“2 Nīfai 5:1–9: Ko e Ngaahi Fakatokanga ʻa e ʻOtuá,’” Tohi ʻa Molomoná – Tohi Lēsoni ʻa e Faiakó (2024)
“2 Nīfai 5:1–9: Ko e Ngaahi Fakatokanga ʻa e ʻOtuá,’” Tohi ʻa Molomoná – Tohi Lēsoni ʻa e Faiakó
2 Nīfai 5:1–9
Ko e Ngaahi Fakatokanga ʻa e ʻOtuá
Pau pē naʻe fakamamahi kia Nīfai. Koeʻuhí ko e palani ʻa Leimana mo Lēmiuela ke fakapoongi iá, naʻe fakatokanga ai kia Nīfai ke ne ʻave “ʻa kinautolu ʻa ia naʻa nau tui ki he ngaahi fakatokanga mo e ngaahi fakahā ʻa e ʻOtuá” (2 Nīfai 5:6) pea hola ki he feituʻu maomaonganoá. ʻI he taimi ʻe niʻihi, ʻe lava foki ke fakatokanga mai e ʻEikí kiate kitautolu felaveʻi mo e ngaahi fakatuʻutāmaki fakatuʻasino mo fakalaumālie ʻoku nau ʻākilotoa kitautolú. ʻE lava ke tokoniʻi koe ʻe he lēsoni ko ʻení ke ke muimui ki he ngaahi fakatokanga ʻoku ʻomi ʻe he ʻEikí ʻi he ʻofa ke maluʻi koé.
Ko hono faʻu ha ʻātakai ʻo e tali leleí mo e fakaʻapaʻapá. Fakatupulaki ha ongoʻi ʻo e kau atú ʻi he tokotaha ako takitaha ʻaki hono ʻiloʻi moʻoni ʻoku fie maʻu ʻa e tokotaha ako takitaha, fakamahuʻingaʻi ha ngaahi puipuituʻa mo ha ngaahi tūkunga kehekehe, pea ʻoange ha ngaahi faingamālie ki he kau akó ke nau fefakamālohiaʻaki pea mo e Fakamoʻuí. Te ke lava foki ʻo tokoniʻi e kau akó ke nau ʻilo ʻoku nau fakahoko ha fatongia ʻi he ngāue ʻa e ʻOtuá.
Teuteu ʻa e tokotaha akó: Fakakaukau ke fakaafeʻi e kau akó ke nau haʻu mateuteu ki he kalasí ke vahevahe ha aʻusia ʻi ha taimi naʻe fakahoko ange ai ʻe ha taha ha fakatokanga pea naʻa nau houngaʻia ai.
Ngaahi ʻEkitivitī Ako ʻOku Ala Fakahokó
Ngaahi fakatokangá
Fakakaukau ke fakaʻaliʻali ha niʻihi ʻo e ngaahi fakaʻilonga fakatokangá pea ʻeke ha ngaahi fehuʻi hangē ko ʻení ke tokoni ki he kau akó ke nau aleaʻi ʻa e founga ʻe lava ke hoko ai e ngaahi fakatokangá ko ha ngaahi tāpuakí.
Te ke lava foki ʻo fakakaukau ke tuku ha meʻa ʻuli pe pikipiki ʻi ha taha ʻo e ngaahi seá pea tuku takai ha ngaahi fakaʻilonga fakatokanga ʻi he sea ko iá kimuʻa he kalasí.
-
Ko e hā ʻoku mahuʻinga ai ʻa e ngaahi fakaʻilonga fakatokanga hangē ko ʻení?
-
Ko e hā ka vakai ai ha kakai ʻe niʻihi ki ha ngaahi fakaʻilonga fakatokangá ʻi he loto houngaʻia? ʻi he fakatupu-ʻitá?
-
Ko e fē ha taimi kuó ke houngaʻia ai hano fai atu ha fakatokanga kiate koe?
ʻI hoʻo ako he ʻaho ní, fakakaukau ki he ʻuhinga ʻoku ʻomi ai ʻe he ʻOtuá ha ngaahi fakatokanga kiate kitautolú. Feinga foki ke ke manatuʻi ha ngaahi founga kehekehe naʻá ke mei tali ʻaki e ngaahi fakatokanga kuó Ne ʻomí.
Ngaahi fakatokanga ʻa e ʻOtuá kia Nīfaí
Lau ʻa e 2 Nīfai 5:1–9, ʻo kumi ai ki ha fakatokanga naʻe fai ʻe he ʻEikí kia Nīfai hili ʻene hoko ko e taki fakalaumālie ʻo e fāmilí hili e pekia ʻa Līhaí.
Feinga ke ke fakakaukauloto ko ha taha koe ʻo e toʻu tupu Nīfaí ʻa ia naʻe fakaafeʻi honau ngaahi fāmilí ke muimui ʻia Nīfaí.
-
Ko e hā naʻe mei faingataʻa ai ke mavahé?
-
Ko e hā e meʻa naʻe mei fie maʻu ke ke fakahoko ke ke fili ai ke muimui ʻia Nīfai ki he feituʻu maomaonganoá?
-
Fakatatau ki he veesi 6, ko e hā e meʻa naʻá ne fakapapauʻi ko hai naʻe ʻalu mo iá?
Ko e moʻoni ʻe taha ʻoku lava ke tau ako mei he meʻa ko ʻeni naʻe hokó ʻoku lava ʻe he ʻOtuá ke taki kitautolu ke tau mavahe mei he fakatuʻutāmakí kapau te tau fili ke tui ki Heʻene ngaahi fakahaá mo tokanga ki Heʻene kau palōfitá.
ʻE ala tokoni ha fealēleaʻaki fakakalasi ke ongoʻi houngaʻia ai e kau akó ʻoku feʻunga e ʻofa ʻa e ʻOtuá ʻiate kitautolú ke fakatokanga mai ai kiate kitautolu fekauʻaki mo e ngaahi fakatuʻutāmakí.
Ke tokoniʻi ha fealēleaʻaki, te ke lava ʻo poupouʻi e kau akó ke nau feinga ke fakakaukauloto ki he founga ʻe kehe ai ʻa e māmaní (pe ko ʻenau moʻui fakatāutahá) kapau naʻe ʻikai fakatokanga mai ʻa e ʻOtuá kiate kitautolu fekauʻaki mo ha faʻahinga meʻa. Fakaafeʻi leva ha niʻihi ʻo e kau akó ke vahevahe ʻenau ngaahi fakakaukaú mo e kalasí. ʻI hono aleaʻi ʻe he kau akó ʻenau ngaahi fakakaukaú, tokoniʻi kinautolu ke nau ʻilo ko e ngaahi fakatokanga ʻa e ʻOtuá ko ha fakaʻilonga ia ʻo ʻEne ʻofa mo tokanga mai kiate kitautolú. ʻE lava ke fakaʻaongaʻi ʻa e vitiō ko ʻení mo ha niʻihi ʻo e ngaahi fehuʻí ni ke fakaloloto ange e fealēleaʻaki ʻa e kalasí.
-
ʻOkú ke pehē ko e hā e ʻuhinga ʻoku tau fie maʻu ai e ngaahi fakatokanga ʻa e ʻOtuá ʻi hotau kuongá?
-
Ko e hā ha ngaahi founga kehekehe ʻoku fakahoko ai ʻe he ʻOtuá ʻEne ngaahi fakatokanga ke ʻilo ki ai ʻa e kakaí fakalūkufua mo fakafoʻituitui fekauʻaki mo honau ngaahi tūkunga paú?
-
Ko e hā ha ngaahi ʻuhinga ʻe ala fili ai ha taha ke ʻoua te ne muimui ki he ngaahi fakatokanga ʻa e ʻOtuá, pea te ke tali fēfē nai ki ha taha ʻokú ne ʻomi ha taha ʻo e ngaahi ʻuhinga ko ʻení?
-
Kuo maluʻi fēfē nai koe pe ko e niʻihi ʻokú ke ʻofa aí ʻi hono muimuiʻi e ngaahi fakatokanga mei he ʻOtuá? Vahevahe ha sīpinga pau kapau te ke lava ʻo fakakaukau ki ai.
ʻOku fakatokanga mai e ʻOtuá kiate kitautolu ʻo fakafou ʻi Heʻene kau palōfitá.
Ko e taha ʻo e ngaahi founga ʻoku fakatokanga mai ai ʻa e ʻOtuá ʻi he ʻofa kiate kitautolú fekauʻaki mo e fakatuʻutāmakí ko hono fakafou mai ia ʻi Heʻene kau palōfita moʻuí. Hangē ko ʻení, ʻi he 2 Nīfai 5:5–6, naʻe fanongo ha tokolahi ʻo e fāmili ʻo Nīfaí ki he fakatokanga naʻe fai kiate ia ʻe he ʻEikí ke nau mavahe ki he feituʻu maomaonganoá. (Vakai foki, ʻĀmosi 3:7.) ʻOku tau maʻu foki mo ha ngaahi fakatokanga fakaepalōfita lahi mei he ʻOtuá maʻatautolu ʻi Heʻene folofolá.
Tuku ha kiʻi taimi ke ke fekumi ai ʻi he folofolá ki he ngaahi fakatokanga kuo foaki mai ʻe he ʻOtuá kiate kitautolu ʻo fakafou mai ʻi Heʻene kau palōfita ʻi he kuohilí. (ʻOku kau ai ʻa e ʻAlamā 41:10; Molonai 10:30, 32; Tokāteline mo e Ngaahi Fuakava 63:57–58; 89:1–4.)
Fakakaukau ke fakaʻatā e kau akó ke nau kumi ʻiate kinautolu pē ha ngaahi fakatokanga mei he ʻOtuá ʻi he ngaahi folofola. Te ke lava ʻo ʻoange ʻa e ngaahi sīpinga ʻi ʻolungá pe ko ha ngaahi sīpinga kehe kapau ʻoku nau fie maʻu tokoni.
Fakaʻaliʻali e ngaahi fehuʻi ko ʻení lolotonga ʻenau akó. Fakaafeʻi leva kinautolu ke nau vahevahe ʻenau ngaahi talí ʻi ha fanga kiʻi kulupu iiki.
-
Ko e hā ha ngaahi fakatokanga naʻá ke maʻu ʻokú ke pehē ʻoku fie maʻu lahi taha ʻe he māmaní he ʻahó ni?
-
ʻOkú ke pehē ko e hā e ngaahi ola ʻo e talangofua pe taʻe-tokanga ki he ngaahi fakatokanga ko ʻení?
-
ʻOku hoko fēfē nai ʻa e ngaahi fakatokanga ko ʻení ko ha fakamoʻoni ʻo e ʻofa ʻa e ʻOtuá?
-
ʻE tokoni fēfē nai ʻa e talangofua ki he ngaahi fakatokanga naʻá ke maʻú ke ke hoko ʻo hangē ange ai ko Sīsū Kalaisí?
-
ʻE lava fēfē nai ke tau vā mamaʻo ai mo Ia ʻi heʻetau taʻe-tokanga ki Heʻene ngaahi fakatokangá?
Ngaahi fakatokanga ʻa e ʻOtuá maʻaú
Fakakaukau ke vahevahe ha aʻusia fakataautaha ʻi ha taimi naʻe tāpuakiʻi ai koe ʻi haʻo muimui ki ha fakatokanga mei he ʻOtuá.
Hili ia pea ʻoange ki he kau akó ha taimi fakalongolongo feʻunga ke nau fakalaulauloto mo hiki ʻenau ngaahi fakakaukaú mo e ngaahi ongó ʻi heʻenau tohinoa akó ke fakaʻosi ʻaki ʻa e lēsoní. ʻE ala tokoni ʻa e fakamatala mo e ngaahi ueʻi fakalaumālie ko ʻení ke teuteuʻi e kau akó kimuʻa pea nau toki tohí.
Naʻe akonaki ʻa Palesiteni Poiti K. Peeka (1924–2015) ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:
ʻOku ʻikai ha ʻamanaki te mou foua e moʻuí taʻe ʻi ai haʻamou fehalaaki, ka he ʻikai te mou fakahoko ha fehalaaki lahi taʻe tomuʻa fakatokanga atu e ngaahi ueʻi ʻa e Laumālié. ʻOku kaungatonu e palomesi ko ʻení ki he kāingalotu kotoa ʻo e Siasí. (Boyd K. Packer, “Faleʻi ki he Toʻu Tupú,”Ensign peLiahona, Nōvema 2011, 18)
-
Kuo fakatokanga mai nai ʻa e Tamai Hēvaní kiate au ki ha meʻa pau ʻi heʻeku moʻuí ʻo fakafou ʻi he ngaahi fakakaukau pe ngaahi ongo mei he Laumālié?
-
ʻOku ʻi ai nai ha ngaahi fakatokanga pau mei he ʻOtuá kuó u maʻu ʻo fakafou mai ʻi he kau taki ʻo e Siasí, mātuʻa tauhi fānaú, ngaahi tāpuaki ʻo e lakanga fakataulaʻeikí, pe ngaahi founga kehe? ʻOku ou fēfē nai ʻi heʻeku muimui kiate kinautolú?
-
Ko e hā ha meʻa ʻe taha ʻoku ou pehē ʻoku finangalo e Tamai Hēvaní ke u fakahoko ʻaki ʻa e meʻa ne u ako pe ongoʻi he ʻaho ní?