“2 Nīfai 2:1–16: ‘Naʻe Tuku ʻe he ʻOtuá ki he Tangatá ʻa e Tauʻatāina Ke Ne Fili Maʻana’” Tohi ʻa Molomoná – Tohi Lēsoni ʻa e Faiakó (2024)
“2 Nīfai 2:1–16: ‘Naʻe Tuku ʻe he ʻOtuá ki he Tangatá ʻa e Tauʻatāina Ke Ne Fili Maʻana’” Tohi ʻa Molomoná – Tohi Lēsoni ʻa e Faiakó
2 Nīfai 2:1–16
“Naʻe Tuku ʻe he ʻOtuá ki he Tangatá ʻa e Tauʻatāina Ke Ne Fili Maʻana”
Fakakaukauloto ki hoʻo moʻuí kapau naʻe ʻikai ke ʻi ai haʻo fili. Ko e tauʻatāiná pe ko e malohi ke filí, ko e taha ia ʻo e ngaahi meaʻofa maongoʻonga taha ʻa e ʻOtuá kiate kitautolú. Naʻe ʻosi aʻusia ʻe Sēkope ko e foha ʻo Līhaí ha ngaahi faingataʻa lahi ʻi heʻene kei siʻí, ko ia naʻe akoʻi kiate ia ʻe Līhai ha ngaahi moʻoni mahuʻinga fekauʻaki mo e Fakamoʻuí pea mo e tauʻatāina ke filí. ʻE lava ke tokoni atu ʻa e lēsoni ko ʻení ke mahino lelei ange kiate koe ʻa e fatongia ʻo e tauʻatāina ke filí ʻi he palani ʻa e Tamai Hēvaní.
Ko hono ʻeke ʻo e ngaahi fehuʻi ʻokú ne fakaafeʻi ʻa e vakavakaiʻi fakataautahá. ʻE lava ʻe he ngaahi fehuʻi ʻokú ne fakaafeʻi e kau akó ke nau fakalaulauloto ki he ngaahi folofolá, ngaahi ongo ʻoku nau maʻu ki he Fakamoʻuí, ʻEne ngaahi akonakí, pe ko hono fakaʻaongaʻi ʻo e ngaahi tefitoʻi moʻoní ʻo fakatupulaki ʻa e fakakaukaú, ʻa ia ʻe lava ke fakaʻaongaʻi ʻe he Laumālié ke fai ʻaki hono akoʻí. ʻOange ki he kau akó ʻa e taimi ʻoku fiemaʻu ki he fakalaulauloto mo e tohi ola leleí.
Teuteu ʻa e tokotaha akó: Fakaafeʻi e kau akó ke nau fakatokangaʻi mo hiki ha lisi ʻo e ngaahi fili mahuʻinga ʻoku nau fai ʻi he vahaʻa ʻo e taimí ni mo e lēsoni hokó. Kole ange ke nau haʻu mateuteu ke vahevahe e ʻuhinga ʻoku mahuʻinga ai ʻa e filí ki heʻetau moʻui fakamatelié pea ki he palani ʻo e fakamoʻui ʻa e Tamai Hēvaní.
Ngaahi ʻEkitivitī Ako ʻOku Ala Fakahokó
Ngaahi fili mahuʻingá
Fakaafeʻi ʻa e kau akó ke nau fakaʻaongaʻi ‘enau teuteu ki he kalasí ke fai ʻa e ʻekitivitī ko ʻeni ʻi heʻenau ngaahi tohinoa akó:
ʻI he miniti ʻe ua ka hokó, hiki ha niʻihi ʻo e ngaahi fili mahuʻinga kuó ke fai ʻi he ngaahi ʻaho siʻi kuo hilí.
-
ʻOkú ke pehē ko e hā ʻoku mahuʻinga ai ʻa e filí ki heʻetau moʻui fakamatelié pea ki he palani ʻo e fakamoʻui ʻa e Tamai Hēvaní?
Fakalaulauloto ki he meʻa kuó ke ako mei he ngaahi fili ʻokú ke laukau ʻakí pea pehē ki he ngaahi fili ʻokú ke fakaʻiseʻisa mei aí. ʻI he hoko atu hoʻo ako ʻi he lēsoni ko ʻení, fekumi ki he fakahinohino ʻa e Laumālie Māʻoniʻoní ke ʻilo ʻa e meʻa ʻe ala tokoni atu ke mahino lelei ange kiate koe mo ke fakaʻaongaʻi hoʻo malava ko ia ke filí. Kapau ʻoku ʻi ai haʻo ngaahi fehuʻi fekauʻaki mo e tauʻatāina ke filí, lotua foki mo fekumi ki ha ngaahi tali ʻi he hokohoko atu ʻa hoʻo akó.
Ngaahi tafaʻaki mahuʻinga ʻo e tauʻatāina ke filí
Naʻe fāʻeleʻi e foha ʻo Līhai ko Sēkopé ʻi he feituʻu maomaonganoá hili ia e mavahe honau fāmilí mei Selusalemá. Kimuʻa siʻi pea pekia ʻa Līhaí, naʻá ne akoʻi kia Sēkope ha ngaahi moʻoni mahuʻinga fekauʻaki mo e tauʻatāina ke filí.
Lau ʻa e 2 Nīfai 2:1–4 ke ʻiloʻi pe naʻe kamata fēfē e pōpoaki ʻa Līhai kia Sēkopé. Mahalo ʻe tokoni ke ʻiloʻi ʻoku ʻuhinga ʻa e foʻi lea “fakatapuí” ke tukupā pe ʻai ke māʻoniʻoni (vakai, “Fakatapuí” ʻi he Fakahinohino ki he Ngaahi Folofolá [scriptures.ChurchofJesusChrist.org]).
-
Ko e hā ʻe mahuʻingamālie ai ki ha taha kuó ne ʻosi fehangahangai mo ha ngaahi faingataʻa lahi ke mahino hono mahuʻinga ʻo e mālohi ke filí?
-
Ko e hā ha ngaahi moʻoni mei he ngaahi veesi ko ʻení ʻoku ngali ʻuhingamālie taha kiate koé? Ko e hā hono ʻuhingá?
Fakaʻaliʻali ʻa e fakamatala ko ʻení pe tufa ange ia ki he kau akó ko ha laʻipepa tufa. Te ke lava ʻo vahe ki ha kau ako kehekehe pe kulupu ʻo e kau akó ha taha ʻo e ngaahi fili ʻe tolú. Pe, te ke lava ʻo vahevahe e kau akó ki ha ngaahi kulupu pea fakaafeʻi kinautolu ke nau ako ki he lahi taha te nau lavá ʻi ha vahaʻataimi fakangatangata.
Ko Hotau Mālohi ke Filí
Tohi ʻa Molomoná – Tohi Lēsoni ʻa e Faiakó (2024)—“2 Nīfai 2:1–16”
Fili A: Ko e hā e meʻa ʻoku akoʻi mai kiate kitautolu ʻe hotau mālohi ke filí fekauʻaki mo e ʻOtuá?
Lau ʻa e 2 Nīfai 2:14, 16 ʻo kumi ki he meʻa naʻe akoʻi ʻe Līhai kau ki he ʻOtuá mo ʻetau tauʻatāina ke filí.
-
Ko e hā ʻa e meʻa naʻá ke akó?
-
Ko e hā ʻoku mahuʻinga ai ke mahino ʻoku foaki mai ʻe he ʻOtuá kiate kitautolu ʻa e mālohi ke tau ngāue maʻatautolú?
-
Ko e hā ʻa e ongo ʻokú ke maʻu ʻi he falala atu e Tamai Hēvaní ke ke fai hoʻo ngaahi filí?
Fakakaukau ki ha sīpinga ʻo e taimi naʻá ke fakaʻaongaʻi ai ʻa e tauʻatāina ke filí ʻi ha founga ʻokú ke ongoʻi ʻoku fakahoifua ki he Tamai Hēvaní.
-
Ko e hā e ʻuhinga ʻokú ke ongoʻi ai naʻe fakahōifua ki he ʻOtuá hoʻo filí?
Mahalo ʻe ʻaonga foki ke fakakaukau ki ha ngaahi fili naʻá ke fai naʻe ʻikai fakahōifua ki he ʻOtuá mo e meʻa kuó ke ako meiate kinautolú.
Fili E: Ko e hā ha meʻa kuo foaki mai ʻe he ʻOtuá ke ne tokoniʻi kitautolu ke tau fili fakapotopotó?
Lau ʻa e 2 Nīfai 2:5, 13 mo e Molonai 7:16 ʻo kumi e ngaahi moʻoni ko ʻení. Fakatokangaʻi ange ʻoku ʻuhinga ʻa e “fonó” ki he ngaahi fekau ʻa e ʻOtuá.
-
Kuo pau ke tau ʻiloʻi ʻa e leleí mei he koví ka tau lava ʻo fakaʻaongaʻi kakato ʻetau tauʻatāina ke filí.
-
Kuo pau ke tau maʻu ʻa e fonó ka tau maʻu ʻa e tauʻatāina ke filí.
-
Ko e hā ʻokú ke ako fekauʻaki mo e Tamai Hēvaní mo Sīsū Kalaisi mei he moʻoni ko ia ʻokú Na foaki ki he tokotaha kotoa pē ha ʻilo feʻunga ki he leleí mo e koví kae lava ke nau fili ke angatonu pe faiangahala?
-
Ko e hā naʻe mei hoko kapau naʻe ʻikai ha fono pe ngaahi fekau?
Fili F: Ko e hā ʻoku tau ongoʻi ai e fakafepakí ki heʻetau ngaahi fili leleí?
Lau ʻa e 2 Nīfai 2:11, 16, ʻo kumi ha ngaahi moʻoni kehe naʻe akoʻi ʻe Līhai fekauʻaki mo ʻetau tauʻatāina ke filí.
-
Ko e hā naʻá ke maʻú?
-
ʻI he palani ʻa e Tamai Hēvaní, ʻokú ke pehē ko e hā e ʻuhinga ʻokú hoko ai e fakafepakí ko ha konga mahuʻinga ʻo e tauʻatāina ke filí?
-
Ko e hā ha ngaahi founga ʻoku fakataueleʻi ai kitautolu ke tau fai e ngaahi fili ʻoku totonú mo ia ʻoku halá?
Lau ʻa e fakamatala ko ʻeni naʻe fai ʻe ʻEletā Sefilī R. Hōlani ʻo e Kōlomu ʻo e Kau ʻAposetolo ʻe Toko Hongofulu Mā Uá ke tokoni ke mahino kiate koe ʻa e moʻoni ko ʻení:
He ʻikai lava ke hoko e fānau fakalaumālie ʻa e ʻOtuá ʻo hangē ko Iá … tukukehe kapau ne nau maʻu … ha aʻusia ʻi ha ʻātakai naʻe fakatou ʻi ai ʻa e leleí mo e koví. …
… Naʻa mau fiemaʻu ʻa e faingamālie ke … fehangahangai ai mo e leleí mo e koví pea ke mālohi feʻunga ke fili ʻa e leleí. (Jeffrey R. Holland, Christ and the New Covenant: The Messianic Message of the Book of Mormon [1997], 200, 204)
Fakakaukau ki ha ngaahi founga ʻokú ke ako ai ke fili ʻa e leleí, ʻo aʻu ai pē ki he taimi ʻoku ʻahiʻahiʻi ai koe ʻe he koví. Mahalo te ke loto ke hiki hoʻo ngaahi talí ʻi hoʻo tohinoa akó. Mahalo te ke fie fakalaulauloto foki ki ha ngaahi founga te ke lava ai ʻo kumi tokoni ʻi ha faʻahinga fili pē te ke fie liliu.
Ko ʻEtau Fiemaʻu ki he Fakamoʻuí
Kuo teʻeki ai ha taha ka ko e Fakamoʻuí pē kuó Ne fakaʻaongaʻi haohaoa ʻa e tauʻatāina ke filí ʻi he moʻui fakamatelié. ʻOku tau faiangahala kotoa pē, pea ka ʻikai ha tokoni te tau “ʻauha … pea mamahi ʻo taʻengata” (2 Nīfai 2:5).
Fakakaukau ke fakaʻaongaʻi e fakamatala mei he konga “Ngaahi Fakamatala Fakamahino mo e Puipuituʻa” ʻi hení ke tokoni ke mahino lelei ange ki he kau akó ʻa e meʻa ʻoku akoʻi ʻi he 2 Nīfai 2:6–8.
ʻI hoʻo fakakaukau ki he meʻá ni, lau ʻa e 2 Nīfai 2:6–8 ke vakai ki he meʻa naʻe fai ʻe Sīsū Kalaisi maʻatautolu kotoá.
-
Naʻe fili fēfē e Fakamoʻuí ke Ne tokoniʻi koé?
Ko e tefitoʻi moʻoni ʻe taha naʻe fakamoʻoni ki ai ʻa Līhaí ko e fakafou ʻi He Fakalelei ʻa e Fakamoʻuí, naʻá ne huhuʻi kitautolu mei heʻetau ngaahi angahalá.
-
ʻOku tākiekina fēfē ʻe he mahino ko ʻeni fekauʻaki mo Sīsū Kalaisí hoʻo ngaahi ongo kiate Iá?
-
Ko e hā ʻokú ke ako mei he sīpinga ʻa e Fakamoʻuí fekauʻaki mo hono fakahoko ʻo e ngaahi fili?
Fakaafeʻi e kau akó ke nau fakalaulauloto ki he meʻá ni kae ʻoua ʻe vahevahe leʻolahi ʻenau ngaahi talí, telia na ʻoku fuʻu fakataautaha.
Fakakaukau ki ha taimi naʻá ke fakatomala ai mei ha angahala, ʻi he tokoni ʻa Sīsū Kalaisí. Naʻe liliu fēfē koe ʻe he fakatomala?
Mahalo te ke fie ʻoange ki he kau akó ha faingamālie ke nau fakamatalaʻi fakanounou mo nau vahevahe ʻa e meʻa ʻoku mahino kiate kinautolu fekauʻaki mo e tauʻatāina ke filí kimuʻa pea fakaʻosi e lēsoni ko ʻení. Ko e ʻekitivitī ko ʻení ko ha founga ia ʻe taha ʻe lava ke fakahoko ai ʻeni.
Fakakaukauloto ʻoku akoʻi ʻe he kau faifekau ʻi homou feituʻú ha kiʻi talavou ko ʻene toki fanongo ia fekauʻaki mo e palani ʻa e Tamai Hēvaní. ʻOku fakaafeʻi koe ʻe he kau faifekaú ke ke haʻu ki he taimi ako hono hokó mo e kiʻi talavou ko ʻení. ʻOku nau kole atu ke ke teuteu ha ngaahi fakakaukau mei he 2 Nīfai 2 ʻi he mahuʻinga ʻo e tauʻatāina ke filí ʻi he palani ʻa e Tamai Hēvaní. Faʻu pea fakahū mai ha kiʻi fakamatala nounou ʻo e meʻa te ke akoʻí. Fakakau ai e ngaahi meʻa ko ʻení:
-
ʻOua naʻa toe siʻi hifo he kupuʻi folofola ʻe ua mei he 2 Nīfai 2:1–16, 26 mo honau ngaahi moʻoni ʻoku fekauʻaki mo iá, kau ai hano fakamatalaʻi nounou ʻo e ʻuhinga ʻoku ʻuhingamālie pe mahuʻinga aí
-
Founga ʻe lava ke tākiekina ai ʻe he feilaulau ʻa Sīsū Kalaisí ʻetau ngaahi filí
-
Founga ʻe lava ke fakahoko ai ʻe he ngaahi moʻoni ko ʻení ha liliu ʻi heʻetau moʻuí
ʻAi ke tauhoa pe fakakulupu iiki e kau akó pea fakaafeʻi kinautolu ke fevahevaheʻaki ʻenau ngaahi fokotuʻutuʻú. Ka toe ha taimi, fakakaukau ke fakafaivaʻi e ngaahi fokotuʻutuʻú ʻo fakaafeʻi e kau akó ke nau feakoʻiʻaki kinautolu.
ʻI he ʻosi hoʻo fokotuʻutuʻú, fekumi ki he tataki ʻa e Laumālie Māʻoniʻoní ʻi hoʻo fakalaulauloto ki he ngaahi founga te ke lava ai ʻo manatuʻi e ngaahi moʻoni ko ʻení mo e founga ʻe lava ke faitāpuekina ai hoʻo moʻuí ʻi hoʻo manatuʻi kinautolú. Hangē ko ʻení, te ke lava ʻo tuku ha screensaver ʻi hoʻo telefoní, tuku ha kiʻi fakamatala ʻi hoʻo sioʻatá, pe fai ha meʻa kehe te ke lava ai ʻo sio maʻu pē mo ke manatuʻi e ngaahi moʻoni ko ʻení.