2 Nīfai 3–5

Vakai Fakalūkufuá

Kimuʻa pea pekia ʻa Līhaí, naʻá ne lea ʻaki ha kikite ʻa Siosefa ʻo ʻIsipité fekauʻaki mo Siosefa Sāmita ʻi ha meimei taʻu ʻe 1,700 kimuʻa pea ʻaloʻi ʻa Kalaisí. Hili e pekia ʻa Līhaí, naʻe tohi ʻa Nīfai kau ki he niʻihi ʻo e ngaahi ongo loloto taha naʻá ne maʻú, ʻo fakahā mai kiate kitautolu ʻi heʻene tā sīpingá ʻa e founga te tau lava ai ʻo tafoki ki he ʻEikí ʻi he taimi ʻoku tau aʻusia ai ʻa e ngaahi faingataʻa ʻo e moʻui fakamatelié. Koeʻuhí ko e palani ʻa Leimana mo Lēmiuela ke fakapoongi ʻa Nīfaí, naʻe fakatokanga ai kiate ia ke ne ʻave “ʻa kinautolu ʻa ia naʻa nau tui ki he ngaahi fakatokanga mo e ngaahi fakahā ʻa e ʻOtuá” (2 Nīfai 5:6) pea hola ki he feituʻu maomaonganoá. Naʻá ne fokotuʻu mo kinautolu naʻe muimui ʻiate iá ha kolo foʻou, ʻa ia ne nau tupulaki mo moʻui ai ʻo maʻu ai ʻa e fiefiá.

Teuteu ke Akoʻí

ʻOku ʻoatu ʻe he fakamatala ko ʻení ki he kau faiakó ha ngaahi fakakaukau ki he meʻa ʻe ala fie maʻu ke teuteuʻi kimuʻa he lēsoni takitaha.

Fakataukei Fakatokāteliné: 2 Nīfai 2:27

Taumuʻa ʻo e lēsoní:ʻE tokoni ʻa e lēsoni ko ʻení ke ako maʻuloto ʻe he kau akó ʻa e fakamoʻoni fakafolofola ʻo e fakataukei fakatokāteliné mo e kupuʻi lea fakafolofola mahuʻinga ki he 2 Nīfai 2:27, fakamatalaʻi ʻa e tokāteliné, pea fakaʻaongaʻi e ngaahi tefitoʻi moʻoni ki hono maʻu ʻo e ʻilo fakalaumālié ʻi ha ngaahi tūkunga moʻoni ʻo e moʻuí.

• Teuteu ʻa e tokotaha akó: Fakaafeʻi e kau akó ke nau feinga ke ako maʻuloto ʻa e 2 Nīfai 2:27. Fakamanatu ki he kau akó te nau lava ʻo fakaʻaongaʻi ʻa e polokalama Fakataukei Fakatokāteliné.

• Fokotuʻu ki hono akoʻi ʻo e konifelenisi vitioó: Fakakaukau ke tuku ha fehokotakiʻanga ki he Fakamatala ki he ʻElito ʻo e Fakataukei Fakatokāteliné (2022) ʻi he fepōtalanoaʻaki ʻi he taimi te ke kamata ai ʻa e konga “Akoako fakahoko” ʻo e lēsoní koeʻuhí ke lava ʻa e kau akó ʻo maʻu vave ʻa e fakamatalá.

2 Nīfai 3

Taumuʻa ʻo e lēsoní: Ko e taumuʻa ʻo e lēsoni ko ʻení ke tokoniʻi e kau akó ke fakaloloto ʻenau fakamoʻoni ki he uiuiʻi fakalangi ʻo e Palōfita ko Siosefa Sāmitá.

• Teuteu ʻa e tokotaha akó: Fakaafeʻi e kau akó ke nau lau pe mamata ʻi he lea ʻa ʻEletā Niila L. ʻEnitaseni “Siosefa Sāmitá,” mei he konifelenisi lahi ʻo ʻOkatopa 2014 (Ensign pe Liahona, Nōvema 2014, 28–31), pea kumi e ʻuhinga ʻoku mahuʻinga ai ke maʻu ha fakamoʻoni fakatāutaha naʻe uiuiʻi ʻa Siosefa Sāmita ʻe he ʻOtuá.

• Meʻa ke fakaʻaliʻalí: Ko e ngaahi ʻīmisi ʻo e Siosefa ʻe toko faá ʻi he kamataʻanga ʻo e lēsoní

• Fokotuʻu ki hono akoʻi ʻi he konifelenisi fakavitioó: Fakakaukau ke vahevahe e kau akó ki ha fanga kiʻi kulupu iiki ke aleaʻi ʻenau ngaahi fakakaukau mo e ngaahi ongo fekauʻaki mo Siosefa Sāmitá pe fakahoko ha fakamoʻoni ko ha palōfita ia.

2 Nīfai 4

Taumuʻa ʻo e lēsoní: ʻE lava ke tokoni e lēsoni ko ʻení ki he kau akó ke nau tali faivelenga ki he ʻahiʻahí mo e loto-foʻí ʻaki ʻenau tafoki ki he ʻEikí.

• Teuteu ʻa e tokotaha akó: Fakakaukau ke fakaafeʻi e kau akó ke nau kole tokoni ki he ʻOtuá ʻi ha ʻahiʻahi pe faingataʻa ʻoku nau fehangahangai mo ia.

• Laʻipepa Tufa: “Ko e Saame ʻa Nīfaí mo Au”

•  

• Fokotuʻu ki hono akoʻi ʻo e konifelenisi vitioó: Fili ha taha ʻo e ngaahi fakamatala mei he konga “Ngaahi Fakamatala Fakamahino mo e Puipuituʻá” pea teuteu ke fakaʻaliʻali ia ki he kau akó lolotonga ʻenau vahevahe ʻenau ngaahi fakakaukau mo e ongo kau ki he 2 Nīfai 4.

2 Nīfai 5:1–9

Taumuʻa ʻo e lēsoní: ʻE lava ke tokoni ʻa e lēsoni ko ʻení ki he kau akó ke nau muimui ki he ngaahi fakatokanga ʻoku ʻomi ʻe he ʻEikí ʻi he ʻofa ke maluʻi kinautolú.

• Teuteu ʻa e tokotaha akó: Fakakaukau ke fakaafeʻi e kau akó ke nau haʻu mateuteu ki he kalasí ke vahevahe ha aʻusia ʻi ha taimi naʻe fakatokanga ange ai ha taha naʻa nau houngaʻia ai.

• Meʻa ke fakaʻaliʻali atú: Ngaahi fakaʻilonga fakatokanga pe ʻīmisi ʻo e ngaahi fakaʻilonga fakatokangá

• Lēsoni fakataumuʻá: Ko ha meʻa ʻuli pe pikipiki ʻi ha taha ʻo e ngaahi nofoʻangá mo ha ngaahi fakaʻilonga fakatokanga ʻoku takatakai ʻi he nofoʻanga ko iá

•  

• Naunau maʻá e kau akó: Ko ha tatau ʻo e Ki Hono Fakamālohia ʻo e Toʻu Tupú (tohitufa, 2011) maʻá e tokotaha ako takitaha pe ko ha ngaahi tatau ke vahevahe ʻe he kau akó

•  

2 Nīfai 5

Fakatokangaʻi ange: ʻOku vahevahe ʻa e lēsoni ko ʻení ki ha fanga kiʻi ʻekitivitī iiki ʻe tolu. Fakakaukau ke fakaafeʻi ha kau ako ʻe toko tolu kimuʻa ke nau teuteu ke akoʻi e kalasí ʻo fakaʻaongaʻi e ngaahi ʻekitivitī ko ʻení.

Taumuʻa ʻo e lēsoní: ʻE lava ke tokoni e lēsoni ko ʻení ki he kau akó ke nau ʻilo ʻa e meʻa te nau lava ʻo fai ke moʻui ʻaki e ʻulungaanga fiefiá.

• Teuteu ʻa e tokotaha akó: Fakaafeʻi e kau akó ke nau aleaʻi mo ha kaungāmeʻa falalaʻanga pe mēmipa ʻo e fāmilí ʻa e faikehekehe ʻo e loto fiefiá mo e ngāue ʻoku fakahoko ke maʻu ai ʻa e fiefiá.

• Naunau: Ko e ngaahi laʻipepa tufa ki he fanga kiʻi ʻekitivitī iiki ʻe tolu ke ʻoange kimuʻa ki he kau akó, kapau kuo vahe

• Fokotuʻu ki hono akoʻi ʻo e konifelenisi vitioó: Te ke lava ʻo vahevahe ʻa e kalasí ki ha ngaahi kulupu tautau toko tolu pea vahe ki he tokotaha ako takitaha ʻi he kulupu takitaha ha taha ʻo e ngaahi ʻekitivitī ʻe tolú, kae ʻoua ʻe vahe kimuʻa ʻa e ngaahi ʻekitivitī ʻe tolú ki ha kau ako ʻe toko tolu. Fakaʻaongaʻi leva e fanga kiʻi loki fetalanoaʻakí ke lava e kau akó ʻo akoʻi ki heʻenau kulupú e meʻa ne nau teuteú. Kapau te ke fakaʻaongaʻi ʻa e fili ko ʻení, fakakaukau ke hiki mei he kulupu ki he kulupu lolotonga e faiako ʻa e kau akó.