2 Nifae 1–2

Vaaiga Aoao

Ina ua latalata Liae i le iuga o lona soifua, sa ia talanoa atu i lana fanau e uunaia i latou e tausi poloaiga a le Atua. Sa ia aoao atu o le faitalia, po o le saolotoga e filifili ai, o se tasi lea o meaalofa silisili a le Atua ia i tatou. Sa ia aoaoina lana fanau e uiga i aafiaga o le Pau o Atamu ma Eva ma faatasi ai ma le Faaola e mafai ai ona tatou faatoilaloina luitau uma o le olaga nei. Sa ia aoao mai foi e faapea ona o Iesu Keriso, ua “saoloto ai tagata uma e filifili le saolotoga ma le ola e faavavau” po o le “faatagataotauaina ma le oti” (2 Nifae 2:27).

Ia Saunia e Aoao Atu

O faamatalaga nei e tuuina atu ai i faiaoga ni manatu o mea e ao ona saunia mamao i ai mo lesona taitasi.

2 Nifae 1

Faamoemoega o le lesona: O lenei lesona e mafai ona fesoasoani i tamaiti aoga e aoao ai e faailoa mataupu faavae e faapea, pe a faatinoina, e mafai ona taialaina i latou ia maua le fesoasoani a le Atua i o latou olaga.

• Sauniuniga a le tamaitiiti aoga: Uunaia tamaiti aoga e fai a latou suesuega o tusitusiga paia i aso taitasi. Valaaulia i latou e saili mo mataupu faavae moni i le 2 Nifae 1 ma o mai saunia e faasoa mai se faataitaiga.

• Ata: O le ata o loo i ai aitema o loo natia

• Vitio: “Ua Aoao Atu Liae i Lona Aiga” (3:47; maimoa mai le faailotaimi 0:39 i le 3:35)

• Fautuaga faafaiaoga i vitio: A uma ona faailoa mai e tamaiti aoga se mataupu faavae ma faamaeaina laasaga e fa i le faaiuga o le lesona, mafaufau e valaaulia i latou e tusi i le talanoaga le mataupu faavae sa latou faailoa mai. Ona valaaulia lea o se tamaititi aoga e filifili se mataupu faavae e manao o ia e aoao atili i ai. Fai i le tamaititi aoga lea na faailoa maia lena mataupu faavae e faasoa mai le ala na ia faamaeaina ai laasaga e fa. Ona valaaulia lea o lena tamaitiiti aoga e filifili se mataupu faavae e ese mai ai. Fai i nisi o tamaiti aoga e faasoa atu.

2 Nifae 2:1–16

Faamoemoega o le lesona: O lenei lesona e mafai ona fesoasoani i tamaiti aoga e malamalama atili ai i le matafaioi o le faitalia i le fuafuaga a le Tama Faalelagi.

• Sauniuniga a le tamaitiiti aoga: Valaaulia tamaiti aoga e faailoa mai ma fai se lisi o filifiliga taua latou te faia i le taimi nei ma le lesona e sosoo ai. Fai atu ia i latou e o mai saunia e faasoa mai pe aisea e taua ai filifiliga i o tatou olaga faaletino ma i le fuafuaga o le faaolataga a le Tama Faalelagi.

• Pepa e tufa atu: “O Lo Tatou Mana e Filifili Ai”

• Fautuaga faafaiaoga i vitio: A uma ona faamaea e tamaiti aoga a latou otootoga e faamalamalama ai le faitalia, mafaufau e vaevae tamaiti aoga i ni vaega ma faatino le tulaga. Atonu e aoga le fai atu i se tamaitiiti aoga se toatasi i vaega taitasi e avea ma taitai ma filifili po o ai e muamua ona faamatala atu. Pe atonu foi e aoga le valaaulia o tamaiti aoga ia iloa po o ai i la latou vaega e aupito matua, umi, pe sili ona vave ala i lena taeao po ma fai i lena tagata e muamua ona ia faamatala atu.

2 Nifae 2:17–26

Faamoemoega o le lesona: O lenei lesona e mafai ona fesoasoani i tamaiti aoga e talisapaia atili ai le Faaola ma Lana Togiola a o latou malamalama i le Pau o Atamu ma Eva.

• Sauniuniga a le tamaitiiti aoga: Mafaufau e valaaulia tamaiti aoga e faitau le mataupu faavae lona lua o le faatuatua ma mafaufau pe faapefea ona latou faamatalaina i se isi tagata. E mafai foi ona latou fesili atu i se tagata se toatasi pe toalua latou te faatuatuaina e faasoa mai ia i latou lo latou malamalama i le mataupu faavae lona lua o le faatuatua.

• Fautuaga faafaiaoga i vitio: A o lei amataina le vasega, mafaufau e auina atu i ni tamaiti aoga se toalua ia saunoaga e lua a Elder Jeffrey R. Holland. Valaaulia i laua taitoatasi e faitau le faamatalaga na laua mauaina ma mafaufau i le uiga ia i laua. I taimi talafeagai i le faagasologa o le lesona, fai atu ia i laua e faitau a la faamatalaga ma faasoa mai o laua manatu.

Atamai i Aoaoga Faavae: 2 Nifae 2:25

Faamoemoega o le lesona: O lenei lesona o le a fesoasoani i tamaiti aoga e tauloto lenei mau faasino o aoaoga faavae ma fasifuaitau autu o mau mo le 2 Nifae 2:25, faamatala le aoaoga faavae, ma faataitai le faaaogaina o mataupu faavae o le mauaina o le malamalama faaleagaga i tulaga faataitai faalesoifuaga.

• Sauniuniga a le tamaitiiti aoga: Valaaulia tamaiti aoga e o mai saunia i le vasega e tauloto le 2 Nifae 2:25 mai le manatua ma o mai saunia e faasoa mai se auala se tasi latou te lagona ai le olioli ona o le Pau o Atamu ma Eva.

• Fautuaga faafaiaoga i vitio: A uma ona faitau e tamaiti aoga le tulaga faataitai e uiga ia Kitiona, valaaulia i latou e faasoa mai mea latou te ono faia e fesoasoani ai. Afai e le malamalama tamaiti aoga pe afai o le a fesoasoani foi i le talanoaga, mafaufau e vaevae ia parakalafa i le Pepa Autu o le Atamai i Aoaoga Faavae (2022) i ni vaega se tolu o tamaiti aoga. Vaevae i ni vaega e talanoaina ai parakalafa ma le tulaga faataitai, ona faauma lea o talanoaga faavaega ina ia mafai ona latou faasoa mai mea na latou aoaoina e ono fesoasoani ia Kitiona.

2 Nifae 2:26–30

Faamoemoega o le lesona: O lenei lesona e mafai ona fesoasoani i tamaiti aoga e faaaoga lo latou faitalia e mulimuli ai ia Iesu Keriso.

• Sauniuniga a le tamaitiiti aoga: Valaaulia tamaiti aoga e faitau le 2 Nifae 2:27 ma ia mafaufau ma le agaga tatalo po o a filifiliga i o latou olaga o loo fesoasoani ia i latou e latalata atili atu ai i le Faaola ma maua faamanuiaga ua Ia ofoina mai. Valaaulia foi i latou e mafaufau i soo se filifiliga atonu latou te mananao e sui.

• Vitio: “Tuua le Pati” (6:26)

• Fautuaga faafaiaoga i vitio: Valaaulia tamaiti aoga e faasoa mai le ata na latou tusia o le 2 Nifae 2:27 po o upu sa latou faaaogaina e aotele ai. Afai latou te tusia se ata, fai atu i nisi o i latou e faasoa mai e ala i le uuina i luga o a latou ata i le latou mea pueata, ma faatonu le vasega e filifili le vaaiga a le failauga ina ia mafai ai ona vaai manino i ai. A maea, mafaufau e faaali atu le ata o loo i le lesona ma faaaoga lau faasino (cursor) po o le vaaiga o le ata tusi e faailoga ai ni vaega faapitoa a o faaauau pea lau lesona.