2 Nifae 3

“O Le a Ou Faatu Mai se Tagatavaai Filifilia”

O leMataupu e 3 o le 2 Nifae o loo tusia ai upu faaiu a Liae i lona atalii laitiiti, o Iosefa. Na sii mai e Liae se valoaga na faia e Iosefa o Aikupito pe tusa ma le 1,700 tausaga a o lei soifua mai Keriso. Vaai faalemafaufau i le faateia o Iosefa Samita ina ua ia iloaina o ia o le autu o le tele o valoaga na faia e Iosefa o Aikupito. O le faamoemoega o lenei lesona o le fesoasoani lea ia te oe e faaloloto lau molimau i le valaauga paia o le Perofeta o Iosefa Samita.

Aoaoina atu o tusitusiga paia ma upu a perofeta ma le talitonuga maumaututu ma le faamoemoe. O tusitusiga paia ma upu a perofeta ma aposetolo o aso e gata ai o punavai ia o upumoni. Ia mautinoa o mea uma e te aoao atu e ogatusa ma tusitusiga paia ma upu a perofeta. O le aoao atu o upumoni o le a valaaulia ai le Agaga Paia i totonu o le potuaoga.

Sauniuniga a le tamaitiiti aoga: Valaaulia tamaiti aoga e faitau pe matamata i le saunoaga a Elder Neil L. Andersen “Iosefa Samita,” mai le konafesi aoao ia Oketopa 2014 (tagai Liahona, Nov. 2014, 28–31), ma vaavaai pe aisea e taua ai le i ai o se molimau patino e faapea na valaauina e le Atua ia Iosefa Samita.

Gaoioiga e Ono Mafai Ona Aoao Ai

Ia manatua o lenei lesona e taulai atu i le misiona paia a Iosefa Samita. O lenei lesona o le a talanoaina ai le matafaioi o tusitusiga paia e pei ona ta’ua i le 2 Nifae 3:12.

O Iosefa e Toafa

Mafaufau i se tasi o mea nei e mafai ona fai. E mafai ona e faaali atu ata ma mau faasino nei i le faasologa fefiloi ma valaaulia tagata aoga e faafetaui le fuaiupu ma le ata sao. Pe faaali atu mau fesootai ma fuaiupu e fesootai i ai ma valaaulia tagata aoga e sue po o ai tagata. Fautuaina tagata aoga e tusi nei igoa i a latou lava tusitusiga paia.

E toafa tagata o loo ta’ua i le 2 Nifae 3 e tutusa uma o latou igoa. Faitau fuaiupu mo ata taitasi ma faailoa mai po o ai e faatusa i ai nei ata e fa.

2 Nifae 3:3; 2 Nifae 3:4; 2 Nifae 3:11; 2 Nifae 3:15

Ia mautinoa ua malamalama tamaiti aoga o ata ua faatusa i ai (1) le atalii o Liae o Iosefa, (2) Iosefa o Aikupito, (3) le Perofeta o Iosefa Samita, ma (4) le tamā o le Perofeta, Iosefa Samita le Matua.

O le tele o le 2 Nifae 3 o loo taulai atu i se valoaga na faia e Iosefa o Aikupito e uiga i le “tagatavaai” ma le perofeta o Iosefa Samita ma lana misiona i aso e gata ai.

Na faia e Peresitene Polika Iaga (1801–77) lenei saunoaga e uiga i le sauniuniga a le Alii mo le misiona a Iosefa Samita:

Sa filifilia i le aufono o le faavavau, ae le’i taitai ona oo i le faavaeina o le fogaeleele, o ia, o Iosefa Samita, o le tagata, i le tisipenisione mulimuli o lenei lalolagi, na te aumaia le afioga a le Atua i tagata, ma maua le atoatoaga o ki ma le mana o le Perisitua o le Alo o le Atua. Sa silasila i ai le Alii ia te ia, ma lona tama, ma le tama o lona tama, ma tagata uma o lona aiga seia oo i tua … ia Atamu. Sa ia silasila i lena aiga ma lena toto ao puna mai i lona amataga seia oo mai i le aso na soifua mai ai lena tagata. Sa muai faamanuiaina o ia i le faavavau e pule faamalumalu i lenei tisipenisione mulimuli. (Aoaoga a Peresitene o le Ekalesia: Polika Iaga [1997], 96, 343)

• O le a se mea e mafai ona aoao mai e nei upu ia i tatou e uiga i le valaauga o Iosefa Samita?

• O le a se mea e mafai ona latou aoao mai ia i tatou e uiga i le Alii?

Valoaga e uiga ia Iosefa Samita

Mo le gaoioiga lenei, mafaufau e vaevae tamaiti aoga i ni paga ma tuu atu i se tamaitiiti aoga e toatasi e faitau le 2 Nifae 3:6–12 ae faitau e le isi le 2 Nifae 3:13–15, 24. Ona mafai lea e tamaiti aoga taitasi ona aoao atu le isi i mea sa ia mauaina. E mafai ona fesoasoani le fealuai solo i le potu ma fesoasoani i soo se tamaitiiti aoga o e atonu e i ai ni fesili e uiga i fuaiupu.

A o saunoa atu i lona atalii o Iosefa, sa sii mai e Liae se vaega o se valoaga a Iosefa o Aikupito mai papatusi apamemea (tagai foi Faaliliuga a Iosefa Samita, Kenese 50:24–38 [i le faaopoopoga i le Tusi Paia]). O lenei valoaga sa tele lava ina faatatau i le Perofeta o Iosefa Samita i aso e gata ai. Faitau le 2 Nifae 3:6–15, 24, ma faailoga upu po o fasifuaitau o loo aoao ai oe e uiga ia Iosefa Samita. (Manatua o “fua o ou sulugatiti” e faasino i tamaiti po o fanau.)

• O le a se mea e tumatila ia te oe e uiga ia Iosefa Samita?

  Mafaufau e valaaulia tamaiti aoga e tusi upu po o fasifuaitau na faagaeetia ai i latou i luga o le laupapa. E mafai ona e faasino i fasifuaitau i luga o le laupapa ma fai i le vasega e faasoa mai pe aisea na anoa ai nei fasifuaitau.

• E faapefea ona e aoteleina aoaoga e uiga i le Perofeta o Iosefa Samita mai mea na e faitauina i le 2 Nifae 3?

O se upumoni e tasi e mafai ona tatou aoaoina o le na faatuina e le Alii ia Iosefa Samita e fesoasoani e aumaia le Toefuataiga o le talalelei a Iesu Keriso.

• Aisea e te manatu ai e taua le i ai o se molimau patino i lenei upumoni?

Ua aoao mai Elder Neil L. Andersen o le Korama a Aposetolo e Toasefululua:

O manatu faaalia le lelei e uiga i le Perofeta o Iosefa Samita o le a faateleina a o tatou agai atu i luma i le Afio Mai Faalua o le Faaola. O faamatalaga e le atoatoa le moni ma tala taufaasese maaleale o le a le faaitiitia. O le a i ai tagata o le aiga ma uo o le a manaomiaina lau fesoasoani. …

Mo le autalavou … ou te tuuina atu se lui faapitoa: Ia maua sau oe lava molimau patino e uiga i le Perofeta o Iosefa Samita. (Neil L. Andersen, “Iosefa Samita,” Liahona, Nov. 2014, 30)

Atonu e sili le tuu atu i tamaiti aoga e mafaufau loloto ma manatunatu le leoa i a latou tali i le isi fesili. E mafai foi ona e fai atu ia i latou e tusi a latou tali i se api faamaumau mo suesuega.

• O le a sou lagona mautinoa e uiga i le valaauga paia o le Perofeta o Iosefa Samita?

Atonu e aoga i tamaiti aoga le faia o fesili e uiga ia Iosefa Samita pe e uiga i le mauaina o se molimau i lona valaauga faaperofeta. O le saunoaga a Elder Andersen o loo ta’ua i sauniuniga a tamaiti aoga e mafai ona avea o se punaoa aoga e talanoaina ai a latou fesili. O tamaiti aoga o e sa faitauina le lauga e sauniuni ai mo lenei lesona atonu e mafai ona talanoaina nisi o fesili a tagata o le latou vasega.

Mauaina o se molimau ia Iosefa Samita

Vaai faalemafaufau i le ata faataitai lenei:

Ina ua iloa e lau uo o Marcos o oe o se tagata O Le Ekalesia a Iesu Keriso o le Au Paia o Aso e Gata Ai, sa amata ona ia faitau e uiga ia Iosefa Samita i luga o le upega tafailagi a le Ekalesia. Sa faagaeetaina o ia i le valaaulia e aoao mo ia lava e faapea o Iosefa Samita o se perofeta a le Atua. A o ia faasoa atu ia te oe nisi o mea o loo ia aoaoina, sa ia fesili, “E faapefea ona tatou iloa mo i tatou lava pe o Iosefa Samita o se perofeta?”

• O le a sau tala e fai atu ia Marcos?

Mo nisi manatu i le mauaina o se molimau o Iosefa Samita o le perofeta a le Alii, matamata pe faitau i mea na fautuaina mai e Elder Andersen:

E mafai ona eseese tulaga e oo mai ai ia i tatou taitoatasi se molimau i le Perofeta o Iosefa Samita. Atonu e oo mai a o e tootuli e tatalo, ole atu i le Atua ina ia faamaonia mai o ia o se perofeta moni. E ono oo mai a o e faitau i le tala a le Perofeta i le Uluai Faaaliga. E mafai ona totoina se molimau i lou agaga a o e faitauina pea lava pea le Tusi a Mamona. E mafai ona oo mai a o e tuuina atu lau lava molimau e uiga i le Perofeta pe a o e tu i le malumalu ma iloaina ua toefuatai mai i le lalolagi le mana o faamauga e ala mai ia Iosefa Samita. O le faatuatua ma le loto faamaoni, o le a faamalosia ai lau molimau i le Perofeta o Iosefa Samita. (Neil L. Andersen, “Iosefa Samita,” Liahona, Nov. 2014, 30)

Atonu e te manao e matamata le vitio “O Le a Ou Faatu Mai se Tagatavaai Filifilia: Perofeta o le Toefuataiga” (4:42) e faalogologo ai i molimau ia Iosefa Samita na faasoa mai e le autalavou o le Ekalesia.

E mafai ona avea lenei mea ma se avanoa lelei e valaaulia ai tamaiti aoga e faasoa mai a latou molimau ia Iosefa Samita. E mafai ona e fesoasoani e saunia tamaiti aoga e ala i le valaaulia o i latou e tusi a latou tali i nisi o fesili nei i a latou api faamaumau mo suesuega. A uma ona tusitusi tamaiti aoga, valaaulia i latou o e naunau e faasoa mai i le vasega. Mafaufau e faasoa atu la oe lava molimau e uiga i le Perofeta o Iosefa Samita. E mafai foi ona lelei le fesoasoani i tamaiti aoga ia iloa o le filifiliga e talitonu i le valaauga paia o Iosefa Samita e tauleleia e tusa lava pe i ai le le mautonu. E mafai ona faamalosia lo latou talitonuga i le faagasologa o le taimi e ala i aafiaga.

• O le a se mea na fesoasoani ia te oe e talitonu ai o Iosefa Samita o se perofeta?

• O le a se mea na fesoasoani le Perofeta o Iosefa Samita e te malamalama ai pe lagona e uiga ia Iesu Keriso?

• O le a se mea e mafai ona e faia e faalolotoina ai lau molimau i le Perofeta o Iosefa Samita?

• E faapefea e le (i le) i ai o se molimau e uiga Iosefa Samita ona aafia ai lou olaga?

Manatu ma Talaaga o Faamatalaga

O tatou tapuai ea ia Iosefa Samita?

Na aoao mai Elder Gerrit W. Gong o le Korama o Aposetolo e Toasefululua e faapea:

Tatou te tapuai i le Atua le Tama Faavavau ma Lona Alo o Iesu Keriso, ae le o le Perofeta o Iosefa po o se isi lava alii po o se tamaitai soifua. (Gerrit W. Gong, “Atunuu Uma, Ituaiga ma Gagana,” Liahona, Nov. 2020, 39)

O a ni mea na saunoa mai ai perofeta o aso nei e uiga Iosefa Samita?

Ua molimau mai Peresitene Russell M. Nelson:

Ou te iloa o Iosefa Samita o le perofeta na muai faauuina, o lē na filifilia e le Alii na te tatalaina lenei tisipenisione mulimuli. E ala mai ia te ia na toefuatai mai ai le Ekalesia a le Alii i le lalolagi. Sa faamaufaailogaina e Iosefa lana molimau i lona toto. E ma’eu lo’u alofa ma le faamamaluina o ia! (Russell M. Nelson, “Faalogo ia te Ia,” Liahona, Me 2020, 92)

Na molimau mai Peresitene Dallin H. Oaks o le Au Peresitene Sili:

E pei o isi Au Paia o Aso e Gata Ai faamaoni, ua ou atinaeina lo’u olaga i luga o le molimau ma le misiona a le Perofeta o Iosefa Samita. I a’u faitauga ma uluai suesuega uma, e le’i faapea lava ua faalotovaivaia au mai la’u molimau i lona valaauga faaperofeta ma e uiga i le toefuataiga o le talalelei ma le perisitua na amataina e le Alii e ala mai ia te ia. (Dallin H. Oaks, “Joseph, the Man and the Prophet,” Ensign, May 1996, 73)

O fea e mafai ona ou aoao atili ai e uiga ia Iosefa Samita?

O le tusiga o Autu o le Talalelei “Iosefa Samita” (topics.ChurchofJesusChrist.org) o loo aofia ai se tusiga aoga ma le tele o isi punaoa e aoao atili ai e uiga i le soifuaga ma le misiona a le Perofeta o Iosefa Samita.

Maimoa i le “O Le a Ou Faatu mai se Tagatavaai Filifilia: Faatuatua e Manumalo Ai” (5:12).

Faitau le tala o Autu o le Talalelei “Faaliliuga o le Tusi a Mamona” (topics.ChurchofJesusChrist.org) e aoao atili ai e uiga i le faaliliuga o le Tusi a Mamona.

Faitau le Au Paia: O Le Tala o le Ekalesia a Iesu Keriso o le Au Paia i Aso e Gata Ai, vol. 1, O Le Tagavai o le Upumoni, 1815–1846) (2018).

Gaoioiga Faaopoopo e Aoao Ai

2 Nifae 3:8. “Ma o le a Ou faasilisilia o ia i o’u mata”

Sa ta’ua e le Alii o le a Ia faia Iosefa Samita ia silisili i Ona fofoga aua o le a ia faia le galuega a le Alii. Atonu e te tuu atu i tamaiti aoga e faitau le fuaiupu lenei ma vaavaai mo le mea na silisili ai Iosefa i le silafaga a le Alii. Mafaufau e talanoaina pe faapefea ona ese le silisili i fofoga o le Alii mai le silisili i mata o le lalolagi. Ona mafai lea ona e valaaulia tamaiti aoga e mafaufau pe mafai faapefea ona latou mulimuli i le faataitaiga a le Perofeta o Iosefa Samita i le faia o le galuega a le Alii.

2 Nifae 3:12. O le auala e galulue faatasi ai le Tusi Paia ma le Tusi a Mamona

Fesoasoani i tamaiti aoga ia malamalama “o le fua o ou sulugatiti” e faasino i e tupuga mai ia Iosefa o Aikupito, o e o le a fesoasoani e aumaia le Tusi a Mamona. O le fua o sulugatiti o Iuta e faasino i e tupuga mai ia Iuta, o e o le a fesoasoani e aumaia le Tusi Paia. Valaaulia tamaiti aoga e vaavaai pe faapefea ona galulue faatasi le Tusi Paia ma le Tusi a Mamona. Mafaufau e lisi mea e maua e tamaiti aoga i luga o le laupapa. E mafai e tamaiti aoga ona talanoaina pe faapefea ona galulue faatasi le Tusi Paia ma le Tusi a Mamona e faataunuu ai na faamoemoega ma saili ni faataitaiga patino. Mo se faataitaiga, e mafai e tamaiti aoga ona faatusatusa le Luka 11:9 ma le 2 Nifae 4:35, e uiga i le tatalo, po o le Mataio 6:14–15 ma le Mosaea 26:30–31, e uiga i le faamagalo atu.

2 Nifae 3:13. “O le a faamalosia o ia mai le vaivai”

E mafai ona e valaaulia tamaiti aoga e faitau le 2 Nifae 3:13 ma vaavaai mo mea ua latou aoaoina e uiga ia Iosefa Samita. Atonu e te fai atu fesili e pei o nei:

• O a ni auala atonu na manatu ai o Iosefa Samita e vaivai?

• Na faapefea ona faia e le Alii ia malosi o ia?

• O a ni auala e te manatu ai lava oe ua e vaivai ai?

• E mafai faapefea e le Alii ona faia oe ia malosi?

Vitio: “Ua Faamanuia e Liae ia Iosefa” (1:53)

Afai e faigata e nisi o au tamaiti aoga ona faitau, atonu e te mafaufau e faaaoga ni vaega o le vitio “Ua Faamanuia e Liae ia Iosefa,” lea o loo faaalia ai le talanoa atu o Liae i lona atalii o Iosefa ma sii mai se vaega o le 2 Nifae 3.