2 Nīfai 6; 10

Ko Hono Tānaki Fakataha ʻo ʻIsilelí

ʻOku lahi ha ngaahi kikite ʻi he folofolá ʻoku fekauʻaki mo e ngaahi meʻa ʻo e ngaahi ʻaho kimui ní, pe ko e ngaahi ʻaho ʻoku tau moʻui ai he taimi ní. Naʻe vahevahe ʻe he tokoua ʻo Nīfai ko Sēkopé ha ngaahi kikite fekauʻaki mo hotau kuongá ni pea mo hono tānaki fakataha ʻo ʻIsilelí ʻa ia ʻe lava ʻo tokoni ke mahino kiate kitautolu hotau fatongia ʻi he ngāue ʻa e ʻEikí ʻi he ngaahi ʻaho kimui ní. ʻE lava ke tokoni ʻa e lēsoni ko ʻení ke ke ongoʻi ha holi lahi ange ke kau mo e ʻEikí ʻi hono tānaki fakataha ʻo ʻIsileli ʻi he ngaahi ʻaho kimui ní.

Fokotuʻu ha ʻātakai ako ʻoku longomoʻuí. ʻI he taimi ʻe niʻihi, ʻe ala taau ke fakatupulaki e kau mai ʻa e tokotaha akó mo tukutaha ʻene tokangá ʻo fakafou ʻi he ʻekitivitī fakatuʻasinó. Fakakaukau ke tokoniʻi e kau mai ʻa e kau akó ʻaki hano feʻunuaki kinautolu. Hangē ko ʻení, ʻe lava ke fetongi nofoʻanga e kau akó, tohi ʻi he palakipoé, tuʻu ke lau ha potufolofola, pe fakatātaaʻi ha talanoa mei he folofolá, mo e ʻalā meʻa pehē.

Teuteu ʻa e tokotaha akó: Fakaafeʻi e kau akó ke omi mateuteu ke vahevahe e ngaahi aʻusia kuo nau maʻu ʻi heʻenau kau ki hono tānaki fakataha ʻo ʻIsilelí.

Ngaahi ʻEkitivitī Ako ʻOku Ala Fakahokó

Ngaahi meʻa mahuʻinga ʻoku hokó

Fakakaukau ke fakaʻaliʻali tahataha e ngaahi lea ko ʻeni ʻa Palesiteni Lāsolo M. Nalesoní pea kiʻi taʻofi taimi siʻi koeʻuhí ke lava e kau akó ʻo fakakaukau ki he fakamatala takitaha kimuʻa pea toki hoko atú.

Naʻe toʻo e ngaahi konga ko ʻení mei ha pōpoaki naʻe vahevahe ʻe Palesiteni Lāsolo M. Nalesoni. ʻI hoʻo lau ʻení, fakakaukau ki ha ngaahi tefito ʻe niʻihi naʻe ʻuhinga ki ai ʻa Palesiteni Nalesoni.

• “ʻOku ʻikai ha toe meʻa ʻoku hoko ʻi he māmaní he taimí ni ʻe toe mahuʻinga ange ai. … ʻOku ʻikai mo ha toe meʻa ʻe māʻongoʻonga ange hono olá. ʻIkai mo ha toe meʻa” (Russell M. Nelson mo Wendy W. Nelson, “ʻAmanakiʻanga ʻo ʻIsilelí” [fakataha lotu maʻá e toʻu tupú, 3 Sune 2018], ChurchofJesusChrist.org).

• “ʻOku totonu ke mahuʻinga fau kiate koe … ʻeni” (Russell M. Nelson, “ʻAmanakiʻanga ʻo ʻIsilelí”).

• “Ko e tufakanga ʻeni naʻe ʻomi ai koe ki he māmaní” (Russell M. Nelson, “ʻAmanakiʻanga ʻo ʻIsilelí”).

• Ko e hā ha ngaahi tefito ʻe niʻihi ʻokú ke pehē naʻe ʻuhinga ki ai ʻa Palesiteni Nalesoni ʻi he ngaahi fakamatala ko ʻení?

Mahalo kuó ke ʻilo naʻe ʻuhinga ʻa Palesiteni Nalesoni ki hono tānaki fakataha ʻo ʻIsilelí. Mamata ʻi he “ʻAmanakiʻanga ʻo ʻIsileli” mei he taimi 39:36–40:05, ʻa ia ʻoku maʻu ʻi he ChurchofJesusChrist.org, pe lau e ngaahi meʻá ni ke vakai ki he fakamatala kakato ʻa Palesiteni Nalesoní.

Naʻe ʻomi kimoutolu—kau talavou mo e finemui fisifisimuʻa—ki he māmaní ʻi he kuonga ko ʻení, ʻa e taimi mahuʻinga taha ko ʻeni ʻi he hisitōlia ʻo e māmaní, ke tokoni ki hono tānaki ʻo ʻIsilelí. ʻOku ʻikai ha toe meʻa ʻoku hoko ʻi he māmaní he taimí ni ʻe toe mahuʻinga ange ai. ʻOku ʻikai mo ha toe meʻa ʻe māʻongoʻonga ange hono olá. ʻIkai mo ha toe meʻa.

ʻOku totonu ke mahuʻinga fau kiate koe ʻa e tānaki fakataha ko ʻení. Ko e tufakanga ʻeni naʻe ʻomi ai koe ki he māmaní. (Russell M. Nelson mo Wendy W. Nelson, “ʻAmanakiʻanga ʻo ʻIsilelí” [fakataha lotu fakaemāmani lahi ʻa e toʻu tupú, 3 Sune 2018], ChurchofJesusChrist.org)

• Ko e hā ha ngaahi fakakaukau pe ongo ʻokú ke maʻu fekauʻaki mo e lea ʻa Palesiteni Nalesoní?

• Ko e hā ha ngaahi fehuʻi ʻokú ke maʻu fekauʻaki mo hono tānaki fakataha ʻo ʻIsilelí?

Fakakaukau ki hoʻo ngaahi fakakaukau mo e ongo fekauʻaki mo hoʻo kau ki hono tānaki fakataha ʻo ʻIsilelí, ʻa ia ʻoku kau ai hono malanga ʻaki e ongoongoleleí kiate kinautolu ʻi he māmaní he taimi ní mo hono fakahoko e hisitōlia fakafāmilí mo e ngāue fakatemipalé maʻanautolu kuo pekiá koeʻuhí ke maʻu ʻe he taha kotoa pē ha faingamālie ke haʻu ki he Tamai Hēvaní mo Sīsū Kalaisi. ʻOku mahuʻinga fēfē ʻa e ngāue ko ʻení kiate koe? ʻI hoʻo ako he ʻaho ní, kumi ha ngaahi akonaki ʻe lava ʻo tokoni ke fakatupulaki hoʻo loto-fiemālie mo e malava ke kau fakataha mo e ʻEikí ʻi hono tānaki fakataha ʻo ʻIsilelí.

Ko e akoʻi ʻe Sekope ʻa hono tānaki fakataha ʻo ʻIsilelí

Naʻe fakaafeʻi ʻe Nīfai hono tokoua ko Sēkopé ke vahevahe ha kikite mahuʻinga mei he palōfita ko ʻĪsaiá ʻi he Fuakava Motuʻá kau ki hono tānaki fakataha ʻo ʻIsileli ʻi he ngaahi ʻaho kimui ní (vakai ki he 2 Nīfai 6:4–7).

Ke tokoni ke teuteuʻi e kau akó ke mahino kiate kinautolu e ngaahi veesi te nau laú, fakakaukau ke fakaʻaliʻali mo lau e ngaahi fakaʻuhinga ko ʻení pea mo ha ʻīmisi ʻe taha pe lahi ange ʻokú ne fakahaaʻi ha fuka pe fakaʻilonga.

• Kau Senitailé: ʻI hono fakaʻaongaʻi ʻi he folofolá, ʻoku lahi e ngaahi ʻuhinga ʻo e Kau Senitailé. ʻI he kikite ʻa ʻĪsaiá (vakai ki he 2 Nīfai 6:5–7), ko e taha ʻo e ngaahi ʻuhinga ʻo e foʻi lea Kau Senitailé ko e kakai ʻoku ʻikai kau ki he hako ʻo ʻIsilelí (Vakai, Fakahinohino ki he Ngaahi Folofolá, “Kau Senitailé,” scriptures.ChurchofJesusChrist.org).

• Fuká:: “[Ko] ha fuka pe ha fakaʻilonga ʻa ia ʻoku fakatahataha mai ki ai ʻa e kakaí ʻi he taumuʻa tatau pea mo e meʻa ʻoku ʻiloa ai ʻa kinautolú” (Fakahinohino ki he Ngaahi Folofolá, “Fuká,”scriptures.ChurchofJesusChrist.org).

ʻI hoʻo fakakaukau ki he ngaahi fakaʻuhinga ko ʻení, lau ʻa e 2 Nīfai 6:5–7. Hiki ʻi hoʻo tohinoa akó ʻa e ngaahi fakaikiiki ʻo e kikite ʻa ʻĪsaiá ʻoku ngali mahuʻingá.

Kapau ʻe fiemaʻu, tokoniʻi e kau akó ke nau ʻiloʻi e ngaahi fakaikiiki mahuʻinga mei he kikite ʻa ʻĪsaiá, hangē ko e:

• ʻE fokotuʻu ʻe he ʻOtuá ha fuka.

• ʻE ʻomi ʻe he kau Senitailé ha ngaahi foha mo ha ngaahi ʻofefine ʻo ʻIsileli ʻi honau nimá pea fua kinautolu ʻi honau umá.

• ʻE hoko e ngaahi tuʻi mo e kuini Senitailé ko ha ngaahi faʻē mo ha ngaahi tamai tauhi.

• Ko e hā ha ngaahi fakaikiiki naʻá ke maʻu mei he kikite ʻa ʻĪsaiá ʻoku ngali mahuʻinga?

• Ko e hā ha ngaahi fehuʻi ʻokú ke kei maʻu fekauʻaki mo e kikité ni?

Naʻe fakatou fakamahinoʻi ʻe Nīfai mo Sēkope ʻa e kikité ni ʻi heʻena ngaahi tohí. Fekumi ki ha mahino lahi ange kau ki he kikite ʻa ʻĪsaiá ʻaki haʻo lau ha taha ʻo e ngaahi veesi ko ʻení. ʻE ala tokoni foki ke fakafekauʻaki pe fakafehokotaki e ngaahi veesi ko ʻení ki he 2 Nīfai 6:5–7.

Fakakaukau ke vahevahe e kau akó ki ha fanga kiʻi kulupu iiki, ʻo ako ʻe ha vaeua ʻe taha ʻo e ngaahi kulupú e ngaahi lea ʻa Nīfaí pea ako ʻe he vaeua ʻe tahá e lea ʻa Sēkopé. Fakaafeʻi leva e kau akó ke lipooti e meʻa ne nau ako mei he ngaahi veesi ne nau akó.

• 1 Nīfai 22:6–12 (Ngaahi lea ʻa Nīfaí)

• 2 Nīfai 10:3–10 (Ngaahi lea ʻa Sēkopé)

• Ko e hā naʻe akoʻi ʻe Nīfai pe Sēkope ʻi he ngaahi veesi ko ʻení naʻe tokoni lahi ange ke mahino kiate koe ʻa e 2 Nīfai 6:5–7? Ko e hā ha ngaahi ʻilo foʻou naʻá ke maʻu?

ʻOku fakataumuʻa e ngaahi fehuʻi ʻe tolu ko ʻení ke tokoni ke mahino lelei ange ki he kau akó ʻa e ngaahi veesi ʻoku nau laú. Kapau kuo ʻosi mahino lelei kiate kinautolu ʻa e potufolofolá, te ke lava ʻo hiki fakalaka ki he fehuʻi hono fā mo e nima ʻi laló.

• ʻOkú ke pehē ko e hā ʻa e “ngāue fakaofo” ʻe hoko ʻi he ngaahi ʻaho fakaʻosí ʻa ia “ʻe fuʻu mahuʻinga lahi” ki ha kakai tokolahi (1 Nīfai 22:8)? Ka fiemaʻu tokoni e kau akó ke mahino pe ko e hā ʻa e ngāue fakaofo, te ke lava ʻo fakahinohino kinautolu ki ha futinouti pe fakamatalaʻi ange ʻoku ʻuhinga ia ki hono fakafoki mai ʻo e ongoongoleleí.

• Fakatatau ki he 1 Nīfai 22:12, ko e hā ʻe ʻilo ʻe he kakai ʻo ʻIsileli kuo fakamoveteveteʻí ʻi hono tānaki fakataha kinautolú?

• Ko e hā e fatongia ʻe fakahoko ʻe he ngaahi puleʻanga ʻo e kau Senitailé ʻi hono tānaki fakataha ʻo ʻIsileli ʻi he ngaahi ʻaho kimui ní (vakai ki he 1 Nīfai 22:8–9; 2 Nīfai 10:8–9)?

• Ko e hā ʻoku tokoni atu ai e ngaahi akonaki ko ʻení ke mahino kiate koe ʻa Sīsū Kalaisi mo e ongo ʻokú Ne maʻu ki he kakai kotoa pē?

• Ko e hā ʻoku nau tokoni atu ke mahino kiate koe fekauʻaki mo e fatongia ʻokú ke fakahoko ʻi hoʻo tokoni ke tānaki fakataha ʻa ʻIsilelí?

Ko e moʻoni ʻe taha te tau lava ʻo ako mei he kikite ʻa ʻĪsaiá mo e lea ʻa Palesiteni Nalesoni mei he konga kimuʻa ʻo e lēsoní ko e ʻi heʻetau hoko ko e kau mēmipa ʻo e Siasi ʻo e Fakamoʻuí kuo fakafoki maí, ʻoku ʻi ai hotau tufakanga ke kau mo e ʻEikí ʻi hono tānaki fakataha ʻo ʻIsileli ʻi he ngaahi ʻaho kimui ní.

• Ko e hā ʻoku tokoni atu e moʻoni ko ʻení ke mahino kiate koe fekauʻaki mo e ongo ʻoku maʻu ʻe he ʻEikí kiate koé?

• Ko e hā ʻokú ke ʻilo fekauʻaki mo e Fakamoʻuí ʻokú ne fakatupulaki hoʻo loto-holi ke tānaki fakataha kiate Iá? ʻE hoko fēfē ʻa hono vahevahe ʻeni mo e niʻihi kehé ke fakatupulaki ai ʻenau loto-holi ke tānaki fakataha ki he Fakamoʻuí?

Faʻu ha palani ke tokoni ki he ʻEikí ʻi hono tānaki ʻo ʻIsilelí

Naʻe fakamatalaʻi ʻe Palesiteni Nalesoni ʻa e meʻa te tau lava ʻo fai ke tokoni ki hono tānaki fakataha ʻo ʻIsilelí:

Ko ha taimi pē ʻoku tau fai ai ha faʻahinga meʻa ʻoku tokoni ki ha taha—ʻi ha tafaʻaki pē ʻo e veilí—ke ne fakahoko mo tauhi ʻene ngaahi fuakava mo e ʻOtuá, ʻoku tau tokoni ai ke tānaki ʻa ʻIsileli. (Russell M. Nelson, “Tuku ke Lāngilangiʻia ʻa e ʻOtuá,” Liahona, Nōvema 2020, 92–93)

• ʻI hoʻo fakakaukau ki he fakamatala ʻa Palesiteni Nalesoní, ko e hā ha ngaahi meʻa pau te ke lava ʻo fai ke kau ai mo e ʻEikí ʻi hono tokoniʻi e niʻihi kehé ke haʻu kiate Iá?

• Ko e hā ha ngaahi aʻusia kuó ke maʻu ʻi hono tokoniʻi e niʻihi kehé ke nau tānaki fakataha mai pe ʻunu ke ofi ange ki he Tamai Hēvaní mo Sīsū Kalaisí?

Fakakaukau ki he founga te ke lava ai ʻo kau kakato ange mo e ʻEikí ʻi hono tānaki fakataha ʻo ʻIsilelí.

Ka faingamālie e taimí, fakakaukau ke vahevahe ha maʻuʻanga tokoni ʻe taha pe lahi ange mei heni ke tokoni ki he kau akó ke fakakaukau ki ha ngaahi fakakaukau pau.

1. Naʻe vahevahe ʻe Palesiteni Lāsolo M. Nalesoni ha ngaahi fakakaukau naʻe fokotuʻu mai ʻe he toʻu tupu ʻo e Siasí ki he founga te nau lava ai ʻo tokoni ke tānaki fakataha ʻo ʻIsilelí. Mamata ʻi he “ʻAmanakiʻanga ʻo ʻIsilelí” mei he taimi 40:29–43:38, ʻoku maʻu ʻi he ChurchofJesusChrist.org.

2. ʻAʻahi ki he share.churchofjesuschrist.org.

3.  

Faʻu ha palani ngāue ki he meʻa te ke lava ʻo fai ke fakaafeʻi e niʻihi kehé ke tānaki fakataha ki he Fakamoʻuí pe ʻi hono fakalea ʻe tahá ke haʻu kia Kalaisi ʻaki hono fakahoko mo tauhi e ngaahi fuakava mo Iá. Fakapapauʻi ke fakakau ha ngaahi sitepu pau te ke lava ʻo fakahoko. ʻE tokoni ʻeni ke ke ngāue ai ʻi he tui. Ko e founga ʻe taha te ke lava ʻo fai ai ʻení ko hono fakakakato e ngaahi sētesi ko ʻení:

• ʻI he fakaʻosinga ʻo e ʻahó, te u

• ʻI he toenga ʻo e uike ní, te u

Fakamatala Fakamahinó mo e Puipuituʻá

Kuo fakahoko fēfē ʻa e kikite ʻa ʻĪsaia ʻi he 2 Nīfai 6:6–7?

Ko ha konga ʻo hono fakahoko ʻo e kikite ko ʻení, ko e fakafoki mai e ongoongoleleí ʻi he ʻIunaiteti Siteiti ʻo ʻAmeliká, ko ha puleʻanga senitaile (vakai ki he Tokateline mo e Ngaahi Fuakava 109:60). Ko e Siasi kuo fakafoki maí ko e “fuka ia [ʻa e ʻEikí] ki he kakaí” (2 Nīfai 6:6), ʻa ia ʻe tānaki ki ai e kakai mei he ngaahi puleʻanga kotoa pē ʻi he ngaahi ʻaho fakaʻosí (vakai ki he 1 Nīfai 22:11–12; ʻĪsaia 2:2–3; 11:12).

 

Ko e fē ha toe feituʻu te u lava ʻo ako lahi ange ai fekauʻaki mo hono tānaki fakataha ʻo ʻIsilelí?

 

Fēfē kapau te u feinga ke tānaki fakataha ʻa ʻIsileli ʻaki hano fakaafeʻi ha taha ke ne fai ha meʻa ka ʻoku ʻikai ke ne tali ʻeku fakaafé?

Naʻe akonaki ʻa ʻEletā Tieta F. ʻUkitofa ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

ʻIloʻi ʻoku ʻikai ko ho fatongiá ke fakaului e kakaí. Ko e fatongia ia ʻo e Laumālie Māʻoniʻoní. Ko ho fatongiá ke vahevahe e meʻa ʻokú ke tui mo ongoʻí pea moʻui ʻaki maʻu pē hoʻo tuí.

Ko ia ai, ʻoua te ke ongoʻi loto-foʻi kapau ʻe ʻikai tali leva ʻe ha taha e pōpoaki ʻo e ongoongoleleí he taimi ko iá. ʻOku ʻikai ko ha foʻui ia ʻoʻou.

ʻOku ʻi he vā ia ʻo e tokotaha fakafoʻituituí pea mo e Tamai Hēvaní.

Ko ho fatongiá ke ʻofa ki he ʻOtuá pea mo ho kaungāʻapí, ko ‘Ene fānaú. (Dieter F. Uchtdorf, “Ngāue Fakafaifekaú: Ko Hono Vahevahe e Meʻa ʻI ho Lotó,” Liahona, Mē 2019, 17)

Ngaahi ʻEkitivitī Fakalahi ki he Akó

Ko ha fuka ki he ngaahi puleʻangá.

ʻE lava ke ʻaonga ki he kau akó ʻenau ako lahi ange fekauʻaki mo e ngaahi kikite ʻoku felāveʻi mo e hoko ʻa e ongoongolelei ʻa e Fakamoʻuí kuo fakafoki maí ko ha fuka, pe fakaʻilonga, ki he māmaní. Ke tokoni hení, fakakaukau ke lau mo e kalasí ha niʻihi pe kotoa ʻo e ngaahi potufolofola ko ʻení: ʻĪsaia 5:26; 11:12; 2 Nīfai 29:2; Tokāteline mo e Ngaahi Fuakava 45:9; 64:41–43; 113:5–6.

ʻE lava foki ke mou lau mo aleaʻi ʻa e fakamatala ki hono fokotuʻu ʻe Pilikihami ʻIongi mo e kau taki kehe ʻo e Siasí ʻi he kuonga muʻá ha fuka ʻi he ʻEnisaini Piiki hili pē ha taimi nounou ʻo ʻenau tūʻuta ʻi he Teleʻa Sōlekí (vakai ki he Kau Maʻoniʻoni: Ko e Talanoa ʻo e Siasi ʻo Sīsū Kalaisi ʻi he Ngaahi ʻAho Kimui Ní, voliume 2, ʻIkai ha Nima Taʻemaʻa, 1846–1893 [2020], 67–68).

He ʻikai ke tau mā.

ʻE lava ke ke fakaafeʻi e kau akó ke nau fakakaukau ki ha taimi ne nau maʻu ai ha ngaahi ongo kehekehe fekauʻaki mo e hoko ko ha mēmipa ʻo e Siasí, hangē ko e nēkeneká, fiefiá, loto-hohaʻá, pe ongoʻi maá. Fakaafeʻi e kau akó ke lau e 2 Nīfai 6:7, 12–13, pea fekumi ki he meʻa ne akoʻi ʻe he ʻEikí kau ki he ongo ʻe maʻu ʻe Heʻene fānaú kapau te nau tatali kiate Ia ʻi he tuí. ʻE lava ke hivaʻi ʻe he kau akó ʻa e foʻi hiva palaimeli “Ko e Siasi ʻo Sīsū Kalaisí” (Tohi Hiva ʻa e Fānaú , 48) pea fakakaukau ki he ngaahi moʻoni ʻo e ongoongoleleí ʻoku tokoni ke nau maʻu ha loto-falala ʻi he muimui ki he ʻEikí mo tatali faivelenga ki Heʻene liuaki maí.