2 Nīfai 6–10

Vakai Fakalūkufuá

Naʻe vahevahe ʻe he tokoua ʻo Nīfai ko Sēkopé ʻa e ngaahi kikite fekauʻaki mo hotau kuongá ni pea mo hono tānaki fakataha ʻo ʻIsilelí ʻa ia ʻe lava ʻo tokoni ke mahino kiate kitautolu hotau fatongia ʻi he ngāue ʻa e ʻEikí ʻi he ngaahi ʻaho kimui ní. Naʻá Ne akoʻi ʻa e kau Nīfaí fekauʻaki mo e ngaahi tūkunga ʻoku fehangahangai mo e faʻahinga kotoa ʻo e tangatá koeʻuhí ko e Hinga ʻa ʻĀtama mo ʻIví. Naʻá ne fakahā ʻoku fakahaofi kitautolu ʻe Sīsū Kalaisi mei he ngaahi nunuʻa ʻo e Hingá, pea naʻá ne fakatokanga ki he ngaahi tōʻonga mo e ʻulungaanga ʻoku nau tohoakiʻi kitautolu meia Kalaisí. Naʻá ne fakaafeʻi hono kakaí ke nau haʻu kia Kalaisi pea ke nau keinanga ʻi he ngaahi tāpuaki ʻo e ongoongoleleí.

Teuteu ke Faiako

ʻOku ʻoatu ʻe he fakamatala ko ʻení ki he kau faiakó ha ngaahi fakakaukau ki he meʻa ʻe ala fie maʻu ke teuteuʻi kimuʻa ki he lēsoni takitaha.

2 Nīfai 6–10

Taumuʻa ʻo e lēsoní: ʻE lava ke tokoni ʻa e lēsoni ko ʻení ke ongoʻi ʻe he kau akó ha holi lahi ange ke nau kau mo e ʻEikí ʻi hono tānaki fakataha ʻo ʻIsileli ʻi he ngaahi ʻaho kimui ní.

• Teuteu ʻa e tokotaha akó: Fakaafeʻi e kau akó ke nau omi mateuteu ke vahevahe e ngaahi aʻusia kuo nau maʻu ʻi heʻenau kau ki hono tānaki ʻo ʻIsilelí.

• Ngaahi Vitioó: “ ʻAmanakiʻanga ʻo ʻIsileli” (1:01:34; mamata mei he taimi 39:36 ki he 40:05 pea mei he taimi 40:29 ki he 43:38).

• ʻĪmisí: Ko ha fuka, tūhulu, pe fakaʻilonga ʻoku fokotuʻu.

• Fokotuʻu ki hono akoʻi ʻi he konifelenisi fakavitioó: Ki he ʻekitivitī ʻi lalo ʻi he “Faʻu ha palani ke tokoni ki he ʻEikí ke tānaki ʻa ʻIsilelí,” fakakaukau ke hiki tatau mo fakapipiki e ngaahi maʻuʻanga tokoni ʻi he fetalanoaʻakí ke lava e kau akó ʻo maʻu vave kinautolu. ʻE ala tokoni foki ke ʻoange ki he kau akó ha taimi fakangatangata ke nau toe vakaiʻi ai e ngaahi maʻuʻanga tokoní mo ha fakamanatu ʻi he taimi ʻe toe ai ha miniti ʻe tahá. ʻE lava ke tokoni ʻeni kiate kinautolu ke fakaʻosi ʻenau akó pea tuku ange ha taimi ke nau faʻu ai ʻenau palaní pea vahevahe ia mo e kalasí.

2 Nīfai 9:1–26

Taumuʻa ʻo e lēsoní: ʻE lava ke tokoniʻi ʻe he lēsoni ko ʻení ʻa e kau akó ke nau ongoʻi houngaʻia lahi ange ʻi he fatongia ʻo Sīsū Kalaisi ʻi hono tokoniʻi kitautolu ke tau ikunaʻi e angahalá mo e maté.

• Teuteu ʻa e tokotaha akó: Fakakaukau ke fakaafeʻi e kau akó ke nau ako ʻa e 2 Nīfai 9:1–26. Te nau lava ʻo fakaʻilongaʻi ʻi ha founga ʻe taha ʻa e meʻa ʻe hoko kiate kitautolú taʻe-kau ai ʻa e Fakalelei ʻa Sīsū Kalaisí, pea ʻi ha founga kehe te nau lava ai ʻo fakaʻilongaʻi ʻa e meʻa ʻe lava ke hoko kiate kitautolú koeʻuhí ko Sīsū Kalaisi mo ʻEne Fakaleleí.

•  

• Meʻa ke fakaʻaliʻalí: Ko e saati ʻokú ne fakahaaʻi ʻa e tuʻunga ʻe ʻi ai ʻa e moʻuí ʻi he ʻi ai mo e ʻikai ke ʻi ai ʻa e Fakamoʻuí

• Fokotuʻu ki hono akoʻi he konifelenisi fakavitioó: Fakakaukau ke fakaʻaongaʻi e polokalama palakipoé ʻi hoʻo polokalama konifelenisi fakavitioó. Fakaʻatā e kalasí ke nau fakafonu e tafaʻaki takitaha ʻo e sātí ʻi hoʻomou ako fakatahá.

2 Nephi 9:27–49

Taumuʻa ʻo e lēsoní: ʻE lava ke tokoni ʻa e lēsoni ko ʻení ki he kau akó ke nau fakaʻehiʻehi mei he ngaahi tōʻonga ʻoku iku ki he loto-mamahí pea fakamavaheʻi ai kinautolu meia Sīsū Kalaisí.

• Teuteu ʻa e tokotaha akó: Fakaafeʻi e kau akó ke nau tokanga pe ko e fē ʻi heʻenau ngaahi ngāue ʻi he vahaʻa ʻo e taimí ni mo e kalasi hokó ʻokú ne tokoniʻi kinautolu ke nau ongoʻi ofi ange ki he ʻOtuá pea mo e ngaahi ngāue fē ʻokú ne ʻai ke nau ongoʻi mamaʻo ange ai meiate Iá.

• Ngaahi meʻa: Ko ha meʻa, hangē ko e foʻi lole, ʻe fiefia ai e kau akó ʻi hono kumi ki he vaʻinga “vela pe momoko” ʻi he kamataʻanga ʻo e lēsoní

•  

• Fokotuʻu ki hono akoʻi ʻi he konifelenisi fakavitioó: Fakaafeʻi e kau akó ke omi mateuteu ki he kalasí ke vahevahe ha ngaahi sīpinga ʻo ha kakai ʻoku nau ʻilo fakalaumālie, ko ha founga ia ʻe taha ki he teuteu ʻa e tokotaha akó. Kapau ʻe lava, fakakaukau ke poupouʻi kinautolu ke nau ʻomi ha fakatātā ʻo e tokotaha ne nau filí pea puke hake ia ki he meʻafaitaá lolotonga ʻenau vahevahe ʻenau ngaahi fakakaukaú.

2 Nīfai 9:50–52

Taumuʻa ʻo e lēsoní: ʻOku fakataumuʻa ʻa e lēsoni ko ʻení ke tokoniʻi e kau akó ke nau ongoʻi ha holi lahi ange ke fekumi ki he ngaahi tāpuaki mo e fiemālié ʻa ia ko Sīsū Kalaisi pē te Ne lava ʻo ʻomaí.

• Teuteu ʻa e tokotaha akó: Fakaafeʻi e kau akó ke nau fakakaukau ki ha ngaahi fili kuo nau fakahoko, ngaahi feituʻu kuo nau ʻalu ki ai, pe ngaahi meʻa kuo nau ako ʻoku nau ʻomi ha fiemālie tuʻuloa ki heʻenau moʻuí.

• Ngaahi meʻa: Ko ha ngaahi ipu ʻoku fonu ʻi ha ngaahi meʻa he ʻikai ke ne lava ʻo toʻo e fieinua ʻa ha taha, hangē ko e soiá, masitatí, pe ko ha huhuʻa kalamela pe sokoletí. (Te ke lava foki ʻo ʻomi ha meʻakai he ʻikai ke ne fakamākona ʻa e fiekaiá, hangē ko e māsimá pe ko ha kiʻi mint siʻisiʻi, pea mo ha meʻakai lahi ange hangē ko ha konga ʻo ha fuaʻiʻakau.)

• Fokotuʻu ki hono akoʻi ʻi he konifelenisi fakavitioó: Fakaʻaongaʻi e ngaahi loki fetalanoaʻakí pea fakaafeʻi e kau akó ke nau vahevahe mo ʻenau ngaahi kulupú ha potufolofola fakafekauʻaki ʻe taha pe lahi ange ne nau maʻu ki he 2 Nīfai 9:50–52. ʻE lava foki ke ngāue fakataha e kau akó mo ʻenau kulupú ke kumi fakataha e ngaahi potufolofola fekauʻakí.

Toe Vakaiʻi Hono 3 ʻo e Fakataukei Fakatokāteliné

Taumuʻa ʻo e lēsoní: ʻOku fakataumuʻa ʻa e lēsoni ko ʻení ke tokoni ke fakatupulaki e mahino ʻa e kau akó pea tuku ke nau akoako fakamatalaʻi ʻa e tokāteline ʻoku akoʻi mai ʻi ha niʻihi ʻo e ngaahi potufolofola fakataukei fakatokāteline ʻo e Tohi ʻa Molomoná.

• Teuteu ʻa e tokotaha akó: Fakaafeʻi e kau akó ke fili ha potufolofola fakataukei fakatokāteline ʻe taha ʻo e Tohi ʻa Molomoná ʻoku mahuʻingamālie kiate kinautolú pea teuteu ke vahevahe mo e kalasí ʻa e ʻuhinga ʻoku mahuʻingamālie ai ʻa e potufolofola ko ʻení.

• Ngaahi meʻa: Ha faʻahinga naunau pē ʻe fie maʻu ʻe hoʻo kau akó kae lava ke fakakakato ai ʻa e ʻekitivitī A, E, F, pe H

• Fokotuʻu ki hono akoʻi ʻi he konifelenisi fakavitioó: Fakakaukau ke ke tokoniʻi e kau akó ke nau fakakaukau ki ha ngaahi meʻa mo ha ngaahi meʻangāue mei honau ʻapí te nau lava ʻo fakaʻaongaʻi ke fakakakato ʻaki e ʻekitivitī A, E, F, pe H. Fakaafeʻi e kau akó ke vahevahe ʻenau ngaahi meʻá mo e kalasí.