2 Nifae 4

Salamo a Nifae

E feagai tagata uma ma faaosoosoga ma lagona le vaivai pe lotovaivai i nisi taimi. Sa faapena foi lagona o le perofeta o Nifae. Ina ua mavae aafiaga o le maliu o lona tama, o Liae, ma le feagai ai ma ona uso feita, sa tusia e Nifae nisi o ona lagona loloto. Sa ia faaalia lona olioli faapea foi ma lona faanoanoa. O lana faataitaiga ua faaali mai ai ia i tatou le ala e mafai ai ona tatou liliu atu i le Alii pe a tatou feagai ma luitau o le olaga faaletino. O lenei lesona e mafai ona fesoasoani ia te oe e tali atu ai ma le faamaoni i faaosoosoga ma le lotovaivai e ala i le liliu atu i le Alii.

O le valaaulia o tagata aoao e faasoa mai o latou lagona, aafiaga ma molimau. E mafai e tagata taitoatasi o lau vasega ona saofaga atu. A o e fesoasoani i tamaiti aoga e faasoa mai o latou lagona, aafiaga, ma molimau, e mafai ona latou faamanuiaina olaga o i latou o siomia i latou. E mafai ona aoaoina tagata uma o le vasega e le Agaga Paia.

Sauniuniga a le tamaitiiti aoga: Mafaufau e valaaulia tamaiti aoga e ole atu i le Atua mo se fesoasoani i se faaosoosoga po o se luitau o loo latou feagai.

Gaoioiga e Ono Mafai Ona Aoao Ai

Luitau o le olaga faitino

O se tasi o auala e amata ai le lesona o le talanoaina lea o luitau o le olaga e taatele i tagata uma. Mo se faataitaiga, tatou te feagai uma lava ma faaosoosoga ma lagona le faanoanoa po o le lotovaivai i nisi taimi. Mafaufau e tuu atu i tamaiti aoga e mafaufau loloto ma le filemu i fesili nei. E mafai foi e tamaiti aoga ona tusi i lalo i a latou api talaaga se faaosoosoga patino po o se mafuaaga atonu latou te lagona ai le lotovaivai.

• Aisea e te manatu ai e faaosoosoina tagata uma ma lagona le lotovaivai i nisi taimi?

• I le fua faatatau o le 1 i le 10, o le a le lelei e te lagona o loo e taulimaina ai nei faafitauli?

• O le a faapefea ona faamanuiaina lou olaga pe afai e sili atu ona mafai ona e faatoilaloina faaosoosoga ma le lotovaivai?

Salamo a Nifae

Faitau le 2 Nifae 4:12–13, 18, ma vaavaai mo nisi o luitau na feagai ma Nifae.

• E faapefea ona e vaai faalemafaufau i lagona o Nifae i nei luitau?

O fuaiupu 2 Nifae 4:16–35 e tele ina faasino i ai o le salamo a Nifae. O se salamo o “se solo po o se viiga musuia” (Taiala i Tusitusiga Paia, “Salamo,” scriptures.ChurchofJesusChrist.org). I nei fuaiupu na tusia ai e Nifae e uiga i nisi o ona lagona loloto. Sa ia faasoa mai ona luitau ma le auala na ia tali atu ai i faaosoosoga ma le lotovaivai. A o e suesue i nei fuaiupu, saili musumusuga e ala i le Agaga Paia ia iloa ai mea e mafai ona e faia i luitau patino o loo feagai ma oe.

Atonu e te manatuaina ni laasaga se fa e fesoasoani ai ia te oe e faatatau tusitusiga paia i lou olaga:

1. Saili auiliiliga taua.

2. Fai ni faatusatusaga i lou olaga.

3. Ia iloa lesona taua.

4. Fuafua le faaaogaina ai mo oe lava ia.

Tuu atu i tamaiti aoga se kopi o le pepa e tufa atu e faatumu taitoatasi. O le isi filifiliga o le faamaea lea o laina muamua e lua o se vasega ona vaevae lea o laina mulimuli e tolu i vaega ma tuu atu i vaega taitasi e lipoti mai mea sa latou aoaoina.

E mafai ona uunaia tamaiti aoga e tusi ni manatu patino ma lagona e uiga i nei fuaiupu i a latou tusitusiga paia.

© 2023 by Intellectual Reserve, Inc. Ua taofia aiā tatau uma. 2 Nifae 4:16-35 Mafaufau e fai atu nisi o fesili nei.

O nisi o faamatalaga o loo maua i le vaega o “Manatu ma Talaaga o Faamatalaga” e mafai ona faaleleia atili ai le talanoaga.

Salamo a Nifae ma A’u (2 Nifae 4:16–35)

Tusi Lesona a le Faiaoga o le Tusi a Mamona (2024)—“2 Nifae 4: Salamo a Nifae”

	Aafiaga a Nifae	O La’u Aafiaga
2 Nifae 4:16	Aafiaga a Nifae O a ni lagona o Nifae?	O La’u Aafiaga O anafea na ou maua ai ni lagona faapena?
2 Nifae 4:17–19	Aafiaga a Nifae O a ni lagona o Nifae?	O La’u Aafiaga O anafea na ou maua ai ni lagona faapena?
2 Nifae 4:20–25	Aafiaga a Nifae O a ni aafiaga ma le Atua na fesoasoani ia Nifae e tali atu ai ma le faamaoni i ona faaosoosoga ma le lotovaivai?	O La’u Aafiaga O a nisi o aafiaga faaleagaga e mafai ona ou manatua pe a faaosoosoina au pe lotovaivai?
2 Nifae 4:26–29	Aafiaga a Nifae O a ituaiga o manatu na fesoasoani ia Nifae e malosi ai pe a lagona le faaosoosoina po o le lotovaivai?	O La’u Aafiaga O a ituaiga o manatu e mafai ona fesoasoani ia te au e malosi ai pe a lagona le faaosoosoina po o le lotovaivai?
2 Nifae 4:30–35	Aafiaga a Nifae O le a se mea na faagaeetia ai au mai le tatalo a Nifae?	O La’u Aafiaga E faapefea ona ou faaaogaina le faataitaiga a Nifae i a’u lava tatalo?

• O a fuaiupu po o fasifuaitau i le 2 Nifae 4 e tumatila ia te oe? Aisea?

• O le a se mea na e aoaoina e uiga i le Faaola mai le 2 Nifae 4?

• Na faapefea e le faatatauina o tusitusiga paia i lou olaga ona uunaia ai au suesuega o le 2 Nifae 4?

• O a nisi o mataupu faavae na e faailoaina?

  I le avea ai ma se vaega o le talanoaga, fesoasoani i tamaiti aoga e faailoa mai ni mataupu faavae eseese. Mo se faataitaiga:

  • O le faalagolago i le Alii ma le manatuaina o aafiaga faaleagaga ua tuanai e mafai ona fesoasoani ia te au e tali atu ai ma le faamaoni i faaosoosoga ma le lotovaivai.

  • Afai ou te tatalo ma le faamaoni i le Atua, e mafai ona ou maua Lana fesoasoani pe a faaosoosoina au ma lagona le lotovaivai.

• O le a sou manatu e faapefea ona fesoasoani nei mataupu faavae ia te oe e liliu atu ai i le Alii pe a faaosoosoina oe pe lagona le lotovaivai?

O la’u fuafuaga e faatoilalo ai faaosoosoga ma le lotovaivai

Ina ia vaai pe na faapefea ona liliu atu se tasi o tamaitai talavou i le Alii i se taimi faigata, matamata i le “Heavenly Father Knows Me” (3:18), o loo maua i le ChurchofJesusChrist.org.

Ina ia fesoasoani i tamaiti aoga ia iloa pe na faapefea ona liliu atu isi i le Alii i taimi o tofotofoga, mafaufau e faaali atu se tasi o vitio o loo fautuaina atu i le vaega o “Gaoioiga Faaopoopo e Aoao ai”.

Mafaufau e valaaulia tamaiti aoga e talanoa e uiga i se taimi na latou liliu atu ai i le Alii i se taimi faigata.

Mulimuli i le faataitaiga a Nifae ma tusi lau oe lava salamo. E mafai ona fesoasoani ni isi o fesili nei:

• O le a le mataupu faavae, aoaoga, po o fuaiupu mai le 2 Nifae 4 e mafai ona e faaaogaina i lou olaga?

• E faapefea ona e faaaogaina i lou olaga?

• O le a sou manatu e faapefea ona fesoasoani le faia o lenei mea ia te oe e liliu atu ai i le Faaola?

• A oo ina faigata le olaga, e faapefea ona e tali atu ma le faatuatua i le Faaola?

Valaaulia ni tamaiti aoga o naunau e faasoa mai a latou salamo i le vasega. Mafaufau e faasoa atu lau molimau e uiga i le Faaola. Atonu e fesoasoani le faamanatu atu i tamaiti aoga o le a latou feagai ma faafitauli ma o le a tele ina manaomia ona faia ni taumafaiga faifai pea e faatoilalo ai. Peitai, e ala i le alofa tunoa o Iesu Keriso, e mafai ai ona latou maua le malosi e faatoilalo pe onosaia ai mea uma.

Manatu ma Talaaga o Faamatalaga

E faapefea e le manatuaina o aafiaga faaleagaga ua tuanai ona fesoasoani ia te au?

Ua aoao mai Elder Neil L. Andersen o le Korama a Aposetolo e Toasefululua:

Faatasi ai ma le taitaiga toafilemu ua tatou maua mai le Agaga Paia, mai lea taimi i lea taimi, ua faamautinoa mamana ma patino mai e le Atua ia i tatou taitoatasi e faapea na te silafia i tatou ma e alofa ia i tatou ma o loo Ia faamanuiaina patino ma le le taofiofia i tatou. Ona oo lea i taimi o o tatou faigata, e toe aumaia e le Faaola i o tatou mafaufau nei aafiaga. …

Atonu e te mafaufau i ou manatuaga faaleagaga i le ala lea. Faatasi ai ma le tatalo e le aunoa, o se naunautaiga e tausia a tatou feagaiga, ma le meaalofa o le Agaga Paia, tatou te faatautaia ai lo tatou ala i le olaga. Pe a oo ina faapouliuliga e faigata faaletagata, masalosalo, po o le lotovaivai lo tatou ala, pe taitai atu foi i tatou e tulaga faalelalolagi e le mafai ona tatou puleaina, e tau mafaufau pe faapeī le lumanai, o manatuaga musuia faaleagaga mai la tatou tusi o le ola e pei o ni maa susulu e fesoasoani e faamalamalama ai le auala o i luma, e faamautinoa mai ai ia i tatou o loo silafia e le Atua i tatou, e alofa ia i tatou, ma sa Ia auina mai Lona Alo, o Iesu Keriso e fesoasoani ia tatou toe foi atu i le aiga. (Neil L. Andersen, “O Manatuaga Musuia Faaleagaga,” Liahona, Me 2020, 19, 21)

Na aoao mai Elder Ronald A. Rasband o le Korama a Aposetolo e Toasefululua:

Ou (te) fautuaina outou i le taimi lenei, ia manatua aemaise lava i taimi o faigata, le taimi na e lagona ai le Agaga ma le malosi o lau molimau; manatua ia faavae faaleagaga na e fausia. (Ronald A. Rasband, “Ne’i Galo ia te Oe,” Liahona, Nov. 2016, 114)

E faapefea ona ou faatoilaloina faaosoosoga ma le lotovaivai?

Na aoao mai Elder Jeffrey R. Holland o le Korama a Aposetolo e Toasefululua:

A tatou feagai ma faaosoosoga i o tatou aso, e tatau ona tatou tautino atu, e pei ona sa faia e le taulealea o Nifae i ona foi faaosoosoga: “[O le a] le toe ulu mai lē ita mai ia te au i lo’u agaga” [2 Nifae 4:28]. E mafai ona tatou teena le tiapolo. Afai tatou te matuai mananao lava i ai, e mafai ma o le a a’oa’ia lena fili e le mana faaola o le Alii o Iesu Keriso. (Jeffrey R. Holland, “Ia Lē Toe Ulu Mai I Lo’u Agaga Lē Ita Mai ia te Au,” Liahona, Me 2010, 46)

Na aoao mai Elder Allen D. Haynie o le Fitugafulu e faapea:

Uso e ma tuafafine, afai e te lagona le lotovaivai pe tau manatunatu foi pe mata e mafai ona e sao ese mai le pu faaleagaga na e eliina, faamolemole ia manatua le o loo tu “i lo [tatou] va ma le faamasinotonu,” o lē “ua faatumulia i le agaalofa i le fanauga a tagata,” ma lē na tauaveina i Ona lava luga a tatou amioleaga ma solitulafono ma “faamalieina ai manaoga o le faamasinotonu” [Mosaea 15:9]. I se isi faaupuga, e pei ona sa faia e Nifae i lona taimi o lona le mautonu, sa na ona ia manatua o “le ua ia faalagolago i ai,” [2 Nifae 4:19], o Iesu Keriso lava, ona salamo lea ma toe maua ai “se susulu atoatoa o le faamoemoe” [2 Nifae 31:20]. (Allen D. Haynie, “Manatua Le Ua Tatou Faalagolago I Ai,” Liahona, Nov. 2015, 123)

Gaoioiga Faaopoopo e Aoao Ai

Vitio

I le vitio “Heavenly Father Knows Me” (3:18), ua faasoa mai e se tamaitai talavou le ala na faatasi ai le Alii ma ia i se taimi faigata.

I le vitio “Wheelz: Overcoming Is Possible” (7:13), o loo faasoa mai ai e se alii talavou le ala ua ia faatoilaloina ai faigata e ala i le Togiola a le Faaola.

I le vitio faamusika “Fragile” (3:46), o loo pese ai se tamaitai talavou e uiga i le ala o loo i ai le Alii iina ma i tatou pe a tatou tiga ma lagona le nutimomoia. Afai e te faaaogaina lenei vitio, mafaufau e faaali upu mo tamaiti aoga.

2 Nifae 4:17–19. “E ui i lea”

Taula’i atu mafaufau o tamaiti aoga i le upu “e ui i lea” i le 2 Nifae 4:17, 19. Matau le suiga i lagona na faailoa sa’o mai e Nifae a o lei faia ma ina ua mavae ai lenei upu. Talanoa i mea e mafai ona aoao e tamaiti aoga mai aafiaga ma faataitaiga o le olaga o Nifae.

2 Nifae 4:17. “E, le tagata leaga e”

E mafai ona aoga i tamaiti aoga le faatusatusaina o Nifae ma le Aposetolo o Paulo. Tagai i le 2 Nifae 4:17–19; Roma 7:22–25; 2 Korinito 12:7–10. Talanoaina pe faapefea ona fesoasoani Iesu Keriso ia i tatou uma e faatoilalo o tatou vaivaiga. Atonu e fesoasoani le faailoa atu o le latalata atili atu i le Tama Faalelagi, o le tele foi lena o lo tatou nofouta i le o ese mai le amiotonu (tagai Bruce C. Hafen, “O Le Togiola: O Mea Uma mo Tagata Uma,” Liahona, Me 2004, 97–99).

2 Nifae 4:15. “Ua fiafia lo’u agaga i tusitusiga paia”

Valaaulia tamaiti aoga e faasoa mai ni mau latou te fiafia i ai. E mafai e tamaiti aoga ona tusi ia mau faasino i luga o le laupapa ma talanoaina pe aisea e taua ai na fuaitau ia i latou. Ma le isi, e mafai ona valaaulia tamaiti aoga e faasoa mai se fuaiupu filifilia ma aiga po o uo i se afiafi faaleaiga, i se feau tusitusia, po o luga o ala o faasalalauga faaagafesootai.

2 Nifae 4:15–16. “Mea o lo’u agaga”

Mafaufau e valaaulia tamaiti aoga e mafaufau toto’a i ai ma tusi mea o o latou agaga. Ina ia amata lenei gaoioiga, e mafai ona e faasoa atu le saunoaga lenei a Elder Ronald A. Rasband o le Korama a Aposetolo e Toasefululua, lea na ia sii mai ai upu a Nifae:

“‘Faauta, ua fiafia lo’u agaga i mea a le Alii, ma ua manatunatu loloto pea lo’u loto i mea sa ou vaaia ma faalogoina” [2 Nifae 4:16; ua faaopopo le faamamafa].

“O upu a Nifae ua tulai mai ai le fesili ‘O a mea e te manatunatu loloto i ai?’ ‘O a mea e tāua moni ia te oe?’ ‘O a mea o lou agaga?’” (“O Mea a Lo’u Agaga,” Liahona, Nov. 2021, 39).

Salamo a Nifae i le pese

O upu o le salamo a Nifae ua faatulaga i musika ma usuina i le konafesi aoao. Mafaufau e ta le pese i le vasega ma valaaulia tamaiti aoga e faatusatusa upu o le viiga ma lagona ma mafaufauga o loo faaalia i le 2 Nifae 4:16–35. Ina ia faia o lea, matamata i le sauniga perisitua o le konafesi aoao ia Aperila 2007 mai le faailotaimi 1:46:17 i le 1:51:18.