2 Nifae 1

Mauaina o Mataupu Faavae o le Talalelei

Mafaufau pe o le a sou lagona pe afai o se tasi e te faamemelo i ai ua latalata i le iuga o lona soifuaga ma na ia faasoaina mai ni fautuaga mulimuli po o se timaiga ia te oe. Na iloa e Liae e le o toe mamao ona oti lea, o lea sa ia talanoa atu ai i lana fanau e musuia i latou e tausi poloaiga a le Atua. O upumoni sa ia aoaoina e mafai ona avea ma se punavai o uunaiga ma le taitaiga mo oe. O lenei lesona e mafai ona fesoasoani ia te oe e aoao ai e faailoa mataupu faavae lea, pe a faaaogaina, e mafai ona taialaina oe ia maua le fesoasoani a le Atua i lou olaga.

Fesoasoani i tagata aoao ia iloa aoaoga faavae ma mataupu faavae o le talalelei. E ui o nisi taimi e aoga ai le faasino atu o se aoaoga po o se mataupu faavae i tamaiti aoga, o le mea sili ona latou manaomia o le taialaina ma uunaia ia iloa aoaoga ma mataupu faavae mo i latou lava. Fesoasoani ma le filiga i tamaiti aoga ina ia maua le tomai e faailoa ai aoaoga ma mataupu faavae e i latou lava.

Sauniuniga a le tamaitiiti aoga: Uunaia tamaiti aoga e fai a latou suesuega o tusitusiga paia i aso taitasi. Valaaulia i latou e saili mo mataupu faavae moni i le 2 Nifae 1 ma o mai saunia e faasoa mai se faataitaiga.

Gaoioiga e Ono Mafai Ona Aoao Ai

O mea e suesue iai

Faaali atu le ata lenei ma valaaulia tamaiti aoga e faamaea le gaoioiga e fesootai i ai. Afai e te manatu o se iti gaoioiga o ata-natia o le a sili atu ona talafeagai mo lau vasega, saili “ata natia” i le ChurchofJesusChrist.org.

I se isi itu, e mafai ona e nanaina ni mea faitino eseese i totonu o le potu, ta’u atu i tamaiti aoga mea e su’e, ma valaaulia le vasega e saili iai.

Iloilo le ata o loo i lalo ma vaai pe fia aitema o loo natia e mafai ona e maua i le minute o lo o sosoo ai.

• O a mea na faigofie ia te oe ona maua? O a mea na manaomia ai ni taumafaiga?

• E ono faapefea ona suia lou tomai e su’e ai mea natia pe ana e le iloa le mea o sailia?

Valaaulia tamaiti aoga e faasoa mai a latou tali i le fesili lenei i ni paga po o ni vaega toalaiti a o lei faasoaina atu i le vasega.

• E faapefea ona talitutusa lenei gaoioiga ma le suesueina o tusitusiga paia?

O ou aafiaga i tusitusiga paia e mafai ona faaleleia pe a e vaavaai mo mataupu faavae a o e suesue.

Sa faamalamalama mai e Elder David A. Bednar o le Korama a Aposetolo e Toasefululua le uiga o le mataupu faavae:

O se mataupu faavae o le talalelei o se taiala e faavae i aoaoga faavae mo le faaaogaina ma le amiotonu o le faitalia tonu. O mataupu faavae e afua mai upumoni lautetele o le talalelei ma o loo aumaia ai le taitaiga ma tulaga faatonuina a o tatou fetuleni atu i luma i luga o le ala o feagaiga. (David A. Bednar, “O Mataupu Faavae o Lau Talalelei,” Liahona, Me 2021, 123)

O nisi o faataitaiga o mataupu faavae sa e suesueina muamua i le 1 Nifae o le afai tatou te tausia a tatou feagaiga, o le a faaauupegaina i tatou i le amiotonu ma le mana o le Atua (tagai 1 Nifae 14:14) ma a o tatou faatusaina tusitusiga paia ia i tatou lava, o le a tatou aoao ma manuia mai ai (1 Nifae 19:23).

• E faapefea ona e faamatalaina po o le a le mataupu faavae?

• O a nisi o mafuaaga o le faailoaina o mataupu faavae e mafai ona fesoasoani i o tatou olaga?

Faalogologo ma le toto’a i tali a tamaiti aoga. Ia mautinoa ua latou malamalama po o le a le mataupu faavae ma pe mafai faapefea e mataupu faavae ona tuuina mai le taitaiga i o tatou olaga.

Mauaina o mataupu faavae.

Valaaulia tamaiti aoga e faasoa mai a latou tali i le fesili lenei: E mafai ona latou tomanatu i a latou sauniuniga mo le vasega a o latou faamatalaina pe faataitai auala e maua ai mataupu faavae e faaaoga ai fuaiupu mai le 2 Nifae 1.

• O le a se mea na e faia i le taimi ua tuanai na fesoasoani ia te oe e maua ai mataupu faavae i tusitusiga paia?

• O le a se mea na luitauina ai oe a o e taumafai e sue mataupu faavae?

O se tasi o auala aoga e sue ai mataupu faavae i tusitusiga paia o le faitau lea ma vaavaai mo upu, fasifuaitau, po o manatu taua. O fesili nei e mafai ona fesoasoani ia te oe e faia ai lenei mea:

Faaali atu fesili ma faatonuga nei i luga o le laupapa mo tamaiti aoga e kopi i totonu o a latou api talaaga mo suesuega. E mafai ona avea ma se mau faasino aoga i le seminare atoa ma i a latou lava suesuega patino o tusitusiga paia.

• O a upu po o fasifuaitau na ta’ua soo pe foliga mai e taua?

• O a lapataiga po o folafolaga na aofia ai i nei fuaiupu?

• O le a se manatu autu po o se manatu sa taumafai le tusitala e faailoa mai?

• O le a le mea na faamamafa atu e le Agaga Paia ia te oe?

Mai nei upu, fasifuaitau, po o manatu, tusi se faamatalaga o le upumoni e mafai ona fesoasoani ia te oe i lou olaga. A uma ona tusi, fai fesili nei ia te oe lava:

• Pe moni ea lenei mataupu faavae i tulaga uma, taimi, ma aganuu? Afai e leai, o a ni fetuunaiga o le a faia ia moni ai?

• Mata o le a aumaia e lenei mataupu faavae a’u ma isi ia latalata atili atu i le Tama Faalelagi ma Iesu Keriso?

2 Nifae 1 o loo i ai ni fautuaga mulimuli a Liae i lana fanau a o lei maliu o ia. Sa ia faamanatu atu ia i latou le agalelei o le Atua ma aoao atu ni mataupu faavae sa ia faamoemoe o le a taialaina ai i latou i o latou olaga atoa.

Faitau le 2 Nifae 1:1–4 ma vaavaai mo mataupu faavae moni. Mafaufau e faaaoga fesili o loo lisi atu i luga.

• O le a se mea sa e mauaina?

Valaaulia ni tamaiti aoga e faasoa mai. Atonu latou te faailoa mai ni mataupu faavae eseese. Faafetai atu ia i latou mo a latou taumafaiga ma faailoa atu o a latou fetufaaiga e taua ia te oe ma isi tagata o le vasega.

O se faataitaiga o se mataupu faavae na aoao mai e Liae o le: e mafai ona puipuia i tatou e le Alii e ala i le mulimuli i Ana lapataiga (tagai 2 Nifae 1:3–4).

A uma ona faailoa se upumoni, e fesoasoani le mafaufau loloto i le uiga ma le ala e fesoasoani ai ia te oe i lou olaga.

Valaaulia tamaiti aoga e faasoa mai ni auala e mafai ona latou malamalama atili ai pe faaaoga upumoni na faatoa latou mauaina. Pe a manaomia, fai atu nisi po o fesili uma nei.

Atonu e aoga nisi o fesili nei:

• Na faapefea ona puipuia e le Alii oe po o tagata e te iloa ina ua uma ona mulimuli i Ana lapataiga?

• O a mea o loo aoao mai e Ana lapataiga ia te oe e uiga ia te Ia ma ona lagona e uiga ia te oe?

Mafaufau loloto po o a auala atonu o loo lapataia ai oe e le Alii i le asō ma pe faapefea ona e manao e tali atu.

Atiina ae lou tomai e saili ai mataupu faavae

Atiina ae lou tomai e saili ai mataupu faavae i tusitusiga paia e ala i le mulimuli i lenei faagasologa i gaoioiga o loo i lalo.

Faitau ia le itiiti ifo ma le lua ni fuaitau nei o le fautuaga mulimuli a Liae i ona atalii. E mafai foi ona e maimoa i le “Ua Aoao e Liae Lona Aiga” mai le faailotaimi 0:39 i le 3:35, o loo maua i le ChurchofJesusChrist.org, e iloilo ai nei fuaitau. Faaaoga le faagasologa o le “Sailia o mataupu faavae” e faailoa ai mataupu faavae moni.

Faaali atu fuaitau nei, pe tusi i luga o le laupapa.

• 2 Nifae 1:13–15, 23

• 2 Nifae 1:16–20

• 2 Nifae 1:24–29

Filifili se upumoni mai le 2 Nifae 1 e te lagona o le a sili ona aoga ia te oe, ma tusi mea nei i lau api talaaga mo suesuega:

1. O le mataupu faavae na e mauaina ma le fuaiupu po o fuaiupu na e mauaina ai

2. O se faamalamalamaga o lou manatu i le uiga o lenei mataupu faavae

3. O auala e te lagona e ono taiala ai oe ma aumaia ai faamanuiaga taua i lou olaga

4. O mea ua e aoaoina e uiga i le Tama Faalelagi ma Iesu Keriso mai lenei mataupu faavae

Valaaulia tamaiti aoga e faasoa mai a latou tali. O se tasi auala e faia ai lenei mea o le tuu atu lea i ni tamaiti aoga e tusi ni mataupu faavae sa latou mauaina i luga o le laupapa. Ona valaaulia lea o se tamaitiiti aoga e filifili se tasi o le tele o mataupu faavae na tusia e tamaiti o lana vasega e foliga manaia pe anoa ia te ia. Ona mafai lea e le tamaititi aoga na mauaina lena mataupu faavae ona faasoa mai ana tali i fesili o i luga. E mafai ona faifai soo lenei gaoioiga. Faamamafa atu upumoni e faavavau e faasoa mai e tamaiti aoga ma pe faapefea e le iloaina ma le faaaogaina o nei upumoni ona fesoasoani ia i tatou i o tatou olaga. Faamalo atu ia i latou mo o latou taunuuga manuia. Mafaufau e faasoa atu foi se mataupu faavae na e mauaina.

Manatunatu i mea na e faia e faailoa ma malamalama ai i mataupu faavae i le 2 Nifae 1.

• E faapefea e le vaavaai mo mataupu faavae i taimi uma i au suesuega patino o tusitusiga paia ona fesoasoani ia te oe?

• E faapefea ona aafia ai lou sootaga ma Iesu Keriso ma lou manao ia avea e faapei o Ia?

Molimau atu i le taua o le sailia o mataupu faavae i tusitusiga paia, ma valaaulia tamaiti aoga e faaaoga soo tomai sa latou aoaoina i le aso i a latou suesuega o tusitusiga paia.

Manatu ma Talaaga o Faamatalaga

2 Nifae 1:13–23. O a “filifili” o loo talanoa i ai Liae?

Maimoa i le “Lulu Ese Filifili ua Noatia ai Outou” mai le faailotaimi 1:18 i le 3:31 ma le “Tagata Uma i Soo se Mea” mai le faailotaimi 3:47 i le 4:58 e maimoa ai ia Elder Marvin J. Ashton (1915–94) o le Korama a Aposetolo e Toasefululua ma Peresitene Dallin H. Oaks o le Au Peresitene Sili o loo faamalamalama mai tali i lenei fesili.

2 Nifae 1:9, 20. O le a le uiga o le “manuia”?

O faaupuga “manuia i le laueleele” ma le “vavae ese outou mai le afioaga [o le Alii]” ua faatulagaina e faafeagai le tasi i le isi. Ua ta’u mai i lenei mea o le manuia i le laueleele e fesootai tele i le faatasi mai o le Alii ia i tatou.

Na faamatalaina e Dieter F. Uchtdorf, a o avea ma se tasi o le Au Peresitene Sili, le manuia lea e oo mai pe a tatou tausia poloaiga:

O le mulimuli i le Faaola o le a le aveesea uma ai ou tofotofoga. Peitai, o le a aveesea ai papupuni i le va o oe ma le fesoasoaniga e finagalo lou Tama Faalelagi e avatu ia te oe. O le a faatasi le Atua ma oe. O le a Ia taialaina ou laasaga. O le a Ia savali i ou tafatafa ma e oo foi ina Ia siitia oe pe a sili atu ona e manaomia. (Dieter F. Uchtdorf, “O Le Faananau mo le Aiga,” Liahona, Nov. 2017, 22)

Gaoioiga Faaopoopo e Aoao Ai

Aoao atili e uiga ia Keriso e ala i faatusatusaga

Afai e manuia tamaiti aoga mai le tomai e suesue ai i tusitusiga paia o le aoao e uiga ia Keriso e ala i faatusatusaga, valaaulia i latou e sailiili i le 2 Nifae 1 ma vaavaai mo auala e talitutusa ai Nifae ma Liae ma le Faaola i o latou manaoga mo isi, i a latou faatinoga ia i latou, ma i a latou aoaoga. Mo se faataitaiga, atonu e matau e tamaiti aoga popolega ma le alofa o Liae e talitutusa ma popolega ma le alofa o le Faaola i le 2 Nifae 1:16, lea o lona manaoga autu e mo le manuia o isi. Atonu latou te matauina o Nifae e talitutusa ma Keriso i lona faasaoina o ona uso (tagai 2 Nifae 1:24). Valaaulia tamaiti aoga e faasoa mai mea ua latou aoaoina e uiga i le Faaola e ala i le faia o lenei mea ma pe faapefea e le faia soo o lenei mea ona faamalosia ai lo latou sootaga ma Ia ma faateleina ai lo latou manao ia faapei o Ia.

2 Nifae 1:9, 20. “O le tulaga e oo i ai la outou tausiga o au poloaiga, o le a outou manuia i le laueleele”

Afai o le a aoga mo tamaiti aoga le suesueina o lenei upumoni, mafaufau i gaoioiga nei:

Faaali atu le upu manuia ma valaaulia tamaiti aoga e faasoa mai pe faapefea ona latou faamatalaina lenei upu ma pe aisea e manaomia ai. Afai e manaomia, faasoa atu faamalamalamaga o le uiga o le manuia mai le vaega o le “Manatu ma Talaaga o Faamatalaga”. Valaaulia i latou e fai se sailiga o le upu “manuia” i le 2 Nifae 1 aemaise lava (fuaiupu 9, 20) ma i le Tusi a Mamona i se tulaga lautele (pe e mafai foi ona latou faaaogaina le faasino upu i le fusitolu i lalo o le “Manuia, Uluola”) e vaai ai i mea ua valaaulia i tatou e le Alii e fai ina ia manuia ai. Valaaulia i latou e faasoa mai pe aisea latou te lagona ai o le usiusitai i poloaiga e taitai atu ai i le manuia. Fai atu ia i latou e faasoa mai ni faataitaiga mai le soifuaga o le Faaola ina ua Ia faataitaia lenei upumoni. E mafai foi ona latou faasoa mai isi tala o tusitusiga paia, faataitaiga mai o latou olaga, po o aafiaga mai olaga o isi e faapupula ai le taua o lenei upumoni.