Fakataukei Fakatokāteline: 1 Nīfai 3:7

“Te u ʻAlu ʻo Fai ʻa e Ngaahi Meʻa Kuo Fekau ʻe he ʻEikí”

Naʻá ke ako ʻi ha lēsoni kimuʻa, ʻoku teuteu maʻu pē ʻe he ʻEikí ha founga ke tau lava ai ʻo fakahoko e meʻa ʻokú Ne fekau mai ke tau faí. ʻE lava ke tokoni atu e lēsoni ko ʻení ke ke ako maʻuloto e veesi folofolá mo e kupuʻi lea mahuʻinga ʻo e 1 Nifai 3:7, fakamatalaʻi ʻa e tokāteliné, pea fakaʻaongaʻi e ngaahi tefitoʻi moʻoni ki hono maʻu ʻo e ʻilo fakalaumālié ʻi ha tūkunga moʻoni ʻo e moʻuí.

Ko e Ko e ako ke fakamatalaʻi ʻa e tokāteliné mo e ngaahi tefitoʻi moʻoní. ʻOku fakatupulaki ʻe he kau akó ʻenau mahinó ʻi heʻenau fefakamatalaʻiʻaki ʻa e ongoongoleleí ʻiate kinautolú. Fokotuʻu ha ʻātakai ʻe ongoʻi fiemālie ai e kau akó ke vahevahe ʻenau mahino ki he ngaahi moʻoni ʻo e ongoongoleleí mo e niʻihi kehé.

Teuteu ʻa e tokotaha akó: Fakaafeʻi e kau akó ke nau fakakaukau ki ha ngaahi aʻusia kuo nau maʻu pe ko ha niʻihi ʻoku nau ʻofa ai ʻoku fakahaaʻi ai ʻoku teuteuʻi ʻe he ʻEikí ha founga ke fakahoko ai e meʻa ʻokú Ne kole mai ke tau faí.

Ngaahi ʻEkitivitī Ako ʻOku Ala Fakahokó

ʻOku fokotuʻutuʻu e lēsoni fakataukei fakatokāteline ko ʻení ke akoʻi hili ʻa e lēsoni “1 Nīfai 3,” ʻa ia ko e lēsoni puipuituʻa ia ki he potufolofola fakataukei fakatokāteline 1 Nifai 3:7. Kapau ʻoku fie maʻu ke hiki e lēsoni fakataukei fakatokāteline ko ʻení ki ha uike kehe, fakapapauʻi ke akoʻi foki mo e lēsoni puipuituʻa fekauʻakí lolotonga e uike ko iá.

Fakamatalaʻi mo ako maʻuloto

Fakaʻaongaʻi ha faʻahinga founga ola lelei pē ke tokoniʻi e kau akó ke nau ako maʻuloto e veesi folofolá mo e kupuʻi lea mahuʻinga ki he 1 Nīfai 3:7 pea ke fakamatalaʻi e ngaahi moʻoni ʻoku maʻu ʻi he potufolofola ko ʻení.

ʻOku fokotuʻu atu e ngaahi ʻekitivitī ko ʻení ki he founga hono fakahoko ʻení.

Ko e taumuʻa ʻe taha ʻo e fakataukei fakatokāteliné ke fakaʻatā koe ke ke akoako hono fakamatalaʻi e ngaahi moʻoni ʻo e ongoongolelei ʻo Sīsū Kalaisí ʻi hoʻo lea pē ʻaʻau. Ko ha ngaahi founga taʻefaʻalaua ʻeni te ke lava ai ʻo tāpuekina e moʻui ʻa kinautolu ʻoku mou feohí ʻi he taimi ʻoku mahino lelei ange ai kiate koe mo ke akoako hono fakamatalaʻi e tokāteline ʻo e Fakamoʻuí ʻoku maʻu ʻi Heʻene folofolá.

Lau ʻa e 1 Nīfai 3:7 pea fakamatalaʻi fakanounou ʻa e meʻa ʻokú ne akoʻí ʻi he lea pē ʻaʻau.

Fakaafeʻi e tokotaha ako takitaha ke vahevahe ʻenau fakamatala fakanounoú mo hanau hoa.

Feinga ke ke fakakaukau ki ha tūkunga ʻe lava ke tokoniʻi ai ʻe he ngaahi moʻoni naʻe akoʻi ʻi he veesi ko ʻení ha taha. Hili ia pea tali leva e ngaahi fehuʻi ko ʻení:

Hili hono ʻoange ha taimi ki he kau akó ke teuteu ʻenau tali ki he ngaahi fehuʻi ko ʻení, fakakaukau ke fakaafeʻi kinautolu ke nau fakamatalaʻi ʻenau ngaahi talí ki ha hoa koeʻuhí ke maʻu ʻe he tokotaha ako kotoa pē ha faingamālie ke fakahaaʻi leʻolahi ʻenau ngaahi fakakaukaú.

• Ko e hā ha ngaahi moʻoni mei he veesi ko ʻení te ke vahevahe mo ha taha ʻi he tūkunga naʻá ke fakakaukau ki aí? Ko e hā hono ʻuhingá?

• Ko e hā ha ngaahi founga kehekehe ʻe lava ke teuteu ai ʻe he ʻOtuá ha founga maʻatautolu ke tau fakahoko ai ʻa e meʻa ʻokú Ne kole maí?

• Ko e hā ha ngaahi aʻusia te ke lava ʻo vahevahe ke fakatātaaʻi ʻaki e moʻoni ʻoku teuteuʻi ʻe he ʻOtuá ha founga maʻatautolu ke tau fakahoko ai ha meʻa pē ʻokú Ne kole mai ke tau fai?

Kapau naʻe fai ʻe he kau akó ʻa e ʻekitivitī teuteu ʻa e tokotaha akó, fakakaukau ke fakaafeʻi ha niʻihi te nau loto fiemālie ke vahevahe ʻenau ngaahi aʻusiá mo e kalasí.

Ke tokoni ki he kau akó ke ako maʻuloto ʻa e kupuʻi lea mahuʻinga mo e fakamoʻoni fakafolofolá, fakakaukau ke fakaʻaliʻali ʻa e fakatātā ʻo Nīfai ʻi heʻene talanoa ki heʻene tamaí mei he kamataʻanga ʻo e lēsoní. Fakaafeʻi e kau akó ke nau sio ki he fakatātaá lolotonga ʻenau toutou lea ʻaki ʻa e, “ʻTe u ʻalu ʻo fai ʻa e ngaahi meʻa kuo fekau ʻe he ʻEikí’—1 Nīfai 3:7,” ʻi he tuʻo lahi taha te nau lava ʻi he miniti ʻe tahá.

Hili iá, ke tokoni ke maʻuloto lelei ange ʻe he kau akó e potufolofola fakataukei fakatokāteline ko ʻení, fakakaukau ke kiʻi mālōlō tuʻo taha pe tuʻo ua ʻi he taimi ʻoku ʻi ai ai ha kiʻi mālōlō ʻi he lēsoní ke toe fakaʻaliʻali ʻa e fakatātaá pea fakaafeʻi e kau akó ke lau maʻuloto ʻa e kupuʻi lea mahuʻingá mo e veesi folofolá.

Akoako hono fakaʻaongaʻí

Te tau fehangahangai kotoa pē mo ha ngaahi tūkunga faingataʻa pea kole mai ʻe he ʻOtuá ke tau fai ha ngaahi meʻa faingataʻa ʻi heʻetau moʻuí. ʻE lava ke tokoni hono fakaʻaongaʻi e ngaahi tefitoʻi moʻoni ki hono maʻu ʻo e ʻilo fakalaumālié ke fakamālohia hoʻo tui kia Sīsū Kalaisí ʻi hoʻo fehangahangai mo e ngaahi tūkunga ko ʻení.

ʻE lava ke nofotaha ʻa e kau akó ʻi ha meʻa kuo fekau ʻe he ʻEikí ʻoku fekauʻaki tonu mo ʻenau moʻuí, kae ʻikai fakaʻaongaʻi ʻa e ngaahi tūkunga ko ʻení. Mahalo kuo nau ʻiloʻi ha meʻa ʻi he lēsoni “1 Nīfai 3.” Kapau ʻoku fai ʻa e liliu ko ʻení, fakakaukau ke fakaʻatā e kau akó ke nau ngāue fakafoʻituitui, koeʻuhí ʻe lava pē ke fuʻu fakataautaha ha niʻihi ʻo e ngaahi meʻa ʻoku nau fili ke tokanga taha ki aí.

Lau e ngaahi tūkunga ko ʻení, pea fili ʻa e meʻa te ke fie tokanga taha ki ai ki he ʻekitivitī hokó.

1. ʻOku ʻofa ʻa Sela ʻi he ʻEikí pea ʻokú ne fie ngāue ʻi Hono Siasí. Ka neongo ia, naʻá ne toki maʻu ha fatongia faka-Siasi ʻoku ʻikai ke ne ongoʻi feʻunga ke fakahoko. Naʻá ne tali e fatongiá ka ʻokú ne momou ke hoko atu.

   Fakakaukau ke fakahū ha faʻahinga fekau pē ki he tūkunga ko ʻení ʻe lava ke fakafekauʻaki lelei ki ai e kau akó. Ko ha ngaahi sīpinga ʻe niʻihi ʻa e ʻaukaí, totongi vahehongofulú, fakahoko ha uiuiʻi faka-Siasi, pe faitotonú.

2. ʻOku ongoʻi loto-mamahi ʻa Losa ʻiate ia koeʻuhí he ʻokú ne fāinga ke tauhi ha fekau pau. Kuó ne talangofua he taimi ʻe niʻihi ki he fekaú ka kuo teʻeki ai ke ne fai maʻu pē ia.

Kapau ʻe fakaʻaongaʻi e tūkunga ʻoku fokotuʻu atú, fakakaukau ke kole ki he kau akó ke nau fakakulupu tautau toko tolu mo e niʻihi kehe naʻa nau fili ʻa e tūkunga tatau. Vahe ki he mēmipa takitaha ʻo e kulupú ke nau ako ha taha ʻo e ngaahi tefitoʻi moʻoni ko ʻeni ʻo hono maʻu ʻo e ʻilo fakalaumālié pea ke tali e ngaahi fehuʻi ʻi he konga ko iá. Hili ha taimi feʻunga, fakaafeʻi ha kau ako ʻe niʻihi ke nau lipooti e meʻa ne nau aleaʻi ʻi heʻenau ngaahi kulupú.

Mahalo ʻe tokoni ke fakaʻaliʻali pe paaki ha tatau ʻo e ngaahi konga ko ʻení ke vakai ki ai e kau akó lolotonga ʻenau akó.

Ngāue ʻi he tuí

Lau ʻa e palakalafi 5–7 ʻi he konga “Ko Hono Maʻu ʻo e ʻIlo Fakalaumālié” ʻo e Fakamatala ki he ʻElito ʻo e Fakataukei Fakatokāteliné (2022).

• ʻE tokoni fēfē ʻa e fakamatala ʻa ʻEletā Hōlani ʻi he palakalafi 6 kia Sela pe ko Losa?

• Kapau he ʻikai lava ʻe Sela pe ko Losa ʻo fakahoko he taimi pē ko iá ʻa e meʻa ʻoku kole mai ʻe he ʻOtuá, ʻe tokoni fēfē nai e ngaahi moʻoni fekauʻaki mo e Tamai Hēvaní ʻi he palakalafi 7?

• Kapau kuó ke maʻu ha ngaahi fakakaukau tatau mo e fakakaukau ʻa Sela pe ko Losá, ko e hā ha meʻa kuó ne tokoniʻi pe te ne tokoniʻi koe ke ke laka ki muʻa ʻi he tui kia Sīsū Kalaisí?

Vakaiʻi ʻa e ngaahi fakakaukaú mo e ngaahi fehuʻí ʻaki ha fakakaukau ʻoku taʻengatá

Lau ʻa e palakalafi 8 ʻi he konga “Ko Hono Maʻu ʻo e ʻIlo Fakalaumālié” ʻi he Fakamatala ki he ʻElito ʻo e Fakataukei Fakatokāteliné. Fakakaukau ke fakaʻilongaʻi ha kupuʻi lea pe fakakaukau ʻe ua pe lahi ange ʻokú ke pehē ʻe lava ʻo tokoni kia Sela pe ko Losa.

• ʻE lava fēfē ke tokoni e kupuʻi lea takitaha naʻá ke filí kia Sela pe ko Losa?

• Ko e hā ʻokú ke ʻilo fekauʻaki mo e Tamai Hēvaní mo e founga ʻokú Ne fengāueʻaki ai mo ʻEne fānaú ʻa ia ʻe ala tokoní?

• ʻE tokoni fēfē ʻetau vakai ki he tūkungá ʻi he puipuituʻa ʻo e palani ʻo e fakamoʻuí?

Fekumi ke maʻu ha mahino lahi ange ʻo fakafou ʻi he ngaahi maʻuʻanga tokoni kuo fokotuʻu fakalangí

Lau e palakalafi 11 ʻi he konga “Ko Hono Maʻu ʻo e ʻIlo Fakalaumālie” ʻi he Fakamatala ki he ʻElito ʻo e Fakataukei Fakatokāteliné.

• Te ke faleʻi ʻa Sela pe ko Losa ke fekumi ʻi fē ki he ngaahi moʻoni ʻe ala tokoni kiate iá?

Fakaʻaongaʻi ha ngaahi miniti siʻi ke fekumi ai ki he ngaahi maʻuʻanga tokoni kuo fokotuʻu fakalangi ki he ngaahi moʻoni ʻokú ke ongoʻi ʻoku kaunga ki he tūkunga ko iá. Ko e maʻuʻanga tokoni ʻe taha te ke lava ʻo filí ko e lisi ʻo e ngaahi potufolofola fakataukei fakatokāteliné ʻoku maʻu ʻi he fakaʻosinga ʻo e Fakamatala ki he ʻElito ʻo e Fakataukei Fakatokāteliné. Fakakaukau ke lau e ngaahi kupuʻi lea mahuʻinga ʻo e ngaahi potufolofola ʻi he Tohi ʻa Molomoná, ʻo kumi ha ngaahi potufolofola ʻe ala tokoni. Fakapapauʻi ke fakakau ʻa e 1 Nīfai 3:7 ʻi hoʻo ngaahi maʻuʻanga tokoní.

• Ko e hā ha meʻa naʻá ke maʻu te ke fie vahevahe?

• Kuo fakahoko fēfē ʻe he ngaahi moʻoni naʻá ke maʻú ha liliu ʻi hoʻo moʻuí?

Fakakaukau ke lue takai ʻi he lokí pea tokoniʻi e kau ako ʻoku ʻikai ke nau fakapapauʻi e founga ke maʻu ai ha ngaahi potufolofola pe fakamatala ʻa e kau taki ʻo e Siasí. Fakakaukau ke fakaʻaliʻali ange ʻa e founga ke maʻu ʻaki e meʻa ʻoku nau fekumi ki aí, kae ʻoua ʻe ʻoange kiate kinautolu ha potufolofola pe fakamatala ʻoku kaunga ki aí.

Toe vakaiʻi ʻo e fakataukei fakatokāteliné

ʻI he lolotonga ʻo e lēsoni ka hokó, ʻoua naʻa toe laka hake ʻi he miniti ʻe tolu ki he nima hono toe vakaiʻi ʻo e fakamoʻoni fakafolofolá mo e kupuʻi lea mahuʻinga ki he 1 Nīfai 3:7. Ko e founga ʻe taha ke toe vakaiʻi ʻakí ko hono puke hake ʻa e ʻīmisi tatau ʻo Nīfai naʻe fakaʻaongaʻi ʻi he lēsoni ko ʻení ke vakaiʻi pe ʻe kei manatuʻi ʻe he kau akó ʻa e kupuʻi lea mahuʻinga ʻo e potufolofolá mo e veesi folofolá. ʻE lava ke fakahoko taimi siʻi ʻeni ʻi he kamataʻanga pe fakaʻosinga ʻo e ngaahi lēsoni takitaha ka hokó.

ʻUluaki Potufolofola Fakataukei Fakatokāteline ʻe 12 mo e Ngaahi Kupuʻi Lea Mahuʻingá

Tohi ʻa Molomoná – Tohi Lēsoni ʻa e Faiakó (2024)

Fakamoʻoni Fakafolofolá	Kupuʻi Lea Folofola Mahuʻingá
Fakamoʻoni Fakafolofolá 1 Nīfai 3:7	Kupuʻi Lea Folofola Mahuʻingá “Te u ʻalu ʻo fai ʻa e ngaahi meʻa kuo fekau ʻe he ʻEikí.”
Fakamoʻoni Fakafolofolá 2 Nīfai 2:25	Kupuʻi Lea Folofola Mahuʻingá “Naʻe hinga ʻa ʻĀtamá koeʻuhi ke ʻi ai ʻa e faʻahinga ʻo e tangatá; pea ʻoku ʻi ai ʻa e faʻahinga ʻo e tangatá koeʻuhi ke nau maʻu ʻa e fiefiá.”
Fakamoʻoni Fakafolofolá 2 Nīfai 2:27	Kupuʻi Lea Folofola Mahuʻingá “ʻOku nau tauʻatāina ke fili ʻa e tauʻatāiná mo e moʻui taʻengatá … pe … pōpulá mo e maté.”
Fakamoʻoni Fakafolofolá 2 Nīfai 26:33	Kupuʻi Lea Folofola Mahuʻingá “ʻOku tatau ʻa e kakai fulipē ʻi he ʻao ʻo e ʻOtuá.”
Fakamoʻoni Fakafolofolá 2 Nīfai 28:30	Kupuʻi Lea Folofola Mahuʻingá ʻE foaki ʻe he ʻOtuá “ki he fānau ʻa e tangatá ʻa e ʻotu lea ki he ʻotu lea, ʻa e akonaki ki he akonaki.”
Fakamoʻoni Fakafolofolá 2 Nīfai 32:3	Kupuʻi Lea Folofola Mahuʻingá “Keinanga ʻi he ngaahi folofola ʻa Kalaisí; he vakai, ʻe fakahā kiate kimoutolu ʻe he ngaahi folofola ʻa Kalaisí ʻa e ngaahi meʻa kotoa pē ʻoku totonu ke mou faí.”
Fakamoʻoni Fakafolofolá 2 Nīfai 32:8–9	Kupuʻi Lea Folofola Mahuʻingá “Kuo pau ke mou lotu maʻu ai pē.”
Fakamoʻoni Fakafolofolá Mōsaia 2:17	Kupuʻi Lea Folofola Mahuʻingá “ʻO ka mou ka ʻi he tauhi ʻo homou kāingá, ʻoku mou ʻi he tauhi pē ʻo homou ʻOtuá.”
Fakamoʻoni Fakafolofolá Mōsaia 2:41	Kupuʻi Lea Folofola Mahuʻingá “[Ko] kinautolu ʻoku tauhi ʻa e ngaahi fekau ʻa e ʻOtuá … ʻoku nau monūʻia ʻi he meʻa kotoa pē.”
Fakamoʻoni Fakafolofolá Mōsaia 3:19	Kupuʻi Lea Folofola Mahuʻingá “Liʻaki ʻa e tangata fakakakanó kae hoko ko ha tangata māʻoniʻoni ʻi he fakalelei ʻa Kalaisi ko e ʻEikí.”
Fakamoʻoni Fakafolofolá Mōsaia 4:9	Kupuʻi Lea Folofola Mahuʻingá “Tui pē ki he ʻOtuá; … tui ʻokú Ne maʻu ʻa e poto kotoa.”
Fakamoʻoni Fakafolofolá Mōsaia 18:8–10	Kupuʻi Lea Folofola Mahuʻingá Ke “papitaiso ʻa kimoutolu ʻi he huafa ʻo e ʻEikí, ko e fakamoʻoni … kuo mou fai ha fuakava mo Ia.”

© 2023 by Intellectual Reserve, Inc. All rights reserved.