1 Nīfai 1–5

Vakai Fakalūkufuá

Naʻe ui ʻe he ʻOtuá ʻa Līhai ke ne malanga ʻaki ʻa e fakatomalá ki he kakai ʻo Selusalemá. Naʻá ne talangofua ki ha fakahā mei he ʻEikí ke ʻave hono fāmilí ki he feituʻu maomaonganoá. Naʻe tafoki hono foha ko Nīfaí ki he ʻEikí ke maʻu ha mahino lahi ange pea fakamolū hono lotó. Hili ʻenau fononga ʻi ha ngaahi ʻaho ʻi he feituʻu maomaonganoá, naʻe fehangahangai ʻa Nīfai mo hono ngaahi tokouá mo ha sivi ʻo ʻena talangofua mo e tui ki he ʻOtuá ʻi he taimi naʻe fekauʻi ai kinautolu ke nau foki ki Selusalema ke ʻomai e ʻū lauʻi peleti palasá meia Lēpaní.

Teuteu ke Akoʻi

ʻOku ʻoatu ʻe he fakamatala ko ʻení ha ngaahi fakakaukau ki he kau faiakó fekauʻaki mo e meʻa ʻe ala fiemaʻu ke tomuʻa teuteuʻi kimuʻa ʻi he lēsoni takitaha.

1 Nīfai 1

Taumuʻa ʻo e lēsoní: ʻE lava ke tokoni e lēsoni ko ʻení ke ongoʻi ʻe he kau akó e mahuʻinga ʻo hono maʻu mo muimui ki he kau palōfita ʻa e ʻOtuá.

• Teuteu ʻa e tokotaha akó: Fakaafeʻi e kau akó ke nau haʻu mateuteu ke vahevahe ha ngaahi fakatokanga ne nau fanongoa kimuí ni mai mei he kau palōfitá pea fakalaulauloto ki he founga kuo nau tali ʻaki e ngaahi fakatokanga ko iá.

• Ngaahi ʻAtá: Ko e ngaahi ʻīmisi ʻo ha vaitafe mo ha vaitō mei he lēsoní

• Vitiō: “The Lord Commands Lehi’s Family to Leave Jerusalem” (18:14; sio mei he taimi 0:39 ki he 5:53 pea mei he taimi 5:53 ki he 7:26)

• Fokotuʻu ki he akoʻi he konifelenisi fakavitioó: Lolotonga e ʻekitivitī fakaʻosí, ʻi hono teuteu ʻe he kau akó ʻenau tali ki he pōpoaki telefoni mei ha kaungāmeʻá, fakaafeʻi kinautolu ke ʻoleva ʻenau vahevahe iá kae ʻoua kuo ʻosi ʻa e tokotaha kotoa pē. Fakaʻaongaʻi ʻa e chat (fepopoakiʻaki tohi he ʻinitaneti) ke fakaʻatā ʻa e tokotaha kotoa pē ke fakahū ʻenau ngaahi talí ʻi he taimi tatau. ʻE lava ʻe he kau akó ʻi he foungá ni ʻo fakakaukauʻi ha tali pē ʻanautolu ka te nau maʻu foki ha faingamālie ke vakaiʻi e fakakaukau ʻa e niʻihi kehé.

1 Nīfai 2

Taumuʻa ʻo e lēsoní: ʻOku fakataumuʻa e lēsoni ko ʻení ke tokoniʻi e kau akó ke nau ongoʻi ha holi lahi ange ke tafoki ki he ʻEikí ʻi Heʻene kole ange ke nau fakahoko ha ngaahi meʻa faingataʻá.

• Teuteu ʻa e tokotaha akó: Fehuʻi ki ha kaungāmeʻa pe mēmipa ʻo e fāmilí, “Ko e fē ha taimi kuó ke fekumi ai pea maʻu e tokoni ʻa e ʻEikí ke tui mo talangofua ki Heʻene ngaahi folofolá, naʻa mo e ngaahi taimi ne faingataʻa aí?”

• Laʻiʻatá: Mape ʻo e hala naʻe fononga ai e fāmili ʻo Līhaí mei Selusalemá

• Ngaahi Vitioó: “Lehi Counsels with His Family to Leave Jerusalem” (2:27); “Ko e Lotua ʻe Nīfai ʻa Leimana mo Lēmiuelá” (6:02); “Ko e Palōfita ʻa e ʻOtuá” (16:04; sio mei he taimi 11:51 ki he 12:37)

• Fokotuʻu ki he akoʻi he konifelenisi fakavitioó: Hili hono fakaʻaliʻali e mape ʻo e hala ʻoku pehē naʻe fononga ai e fāmili ʻo Līhaí ki he feituʻu maomaonganoá mo fakamatalaʻi ʻa e mamaʻo ʻoku ngalingali ne nau fononga aí, fakakaukau ke fakaʻaongaʻi ha polokalama mape ʻi he ʻinitanetí ke fakaʻaliʻali ki he kau akó ha ngaahi feituʻu ʻe niʻihi ʻoku tatau honau mamaʻó mei he feituʻu ʻoku nau nofo aí. ʻE lava ke fakaafeʻi e kau akó ke nau fakakaukauloto pe ʻe fēfē haʻanau fononga ki ai taʻe ʻi ai ha meʻalele, ʻi heʻenau ʻiloʻi kuo pau ke nau ʻalu mo ha ngaahi koloa ʻoku nau loto ke tauhí.

1 Nīfai 3

Taumuʻa ʻo e lēsoní: ʻE lava ke tokoniʻi ʻe he lēsoni ko ʻení ʻa e kau akó ke nau ngāue ʻaki ʻa e tui ki he ʻOtuá ke fakahoko ʻa e meʻa ʻokú Ne kole ange ke nau fakahokó.

• Teuteu ʻa e tokotaha akó: Fakaafeʻi e kau akó ke nau feinga ke ako maʻuloto ʻa e potufolofola fakataukei fakatokāteline 1 Nīfai 3:7 pea fakakaukau ki he founga ʻoku kaunga ai ki he ngaahi tūkunga ʻoku nau fehangahangai mo ia ʻi heʻenau moʻuí.

• Vitiō: “ʻOku Tataki ʻe he Laumālié ʻa Nīfai ke Maʻu e ʻŪ Peleti Palasá” (25:44; sio mei he taimi 4:43 ki he 8:18 pea mei he taimi 8:18 ki he 15:10)

• Fokotuʻu ki he akoʻi he konifelenisi fakavitioó: Ko ha founga ʻe lava ke kamata ʻaki e lēsoní ko hono fakaafeʻi e kau akó ke fakaʻaliʻali ʻi heʻenau meʻafaitaá ha meʻa ʻoku mahuʻinga lahi kiate kinautolu pe ko honau fāmilí koeʻuhí ko e ngāue naʻe fiemaʻu ke nau fakahoko ke maʻu ai iá. Fakaafeʻi ha kau ako ʻe niʻihi ke talanoa fekauʻaki mo e mahuʻinga ʻo e meʻa ne nau fakaʻaliʻalí pea mo e founga naʻe maʻu ai iá. Hili iá pea fakaʻaliʻali ha fakatātā ʻo hono pukepuke ʻe he fāmili ʻo Līhaí ʻa e ʻū lauʻi peleti palasá, pea fakaafeʻi ha tokotaha ako ke ne fakamatalaʻi ʻa e meʻa naʻe pau ke fai ʻe he fāmili ʻo Līhaí ke maʻu ai kinautolú mo e ʻuhinga naʻa nau mātuʻaki vilitaki ai ke fai iá.

Fakataukei Fakatokāteline: 1 Nīfai 3:7

Taumuʻa ʻo e lēsoní: ʻE tokoni e lēsoni ko ʻení ke ako maʻuloto ʻe he kau akó ʻa e potufolofola mo e kupuʻi lea mahuʻinga ʻo e 1 Nifai 3:7, fakamatalaʻi ʻa e tokāteliné, pea fakaʻaongaʻi e ngaahi tefitoʻi moʻoni ki hono maʻu ʻo e ʻilo fakalaumālié ʻi ha tūkunga moʻoni ʻo e moʻuí.

• Teuteu ʻa e tokotaha akó: Fakaafeʻi e kau akó ke nau fakakaukau ki ha ngaahi aʻusia kuo nau maʻu pe ko ha niʻihi ʻoku nau ʻofa ai ʻoku fakahaaʻi ai ʻoku teuteuʻi ʻe he ʻEikí ha founga ke fakahoko ai e meʻa ʻokú Ne kole mai ke tau faí.

• Laʻiʻata ke fakaʻaliʻalí: Lea ʻa Nīfai ki heʻene tamai ko Līhaí

• Meʻa ke fakaʻaliʻali atú: Ko e ngaahi fakahinohino mo e ngaahi fehuʻi fekauʻaki mo e ngaahi tefitoʻi moʻoni ʻe tolu ʻo hono maʻu ʻo e ʻilo fakalaumālié (kamata ʻaki e “Ngāue ʻi he tuí” ʻi he konga ki he “Akoako Fakahokó”

• Fokotuʻu ki he akoʻi he konifelenisi fakavitioó: Makehe mei hono fakaʻaongaʻi ʻo e ngaahi tūkunga kuo fokotuʻu atu ʻi he konga ki he “Akoako Fakahokó”, fakakaukau ke fakaafeʻi e kau akó ke nau tohi ʻi he feituʻu fetalanoaʻakí (chat) ha ngaahi tūkunga moʻoni ʻoku faingataʻa ai ke tauhi ha fekau. (Fakamanatu ange ke ʻoua naʻa nau vahevahe ha meʻa ʻoku fuʻu fakataautaha fekauʻaki mo kinautolu pe ha kakai kehe.) ʻE lava leva ke fili ʻe he kau akó ha taha ʻo e ngaahi fakamatala ʻa honau kaungā akó ke nau tokanga taha ki ai lolotonga ʻenau fakaʻaongaʻi e ngaahi tefitoʻi moʻoni ki hono maʻu ʻo e ʻilo fakalaumālié.

1 Nīfai 4–5

Taumuʻa ʻo e lēsoní: ʻOku fakataumuʻa ʻa e lēsoni ko ʻení ke fakamālohia e falala ʻa e kau akó ki he Tamai Hēvaní mo ʻEne hoifua ke tataki kinautolú.

• Teuteu ʻa e tokotaha akó: ʻOange ki he kau akó ha tatau ʻo e lea ʻa Palesiteni Lāsolo M. Nalesoni ʻoku ʻasi ʻi he kamataʻanga ʻo e lēsoní. Fakaafeʻi kinautolu ke nau omi mateuteu mo ha ngaahi fakakaukau ʻo e ngaahi tūkunga ʻe lava ke ʻaonga fakataautaha ai kiate kinautolu ʻenau maʻu e fakahinohino ʻa e ʻEikí.

• Ngaahi Vitioó: “Fakahā maʻá e Siasí, Fakahā ki Heʻetau Moʻuí” (20:28; sio mei he taimi 9:14 ki he 9:40); “Ko e Tataki ʻe he Laumālié ʻa Nīfai ke ne Tamateʻi ʻa Lēpani” (3:26); “Ko Hono Maʻu ʻe Nīfai e Ngaahi Lekooti Toputapú” (4:20)

• Fokotuʻu ki he akoʻi he konifelenisi fakavitioó: Kimuʻa pea fakataha mai e kau akó ki he kalasí, fakakaukau ke fakaafeʻi hanau niʻihi ke nau omi mateuteu ke vahevahe ha ngaahi aʻusia ʻo hono tataki kinautolu ʻe he Laumālie Māʻoniʻoní. Kumi ha ngaahi faingamālie lolotonga e fealēleaʻakí ke fakaʻatā e kau akó ke nau fakamoʻoni ki he mālohi ʻo e ʻEikí ke tataki kinautolú.