Fakakaukau ki he ngaahi fekau, tuʻunga moʻui, pe ngaahi fakaafe fakaepalōfita kehe ne mou ʻosi maʻu kimuʻa ʻi he lēsoní ʻe faingataʻa taha ia ke talangofua ki ai e toʻutupú.
-
Ko e hā ha ngaahi tūkiaʻanga te ne lava ʻo ʻai ke faingataʻa ai hoʻo talangofua ki he ngaahi fekau ko ʻení?
-
Ko e hā ha founga ʻe lava ai ʻe he ʻEikí ʻo “teuteu ha hala” ke tokoniʻi e toʻutupú ke nau talangofua ki he ngaahi fekau ko ʻení?
Fakaafeʻi e kau akó ke vahevahe ha ngaahi tali kehekehe ki he fehuʻi kimuʻá.
Ko e feinga ʻa Nīfai mo hono ngaahi tokouá ke maʻu e ʻū lauʻi peletí
ʻI he ʻekitivitī ko ʻení, ʻe lava ke vahevahe ʻa e kau akó ki ha fanga kiʻi kulupu iiki, ʻo ako ʻe he vaeua ʻo e ngaahi kulupú ʻa e ʻuluaki feingá pea ako leva ʻe he vaeua ʻe tahá ʻa e feinga hono uá. ʻE lava ke teuteu e kulupu takitaha ke fakatātaaʻi ʻa e meʻa naʻe hoko ʻi heʻenau konga talanoá pea fakafaivaʻi ia ki ha kulupu ʻe taha naʻa nau ako ʻa e konga ʻe tahá, pe ʻe lava ke fakamatalaʻi fakanounou ʻe he kulupu takitaha ʻenau konga talanoá ki ha kulupu kehe.
ʻE lava ke mamata e kau akó ʻi he ngaahi vitiō ʻoku fokotuʻu atú kae ʻikai lau pe fakatātaaʻi e ngaahi fakamatalá.
Ako e ngaahi fakamatala ko ʻeni ʻo e ongo ʻuluaki feinga ke maʻu ʻa e ʻū lauʻi peleti palasá. Kumi e tali ʻa e kau tautehiná ki he feinga takitaha. (Fakatokangaʻi ange: ʻI he lēsoni “1 Nīfai 4–5” te mou ako ai ki he founga ne faifai pea ʻomi ai ʻe he ʻEikí ha founga ke nau lavameʻa aí.)
ʻUluaki feingá: Lau ʻa e 1 Nīfai 3:10–15 pe mamata ʻi he “ʻOku Tataki ʻe he Laumālié ʻa Nīfai ke Maʻu e ʻŪ Peleti Palasá” mei he taimi 4:43 ki he 8:18. ʻOku maʻu e vitioó ni ʻi he ChurchofJesusChrist.org. (Mahalo ʻe tokoni ke ʻiloʻi ko e talotaló ko ha founga ia ʻo hono fili tavale pē ha meʻa ʻe taha mei ha ngaahi meʻa lahi.)
Feinga hono uá: Lau ʻa e 1 Nīfai 3:22–31; 4:1, pe mamata ʻi he “ʻOku Tataki ʻe he Laumālié ʻa Nīfai ke Maʻu e ʻŪ Peleti Palasá” mei he taimi 8:18 ki he 15:10.
-
Ko e hā naʻe mei ako ʻe he kau tautehina ko ʻení fekauʻaki mo kinautolu mei he ngaahi faingataʻa naʻa nau fehangahangai mo ia lolotonga ʻenau feinga ke talangofua ki he fekau ʻa e ʻOtuá?
-
ʻOkú ke pehē ko e hā ʻe fakaʻatā ai kitautolu ʻe hotau ʻOtua ʻofá ke tau faingataʻaʻia ʻi ha kiʻi taimi kimuʻa peá Ne ʻomi ha founga ke fakahoko ai Hono finangaló?
-
ʻOkú ke pehē naʻe tākiekina fēfē ʻe he ngaahi fakafeangai kehekehe ʻa e kau tautehiná ki he meʻa naʻe hokó ʻa ʻenau tui mo e vā fetuʻutaki mo Sīsū Kalaisí? Ko e hā hono ʻuhingá?
Ko hono fakaʻaongaʻi ʻo e fakamatala ko ʻení ʻi hoʻo moʻuí
ʻE lava ke tokoniʻi koe ʻe he Fakamoʻuí ke ke ikunaʻi e ngaahi tūkiaʻanga ʻokú ne ʻai ke faingataʻa ange hoʻo talangofua ki Heʻene ngaahi fekaú mo muimui ki he faleʻi ʻa ʻEne kau palōfitá. Tali ʻa e ngaahi fehuʻi ko ʻení ʻi hoʻo tohinoa akó ke tokoni atu ke ke fakaʻaongaʻi ʻeni ʻi hoʻo moʻuí.
Fakakaukau ke fakaʻaliʻali e ngaahi fehuʻi ko ʻení ke fili mei ai ʻa e tokotaha akó.
ʻI he ʻosi e ngāue ʻa e kau akó, fakaafeʻi ha niʻihi te nau loto fiemālie ke vahevahe ha konga ʻo e meʻa ne nau tohí mo e kalasí. Fakamoʻoniʻi ange ʻe teuteu maʻu pē ʻe he ʻEikí ha founga ke tau fakahoko kakato ai ʻa e meʻa ʻokú Ne fekau mai kiate kitautolú.
-
Fakakaukauloto pē ʻoku ʻoatu ʻe Nīfai ha faleʻi kiate koe fekauʻaki mo ha fekau pe faleʻi ʻa e palōfitá ʻa ia ʻoku faingataʻa ke ke talangofua ki ai. ʻOkú ke pehē ko e hā te ne talaatú?
-
Ko e hā ha ngaahi ngāue pau te ke fai ke talangofua kakato ange ai ki ha taha ʻo e ngaahi fekau ʻa e ʻEikí pe ngaahi faleʻi ʻa e palōfitá?
-
Ko e hā kuó ke mamata pe aʻusia ʻokú ne ʻoatu ha loto-falala ʻe teuteu ʻe he ʻEikí ha founga maʻau ke ke talangofua ai ki Heʻene ngaahi fekaú mo muimui ki Heʻene palōfitá?
Kapau ʻe ʻaonga ki he kau akó hono ako e toenga ʻo e fakamatala ki hono maʻu ʻe Nīfai e ʻū lauʻi peletí kimuʻa pea akoʻi kiate kinautolu e lēsoni fakataukei fakatokāteline ki he 1 Nīfai 3:7, ʻe lava ke ke tatali ke akoʻi e lēsoni fakataukei fakatokāteliné hili e lēsoni “1 Nīfai 4–5.” Ko ha fili ʻe taha ko hano ʻai ha tokotaha ako ke ne fakamatala fakanounouʻi e ngaahi meʻa naʻe hoko ʻoku lekooti ʻi he 1 Nīfai 4, ke tokoniʻi e kalasí ke nau vakai ki he founga naʻe ʻomi ai ʻe he ʻEikí ha founga ke talangofua ki Heʻene ngaahi fekaú.