2 Nifae 2:17–26

“Togiolaina mai le Paʼūʼ

Pe na e mafaufau ea i auala e ono aafia ai pea oe ona o filifiliga na faia e Atamu ma Eva i le faitau afe o tausaga ua mavae? Na aoao e Liae lana fanau e uiga i aafiaga o le Paʼū o Atamu ma Eva ma faatasi ai ma le Faaola e mafai ai ona tatou faatoilalo luitau uma o le olaga faaletino. O lenei lesona e mafai ona fesoasoani e te talisapaia atili ai le Faaola ma Lana Togiola a o e malamalama i le Paʼū o Atamu ma Eva.

Fesoasoani i tagata aoao e atiina ae tomai e talanoaina ai talitonuga o le talalelei faatasi ma isi. E faateleina e tamaiti aoga lo latou malamalama pe a latou faamatala atu le talalelei. Fatufatu se siosiomaga e lagona ai e tamaiti aoga le lagolelei e faasoa atu o latou malamalama i upumoni o le talalelei i isi.

Sauniuniga a le tamaitiiti aoga: Mafaufau e valaaulia tamaiti aoga e faitau le mataupu faavae o le faatuatua lona lua ma mafaufau pe o le a faapefea ona latou faamatala atu i se isi tagata. E mafai foi ona latou fesili atu i se tagata se toatasi pe toalua latou te faatuatuaina e faasoa mai ia i latou o laua malamalamaaga i le mataupu faavae o le faatuatua lona lua.

O lenei sauniuniga e mafai ona faaaoga i le amataga o le lesona pe faasoa mai foi e tamaiti aoga mea ua latou iloa e uiga i le Paʼū o Atamu ma Eva.

Gaoioiga e Ono Mafai Ona Aoao Ai

O le malamalama e taitai atu ai i le talisapaia

Mafaufau loloto i fesili nei:

• I se fuafaatatau o le 1 i le 10 (1 e “aunoa ma se mea” ma le 10 e “atoatoa”), o le a sou lagona i le tele o lou malamalama ma le talisapaia o le Faaola o Iesu Keriso ma Lana taulaga mo oe? Aisea?

Tuu atu i tamaiti aoga se taimi ia lava e mafaufau loloto ai i fesili na muamua atu a o lei agai i luma. Ona valaaulia lea o i latou e faasoa mai tali i le fesili e sosoo ai:

• Afai e fesili atu se tasi ia te oe po o le a se mea e tatau ona latou faia ia malamalama ai ma talisapaia le Togiola a Iesu Keriso, o le a sau tala e fai atu?

Sa taua e Elder Jeffrey R. Holland o le Korama a Aposetolo e Toasefululua se laasaga talafeagai se tasi e malamalama atili ai i le Togiola a le Faaola. Atonu e te manao e matamata le vitio o le “Pe a Faatasia le Faamasino Tonu, Alofa, ma le Alofa Mutimutivale” mai le faailotaimi 6:51 i le 7:26 pe faitau le faamatalaga lenei:

O le upumoni faigofie e faapea, e le mafai ona tatou malamalama atoatoa i le Togiola ma le Toetu o Keriso ma o le a le lava lo tatou talisapaia o le faamoemoega uiga ese o Lona soifua mai po o Lona maliu … e aunoa ma le malamalama sa i ai moni lava se Atamu ma se Eva sa pa’ū’ū mai se Etena moni faatasi ai ma taunuuga uma sa tauaveina e lena pa’ū. (Jeffrey R. Holland, “Pe a Faatasia le Faamasino Tonu, Alofa, ma le Alofa Mutimutivale,” Ensign po o le Liahona, Me 2015, 105)

Ina ia fesoasoani ia te oe e iloilo le tele o lou iloa e uiga i le Paʼū o Atamu ma Eva, mafaufau i fesili nei:

• O le a le Paʼū o Atamu ma Eva?

• O a aafiaga o le Paʼū i le lalolagi? ia te oe?

• E faapefea ona fetaui le Paʼū i totonu o le fuafuaga o le faaolataga a le Tama Faalelagi?

• E faapefea ona fesoasoani le Paʼū ia te oe ia malamalama ma talisapaia ai Iesu Keriso ma Lana taulaga mo oe?

A o e suesue, vaavaai mo tali i nei fesili ma mafaufau loloto pe faapefea e le malamalama i ai ona fesoasoani ia te oe.

O aafiaga o le Paʼū o Atamu ma Eva

O le parakalafa o loo i lalo ua faamoemoe e fesoasoani i tamaiti aoga ia malamalama pe na faape’i le Faatoaga o Etena ina ia mafai ona latou malamalama loloto atili ai i aafiaga o le Paʼū. Mafaufau e valaaulia tamaiti aoga e faasoa mai mea ua latou iloa e uiga i nei mea na tutupu, ma faatumu ai soo se faamatalaga auiliili taua.

A o sauni Liae e oti, sa ia talanoa loloto atu i lona atalii o Iakopo e uiga i le Paʼū o Atamu ma Eva. O Atamu, Eva, ma ituaiga uma o olaga i luga o le fogaeleele sa i ai i se tulaga tino ola pea, e lei oo i ai le oti, ma sa i ai i le afioaga o le Atua. I lena tulaga, sa le mafai ona mama’i pe feoti, ma sa saunia e le faatoaga meaai mo i laua e aunoa ma lo la galulue e gaosia. Sa le mafai foi ona i ai so laua aiga. Sa lapataia i laua e le Alii afai la te aai i le fua o le laau e iloa ai le lelei ma le leaga, o le a iu lava ina la feoti (tagai Mose 3:16–17; Aperaamo 5:12–13). O le faaiuga a Atamu ma Eva e aai i lena fua ma taunuuga mo i laua ma le lalolagi atoa ua ta’ua o le Paʼū.

Faitau le 2 Nifae 2:19–23 ma le Alema 42:6–9, ma vaavaai mo taunuuga o le Paʼū. Mafaufau e faailoga mea e te mauaina.

E ono fesoasoani le galulue faatasi o tamaiti aoga i ni vaega toalaiti pe tusi se lisi i luga o le laupapa o se vasega.

Mafaufau e valaaulia tamaiti aoga e tali fesili nei e lua i ni paga pe i ni vaega toalaiti. Faamalamalama atu o nei fesili o ni fesili mo manatu, o lea e mafai ai e tamaiti aoga ona faasoa saoloto mai o latou manatu ma aua le popole i le i ai o se “tali sao.”

• O le a sou lagona pe ana faapea o oe o Atamu ma Eva o feagai ma nei taunuuga?

• E te manatu o nei aafiaga e lelei, leaga, pe o taunuuga uma e lua? Aisea?

Faitau le 2 Nifae 2:24–25, ma mafaufau pe faapefea ona e aoteleina nei fuaiupu i au lava upu.

O le2 Nifae 2:25 o se fuaitau o le atamai i aoaoga faavae. Mafaufau e faailoga fuaitau o le atamai i aoaoga faavae i se auala iloga ina ia mafai ai ona e maua gofie. O le a e maua se avanoa i le lesona e sosoo ai e faataitai ai ona faaaoga le aoaoga faavae o loo aoaoina i lenei fuaitau i se fesili po o se tulaga o aafiaga.

Valaaulia tamaiti aoga e faasoa mai pe o le a faapefea ona latou aotelea nei fuaiupu. Tusi ni upumoni latou te ta’ua i luga o le laupapa. O se faataitaiga lenei o se upumoni se tasi atonu latou te faailoa mai.

O se tasi o upumoni na aoao mai e Liae o le Paʼū o se vaega taua o le fuafuaga o le fiafia a le Tama Faalelagi.

Faaaoga sina taimi e toe manatunatu ai pe aisea na avea ai le Paʼū o se vaega taua o le fuafuaga a le Tama Faalelagi a o e faitauina le saunoaga lenei a Elder Jeffrey R. Holland o le Korama a Aposetolo e Toasefululua:

O le Pau o se vaega manaomia o le ata paia a le Tama Faalelagi. Ana leai lena, e leai ni fanau faaletino e fananau ia Atamu ma Eva, ma o le a leai se aiga o tagata e oo i le tuu faafeagai o mea ma le ola tuputupu ae, faitalia, ma le olioli i le toetutu, faaolataga, ma le ola e faavavau [tagai 2 Nifae 2:22–27; Mose 5:11]. (Jeffrey R. Holland, “O le Togiola a Iesu Keriso,” Liahona, Mat. 2008, 35)

• Aisea na avea ai le Paʼū o se vaega taua o le fuafuaga a le Tama Faalelagi?

O se vaega o lenei fesili, atonu e te manao e tuu atu i tamaiti aoga e faailoga ma talanoaina le fasifuaitau “ua i ai tagata, ina ia latou maua le olioli” i le 2 Nifae 2:25. E mafai ona e fai atu fesili e pei o nei:

Aisea e taua ai le malamalama faapea e tusa lava pe tatou te feagai ma taunuuga o le Paʼū, e finagalo pea le Tama Faalelagi ia tatou lagonaina le olioli? O le a se mea o aoao atu e lenei mea ia te oe e uiga ia te Ia?

Tatou te manaomia pea le fesoasoani.

E ui o taunuuga o le Pa’ū o se vaega o le fuafuaga a lo tatou Tama Faalelagi ma ua faamoemoe e fesoasoani ia i tatou ia alualu i luma, e le mafai ona tatou lagonaina le olioli moni e aunoa ma fesoasoaniga faalelagi.

Atonu e te manao e lisi mau o loo i lalo i luga o le laupapa ma fai atu i tamaiti aoga e suesue le leoa ma mafaufau loloto i ai ma le toto’a.

Faitau ma le toto’a le 2 Nifae 2:26, ma vaavaai pe faapefea ona mafai ona faatoilalo aafiaga o le Paʼū ma lagona le olioli. Ona faitau lea o le Mose 5:10–11, ma matau po o a upumoni na taitai atu ai Atamu ma Eva i le olioli.

• O le a se mea na e aoaoina?

• Aisea e te manatu na olioli ai Atamu ma Eva ina ua uma ona aoao e uiga i le Paʼū ma le Togiola a Iesu Keriso?

A uma ona faasoa mai tamaiti aoga, e mafai ona latou toe asia fesili e fa o le iloiloga faaletagata lava ia mai le amataga o le lesona ma vaai po o le a le lelei e mafai ona latou taliina ai i le taimi nei. Afai e tatau ai, toe fai soo se anomea i le lesona e fesoasoani e faamanino ai lo latou malamalama. O le isi auala e fesoasoani ai i tamaiti aoga e mafaufau e uiga i mea sa latou aoaoina i lenei lesona o le faasoa atu lea o le vaaiga faataitai lenei ma valaaulia tamaiti aoga e faasoa mai pe o le a faapefea ona latou tali i ai.

Manatu faapea i se talanoaga ma se uo, e te matauina ai na te le talisapaia le Faaola po o Lana Togiola.

• O le a le malamalamaaga e uiga i le Paʼū o Atamu ma Eva e mafai ona fesoasoani ia te ia e talisapaia ai le Faaola ma Lana Togiola?

Mafaufau e te molimau atu i upumoni na aoaoina i lenei lesona.

Manatu ma Talaaga o Faamatalaga

O a ni lagona e tatau ona tatou maua e uiga i le aia e Eva o le fua [o le laau]?

Na saunoa Peresitene Dallin H. Oaks o le Au Peresitene Sili:

Ua tausalaina e ni isi o Kerisiano ia Eva ona o lana faatinoga, ma iu ai ina faapea ua sasi o ia ma lana fanau tamaitai i lea mea. Ae le [o lagona na] o le Au Paia o Aso e Gata Ai! O le faailoaina mai e ala i faaaliga, ua tatou patipatia ai le faatinoga a Eva ma faamamalu ai lona atamai ma le lototele i le vaega maoae ua taua o le Paʼū. (Dallin H. Oaks, “O Le Fuafuaga Sili o le Fiafia,” LiahonaNov. 1993, 73)

E faapefea ona tatou maua le olioli i se lalolagi faigata?

Na saunoa Peresitene M. Russell Ballard o le Korama a Aposetolo e Toasefululua:

Na aoao mai le perofeta o Liae, “Ua i ai [alii ma tamaitai], ina ia latou maua le olioli” [2 Nifae 2:25]. E tele mafuaaga e mafai ai ona tatou lē maua le filemu, olioli, ma le fiafia i lenei olaga, e aofia ai le mativa, taua, faalavelave faalenatura, ma faafitauli e lei faamoemoeina i galuega, soifua maloloina, ma mafutaga faaleaiga.

Ae e ui lava e le mafai ona tatou pulea le tele o na malosiaga mai fafo lea e aafia ai o tatou olaga iinei i le lalolagi, ae a o tatou taumafai e avea ma soo faamaoni a le Alii o Iesu Keriso, e mafai ona tatou maua le filemu, olioli, ma le fiafia e ui lava i faafitauli faalelalolagi o siomia ai i tatou. …

… Uso e ma tuafafine, fai le mea sili tou te mafaia i lea aso ma lea aso, ma i se taimi vave lava, o le a e iloa ai e silafia oe e lou Tama Faalelagi ma e alofa o Ia ia te oe. Ma pe a e iloa lena mea—iloa moni lava—o le a i ai se faamoemoega ma se uiga moni o lou olaga, ma o le a faatumuina oe i le olioli ma le filemu. (M. Russell Ballard, “O Le Talalelei Moni, Mama, ma Faigofie a Iesu Keriso,” Ensign po o le Liahona, Me 2019, 28)

Na saunoa mai Peresitene Russell M. Nelson:

O o’u uso e ma tuafafine pele, o le olioli o tatou lagonaina e itiiti lava se mea e faatatau i tulaga o o tatou olaga ao mea uma o loo faatatau i le taulaiga o o tatou olaga.

Afai o le taulaiga o tatou olaga e i le fuafuaga o le faaolataga a le Atua … ma ia Iesu Keriso ma Lana talalelei, e mafai ona tatou lagona le olioli e tusa lava po o a mea o tutupu—pe le o tutupu foi—i o tatou olaga. O le olioli e sau mai [ia te Ia] ma ona o Ia. O Ia o le puna o le olioli uma. Tatou te lagonaina i le taimi o le Kerisimasi pe a tatou usuina, “Le lalolagi ia fiafia, lou tupu ia talia” [“Le Lalolagi ia Fiafia,” Viiga, nu. 201]. Ma e tatou te lagonaina i le tausaga atoa. Mo le Au Paia o Aso e Gata Ai, o Iesu Keriso o le olioli lea! (Russell M. Nelson, “Olioli ma le Ola ai Faaleagaga,” Ensign po o le Liahona, Nov. 2016, 82)

Gaoioiga Faaopoopo e Aoao Ai

O se isi amataga i le lesona

Mafaufau e valaaulia ni nai tamaiti aoga e faasoa mai mea e manaomia e se tasi ona fai ia malamalama ai ma talisapaia mea eseese e pei o faatufugaga, o o latou tino faaletino, po o o latou matua. Ona valaaulia lea o tamaiti aoga e faasoa mai mea e manaomia e se tasi ona fai ia malamalama ai ma talisapaia le Togiola a Iesu Keriso.

2 Nifae 2:25. Mauaina o le olioli i le olaga

Na aoao mai Liae e finagalo le Alii ia tatou lagonaina le olioli i lenei olaga. Mafaufau e fesoasoani i tamaiti aoga e faailoa lenei upumoni i le 2 Nifae 2:25. Ina ia fesoasoani ia i latou e faailoa mai auala e maua ai le olioli, valaaulia i latou e suesue i le lauga “Ina Ia Atoa Lo Outou Olioli” saunia e Peresitene Jean B. Bingham, Peresitene Aoao o le Aualofa (Ensign po o le Liahona, Nov. 2017, 85–87). E mafai ona e vaevaeina le vasega i ni vaega se tolu ma tofi vaega taitasi e faitau se tasi o ana fautuaga e tolu mo le mauaina o le olioli. Ona talanoaina lea o mea na faitau e tamaiti aoga ma valaaulia i latou e fai se fuafuaga mo le faatinoina i le faatuatua o mea sa latou aoaoina. (Manatua: Atonu e maua e tamaiti aoga se isi avanoa e suesue ai e uiga i le mauaina o le olioli i lenei olaga pe a latou suesue i le 2 Nifae 3–5.)

O se vitio e mafai ona matamata ai

Afai e aoga, faaali le vitio “Pe a Faatasia le Faamasino Tonu, Alofa, ma le Alofa Mutimutivale” mai le faailotaimi 0:16 to 6:30. I lenei vitio, o loo faamatala ai e Elder Jeffery R. Holland o le Korama a Aposetolo e Toasefululua le tala i se tamaitiiti na faasaoina le ola o lona uso a o fea’ei. Ua faatusatusa e Elder Holland i lo tatou manaomia o le Togiola a Iesu Keriso.