Atamai i Aoaoga Faavae: 2 Nifae 2: 27

Ua Tatou Saoloto e Filifili e Ala i le Puluvaga Sili

I se lesona talu ai, “2 Nifae 2:26–30,” na e aoaoina ai ua tatou saoloto e filifili le saolotoga ma le ola e faavavau e ala ia Iesu Keriso. O lenei lesona e mafai ona fesoasoani ia te oe e tauloto ai le mau o le atamai i aoaoga faavae ma le fasifuaitau autu o le mau mo le 2 Nifae 2:27, faamatala le aoaoga faavae, ma faaaoga mataupu faavae o le mauaina o le malamalama faaleagaga i tulaga moni o le olaga.

Faalauteleina o le malamalama e ala i gaoioiga toe faamanatu o le atamai i aoaoga faavae. O le faia e le aunoa o nei gaoioiga e fesoasoani ai i tamaiti aoga e tauloto fasifuaitau autu o mau. Atonu e te manao e fautuaina au tamaiti aoga e faaauau le suesueina o fuaitau o le atamai i aoaoga faavae i fafo atu o le vasega.

Sauniuniga a le tamaitiiti aoga: E mafai ona e valaaulia tamaiti aoga e taumafai e tauloto le 2 Nifae 2:27. Faamanatu i tamaiti aoga e mafai ona latou faaaogaina le polokalama o le Atamai i Aoaoga Faavae.

Gaoioiga e Ono Mafai Ona Aoao Ai

O lenei lesona o le fuaitau o le atamai i aoaoga faavae ua fuafuaina ia aoaoina pe a maea ona fai le lesona o le “2 Nifae 2:26–30,” o le lesona faatatau mo le fuaitau o le atamai i aoaoga faavae o le 2 Nifae 2:27. Afai e manaomia le tuu o le lesona lenei o le atamai i aoaoga faavae i se isi vaiaso, ia mautinoa e aoao atu ai foi le lesona faatatau e o faatasi ai i le vaiaso foi lena.

Tauloto ma faamatala

Faaaoga soo se metotia aoga ma talafeagai e fesoasoani ai i tamaiti aoga e tauloto le tusi faasino ma le fuaitau autu o le mau mo le 2 Nifae 2:27 ma faamalamalama upumoni o loo maua i lenei fuaitau.

Afai e faaaoga le fautuaga lenei, mafaufau e valaaulia tamaiti aoga e tusi faatasi o se vasega se ata tusi i luga o le laupapa po o luga o se fasipepa tele. Ia faaeteete ina ia faapuupuu le gaoioiga o le tusiga ata ina ia lava le taimi mo le faataitai le faaaogaina. Afai e mafai, faaali atu le atatusi a le vasega mo ni nai aso e fesoasoani ai i tamaiti aoga e tauloto lelei le tusi faasino ma le fasifuaitau autu o le mau.

Faitau le 2 Nifae 2:27 ma tusi se ata e fesoasoani ia te oe e vaai faalemafaufau ai i le uiga o le fuaitau autu o le mau: “Ua latou saoloto e filifili le saolotoga ma le ola e faavavau … [po o] le … faatagataotauaina ma le oti. Ia aofia ai le fasifuaitau autu i lau atatusi e fesoasoani ia te oe e tauloto ai.

O le isi, tusi i luga o lau ata le uiga o le ua tatou saoloto e filifili le saolotoga ma le ola e faavavau e ala ia Iesu Keriso, pe filifili le faatagataotauaina ma le oti. Ia aofia ai le uiga o lenei fuaiupu ia te oe lava ia ma pe faapefea ona fesoasoani ia te oe e mulimuli atili ai ia Iesu Keriso.

Afai na fatuina se ata a le vasega, valaaulia tamaiti aoga e galulue faatasi e tusi se faamalamalamaga o le fuaiupu.

Afai e faamaeaina e tamaiti aoga ata taitasi, valaaulia i latou e tusi a latou lava faamalamalamaga ona faasolosolo lea i le potu ma faasoa mai a latou ata tusi ma faamalamalamaga ia le itiiti ifo ma le toalua o isi tamaiti aoga.

Ma le mea mulimuli, a o tilotilo i le ata, toe fai le tusi faasino ma le fasifuaitau autu o le mau seia oo ina e iloaina mai le manatuaga.

Faataitai le faaaogaina

O se isi vaega o le fautuaga lenei e fesoasoani ai i tamaiti aoga e toe faamanatu mataupu faavae o le mauaina o le malamalama faaleagaga o le valaaulia lea o ni tamaiti aoga se toatolu a o lei amataina le vasega e suesue se tasi o mataupu faavae. I le taimi lea o le lesona, valaaulia i latou e taitasi ma faaaoga se minute se tasi pe lua e faamalamalama ai le mataupu faavae sa latou suesueina i le vasega.

Ina ia toe faamanatu mataupu faavae o le mauaina o le malamalama faaleagaga, vaai pe mafai ona e manatua pe o a mataupu faavae taitasi e tolu. Ona vaai lea pe mafai ona e faafetauia fasifuaitau nei ma le mataupu faavae sa’o. (Faaaoga parakalafa 5–12 i le “Mauaina o le Malamalama Faaleagaga” i le vaega o le Pepa Autu o le Atamai i Aoaoga Faavae [2022] e siaki ai lou sa’o.)

• “Puipuia i tatou mai faamatalaga sese ma mai ia i latou o e saili e faaumatia le faatuatua”

• “Vaai i manatu e faavae i le tulaga faatonuina a le Alii o le upumoni nai lo le taliaina o manatu po o mafaufauga o le lalolagi”

• “Faalagolago i le molimau ua uma ona tatou maua”

Ia lagona le saoloto e fetuunai tulaga ua fautuaina mai i le mataupu aoaoina ina ia fetaui lelei ma tulaga o au tamaiti aoga. Mo se faataitaiga, i le ata faataitai lenei, e mafai ona suitulaga se amioga agasala i le ava malosi.

E mafai foi ona faaaoga ata faataitai eseese e faataunuu ai le faamoemoega lava e tasi. Mo se faataitaiga, e mafai e tamaiti aoga ona taulai atu i se isi ata faataitai e uiga i se tagata o le Ekalesia o le ua le fiafia ona ua uunaia e ona matua le mulimuli i se tulaga faatonuina patino o le Ekalesia. I le le fiafia, atonu e tali mai o ia, “E i ai la’u faitalia! E mafai ona ou faia soo se mea ou te manao ai!” Ona mafai lea e tamaiti aoga ona faaaoga mataupu faavae o le mauaina o le malamalama faaleagaga ma le 2 Nifae 2:27 i lenei ata faataitai.

Faitau le ata faataitai lenei ma mafaufau pe faapefea ona faaaoga e Ivan ia mataupu faavae o le mauaina o le malamalama faaleagaga.

Sa fuafua Ivan e faaalu le aoauli o le Aso Toonai faatasi ma ana uo, ae ina ua faafuasei ona tu atu se tasi o i latou ma se ava malosi e faasoa atu, sa ia lagona ua oo i le taimi mo ia e alu ese ai. Sa ia iloa o le a le faateia ana uo ona ua ia masani i le tuumuli atu i le fale i tulaga faapena i le taimi ua tuanai. A o savali ese atu o ia, sa ia lagona atu lana uo o Tanielu o fai mai, “E foliga mai o le a le faatagaina e le lotu a Ivan lona faia o se mea.”

Sa faaauau pea ona mafaufau Ivan i le faamatalaga a Tanielu a o savali atu o ia i le fale.

Iloilo manatu faavae ma fesili faatasi ma se vaaiga e faavavau.

Faitau le parakalafa 8 i le “Mauaina o le Malamalama Faaleagaga” i le vaega o le Pepa Autu o le Atamai i Aoaoga Faavae (2022). Ia gauai faapitoa atu i le uiga o le toe faaupuina o fesili.

• E faapefea ona e faamatalaina le uiga o le toe faaupuina o se manatu faaalia po o se fesili?

Faalogo ma le toto’a i tali a tamaiti aoga i le fesili na muamua atu e fesoasoani ia te oe e iloa ai pe o le a le lelei o le malamalama o tamaiti aoga i lenei manatu. Afai latou te malamalama lelei i ai, mafaufau e valaaulia se tamaititi aoga e taitai isi tamaiti aoga i le toe faaupuina o le faamatalaga a Tanielu.

Afai e lei saunia tamaiti aoga e toe faaupu manatu e aunoa ma se fesoasoani, mafaufau e faaaoga nisi o fautuaga nei e fesoasoani ai ia i latou.

1. Faailoa mai ni manatu po o ni mafaufauga e ono aofia ai.

   • O le a se mea e foliga mai e talitonu i ai Tanielu e uiga i le saolotoga ma le faamoemoega o le faitalia?

   • O le a se mea e foliga mai e talitonu i ai o ia e uiga i tulaga faatonuina o le Ekalesia a le Faaola?

2. Mafaufau i le mataupu i le anomea o le fuafuaga o le faaolataga ma aoaoga a le Faaola.

   • O le a se mea na e oo i ai e ala i le ola ai i le talalelei a Iesu Keriso ua fesoasoani ia oe e ese ai lau vaai i mea nai lo le vaai a Tanielu?

   • O a vaega o le fuafuaga o le faaolataga e te manatu o le a sili ona aoga mo Tanielu e malamalama ai?

   • O le a le ituaiga saolotoga ua ofo mai e le Faaola ia i latou o e faaaogaina lo latou faitalia e tausi ai Ana poloaiga? O le a le ituaiga o faatagataotauaina e taunuu i ai mai le teenaina o i latou?

Mafaufau e vavae tamaiti aoga i ni paga ma suesue e tamaiti aoga taitasi se tasi o mataupu faavae nei e lua o le mauaina o le malamalama faaleagaga. Ona valaaulia lea o i latou e faasoa mai ma a latou paga a latou tali i fesili o loo avatu faatasi ai.

Faitau palakalafa 5–7, 11 o le vaega o le “Mauaina o le Malamalama Faaleagaga” o le Pepa Autu o le Atamai i Aoaoga Faavae (2022) ma mafaufau loloto pe faapefea ona faatatau mataupu faavae nei e lua i le tulaga o Ivan.

Faatino i le faatuatua

• Afai e amata ona fesiligia e Ivan lana faaiuga e savali ese mai tulaga matautia faaleagaga, o le a se mea e mafai ona e faasoa atu ia te ia mai palakalafa 5–7? Aisea?

Saili le malamalama atili e ala i punavai paia ua filifilia

• O a punavai o loo ta’ua i le parakalafa 11 e te manatu o le a sili ona aoga ia Ivan?

• E faapefea e upumoni o loo i le 2 Nifae 2:27 ona fesoasoani ia te ia?

Iloiloga o le atamai i aoaoga faavae

I le taimi o lesona o le a sosoo ai, fesoasoani i tamaiti aoga e toe faamanatu faapuupuu le tusi faasino ma le fasifuaitau autu mo le 2 Nifae 2:27. O se tasi auala e faia ai lenei mea o le valaaulia lea o tamaiti aoga e vaai i le atatusi na latou fatuina ma vaai pe o mafai lava ona latou manatua le tusi faasino ma le fasifuaitau autu o le mau. E mafai ona toe fai lenei mea i le amataga po o le faaiuga o lesona eseese i le lumanai.