“2 Nīfai 5: Nofo ʻi he Fiefia,” Tohi ʻa Molomoná – Tohi Lēsoni ʻa e Faiakó (2024)

“2 Nīfai 5: Nofo ʻi he Fiefia,” Tohi ʻa Molomoná – Tohi Lēsoni ʻa e Faiakó

2 Nīfai 5

Nofo ʻi he Fiefia

Hili e māvahevahe ʻa Nīfai mo hono ongo taʻoketé, naʻá ne fokotuʻu mo kinautolu ne muimui ʻiate iá ha kiʻi kolo foʻou. Naʻe tupulaki pea moʻui ʻa e kakai ʻo Nīfaí ʻi he fiefia. ʻE lava ke tokoni atu e lēsoni ko ʻení ke ke ʻiloʻi ʻa e meʻa te ke lava ʻo fai ke ke nofo ai ʻi he fiefiá.

Ko hono poupouʻi e kau maí. Lolotonga hono teuteu e ngaahi lēsoní mo fengāueʻaki mo e kau akó, kumi ha ngaahi founga ke fakaafeʻi ai e kau akó ke nau kau longomoʻui mai. ʻE tokoni hono fai iá ki he kau akó ke nau kau ʻi he akó mo tokoniʻi kinautolu ke nau ofi ange ki he Fakamoʻuí.

Teuteu ʻa e tokotaha akó: Fakaafeʻi e kau akó ke nau aleaʻi mo ha kaungāmeʻa falalaʻanga pe mēmipa ʻo e fāmilí ʻa e faikehekehe ʻo e fiefiá mo e fakafiefiá.

Ngaahi ʻEkitivitī Ako ʻOku Ala Fakahokó

Nofo ʻi he fiefia

Fakakaukau ke hiki ʻa e fehuʻi “Ko e hā e meʻa ʻokú ne ʻai ha taha ke fiefiá?” ʻi he palakipoé pea kole ki he kau akó ke vahevahe pe ko e hā ha tali ʻa ha toʻu tupu; pea aleaʻi ʻa e founga ʻe ala tali ʻaki ʻe he Fakamoʻuí.

Fakaafeʻi e kau akó ke nau fakakaukau fakalongolongo ki he founga ʻoku fakafehoanaki ai ʻenau talí ki he founga ʻoku nau pehē ʻe ala tali mai ʻaki ʻe he Fakamoʻuí. Fakaafeʻi kinautolu ke nau fekumi ki ha fakahā ʻi heʻenau ako e lēsoni ko ʻení ke nau ʻiloʻi e meʻa ʻoku finangalo e Tamai Hēvaní ke nau ʻiloʻi pe fakahokó.

ʻOku fakaikiiki ʻe he 2 Nīfai 5 ʻa e mavahe ʻa e fāmili ʻo Līhaí ki he kau Nīfaí mo e kau Leimaná. ʻI he palani ʻa Leimana mo Lēmiuela ke tamateʻi ʻa Nīfaí, naʻe fakatokanga ʻa e ʻEikí kia Nīfai ke mavahe mei hono ngaahi tokouá (vakai, 2 Nīfai 5:1–5). Naʻe talangofua ʻa Nīfai ki he ʻEikí peá ne mavahe mo kinautolu naʻa nau “tui ki he ngaahi fakatokanga mo e ngaahi fakahā ʻa e ʻOtuá” (2 Nīfai 5:6) pea nau fokotuʻu ha kiʻi kolo foʻou.

Naʻe nofo pē ʻa e kau Leimaná ʻi he fonuá pea naʻa nau angatuʻu ʻo fakafepaki ki he ʻEikí. Naʻe “motuhi atu ʻa [kinautolu] mei [hono] ʻaó” (2 Nīfai 5:20). Ko e fakamalaʻia ʻoku fakamatalaʻi ʻi he vahe ko ʻení ko e mavahe ia mei he ʻOtuá (vakai, 2 Nīfai 5:20–24). Ko e liliu ʻi he kili ʻo e kau Leimaná ko ha fakaʻilonga pe fakahaaʻi ia ʻo e fakamalaʻiá. ʻOku ʻikai ke mahino kakato ʻa e natula ʻo e fakaʻilonga ko ʻení. Naʻe kamata ke fakafaikehekeheʻi ʻe he fakaʻilongá ʻa e kau Leimaná mei he kau Nīfaí. Kimui angé, ʻi he fakatou aʻusia ʻe he kau Nīfaí mo e kau Leimaná ha vahaʻa-taimi ʻo ʻenau faiangahalá mo e māʻoniʻoní, naʻe fakaʻau ke ʻikai toe mahuʻinga ʻa e fakaʻilongá ko ha fakahaaʻiʻanga ʻo e tuʻunga ʻo e kau Leimaná ʻi he ʻao ʻo e ʻOtuá.

ʻOua naʻá ke fakamahamahalo ki he fakamalaʻiá. Kapau ʻoku ʻi ai ha ngaahi fehuʻi ʻa e kau akó, ʻe lava ke maʻu ha fakamatala lahi ange ʻi he konga ko e “Ngaahi Fakamatala Fakamahinó mo e Puipuituʻá.”

Lau ʻa e 2 Nīfai 5:27 pea fakatokangaʻi ʻa e founga hono fakamatalaʻi ʻe Nīfai ʻa e kolo foʻou naʻá ne fokotuʻú.

ʻOkú ke pehē ʻoku ʻuhinga ki he hā e nofo ʻi he fiefiá?
Ko e hā ha ngaahi faingataʻa ʻe ala hoko ʻi he nofo ʻi he fiefiá?

Vakai ki he ngaahi veesi kimuʻa ʻi he vahé ke maʻu ha ʻilo ki he meʻa naʻe fai ʻe he kau Nīfaí ʻo tupu ai ʻenau nofo ʻi he fiefiá?

Lau ʻa e 2 Nīfai 5:10–17, 26 pea fakakakato ʻa e fakamatala ko ʻení ʻaki e meʻa ʻokú ke maʻú:

lava ʻo tokoni mai ke u muimui ʻi he Fakamoʻuí mo nofo ʻi he fiefia.

Te ke lava ʻo hiki e fakamatala ʻi he palakipoé pea ʻai ke haʻu e kau akó ʻo hiki ʻa e meʻa ʻoku nau maʻú hili ʻenau laú.

Ko e hā mo ha toe meʻa ʻokú ke pehē ʻe tokoni atu ke ke nofo ʻi he fiefiá?”
Ko e hā hono tuʻo lahi hoʻo kau ʻi he faʻahinga ʻekitivitī pehení?

ʻOku fokotuʻutuʻu e ngaahi ʻekitivitī ko ʻení ko ha fanga kiʻi lēsoni iiki maʻá e kau akó ke nau feakoʻiʻaki. Ko ʻeni ha ngaahi fakakaukau ʻe niʻihi ki he founga hono fakaʻaongaʻi kinautolú:

Vahevahe e kalasí ki ha ngaahi kulupu tautau toko tolu pea tuku ki he mēmipa takitaha ʻo e kulupú ke teuteu mo akoʻi ha taha ʻo e ngaahi lēsoni ʻe tolú ki heʻenau kulupú.
Vahe kei taimi e ngaahi lēsoní ki ha kau ako ʻe toko tolu te nau lava ʻo teuteu pea nau haʻu mateuteu ke akoʻi e kalasí.
Aleaʻi fakakalasi ha lēsoni ʻe taha pe lahi ange.

Ko ha founga ʻe tolu ʻoku malava ke fakaʻosi ʻaki e sētesi ko ʻení ko e “Talangofua ki he ngaahi fono ʻa e ʻOtuá,” “Ngāué,” mo e “Ko e temipalé.” Toe fekumi ke loloto ange ki he ngaahi ʻekitivitī ʻoku hoko atu aí.

ʻEkitivitī Ko e Talangofua ki he ngaahi fono ʻa e ʻOtuá

Tohi ʻa Molomoná – Tohi Lēsoni ʻa e Faiakó (2024)—“2 Nīfai 5: Nofo ʻi he Fiefia

Fakakaukau ke fakaafeʻi e kau akó ke nau tauhoa ʻo aleaʻi e ngaahi fehuʻi ko ʻení:

Ko e hā ha niʻihi ʻo e ngaahi lao ʻi homou koló?
Ko e hā ha ola ʻo e muimui maʻu pē pe ʻikai ke muimui ʻi he ngaahi lao ko iá?
ʻOku faitatau pe kehe fēfē ʻa e fakafehoanaki ko ʻení mei he ngaahi fono ʻa e ʻOtuá?

Naʻe talangofua ʻa Nīfai mo hono kau muimuí ki he ngaahi fekau ʻa e ʻEikí (vakai, 2 Nīfai 5:10). Lau ʻa e potufolofola fakataukei fakatokāteline Mōsaia 2:41 pea fekumi ki he meʻa naʻe fie maʻu ʻe he Tuʻi ko Penisimaní ke mahino ki hono kakaí fekauʻaki mo hono tauhi e ngaahi fekau ʻa e ʻOtuá. ʻE lava ke mou fakafekauʻaki e veesi ko ʻení ki he 2 Nīfai 5:10.

ʻOkú ke pehē ʻoku tokoniʻi fēfē nai kitautolu ʻe he talangofua ki he ngaahi fono ʻa e ʻOtuá ke tau fiefiá?
Naʻe fakatātaaʻi fēfē nai ʻe Sīsū Kalaisi ʻa e talangofuá?

ʻE lava ke ke hiki ʻi he palakipoé pe ʻi ha laʻipepa ha lisi ʻo e ngaahi fekau ʻoku nau tokoniʻi kitautolu ke tau toe fiefia angé. ʻEke ki he kau akó e ʻuhinga ne nau fili ai e ngaahi fekau naʻa nau filí.
Ko e hā ha niʻihi ʻo e ngaahi fekau ʻa e ʻOtuá kuo nau ʻomi kiate koe ha fiefia ʻoku lahi angé?

Fakakaukau ke ke vahevahe hoʻo aʻusiá pe fakamoʻoní fekauʻaki mo e felāveʻi ʻa e fiefiá mo e talangofua ki he ngaahi fekau ʻa e ʻOtuá.

ʻEkitivitī 2 Ngāué mo e moʻui fakafalala pē kiate kitá

Tohi ʻa Molomoná – Tohi Lēsoni ʻa e Faiakó (2024)—“2 Nīfai 5: Nofo ʻi he Fiefia

Fakaʻaongaʻi ha kiʻi taimi ke ke lisi ai ʻi ha laʻipepa pe ʻi hoʻo tohinoa akó ʻa e ngaahi lelei te ke pehē ʻoku maʻu mei he ngāue mālohí.

Te ke lava ke fakaafeʻi ha kau ako ʻe niʻihi ke nau vahevahe e meʻa ne nau hikí.

Lau ʻa e 2 Nīfai 5:11, 15, 17 pea feinga ke ʻiloʻi ʻa e ngaahi founga kehekehe naʻe ngāue ai e kau Nīfaí mo e ngaahi ola ʻo ʻenau ngaahi ngāué.

Ko e hā e meʻa naʻá ke maʻú?

Fakakaukau ke ʻai e kau akó ke nau tauhoa ʻo fakahoko ʻeni.

Lau ʻa e “Ngāue mo e Moʻui Fakafalala Pē Kiate Kitá” ʻi he kiʻi tohi Ki Hono Fakamālohia ʻo e Toʻu Tupú (2011) pea vakai ki he meʻa ʻokú ke ako fekauʻaki mo e tefitoʻi moʻoni ʻo e ngāué.

Ko e hā mo ha toe ngaahi lelei kehe ʻo e ngāué naʻá ke maʻú? (Fakakaukau ke tānaki atu ʻeni ki hoʻo lisí.)
Ko e fē ʻi he ngaahi lelei ko ʻení kuó ke ʻosi aʻusiá?
ʻE tokoniʻi fēfē nai ʻe he ngāué ha taha ke ne hoko ʻo hangē ange ko Sīsū Kalaisí?

Fakamatala Fakamahinó mo e Puipuituʻá

Ko e hā mo ha toe meʻa te tau lava ʻo fai ke fakaafeʻi ai ʻa e fiefiá ki heʻetau moʻui?

Naʻe akoʻi ʻe ʻEletā Kolotiō R. M. Kositā ʻo e Kau Fitungofulú:

ʻOku tau ako ʻoku maʻu ʻa e fiefiá ʻi hono fai ʻo e fanga kiʻi meʻa iiki ʻoku nau langaki hake kitautolú, ʻa ia ʻoku nau fakatupulaki ʻetau tuí mo e fakamoʻoní. Fanga kiʻi meʻa iiki ʻoku tau fakahoko ʻi heʻetau moʻui fakaʻahó, hangē ko e:

ʻOku tau fiefia ʻi heʻetau lotu he pongipongi mo e pō kotoa pē, ʻi he taimi ʻoku tau ongoʻi ai ʻoku fanongo mai ʻa e ʻEikí kiate kitautolu pea ʻokú Ne finangalo maʻu pē ke tāpuakiʻi, fakamolemoleʻi, mo tokoniʻi kitautolú. ʻOku tau fiefia ʻi heʻetau ongoʻi e ngaahi ueʻi ʻa e Laumālie Māʻoniʻoní ʻi heʻetau moʻuí—ʻi heʻetau ongoʻi e Laumālié ʻi he taimi ʻoku tau fai ai ha ngaahi tuʻutuʻuni mahuʻinga ʻi he moʻuí. … Ko hono fakanounoú, te tau lava ʻo ongoʻi fiefia ʻi he ʻaho kotoa pē ʻi heʻetau moʻuí ʻo fakafou ʻi he fanga kiʻi meʻa iiki ʻoku tau fakahokó, pea ʻoku tau fiefia kakato ʻi heʻetau tauhi e ngaahi fekau ʻa ha ʻOtua ʻofa ʻokú Ne tokanga mai kiate kitautolu. (Claudio R. M. Costa, “Fun and Happiness,” Liahona, Nov. 2002, 92–93)

2 Nīfai 5:20–21. Ko e hā ʻa e fakamalaʻia naʻe hoko ki he kakai Leimaná?

ʻI he kuonga ʻo Nīfaí, ko e mala ʻo e kakai Leimaná, naʻe “motuhi atu ʻa [kinautolu] mei he ʻao ʻo e ʻEikí … koeʻuhi ko ʻenau angahalá” (2 Nīfai 5:20–21). Naʻe ʻuhinga ʻeni, naʻe fakamavaheʻi ʻa e Laumālie ʻo e ʻEikí mei heʻenau moʻuí. ʻI he taimi ne tali ai ʻe he kau Leimaná kimui ange e ongoongolelei ʻo Sīsū Kalaisí, “naʻe ʻikai ke toe ʻiate kinautolu ʻa e fakamalaʻia ʻa e ʻOtuá” (ʻAlamā 23:18).

ʻOku toe pehē foki ʻi he Tohi ʻa Molomoná, naʻe ʻi ai ha fakaʻilonga ʻo ha kili lanu ʻuliʻuli ʻo e kau Leimaná hili e mavahe ʻa e kau Nīfaí meiate kinautolú. ʻOku ʻikai ke mahino kakato ʻa e natula mo e fōtunga ʻo e fakaʻilonga ko ʻení. Naʻe kamata ke fakaʻilongaʻi makehe ʻe he fakaʻilongá ʻa e kau Leimaná mei he kau Nīfaí. ʻI he foua kimui ange ai ʻe he kau Nīfaí mo e kau Leimaná fakatouʻosi ʻa e vahaʻataimi ʻo e faiangahalá mo e anga faitotonú, naʻe ʻikai toe ʻaonga ʻa hono fakaʻilongaʻi ʻe he fakaʻilongá ʻa e kau Leimaná’ ʻi heʻenau tuʻu ʻi he ʻao ʻo e ʻOtuá.

ʻOku fakapapauʻi mai ʻe he kau palōfitá ʻi hotau kuongá ni ko e kili fakapōpōʻulí ʻoku ʻikai ko ha fakaʻilonga ia ʻo ha houhau fakalangi pe fakamalaʻia. ʻOku tali ʻe he Siasí ʻa e akonaki ʻa Nīfaí, ʻoku “ʻikai taʻofi ʻe he ʻEikí ha tokotaha ʻoku haʻu kiate ia, pe ko ha ʻuliʻuli pe hinehina, pe ko ha pōpula pe tauʻatāina, pe ko ha tangata pe fefine” (2 Nīfai 26:33). Naʻe pehē ʻe Palesiteni Lāsolo M. NaLēsoni:

“Naʻe fakamamafaʻi ʻe he ʻEikí ʻa ʻEne tokāteline mahuʻinga ʻo e faingamālie potupotutataú maʻa ʻEne fānaú. …

“…ʻOku ʻikai mahuʻinga e ngaahi faikehekehe ʻi he anga fakafonuá, leá, tangata pe fefiné, matakalí, mo e fōtunga ʻo e matá ki he fononga ʻa e kau faivelengá ʻi he hala ʻo e fuakavá mo haʻu ki hotau Huhuʻi ʻofeiná” (“President Nelson Remarks at Worldwide Priesthood Celebration,”1 Sune 2018, newsroom.ChurchofJesusChrist.org).

“ʻOku ou fakapapauʻi atu ʻoku ʻikai ke makatuʻunga hoʻo tuʻu ʻi he ʻao ʻo e ʻOtuá ʻi he lanu ho kilí. ʻOku makatuʻunga ʻa e hoifua mo e ʻikai ke hoifua mai ʻa e ʻOtuá mei hoʻo tauhi mateaki ki he ʻOtuá mo ʻEne ngaahi fekaú kae ʻikai ko e lanu ho kilí” (”Tuku ke Lāngilangiʻia ʻa e ʻOtuá,” Liahona, Nōvema 2020, 94).