2 Nifae 2:1–16

“Na Tuuina Mai ai e Le Alii le Atua i le Tagata ia Tatau Ona ia Fai Mo ia Lava”

Vaai faalemafaufau i lou olaga pe ana faapea e leai ni au filifiliga. O le faitalia, po o le mana e filifili ai, o se tasi o meaalofa sili a le Atua ia i tatou. O le atalii o Liae o Iakopo ua uma ona feagai i le tele o luitau i lona talavou, o lea na aoao atu ai e Liae ia te ia upumoni taua e uiga i le Faaola ma le saolotoga e filifili ai. O lenei lesona e mafai ona fesoasoani e te malamalama atili ai i le matafaioi o le faitalia i le fuafuaga a le Tama Faalelagi.

O le tuuina atu o fesili e valaaulia ai le mafaufau loloto. O fesili e valaaulia ai tamaiti aoga e mafaufau loloto i tusitusiga paia, o o latou lagona i le Faaola, o Ana aoaoga, po o le faaaogaina o mataupu faavae e mafai ona faalauiloa ai manatunatuga, lea e mafai ona faaaoga e le Agaga e aoao atu ai. Tuu atu i tamaiti aoga le taimi e manaomia mo le mafaufau loloto ma le tusitusi mataalia.

Sauniuniga a le tamaitiiti aoga: Valaaulia tamaiti aoga e faailoa mai ma fai se lisi o filifiliga taua latou te faia i le taimi nei ma le lesona e sosoo ai. Fai atu ia i latou e o mai saunia e faasoa mai pe aisea e taua ai filifiliga i o tatou olaga faaletino ma i le fuafuaga o le faaolataga a le Tama Faalelagi.

Gaoioiga e Ono Mafai Ona Aoao Ai

Filifiliga taua

Valaaulia tamaiti aoga e faaaoga a latou sauniuniga o le vasega e fai ai gaoioiga nei i a latou apitalaaga mo suesuega.

Mo le isi lua minute, tusi nisi o filifiliga taua na e faia i ni nai aso ua tuanai.

• Aisea e te manatu ai e taua le filifiliga i o tatou olaga faaletino ma i le fuafuaga o le faaolataga a le Tama Faalelagi?

Mafaufau loloto i mea ua e aoaoina mai filifiliga ua e mitamita ai faapea foi mai filifiliga ua e faanoanoa ai. A o e suesue i lenei lesona, saili le taitaiga a le Agaga Paia e aoao ai po o le a se mea e mafai ona fesoasoani ia te oe e malamalama atili ai ma faaaoga lou tomai e filifili ai. Afai e i ai ni au fesili e uiga i le faitalia, ia tatalo foi iai ma saili tali a o e suesue.

Vaega taua o le faitalia

Na fanau Iakopo le atalii o Liae i le vao ina ua tuua e lo latou aiga ia Ierusalema. Ao lei maliu Liae, sa ia aoao atu ia Iakopo upumoni taua e uiga i le faitalia.

Faitau le 2 Nifae 2:1–4 e iloa ai pe na faapefea ona amata e Liae lana savali ia Iakopo. Atonu e fesoasoani le iloa o le upu “faapaiaina” o lona uiga o le faamanuiaina po o le faia ia paia (tagai “Faapaiaina, Tulafono o le Faapaiaga“ i le Taiala i Tusitusiga Paia [scriptures.ChurchofJesusChrist.org]).

• Aisea e ono anoa ai mo se tagata sa feagai ma le tele o tofotofoga le malamalama i le taua o le mana o filifiliga?

• O a upumoni mai nei fuaiupu e sili ona anoa ia te oe? Aisea?

Faaali le faamatalaga lenei pe saunia o se pepa e tufa atu. E mafai ona e atofa atu i tamaiti aoga eseese po o vaega o tamaiti aoga se tasi o filifiliga e tolu. I se isi itu, e mafai ona e vaevaeina tamaiti aoga i ni vaega ma valaaulia i latou e suesue i le tele latou te mafaia i totonu o se taimi faatapulaaina.

O Le Mana Tatou Te Filifili Ai

Tusi Lesona a le Faiaoga o le Tusi a Mamona (2024)—“2 Nifae 2:1–16”

Filifiliga A: O le a le mea ua aoao mai e lo tatou mana e filifili ai e uiga i le Atua?

Faitau le 2 Nifae 2:14, 16 ma vaavaai mo mea na aoao mai e Liae e uiga i le Atua ma lo tatou faitalia.

• O le a se mea na e aoaoina?

• Aisea e taua ai le malamalama faapea e tuuina mai e le Atua ia i tatou le mana e galulue ai mo i tatou lava?

• O le a sou lagona i le faatuatuaina o oe e le Tama Faalelagi e fai au lava filifiliga?

Mafaufau i se faataitaiga i se taimi na e faaaogaina ai le faitalia i se auala e te lagona na fiafia ai le Tama Faalelagi.

• Aisea e te lagona ai na fiafia le Atua i lau filifiliga?

Atonu foi e aoga le mafaufau loloto i soo se filifiliga na e faia atonu e le i fiafia ai le Atua ma mea ua e aoaoina mai i na mea.

Filifiliga E: O le a le mea ua tuuina mai e le Atua ia i tatou e fesoasoani ai ia i tatou e filifili ma le poto?

Faitau le 2 Nifae 2:5, 13 ma le Moronae 7:16 ma vaavaai mo upumoni nei. Matau “o le tulafono” e faasino i poloaiga a le Atua.

• E tatau ona tatou iloa le lelei mai le leaga e faaaoga tonu atoatoa ai lo tatou faitalia.

• E tatau ona ia i tatou le tulafono ina ia maua ai le faitalia.

• O le a se mea ua e aoaoina e uiga i le Tama Faalelagi ma Iesu Keriso mai le upumoni lea La te tuuina atu i tagata uma ia lava ai le malamalama i le lelei ma le leaga ina ia mafai ai ona filifili i le amiotonu po o le amioleaga?

• O le a le mea semanu e tupu pe ana leai se tulafono po o ni poloaiga?

Filifiliga I: Aisea tatou te lagona ai le faafeagai i a tatou filifiliga lelei?

Faitau le 2 Nifae 2:11, 16, ma vaavaai mo upumoni faaopoopo na aoao mai e Liae e uiga i le faitalia.

• O le a se mea sa e mauaina?

• I le fuafuaga a le Tama Faalelagi, aisea e te manatu ai o le faafeagai o se vaega e tatau ai o le faitalia?

• O a ni auala e faatosinaina ai i tatou e faia filifiliga sao ma le sese?

Ina ia fesoasoani ia e malamalama i lenei upumoni, faitau le saunoaga lenei a Elder Jeffrey R. Holland o le Korama a Aposetolo e Toasefululua:

E le mafai ona avea fanau a le Atua i le muai olaga e faapei o ia … sei vagana ua latou maua … le poto masani i se nofoaga sa i ai uma le lelei ma le leaga. …

… Sa tatou mananao i le avanoa e … faafetaiaia le lelei ma le leaga ma ia lava le malosi e filifili ai le lelei. (Jeffrey R. Holland, O Keriso ma le Feagaiga Fou: O le Savali Faale Mesia o le Tusi a Mamona 1997), 200, 204)

Mafaufau i ni auala o loo e aoao ai e filifili le lelei, e tusa lava pe faaosoosoina e le leaga. Atonu e te manao e tusi au tali i totonu o lau apitalaaga mo suesuega. Atonu foi e te manao e mafaufau loloto i auala e mafai ona e sailia ai le fesoasoani i soo se faaiuga atonu e te manao e sui.

O lo tatou manaomia o le Faaola

E leai se tasi ua na o le Faaola lava na faaaogaina atoatoa le faitalia i le olaga nei. Tatou te agasala uma lava, ma a aunoa ma le fesoasoani o le a tatou “fano … ma ua malaia e faavavau” (2 Nifae 2:5).

Mafaufau e faaaoga faamatalaga mai le vaega o “Manatu ma Talaaga o Faamatalaga” lenei e fesoasoani ai i tamaiti aoga ia malamalama atili i mea o loo aoaoina i le 2 Nifae 2:6–8.

Faatasi ai ma lenei mafaufauga, faitau le 2 Nifae 2:6–8 e vaai ai i le mea na faia e Iesu Keriso mo i tatou uma.

• Na faapefea ona filifili le Faaola e fesoasoani ia te oe?

O se tasi o mataupu faavae na molimau mai ai Liae e faapea e ala mai i Lana Togiola, ua togiolaina ai i tatou e le Faaola mai a tatou agasala.

• E faapefea e le malamalama i lenei mea e uiga ia Iesu Keriso ona aafia ai ou lagona ia te Ia?

• O le a se mea ua e aoaoina mai le faataitaiga a le Faaola e uiga i le faia o filifiliga?

Valaaulia tamaiti aoga e mafaufau loloto i mea nei e aunoa ma le faasoaina atu leotele o a latou tali, ona atonu e patino tele mo i latou.

Mafaufau i se taimi, faatasi ai ma le fesoasoani a Iesu Keriso, na e salamo ai i se agasala. Na faapefea e le salamo ona aafia ai oe?

Atonu e te manao e tuu atu i tamaiti aoga se avanoa e aotele ai ma faasoa mai mea ua latou malamalama i ai e uiga i le faitalia a o lei faaiuina lenei lesona. O le gaoioiga o mulimuli mai o se tasi lea o auala e mafai ona e faatinoina ai.

Vaai faalemafaufau e faapea, o loo aoao atu e faifeautalai i la outou eria se talavou ua faalogo e uiga i le fuafuaga a le Tama Faalelagi mo le uluai taimi. Ua valaaulia oe e faifeautalai e o mai ma lenei talavou i le isi taimi faatulagaina e aoao atu ai. Ua la talosagaina oe e saunia ni manatu mai le 2 Nifae 2 i le taua o le faitalia i le fuafuaga a le Tama Faalelagi. Fatu ma auina atu se otootoga puupuu o mea o le a e aoao atu. Ia aofia ai mea nei:

1. Ia le itiiti ifo ma le lua ni mau mai le 2 Nifae 2:1–16, 26 ma a latou upumoni fesootai, e aofia ai se faamalamalamaga puupuu pe aisea e taua ai pe anoa.

2. O le ala e mafai ai e le taulaga a Iesu Keriso ona aafia a tatou filifiliga

3. O le auala e mafai ai e nei upumoni ona faia se eseesega i o tatou olaga

   Tuu tamaiti aoga i ni paga po o ni vaega toalaiti ma valaaulia i latou e fefaasoaai a latou otootoga o le tasi ma le isi. Afai e i ai se taimi, mafaufau e faatino otootoga ma valaaulia tamaiti aoga e aoao e le tasi le isi.

A uma lau otootoga, saili le taitaiga a le Agaga Paia a o e mafaufau loloto i auala e mafai ona e manatua ai nei upumoni ma pe faapefea e le manatuaina o i latou ona faamanuiaina ai lou olaga. Mo se faataitaiga, atonu e te tuuina se ata i luga o lau telefoni, tuu se faamatalaga i luga o lau faaata, pe fai se isi mea o le a mafai ai ona e vaai ma manatua pea nei upumoni.

Manatu ma Talaaga o Faamatalaga

Aisea e oo mai ai puapuaga ma mea faafeagai i lo’u olaga?

Maimoa le “Faalatalata Atu i le Nofoalii o le Atua ma le Mautinoa” mai le faailotaimi 7:27 i le 8:30 e vaai ai ia Elder Jorg Klebingat o le Fitugafulu o faamalamalama mai ni tali talafeagai i lenei fesili.

Faalatalata Atu i le Nofoalii o le Atua ma le Lototele

O le lauga a Elder Jorg Klebingat i le Konafesi Aoao o Oketopa 2014.

2 Nifae 2:4. O le a le uiga o le “ua maua fua le olataga”?

O le faapea atu “ua maua fua le olataga” o lona uiga (1) ua avanoa fua mo fanau uma a le Atua ma (2) e le mafai ona faatauina, faafesuiaia, pe maua e ala i a tatou galuega lelei; o le meaalofa silisili lea o meaalofa uma a le Atua (2 Nifae 2:4; Mataupu Faavae ma Feagaiga 6:13; 14:7). Sa lei “maua fua” ia Keriso, o le na ia totogi le tau e faamalie ai manaoga o le faamasinotonu. E le “maua fua” ia i tatou e pei ona manaomia ai le faatuatua ma le salamo. O lenei meaalofa e maua fua ae e manaomia uma ai le Faaola ma a tatou taumafaiga e talia ai le meaalofa.

“Na molimau Paulo, ‘Auā faapei ona oti uma ia Atamu, e faapea foi ona faaolaina uma ia Keriso’ (1 Korinito 15:22). I lenei tulaga, e faaolaina tagata uma, e tusa lava po o a filifiliga sa faia i lenei olaga. O se meaalofa maua fua lea mai le Faaola i tagata uma“ (Autu o le Talalelei, ”Faaolataga,” topics.ChurchofJesusChrist.org).

O le a se mea e mafai ona ou aoaoina e uiga i le Faaola ma Lana Togiola mai le 2 Nifae 2:6–8?

O le togiola o lona uiga “e laveai, e faatau, po o le togiola, e pei o le faasaolotoina o se tagata mai le nofopologa e ala i le totogiina” (Taiala i Tusitusiga Paia, “Togiola, Togiolaina, Faaolataga,” scriptures.ChurchofJesusChrist.org).

O le alofa tunoa i lenei tulaga e faasino i le lagolagoina, agalelei, mana, ma le alofa o le Faaola. O Ia o le faatusa o le upumoni (tagai Ioane 14:6), ma o uiga uma ma le mana o le Atua e mau ia Keriso (tagai Kolose 2:9).

E le mafai ona tatou maua le faaolataga e i tatou lava, aua “ua agasala tagata uma” (Roma 3:23; tagai foi Alema 22:14). Ona o le Faaola e leai se agasala ma e i ai le mana uma, ua na o Lana galuega (agalelei pe silisili ese) e mafai ai ona faaolaina i tatou.

O le alofa tunoa ma le alofa mutimutivale e talitutusa ae e eseese i ni auala taua. O le mauaina o le alofa mutimutivale o le le mauaina leao mea tatou te agavaa i ai (faasalaga). O le mauaina o le alofa tunoa o le mauaina lea o mea ua tatou le agava i ai (faamanuiaga). O le mea lea, o le taulaga a le Faaola e fesoasoani tatou te aloese ai mai le faasalaga talafeagai o le agasala ma faatagaina ai foi i tatou e maua meaalofa tatou te le agavaa ai.

2 Nifae 2:7. O le a le uiga o le i ai o se loto momomo ma se agaga salamo?

Maimoa i le “Pe a Liua Mai Oe” mai le faailotaimi 7:00 i le 8:32 e vaai ai ia Elder D. Todd Christofferson o le Korama a Aposetolo e Toasefululua o faamalamalama mai le tali i lenei fesili.

When Thou Art Converted

Plead with God in the name of Christ to write the gospel in your mind that you may have understanding and in your heart that you may love to do His will.

Gaoioiga Faaopoopo e Aoao Ai

2 Nifae 2:1–2. E mafai e le Atua ona faapaiaina o tatou puapuaga mo lo tatou manuia

Valaaulia tamaiti aoga e mafaufau i tofotofoga, mafatiaga, po o puapuaga o loo feagai ma i latou i le taimi nei. Fai atu ia i latou e faitau le 2 Nifae 2:1–2, ma vaavaai mo se upumoni na aoao atu e Liae ia Iakopo e uiga i puapuaga. Valaaulia i latou e faailoa mai le upumoni e faapea e mafai e le Atua ona faapaiaina o tatou puapuaga mo lo tatou manuia. Ona mafai lea ona latou manatunatu i o latou puapuaga ma puapuaga o isi ma faasoa mai mea na maua mai na puapuaga. Valaaulia tamaiti aoga e manatunatu i lenei upumoni a o latou feagai ma puapuaga e fesoasoani ai ia i latou e tausia se vaaiga e faavavau.

2 Nifae 2:1–9. Togiolaina e ala ia Keriso

Afai e manuia tamaiti aoga mai le taulai atu i le matafaioi a le Faaola i lo tatou togiolaina, valaaulia i latou e fatu se siata e pei o le siata lenei. Valaaulia i latou e faatumu itu taitasi o le siata e faavae i upumoni latou te maua i le 2 Nifae 2:1–9 (mafaufau e tuuina atu faamatalaga mai le vaega o “Manatu ma Talaaga o Faamatalaga” e fesoasoani ai i tamaiti aoga ia malamalama i nei fuaiupu). A uma ua lava se taimi, valaaulia i latou e faasoa mai mea na latou aoaoina sa sili ona anoa ia i latou ma pe aisea foi. Valaaulia i latou e manatunatu soo i mea na faia e le Faaola ma pe aisea e paia tele ai le meaalofa o le faitalia.

O le ala na faaaoga ai e le Faaola Lona faitalia ma lona uiga ia te au:	O le auala e tatau ona ou faaaoga ai lo’u lava faitalia ona o le mea na faia e Iesu Keriso:
O le ala na faaaoga ai e le Faaola Lona faitalia ma lona uiga ia te au:	O le auala e tatau ona ou faaaoga ai lo’u lava faitalia ona o le mea na faia e Iesu Keriso: