Toe Vakaiʻi Hono 3 ʻo e Fakataukei Fakatokāteliné

Mahino pea Fakamatalaʻi

Ko e mahino ko ia ha ngaahi potufolofola pau mo lava ke fakamatalaʻi e ngaahi moʻoni ʻoku nau akoʻí ʻoku mahuʻinga ia ki hono maʻu ʻo e fakataukei fakatokāteliné. ʻOku fakataumuʻa ʻa e lēsoni ko ʻení ke tokoni ke fakatupulaki e mahino ʻa e kau akó pea fakaʻatā koe ke ke akoako fakamatalaʻi e tokāteline ʻoku akoʻi mai ʻi ha niʻihi ʻo e ngaahi potufolofola fakataukei fakatokāteline ʻo e Tohi ʻa Molomoná.

Ako lahi ange ki hoʻo kau akó. Kumi ha ngaahi faingamālie ke ke maheni ai mo e kau akó. ʻE tokoni atu hoʻo vakaiʻi mo fakahoko ha ngaahi fehuʻi fakamātoató ke ke ako lahi ange ai fekauʻaki mo e meʻa ʻoku mahuʻinga ki he tokotaha ako takitaha. ʻI he mahino lahi ange kiate koe hoʻo kau akó, ʻe lava ke tokoniʻi koe ʻe he Laumālie Māʻoniʻoní ke ke fakatefito e meʻa ʻokú ke akoʻí ʻi heʻenau ngaahi fiemaʻú.

Teuteu ʻa e tokotaha akó: Fakaafeʻi e kau akó ke fili ha potufolofola fakataukei fakatokāteline ʻe taha ʻo e Tohi ʻa Molomoná ʻoku mahuʻingamālie kiate kinautolú pea teuteu ke vahevahe mo e kalasí ʻa e ʻuhinga ʻoku mahuʻingamālie ai ʻa e potufolofola ko ʻení.

Ngaahi ʻEkitivitī Ako ʻOku Ala Fakahokó

ʻE ala fiemaʻu ke akoʻi ha lēsoni ki he potufolofola fakataukei fakatokāteliné ʻo fetongi ʻaki ʻa e lēsoni ko ʻení. Vakai ki he taimi-tēpile ki he vave hono akoʻí ʻa ia ʻoku ʻoatu ʻe he talēkita fakavāhengá pe vahefonuá pe kouʻotineitá ke fakapapauʻi ʻe akoʻi e lēsoni fakataukei fakatokāteline takitaha ʻi he lele ʻa e seminelí.

Ko e mahino ʻa e potufolofola fakataukei fakatokāteliné

ʻE lava ke liliu e lēsoní ʻo fakatatau mo e ngaahi fiemaʻu ʻa e kalasí. Hangē ko ʻení, mahalo ʻe ʻaonga ke toe vakaiʻi e ngaahi potufolofola kuo ako ʻe he kau akó he taʻu ní.

ʻE lava ke ke fakaafeʻi e kau akó ke nau ʻoatu ki he lahi taha te nau lavá ʻa e potufolofola fakataukei fakatokāteline ʻe 12 ʻo e Tohi ʻa Molomoná. Hiki e ngaahi potufolofola ko ʻení ʻi he palakipoé ʻi heʻenau fakalau atú. Fakaʻaliʻali e saati ko ʻení ke tokoni atu ʻi hano fiemaʻu. Hili iá pea ʻeke leva e ngaahi fehuʻi ko ʻení.

ʻUluaki Potufolofola Fakataukei Fakatokāteline ʻe 12 mo e Ngaahi Kupuʻi Lea Mahuʻingá

Tohi ʻa Molomoná – Tohi Lēsoni ʻa e Faiakó (2024)

Fakamoʻoni Fakafolofolá	Kupuʻi Lea Mahuʻinga mei he Folofolá
Fakamoʻoni Fakafolofolá 1 Nīfai 3:7	Kupuʻi Lea Mahuʻinga mei he Folofolá “Te u ʻalu ʻo fai ʻa e ngaahi meʻa kuo fekau ʻe he ʻEikí.”
Fakamoʻoni Fakafolofolá 2 Nīfai 2:25	Kupuʻi Lea Mahuʻinga mei he Folofolá “Naʻe hinga ʻa ʻĀtamá koeʻuhi ke ʻi ai ʻa e faʻahinga ʻo e tangatá; pea ʻoku ʻi ai ʻa e faʻahinga ʻo e tangatá koeʻuhi ke nau maʻu ʻa e fiefiá.”
Fakamoʻoni Fakafolofolá 2 Nīfai 2:27	Kupuʻi Lea Mahuʻinga mei he Folofolá “ʻOku nau tauʻatāina ke fili ʻa e tauʻatāiná mo e moʻui taʻengatá … pe … pōpulá mo e maté.”
Fakamoʻoni Fakafolofolá 2 Nīfai 26:33	Kupuʻi Lea Mahuʻinga mei he Folofolá “ʻOku tatau ʻa e kakai fulipē ʻi he ʻao ʻo e ʻOtuá.”
Fakamoʻoni Fakafolofolá 2 Nīfai 28:30	Kupuʻi Lea Mahuʻinga mei he Folofolá ʻE foaki ʻe he ʻOtuá “ki he fānau ʻa e tangatá ʻa e ʻotu lea ki he ʻotu lea, ʻa e akonaki ki he akonaki.”
Fakamoʻoni Fakafolofolá 2 Nīfai 32:3	Kupuʻi Lea Mahuʻinga mei he Folofolá “Keinanga ʻi he ngaahi folofola ʻa Kalaisí; he vakai, ʻe fakahā kiate kimoutolu ʻe he ngaahi folofola ʻa Kalaisí ʻa e ngaahi meʻa kotoa pē ʻoku totonu ke mou faí.”
Fakamoʻoni Fakafolofolá 2 Nīfai 32:8–9	Kupuʻi Lea Mahuʻinga mei he Folofolá “Kuo pau ke mou lotu maʻu ai pē.”
Fakamoʻoni Fakafolofolá Mōsaia 2:17	Kupuʻi Lea Mahuʻinga mei he Folofolá “ʻO ka mou ka ʻi he tauhi ʻo homou kāingá, ʻoku mou ʻi he tauhi pē ʻo homou ʻOtuá.”
Fakamoʻoni Fakafolofolá Mōsaia 2:41	Kupuʻi Lea Mahuʻinga mei he Folofolá “[Ko] kinautolu ʻoku tauhi ʻa e ngaahi fekau ʻa e ʻOtuá … ʻoku nau monūʻia ʻi he meʻa kotoa pē.”
Fakamoʻoni Fakafolofolá Mōsaia 3:19	Kupuʻi Lea Mahuʻinga mei he Folofolá “Liʻaki ʻa e tangata fakakakanó kae hoko ko ha tangata māʻoniʻoni ʻi he fakalelei ʻa Kalaisi ko e ʻEikí.”
Fakamoʻoni Fakafolofolá Mōsaia 4:9	Kupuʻi Lea Mahuʻinga mei he Folofolá “Tui pē ki he ʻOtuá; … tui ʻokú Ne maʻu ʻa e poto kotoa.”
Fakamoʻoni Fakafolofolá Mōsaia 18:8–10	Kupuʻi Lea Mahuʻinga mei he Folofolá Ke “papitaiso ʻa kimoutolu ʻi he huafa ʻo e ʻEikí, ko e fakamoʻoni … kuo mou fai ha fuakava mo Ia.”

© 2023 ʻe he Intellectual Reserve, Inc. All rights reserved.

• Ko e fē ʻi he ngaahi potufolofola ko ʻení ʻokú ke ongoʻi ʻoku mahino lelei kiate koé?

• Ko e hā ha ngaahi aʻusia kuó ne tokoniʻi koe ke mahino e (ngaahi) moʻoni ʻo e potufolofola ko iá?

  Kapau naʻe fakakakato ʻe he kau akó ʻa e teuteu ʻa e tokotaha akó ki he lēsoni ko ʻení, fakakaukau ke fakaafeʻi kinautolu ke vahevahe ʻa e ngaahi potufolofola ʻoku mahuʻingamālie kiate kinautolú pea mo hono ʻuhingá. Fakakaukau ke fakaʻaongaʻi e fealēleaʻaki ko ʻení ke tokoniʻi e kau akó ke siviʻi e tuʻunga ʻo ʻenau mahino ki he ngaahi potufolofolá pea kapau ʻoku ʻi ai ha ngaahi potufolofola te nau fiemaʻu ke mahino lelei ange kiate kinautolu.

Fili ha taha ʻo e ngaahi potufolofola fakataukei fakatokāteline ʻo e Tohi ʻa Molomoná te ke fiemaʻu ke mahino lelei angé pea fakakakato ha taha ʻo e ngaahi ʻekitivitī ko ʻení ke tokoni ke fakaloloto hoʻo mahino ki he tokāteline ʻokú ne akoʻí. Kapau te ke ʻosi vave, fili ha potufolofola fakataukei fakatokāteline ʻe taha pea fakakakato ha ʻekitivitī ʻe taha.

Fakakaukau ke fakaʻaliʻali e ngaahi fili ko ʻení maʻá e kau akó ʻi heʻenau akó. Te ke lava foki ʻo fakakaukau ke ʻomi ha ngaahi meʻa ki he kalasí ke fakaʻaongaʻi ʻe he kau akó ki he konga “Fakafehoanakí.” ʻE lava foki ke mohu founga mo fakaʻaongaʻi ʻe he kau akó ha ngaahi maʻuʻanga tokoni kehe ʻi he loki akó ke fai ha ngaahi fakafehoanaki.

ʻEkitivitī A: Fakatātaá

Faʻu ha fakatātā, fakatahatahaʻi ha ngaahi fakatātā, meme, word art, word cloud, pe ngaahi fakatātā kehe ʻokú ne fakahaaʻi e meʻa ʻoku akoʻi ʻe hoʻo potufolofolá.

Lomiʻi ʻi he ngaahi fehokotakiʻanga ko ʻení ki ha ngaahi sīpinga:

• Word art

• Memes

ʻEkitiviti E: Vahevahe mo e niʻihi kehé

Faʻu ha palani ke akoʻi hoʻo potufolofolá. ʻE lava ke kau heni ha ngaahi fehuʻi te ke fai ke tokoni ke mahino lelei ange kiate kinautolu ʻokú ke akoʻí ʻa e potufolofolá. Te ke lava foki ʻo fakakaukau ke faʻu ha foʻi vitiō ʻa ia te ke tali ai e ngaahi fehuʻi naʻá ke faʻú pe fakamatalaʻi e ʻuhinga ʻo e ngaahi foʻi lea mo e kupuʻi lea mahuʻingá.

ʻEkitiviti F: Ako tauʻatāina

Fili ha foʻi lea mahuʻinga ʻe taha pe ua mei he potufolofolá ke ako. Fakaʻaongaʻi e ngaahi tokoni ki he akó ʻi hoʻo folofolá, ko e polokalama Gospel Library, pe ngaahi maʻuʻanga tokoni kuo fokotuʻu fakalangí ke ʻiloʻi e ngaahi fakaʻuhingá, ngaahi potufolofola fakafekauʻakí, pe ngaahi fakamatala ʻa e kau taki ʻo e Siasí ʻokú ne fakaloloto hoʻo mahinó. Lekooti e meʻa ʻokú ke akó, kau ai e meʻa ʻoku akoʻi atu ʻe he ngaahi meʻá ni fekauʻaki mo e Tamai Hēvaní mo Sīsū Kalaisí.

ʻEkitivitī H: Fakafehoanakí

Feinga ke fakahaaʻi ha ngaahi meʻa ʻokú te lava ʻo ala ki ai pe faʻu ha talanoa fakatātā te ne lava ʻo fakafofongaʻi e potufolofola pe ngaahi foʻi lea mo e ngaahi kupuʻi lea mei he potufolofolá. Hangē ko ʻení, ʻi he 2 Nīfai 2:27 te ke lava ʻo puke ha foʻi kī ʻi ha nima ʻe taha ke fakatātaaʻi ʻoku tau “tauʻatāina ke fili ʻa e tauʻatāiná mo e moʻui taʻengatá” pea mo ha foʻi loka ʻi he nima ʻe tahá ke fakafofongaʻi ʻa e “pōpulá mo e maté.”

Hili hono maʻu ʻe he kau akó ha taimi feʻunga ʻi he ʻekitivitī ako ko ʻení, fakaafeʻi ha niʻihi te nau loto-lelei ke vahevahe ha meʻa mei he ngaahi ʻekitivitī ne nau filí. Te nau lava ʻo vahevahe ʻenau ngāue fakaʻātí, ngaahi fehuʻi ne nau maʻú, ngaahi fakakaukau ne nau maʻu mei heʻenau akó, pe ko e ngaahi meʻa ne nau fakaʻaongaʻi ki he fakafehoanakí.

ʻE lava ke fakahoko ʻa e fevahevaheʻaki ko ʻení ʻi ha fanga kiʻi kulupu iiki, fakakalasi, pe fakatouʻosi. ʻE lava ke tali ʻe he kau akó e ngaahi fehuʻi ko ʻení ki ha potufolofola ʻe taha pe lahi ange naʻa nau fili, ko ha konga ʻo e fealēleaʻakí.

• ʻOkú ke pehē ko e hā ʻoku mahuʻinga ai ke mahino kiate koe ʻa e potufolofola naʻá ke fili?

• ʻE tokoniʻi fēfē koe ʻe hono maʻu ha mahino ki he potufolofola ko ʻení ke fakatupulaki hoʻo tui kia Sīsū Kalaisí pe hoko ʻo hangē ko Iá?