2 Nifae 2:26–30

Saoloto e Filifili

I lou olaga atoa, o le a e feagai ai ma filifiliga. O nisi o filifiliga e te faia o le a i ai ni taunuuga tumau, o nisi taimi e faavavau. Na aoao mai Liae ona o Iesu Keriso, ua mafai ai e tagata ona “saoloto e filifili le saolotoga ma le ola e faavavau” po o le “faatagataotauaina ma le oti” (2 Nifae 2:27). O lenei lesona e mafai ona fesoasoani ia te oe e faaaoga ai lou faitalia e mulimuli ai ia Iesu Keriso.

Iloaina o tulaga o tagata a’oa’o taitoatasi. E tofu le tamaitiiti aoga ma ni aafiaga ma ni sootaga eseese e faaosofia ai o latou mafaufauga ma lagona e uiga i upumoni o le talalelei. Saili ia malamalama i tamaiti aoga taitasi ma o latou talaaga. A o e sauniuni ma aoao atu lesona, mafaufau e uiga i fesuiaiga e ono aafia ai le ala e tali mai ai tamaiti aoga.

Sauniuniga a le tamaitiiti aoga: Valaaulia tamaiti aoga e faitau le 2 Nifae 2:27 ma mafaufau ma le agaga tatalo po o a filifiliga i o latou olaga o loo fesoasoani ia i latou e latalata atili atu ai i le Faaola ma maua faamanuiaga ua Ia ofoina mai. Valaaulia foi i latou e mafaufau i soo se filifiliga atonu latou te mananao e sui.

Gaoioiga e Ono Mafai Ona Aoao Ai

Faia o Filifiliga

Tusi le lisi lenei i luga o le laupapa. Valaaulia tamaiti aoga e talanoa i ni paga, i ni vaega toalaiti, po o se vasega.

Mafaufau pe aisea e mafai ai e tagata eseese ona filifili e fai pe le faia foi mea nei:

• tatalo e le aunoa

• auai i le lotu

• salamo

• usitai i le Upu o le Poto

• faamagalo atu i isi

Mafaufau loloto i au lava mafuaaga mo le filifilia e fai pe le faia foi nei faatinoga. Ia mafaufau foi i isi poloaiga o loo aofia ai i le talalelei a Iesu Keriso. A o e suesue i lenei lesona, saili le fesoasoani mai le Agaga Paia ia malamalama ai pe o faapefea ona e faaaogaina lou faitalia i auala e faamaonia e le Alii ma pe faapefea ona e manao e faaleleia atili.

Saoloto e filifili

I le tau faaiuiuga o lona soifua, sa aoao atu ai e le perofeta o Liae lona aiga e uiga i vaega autu o le fuafuaga o le faaolataga a le Tama Faalelagi. O ana aoaoga na aofia ai le Pa’ū, le Togiola a le Faaola, ma le faitalia.

Faitau le 2 Nifae 2:26, ma vaavaai mo mea na aoao atu e Liae e uiga i nei vaega e tolu.

• O le a se mea na e aoaoina?

  A o faasoa mai tamaiti aoga, atonu e aoga le faasino atu o le fasifuaitau “ua togiolaina i latou mai le pa’ū” ma fesili atu po o a mea latou te manatua e uiga i le Pa’ū.

• E mafai faapefea e le Pa’ū ma le Togiola a le Faaola ona tatou maua ai le faitalia?

Faitau le 2 Nifae 2:27. Tusi se ata faigofie e faaali atu ai mea o loo aoao mai e le fuaiupu, pe aotele i au lava upu.

Valaaulia tamaiti aoga e faasoa mai mea na latou tusia po o le auala na latou aoteleina ai le fuaiupu. E mafai e tamaiti aoga ona faasoa mai i ni paga, i vaega toalaiti, pe o se vasega.

O le2 Nifae 2:27 o se fuaitau o le atamai i aoaoga faavae. Mafaufau e faailoga fuaitau o le atamai i aoaoga faavae i se auala iloga ina ia mafai ai ona e maua gofie. O le a e maua se avanoa i le lesona e sosoo e faataitai ai ona faaaoga le aoaoga faavae o loo aoaoina i lenei fuaitau i se fesili po o se tulaga o aafiaga.

Mafaufau e tusi se ata i luga o le laupapa e pei o le ata o loo i lalo, pe faaaoga se lomiga na fatuina e tamaiti aoga. Faasino atu i le ata ao tali mai e tamaiti aoga ia fesili nei. E mafai ona e faaali atu le ata atoa i le taimi e tasi, pe faaali muamua atu le afa pito i luga ona faaopoopo lea o le afa pito i lalo pe a talanoaina fesili lona tolu ma le fa.

O se tasi lenei o auala e faailoa atu ai lenei fuaiupu:

O se tasi o auala e mafai ona e aoteleina ai le aoaoga a le Faaola i le fuaiupu 27 o le, ua tatou saoloto e filifili le saolotoga ma le ola e faavavau e ala ia Iesu Keriso pe filifili le faatagataotauaina ma le oti.

Matau i luga a’e o le pusa ua faaulutalaina “Saoloto e Filifili,” e amata ona felata’i aū o le tasi ma le isi. Atonu e manatu nisi tagata o le faaaogaina o lo tatou faitalia e mulimuli ai ia Iesu Keriso e faatapulaa ai a tatou filifiliga ma aveesea moni ai lo tatou saolotoga.

• Aisea e ono manatu ai nisi tagata o le mulimuli ia Iesu Keriso e faatapula’ia ai lo tatou saolotoga?

Matau le auala o loo faaalia ai i lenei ata le lautele atu o le matala o aū a o tatou mulimuli ia Iesu Keriso. O le mea moni, o le mulimuli ia Iesu Keriso e tuuina mai ai ia i tatou le tele o filifiliga ma le saolotoga sili atu.

• O a ni auala e mafai ai e le mulimuli ia Iesu Keriso ona taitai atu i le saolotoga?

Matau i le isi itu o le ata, o aū e amata mamao ese atu ona toe o mai vavalalata faatasi lea.

• Aisea e ono manatu ai nisi tagata o le le usitai ia Iesu Keriso e taitai atu ai i le saolotoga?

• E faapefea e le filifili o le le usitai ia Iesu Keriso ona taitai atu ai i le faatagataotauaina?

Sa faamatala e Elder D. Todd Christofferson o le Korama a Aposetolo e Toasefululua le mafuaaga o le le usitai i le Alii e taitai atu ai i le faaitiitia o le saolotoga:

O Satani … e uunaia amioga ma filifiliga e faatapulaa ai lo tatou saolotoga e filifili ai e ala i le suia o le uunaiga a le Agaga Paia i lana lava pulega (tagaiMF&F 29:40;93:38–39). O le gauai atu i ana faaosoosoga e taitai atu ai i se filifiliga vaapiapi ma vaapiapi o a tatou filifiliga seia oo lava ina leai se mea e totoe, ma i mea ua fai ma vaisu e le mafai ai ona tatou tetee atu. (D. Todd Christofferson, “Moral Agency,” Ensign, Iuni 2009, 49)

Ina ia vaai i se faataitaiga o le upumoni sa e aoaoina, mafaufau e maimoa i le “Tuua le Patī” (6:26) i le ChurchofJesusChrist.org.

Mafaufau e valaaulia tamaiti aoga e faasoa mai le auala e faapupula ai e lenei tala le mataupu faavae na latou faailoa mai.

Faitau le 2 Nifae 2:28–30, ma faaaoga ni nai minute e mafaufau loloto ai pe o faapefea ona e filifili e faaaoga lou faitalia.

Mafaufau i au tali i fesili nei:

• O faapefea ona taitai atu oe e au filifiliga e mulimuli ia Iesu Keriso i le saolotoga ma le ola e faavavau? O faapefea ona faamanuiaina oe e le Alii mo o au taumafaiga?

• E faapefea e nisi o au filifiliga ona taitai atu oe i le faatagataotauaina? O le a lau laasaga muamua e sui ai? E faapefea ona fesoasoani le Alii ia te oe?

Faamautinoa atu i tamaiti aoga o soo se filifiliga leaga lava atonu na latou faia e mafai ona faatoilaloina e ala i le faatuatua ia Iesu Keriso ma le salamo. Molimau atu i le Faaola, Lana Togiola, ma Lona gafatia e faamalosia ai i tatou e faia filifiliga e taitai atu ai i le fiafia ma le ola e faavavau. Afai e musuiaina, e ono fesoasoani le faamanatu atu i tamaiti aoga o lo latou epikopo po o le peresitene o le paranesi e i ai ki o le perisitua e fesoasoani ai i soo se tasi e toe foi atu i luga o le ala o feagaiga.

Manatu ma Talaaga o Faamatalaga

Aisea e tatau ai ona ou taumafai e fai filifiliga lelei pe afai e faia e tagata o siomia au ni filifiliga leaga?

“E te tali atu oe lava ia mo filifiliga e te faia. E manatu tele mai le Atua ia te oe ma o le a fesoasoani ia te oe e faia filifiliga lelei, e tusa lava pe faaaoga e lou aiga po o uo a latou faitalia i auala e le sa’o. Ia i ai lou lototoa a’ia’i e tu mausali ai e usiusitai i le finagalo o le Atua, e tusa lava pe e te tu na o oe. A o e faia lenei mea, ua e faia se faataitaiga mo isi e mulimuli ai.

“Ao e saoloto e filifili lau lava ala o faatinoga, e te le saoloto e filifili taunuuga. Pe mo le lelei po o le leaga, e mulimuli mai taunuuga o se taunuuga masani o filifiliga e te faia” (Mo le Malosi o le Autalavou [tamaitusi, 2011],2).

Aisea e taua tele ai i le Tama Faalelagi ma Iesu Keriso le i ai o le faitalia ma le iloaina o le auala e faaaoga ai?

Na faamalamalama mai e Elder D. Todd Christofferson o le Korama a Aposetolo e Toasefululua:

O le faaaogaina o lo tatou faitalia e filifili ai le finagalo o le Atua, ae le o le faavaivai e tusa lava pe faigata, o le a le avea ai i tatou o ni papeti a le Atua; o le a avea ai i tatou faapei o Ia. Na tuuina mai e le Atua ia i tatou le faitalia, ma na faaali mai e Iesu ia i tatou le ala e faaaoga ai ina ia mafai ona tatou aoao mea ua Laua silafia, ma avea ma tagata ua avea ai i Laua. (D. Todd Christofferson, “Moral Agency,” Ensign, Iuni 2009, 53)

Aisea e tuuina mai ai e le Alii ia i tatou poloaiga ma valaaulia i tatou e faaaoga lo tatou faitalia e tausia ai?

Na ta’ua e Elder Robert D. Hales (1932–2017) o le Korama a Aposetolo e Toasefululua:

O poloaiga e le o se avega mamafa po o se tapu. O poloaiga uma a le Alii ua tuuina mai mo lo tatou atiinaega, alualu i luma, ma le tuputupu a’e. Na aoao mai le Perofeta o Iosefa Samita: “Ua mamanuina e le Atua lo tatou fiafia. … O le a Ia le faatuina lava se sauniga pe tuuina atu se poloaiga i Lona nuu e lei fuafuaina i lona natura e faalauiloa ai lena fiafia ua Ia mamanuina” (Teachings of the Prophet Joseph Smith, sel. Joseph Fielding Smith [1976], 256). (Robert D. Hales, “If Thou Wilt Enter into Life, Keep the Commandments,” Ensign, Me 1996, 36)

Gaoioiga Faaopoopo e Aoao Ai

2 Nifae 2:26–27. E mafai e Iesu Keriso ona togiolaina le fanauga a tagata

Atonu e i ai ni tamaiti aoga po o ni tagata e iloa e tamaiti aoga o loo faia filifiliga e taitai atu ai i le faatagataotauaina. Mafaufau e faaali le vitio “Painted into a Corner” (3:41) e fesoasoani ai i tamaiti aoga ia lagona le faamoemoe lea e mafai ona maua e ala ia Iesu Keriso. E mafai ona faaali le vitio pe a uma ona talanoaina e tamaiti aoga pe faapefea e le mulimuli ia Satani ona taitai atu i le faatagataotauaina.

2 Nifae 2:27. Filifili le saolotoga ma le ola e faavavau

O le gaoioiga lenei e mafai ona fesoasoani i tamaiti aoga e mafaufau loloto ai i le mataupu faavae na faailoa mai i le lesona ma le auala na latou faaaogaina ai.

Valaaulia tamaiti aoga e fai se ata faataitai e uiga i se tasi e manaomia ona sui.

Mafaufau e fai atu fesili e pei o nei: O le a se mea e te fautuaina atu e fai e lenei tagata? O a saolotoga o le a aumaia e nei filifiliga? E faapefea ona sailia e lenei tagata le fesoasoani mai le Faaola? O a ni auala e ono fesoasoani ai le Faaola? E faapefea e Satani ona saili e faalotovaivaia pe taofia lenei tagata mai le suia? E faapefea ona faatoilalo e lenei tagata taumafaiga a Satani?

A uma ona faia e tamaiti aoga, valaaulia i latou e mafaufau loloto i se mea i o latou olaga atonu e manaomia ona latou suia. O nei lava fesili e mafai ona faaalia mo tamaiti aoga e toe manatunatu ai e uiga ia i latou lava.