1 Նեփի 6–7

Հասկանանք «Աստծո գործերը»

Եթե ձեզանից ակնկալվեր գրել մի արձանագրություն, որը պետք է պահվեր հետագա սերունդների համար, և որից նրանք պետք է սովորեին, ի՞նչ կարող էիք ներառել: Նեփին ցանկություն հայտնեց, որ իր գրվածքներն աստվածահաճո լինեն և համոզեն մարդկանց հետևել Հիսուս Քրիստոսին: Այս դասը կօգնի ձեզ հասկանալ, թե Մորմոնի Գրքի նպատակներն ինչպես կարող են օգնել ձեզ ձեր ուսումնասիրության ընթացքում և ձեր կյանքում:

Կենտրոնացեք հեղինակի մտադրության վրա: Ըստ տիտղոսաթերթի՝ Մորմոնի Գիրքը գրվել է «մարգարեության և հայտնության ոգով»՝ համոզելու բոլոր մարդկանց, որ Հիսուսը Քրիստոսն է: Ուսումնասիրության ընթացքում ուսանողներին խրախուսեք մտածել, թե ինչու է յուրաքանչյուր հեղինակ մի որոշակի ուսմունք կամ իրադարձություն գրանցել, և ինչպես է այն օգնում ընթերցողներին ավելի մոտենալ Հիսուս Քրիստոսին:

Ուսանողի նախապատրաստում. ուսանողներին խրախուսեք կատարել Մորմոնի Գրքի իրենց ամենօրյա անձնական ուսումնասիրությունը: Նրանց առաջարկեք խորհել Մորմոնի Գրքի մինչ այժմ կատարած ուսումնասիրության իրենց փորձառության շուրջ, նաև թե ինչ են սովորում:

Հնարավոր ուսումնական վարժություններ

Ինչո՞ւ ուսումնասիրել Մորմոնի Գիրքը

Ստորև ներկայացվող նյութը նախատեսված է օգնելու ուսանողներին հասկանալ, թե իր արձանագրության մեջ Նեփին ինչու ներառեց իր կատարածը: Եթե ցանկանում եք տեսողական նյութ օգտագործել, Մորմոնի Գրքի մի օրինակ դրեք մյուս գրքերի կողքին և ուսանողներին առաջարկեք դասարանով կամ զույգերով դերախաղով ներկայացնել այս իրավիճակը:

Պատկերացրեք, թե ինչպես կարձագանքեիք, եթե որևէ մեկը ձեզ տար հետևյալ հարցերը.

• Կրոնի և լավ մարդ դառնալու մասին բազմաթիվ գրքեր կան. ինչո՞ւ պետք է կարդամ Մորմոնի Գիրքը: Այն ի՞նչ կտա ինձ: Ինչո՞վ է այն տարբերվում կամ ինչո՞վ է ավելի լավը մյուս գրքերից:

Մի քանի ուսանողի առաջարկեք կիսվել, թե ինչ կասեին: Շնորհակալություն հայտնեք նրանց պատասխանների համար և գովեք լավ պատասխաններ տալու համար: Նրանց առաջարկեք ուսումնասիրության ընթացքում ավելի շատ մտքեր փնտրել:

Նեփին հայտնեց իր մտադրությունը կամ նպատակները՝ Մորմոնի Գրքում արձանագրելով թե ինչ է արել: Այս նպատակների իմացությունը կարող է օգնել մեզ հասկանալ, թե ինչու պետք է կարդանք գիրքը, և ինչ կտա այն մեզ:

Կարդացեք 1 Նեփի 6.3–6 հատվածը և նշեք այն բառերը կամ արտահայտությունները, որոնք ցույց են տալիս իր գրառումները պահելու Նեփիի նպատակները: Գուցե օգտակար լինի իմանալ, որ «Աբրահամի, … Իսահակի և … Հակոբի Աստվածը» (հատված 4) տիտղոս է Հիսուս Քրիստոսի համար:

• Ինչպե՞ս կբացատրեիք, ինչո՞ւ Նեփին գրառեց այն, ինչ արել էր:

Ըստ Նեփիի՝ նրա գրությունները նպատակ ունեին համոզելու մեզ գալ Հիսուս Քրիստոսի մոտ և պարունակում էին միայն աստվածահաճո բաներ:

Մի պահ մտածեք մինչ այժմ Մորմոնի Գրքի ընթերցանության ձեր փորձառության մասին:

Որոշեք, թե որը կլիներ լավագույն տարբերակը ուսանողների համար. բարձրաձայն պատասխանել հետևյալ հարցերին, անհատապես մտածել իրենց պատասխանների մասին, թե՞ օրագրերում գրել իրենց պատասխանները:

• Արդյո՞ք Մորմոնի Գիրքն օգնում է ձեզ հասկանալ աստվածահաճո բաները: Եթե այո, ապա ինչպե՞ս:

• Արդյո՞ք զգում եք, որ Մորմոնի Գրքի ուսումնասիրությունն օգնում է ձեզ ավելի մոտենալ Հիսուս Քրիստոսին և փրկվել: Ինչո՞ւ այո, կամ ինչո՞ւ ոչ։

• Աստծո գործերի իմացությունը և Հիսուս Քրիստոսին ավելի մոտենալը ինչպե՞ս կարող է օրհնություն լինել ձեր կյանքում:

Գալ Հիսուս Քրիստոսի մոտ և իմանալ աստվածահաճո բաներ

Սուրբ գրությունների ուսումնասիրության օգտակար հմտություն է Նեփիի նպատակների որոնումը, երբ կարդում եք Մորմոնի Գիրքը: Սրանում վարժվելու հնարավորություն կունենաք, երբ ուսումնասիրեք 1 Նեփի 7 գլուխը:

Կարող եք ցուցադրել հետևյալ հրահանգները, սուրբ գրությունների հղումներն ու ամփոփումները, և առաջարկել ուսանողներին ընտրել որևէ հատված ուսումնասիրության համար: Որոշեք, թե ուսանողների համար որը կլինի լավագույն տարբերակը. ուսումնասիրել անհատապես, զույգերով, թե փոքր խմբերով: Օգտակար կլինի, եթե քայլեք սենյակով և օգնեք այն ուսանողներին, որոնք գուցե ունենան հարցեր կամ կարդացածը հասկանալու և անհատականացնելու համար օգնության կարիք:

Իրադարձությունները, որոնք Նեփին հիշատակում է 1 Նեփի 7 գլխում, կարելի է բաժանել երեք հիմնական մասի: Կարդացեք յուրաքանչյուր մասի ստորև ներկայացվող ամփոփ նկարագրությունները: Ընտրեք մեկը և շարունակեք ուսումնասիրել այն՝ փնտրելով այն ամենը, ինչ աստվածահաճո է և օգնում է մեզ գալ Քրիստոսի մոտ:

Մաս 1. 1 Նեփի 7.1–5 Նեփին և նրա եղբայրները վերադարձան Երուսաղեմ՝ կրկին համոզելու Իսմայելի ընտանիքին միանալ իրենց ճամփորդությանը դեպի խոստացված երկիր: Սա Նեփիին և նրա եղբայրներին թույլ տվեց ամուսնանալ և ընտանիք կազմել:

Մաս 2. 1 Նեփի 7.6–18 Լամանը և Լեմուելը կապեցին Նեփիին՝ մտադրվելով թողնել նրան՝ մեռնելու անապատում: Բայց Նեփին մեծ հավատք ուներ, և Տերը հրաշքով ազատեց նրան:

Մաս 3. 1 Նեփի 7:17–22: Նեփին անկեղծ սրտով ներեց եղբայրներին իրեն սպանելու փորձի համար, և խումբը վերադարձավ Լեքիի և Սարիայի մոտ:

Երբ ուսանողներն ավարտեն ուսումնասիրությունը, հանձնարարեք նրանց քննարկել, թե ինչ սովորեցին, և գրատախտակին գրել իրենց պատասխանը ստորև ներկայացվող հարցին:

• Ի՞նչ սովորեցիք ձեր ուսումնասիրությունից, որը ձեր կարծիքով, աստվածահաճո կլիներ և կօգներ ձեզ գալ Քրիստոսի մոտ:

Ուսանողները կարող են ներկայացնել նմանատիպ սկզբունքներ. ամուսնությունը և ընտանիքը առանցքային են Աստծո ծրագրում. եթե մենք հավատանք Տիրոջը, Նա կկարողանա անել ամեն ինչ մեզ համար՝ համաձայն Իր կամքի, և որ ուրիշներին ներելը խաղաղություն է բերում:

• Ինչպե՞ս կարող է ձեր սովորածն օգնել ձեզ կյանքում:

Ըստ անհրաժեշտության՝ կարող եք տալ լրացուցիչ հարցեր, ինչպիսիք են. ձեր կարծիքով, ինչպե՞ս կարող եք ձեր կյանքում կիրառել ձեր սովորածը: Ի՞նչ հետագա քայլեր կարող եք ձեռնարկել:

Մտածեք այսօր ուսումնասիրածի մասին, երբ փնտրում էիք որոշակի բաներ, որոնք կօգնեին ձեզ գալ Հիսուս Քրիստոսի մոտ, և որոնք աստվածահաճո են:

• Ինչպե՞ս կարող եք բարելավել սուրբ գրությունների ուսումնասիրությունը, եթե այսպես հետևողականորեն մոտենաք ուսումնասիրությանը:

Կարող եք եզրափակել անձնական վկայությամբ կամ ուսանողներին հնարավորություն տաք կիսվել, թե ինչ են սովորել կամ զգացել իրենց ուսումնասիրությունից:

Բացատրական և պատմական տեղեկություններ

Ի՞նչ օրհնություններ կարող են գալ Մորմոնի Գրքի անկեղծ ուսումնասիրությունից և դրանում առկա ճշմարտությունները գրի առնելու արդյունքում:

Կարող եք դիտել հետևյալ տեսանյութը, որում Արևելյան Եվրոպայի երիտասարդները նկարագրում են Մորմոնի Գրքի ընթերցանության և իրենց սովորածը գրի առնելու փորձառությունները:

Ինչո՞ւ է ընտանիքն այդքան կարևոր Տիրոջ համար: Ի՞նչ կարող եմ փոխել իմ ընտանիքում այժմ:

Սուրբ գրություններում խոսվում է Լեքիի որդիների ամուսնության անհրաժեշտության մասին, որպեսզի նրանք խոստացված երկրում երեխաներ ունենան, իսկ ժամանակակից մարգարեներից մենք իմանում ենք, որ մեր հավերժական ճակատագրի իրագործման համար ընտանիքն առանցքային է Տիրոջ ծրագրում: Հետևյալ նյութերը կարող են ձեզ օգնել ավելի խորը հասկանալ ընտանիքի կարևորությունը և այն ազդեցությունը, որ կարող են ունենալ ընտանիքները:

• «Ընտանիք՝ հայտարարություն աշխարհին», ChurchofJesusChrist.org

• Ջուլի Բ. Բեք, «Ընտանիքի վարդապետության ուսուցում», Ensign, մարտ 2011, 12–17

• Ավետարանական թեմաներ, «Ընտանիք», topics.ChurchofJesusChrist.org

Ինչպե՞ս կարող եմ ներել ուրիշներին:

Տասներկու Առաքյալների Քվորումից երեց Ջեֆրի Ռ. Հոլլանդը ուսուցանել է հետևյալը.

«Արձակեցէք և կ՛արձակուիք» [Ղուկաս 6.37], Քրիստոսն ուսուցանել է Նոր կտակարանի ժամանակներում: Իսկ մեր օրերում. «Ես՝ Տերս կներեմ, ում որ կներեմ, բայց ձեզնից պահանջվում է ներել բոլոր մարդկանց» [Վարդապետություն և ուխտեր 64.10]: Սակայն ձեզանից ոմանց համար, ովքեր իրական չարչարանքների մեջ են, կարևոր է հիշել, թե Նա ինչ չի ասել: Նա չի ասել. «Ձեզ չի թույլատրվում իրական ցավ կամ իրական վիշտ զգալ կործանարար փորձություններից, որոնց մեջ դուք հայտնվել եք մեկ ուրիշի պատճառով»: Նա նաև չի ասել. «Որպեսզի լիովին ներեք, դուք պետք է շարունակեք վնասակար հարաբերությունները կամ վերադառնաք ստորացուցիչ և կործանարար վիճակին»։ Բայց, չնայած ամենասարսափելի անպատվություններին, որոնք կարող են պատահել մեզ հետ, մենք կարող ենք հաղթահարել ցավը, երբ ոտք դնենք ճշմարիտ բժշկման արահետի վրա: Դա ներելու ճանապարհն է, որով քայլում էր Հիսուս Նազովրեցին, ով կոչ է անում մեզնից յուրաքանչյուրին. «Ե՛կ, հետևիր ինձ» [Ղուկաս 18.22]: (Ջեֆրի Ռ. Հոլլանդ, «Հաշտության սպասավորությունը», Լիահոնա, նոյեմբեր 2018թ., 78–79)

Երեց Լարի Ջ. Էքո Հոքը, երբ ծառայում էր որպես Յոթանասունի անդամ, կիսվել է հետևյալով․

Եղբայրնե՛ր և քույրե՛ր, կա՞ն մեր կյանքում մարդիկ, որոնք վնասել են մեզ: Արդյո՞ք մենք մեր մեջ պահում ենք մերժման և զայրույթի լիովին արդարացված զգացմունքներ։ Արդյո՞ք մենք թույլ ենք տալիս, որ հպարտությունը չթողնի մեզ ներել և մոռանալ։ Ես հրավիրում եմ բոլորիս ամբողջովին ներել և թույլ տալ, որ ապաքինումը գործի մեր ներսից։ Եվ եթե անգամ ներումը հնարավոր չէ այսօր, իմացեք, որ եթե մենք ցանկանում և աշխատում ենք այդ ուղղությամբ, այն կգա, ինչպես, ի վերջո, եկավ ինձ համար: (Լարի Ջ. Էքո Հոք, «Ինչպէս Քրիստոսն էլ ձեզ ներեց, այնպէս էլ դուք», Լիահոնա, մայիս 2018, 16)

Օժանդակ ուսումնական վարժություններ

Այլընտրանքային սկիզբ

Ուսանողները կարող են քննարկել գործողություններ, որոնց համար հիմնական նպատակը հաճախ գուցե անտեսվում է: Օրինակ՝ դպրոց գնալը կարող է դառնալ առաջադրանքների կատարում՝ կրթություն ստանալու փոխարեն: Ուսանողներին խնդրեք խորհել որևէ բանի ավելի մեծ նպատակի անտեսման հետևանքների շուրջ: Օգնեք նրանց հասկանալ, որ շատ մարդկանց մոտ թյուրըմբռնում կա Մորմոնի Գրքի նպատակի մասին, և որ այս դասը կանդրադառնա այդ նպատակին:

Գտնել ավետարանի սկզբունքները

1 Նեփի 7 գլխի երեք բաժինները կարդալիս ուսանողները կարող են փնտրել ավետարանի սկզբունքները: Կարդալուց հետո նրանք կարող են հարցնել իրենց. «Ո՞րն է հիմնական դասերից մեկը, որ սովորեցի այս հատվածներից»:

Եթե ուսանողներն օգնության կարիք ունենան սկզբունքները հասկանալու և սահմանելու գործում, կարող եք դիմել հետևյալ նյութերի օգնությանը.

• «Թանկարժեք մարգարիտների առակը» (տեսանյութ, 6:47), հասանելի է ChurchofJesusChrist.org կայքում

• Դեյվիդ Ա. Բեդնար, «Իմ ավետարանի սկզբունքները», Լիահոնա, մայիս 2021թ., 123–26

• Ռիչարդ Գ. Սքոթ, «Ձեռք բերել հոգևոր գիտելիքներ», Ensign, նոյեմբեր 1993, 86–88

Կարևորենք ընտանիքի վարդապետությունը

Որպեսզի ուսանողները հասկանան, թե Տերը ինչ է զգում ամուսնության և ընտանիքի կարևորության մասին, կարող եք նրանց առաջարկել մտածել այն բանի շուրջ, թե ինչպես կպատասխանեին հետևյալ հարցին. «Ինչո՞ւ է Առաջին Նախագահությունն այդքան շատ հոգում ձեր մասին և այդքան շատ նյութեր տրամադրում ձեզ»: (Ջուլի Բ. Բեք, «Ընտանիքի վարդապետության ուսուցումը», Ensign, մարտ 2011, 12) Երբ ուսանողներն ուսումնասիրեն 1 Նեփի 7.1–5 հատվածը, կարող եք ներկայացնել Քույր Բեքի ուղերձի լրացուցիչ բաժինները կամ «Ընտանիք՝ հայտարարություն աշխարհին» հռչակագիրը (ChurchofJesusChrist.org):