2 Nīfai 1–2

Vakai Fakalūkufuá

ʻI he fakaofi ʻa Līhai ki he ngataʻanga ʻo ʻene moʻuí, naʻá ne lea ki heʻene fānaú ke ueʻi fakalaumālie kinautolu ke nau tauhi e ngaahi fekau ʻa e ʻOtuá. Naʻá ne akoʻi ko e tauʻatāina ke filí, ko e taha ia ʻo e ngaahi meʻaʻofa maʻongoʻonga taha ʻa e ʻOtuá kiate kitautolú. Naʻá ne akoʻi ʻene fānaú fekauʻaki mo e ngaahi nunuʻa ʻo e Hinga ʻa ʻĀtama mo ʻIví pea te tau lava ʻo ikunaʻi e ngaahi fakafeʻatungia kotoa pē ʻo e moʻui fakamatelié ʻo fakafou ʻi he Fakamoʻuí. Naʻá ne toe akoʻi foki koeʻuhí ko Sīsū Kalaisi, ʻoku “tauʻatāina [ʻa e tokotaha kotoa pē] ke fili ʻa e tauʻatāiná mo e moʻui taʻengatá” pe “pōpulá mo e maté” (2 Nīfai 2:27).

Teuteu ke Akoʻí

ʻOku ʻoatu ʻe he fakamatalá ni ki he kau faiakó ha ngaahi fakakaukau ki he meʻa ʻe ala fiemaʻu ke teuteuʻi kimuʻa ‘i he lēsoni takitaha.

2 Nīfai 1

Taumuʻa ʻo e lēsoní: ʻE lava ke tokoni ʻa e lēsoni ko ʻení ki he kau akó ke nau ako ke ʻiloʻi e ngaahi tefitoʻi moʻoni ko ia, ʻi he taimi ʻoku fakaʻaongaʻi aí, te ne lava ʻo tataki kinautolu ki hono maʻu e tokoni ʻa e ʻOtuá ʻi heʻenau moʻuí.

• Teuteu ʻa e tokotaha akó: Poupouʻi e kau akó ke fakahoko ʻenau ako folofola fakaʻahó. Fakaafeʻi kinautolu ke nau fekumi ki he ngaahi tefitoʻi moʻoni ʻi he 2 Nīfai 1 pea omi mateuteu ke vahevahe ha sīpinga.

• ʻĪmisí: Ko e ʻīmisi mo ha ngaahi meʻa fūfū

• Vitiō: “ʻOku Akoʻi ʻe Lihai Hono Fāmilí” (3:47; mamata mei he taimi 0:39 ki he 3:35)

• Fokotuʻu ki he akoʻi he konifelenisi fakavitioó: Hili hono ʻiloʻi ʻe he kau akó ha tefitoʻi moʻoni pea fakakakato ʻa e sitepu ʻe fā ʻi he fakaʻosinga ʻo e lēsoní, fakakaukau ke fakaafeʻi kinautolu ke nau tohi ʻi he feituʻu fetalanoaʻakí ʻa e tefitoʻi moʻoni ne nau ʻiló. Fakaafeʻi leva ha tokotaha ako ke ne fili ha tefitoʻi moʻoni ʻokú ne fie ako lahi ange ki ai. Kole ki he tokotaha ako naʻá ne ʻiloʻi e tefitoʻi moʻoni ko iá ke vahevahe e founga naʻá ne fakakakato ʻaki e sitepu ʻe faá. Fakaafeʻi leva e tokotaha ako ko iá ke fili ha tefitoʻi moʻoni kehe. Fakaafeʻi ha kau ako ke vahevahe.

2 Nīfai 2:1–16

Taumuʻa ʻo e lēsoní: ʻE lava ke tokoni ʻa e lēsoni ko ʻení ke mahino lelei ange ki he kau akó ʻa e fatongia ʻo e tauʻatāina ke filí ʻi he palani ʻa e Tamai Hēvaní.

• Teuteu ʻa e tokotaha akó: Fakaafeʻi e kau akó ke nau fakatokangaʻi mo hiki ha lisi ʻo e ngaahi fili mahuʻinga ʻoku nau fai ʻi he vahaʻa ʻo e taimí ni mo e lēsoni hokó. Kole ange ke nau haʻu mateuteu ke vahevahe e ʻuhinga ʻoku mahuʻinga ai ʻa e filí ki heʻetau moʻui fakamatelié pea mo e palani ʻo e fakamoʻui ʻa e Tamai Hēvaní.

• Laʻipepa Tufa: “Ko Hotau Mālohi ke Filí”

• Fokotuʻu ki he akoʻi he konifelenisi fakavitioó: Hili hono fakakakato ʻe he kau akó ʻenau ngaahi fokotuʻutuʻu ki hono fakamatalaʻi ʻo e tauʻatāina ke filí, fakakaukau ke vahevahe e kau akó ki he ngaahi loki fetalanoaʻakí pea nau fakafaivaʻi e tūkungá. Mahalo ʻe ʻaonga ke kole ki ha tokotaha ako ʻi he kulupu takitaha ke hoko ko e taki pea ne fili pe ko hai ʻe ʻuluaki fakamatalá. Pe ʻe ola lelei ke fakaafeʻi e kau akó ke nau ʻiloʻi pe ko hai ʻi heʻenau kulupú ʻoku motuʻa tahá, lōloa tahá, pe ʻā hengihengia taha he pongipongi ko iá pea ʻuluaki fakamatala ʻa e tokotaha ko iá.

2 Nīfai 2:17–26

Taumuʻa ʻo e lēsoní: ʻE lava ke tokoni ʻa e lēsoni ko ʻení ke fakahoungaʻi ange ʻe he kau akó ʻa e Fakamoʻuí mo ʻEne Fakaleleí ʻi he mahino kiate kinautolu ʻa e Hinga ʻa ʻĀtama mo ʻIví.

• Teuteu ʻa e tokotaha akó: Fakakaukau ke fakaafeʻi e kau akó ke nau lau e tefito ʻo e tui hono uá pea fakakaukau ki he founga te nau fakamatalaʻi ai ia ki ha taha kehe. Te nau lava foki ʻo kole ki ha toko taha pe toko ua ʻoku nau falala ki ai ke vahevahe mo kinautolu ʻa e mahino ʻoku nau maʻu ki he tefito ʻo e tui hono uá.

• Fokotuʻu ki he akoʻi he konifelenisi fakavitioó: Kimuʻa pea kamata e kalasí, ʻe lava ke ke ʻoange ki ha ongo tamaiki ako ʻa e ongo lea ʻa ʻEleta Sefilī R. Hōlaní. Fakaafeʻi kinaua ke takitaha lau ʻa e fakamatala ne na maʻú pea fakakaukau ki hono ʻuhinga kiate kinauá. ʻI he ngaahi taimi totonu lolotonga e lēsoní, kole ange ke nau lau ʻenau fakamatalá pea vahevahe ʻenau ngaahi fakakaukaú.

Fakataukei Fakatokāteliné: 2 Nīfai 2:25

Taumuʻa ʻo e lēsoní: ʻE lava ke tokoni ʻa e lēsoni ko ʻení ke ako maʻuloto ʻe he kau akó e potufolofola fakataukei fakatokāteliné mo e kupuʻi lea mahuʻinga ʻo e 2 Nīfai 2:25, fakamatalaʻi e tokāteliné, pea akoako fakaʻaongaʻi e ngaahi tefitoʻi moʻoni ki hono maʻu ʻo e ʻilo fakalaumālié ʻi ha tūkunga moʻoni ʻo e moʻuí.

• Teuteu ʻa e tokotaha akó: Fakaafeʻi e kau akó ke omi mateuteu ki he kalasí ke lau maʻuloto e 2 Nīfai 2:25 mei heʻenau manatu pea nau haʻu mateuteu ke vahevahe ha founga ʻe taha ʻoku nau aʻusia ai e fiefiá koeʻuhí ko e Hinga ʻa ʻĀtama mo ʻIví.

• Fokotuʻu ki he akoʻi he konifelenisi fakavitioó: Hili hono lau ʻe he kau akó e tūkunga fekauʻaki mo Kitioné, fakaafeʻi kinautolu ke vahevahe e meʻa te nau ala fai ke tokoni aí. Kapau ʻe faingataʻaʻia e kau akó pe ʻe tokoni ki he fealēleaʻakí, fakakaukau ke vahevahe e ngaahi palakalafi ʻi he Fakamatala ki he ʻElito ʻo e Fakataukei Fakatokāteliné (2022) ki ha kulupu ʻe tolu ʻo e kau akó. Fokotuʻutuʻu kinautolu ʻi ha ngaahi loki fetalanoaʻaki kehekehe ke nau aleaʻi e ngaahi palakalafí mo e tūkungá, pea fakaʻosi leva ʻenau alēleá koeʻuhí ke nau lava ʻo vahevahe ʻa e meʻa naʻa nau ako ʻa ia ʻe ala tokoni kia Kitioné.

2 Nīfai 2:26–30

Taumuʻa ʻo e lēsoní: ʻE lava ke tokoni e lēsoni ko ʻení ki he kau akó ke fakaʻaongaʻi ʻenau tauʻatāina ke fili ke muimui kia Sīsū Kalaisí.

• Teuteu ʻa e tokotaha akó: Fakaafeʻi e kau akó ke lau e 2 Nīfai 2:27 pea fakakaukau ʻi he faʻa lotu pe ko e ngaahi fili fē ʻi heʻenau moʻuí ʻokú ne tokoniʻi kinautolu ke nau ofi ange ki he Fakamoʻuí mo maʻu e ngaahi tāpuaki ʻokú Ne foakí. Fakaafeʻi foki kinautolu ke nau fakakaukau ki ha ngaahi fili te nau fie liliu.

•  

• Fokotuʻu ki he akoʻi he konifelenisi fakavitioó: Fakaafeʻi e kau akó ke vahevahe e fakatātā ne nau tā ʻo e 2 Nīfai 2:27 pe ko e ngaahi lea ne nau fakaʻaongaʻi ke fakamatalaʻi fakanounou ʻakí. Kapau ne nau tā ha fakatātā, kole ki ha niʻihi tokosiʻi ʻo kinautolu ke vahevahe ʻaki hono puke hake ʻenau fakatātaá ki heʻenau meʻafaitaá, pea fakahinohinoʻi e kalasí ke nau fili ʻa e speaker view ke nau lava ʻo sio lelei ki ai. Hili iá, fakakaukau ke fakaʻaliʻali ʻa e fakatātā ʻi he lēsoní pea fakaʻaongaʻi hoʻo cursor pe meʻangāue tā fakatātaá ke fakaʻilongaʻi ʻaki hano ngaahi konga pau ʻi he hokohoko atu hoʻo lēsoní.