Atamai i Aoaoga Faavae o le Tusi a Mamona Iloiloga 2

Tauloto Mau Faasino ma Fasifuaitau Autu o Mau

O le manatuaina o fuaitau o mau ma mea latou te aoaoina e mafai ona fesoasoani ia te oe i le tele o auala. O lenei lesona ua faamoemoeina e fesoasoani ia te oe e tauloto mau faasino ma fasifuaitau autu o mau mo nisi o fuaitau o le atamai i aoaoga faavae mo le Tusi a Mamona.

Gaoioiga uunaia o le iloiloga o le atamai i aoaoga faavae. O gaoioiga toeiloilo o le atamai i aoaoga faavae e fesoasoani i tamaiti aoga e tauloto fasifuaitau autu o mau. O le faia soo o nei gaoioiga, e mafai ai e tamaiti aoga ona aoao nei fasifuaitau. Atonu e te manao e uunaia au tamaiti aoga e faaauau pea le suesueina o fuaitau o le atamai i aoaoga faavae i fafo atu o le vasega.

Sauniuniga a le tamaitiiti aoga: Valaaulia tamaiti aoga e manatunatu i ai ma ia saunia e talanoaina soo se fuaitau o mau na fesoasoani ia i latou i o latou olaga.

Gaoioiga e Ono Mafai Ona Aoao Ai

Atonu e manaomia ona aoao atu se lesona o fuaitau o le atamai i aoaoga faavae e suitulaga i lenei lesona toe faamanatu. Tagai i le faasologa faatulagaina o lesona ua saunia e le faatonu o le eria po o le itulagi po o le taitai faamaopoopo ia mautinoa o lesona taitasi o fuaitau o le atamai i aoaoga faavae o le a aoaoina a o faia vasega seminare.

O le faaaogaina o tusitusiga paia e faasoa atu ai le talalelei

Vaai faalemafaufau o loo i ai ni fesili a se tasi o au uo e uiga i nisi o ou talitonuga o se tagata o Le Ekalesia a Iesu Keriso o le Au Paia o Aso e Gata Ai, e aofia ai ou talitonuga e uiga ia Iesu Keriso, lo tatou faamoemoega i le lalolagi, ma poloaiga a le Atua. A o e mafaufau i auala e te tali atu ai, ua e filifili e te manao e faaali atu ia te ia mau mai le Tusi a Mamona e fesoasoani e tali ai ana fesili.

• E mafai ona e mafaufau i ni fuaitau aoga mai le Tusi a Mamona e mafai ona e faaali atu i lau uo?

• E faapefea e le iloaina o fuaitau o le atamai i aoaoga faavae ma o latou fasifuaitau autu o mau ona fesoasoani ia te oe i tulaga faapenei?

Mafaufau e fesili atu i tamaiti aoga pe sa i ai se taimi na latou oo ai i tulaga faapenei ma faasoa mai pe na faapei o latou aafiaga. E mafai e tamaiti aoga ona utuvai mai a latou sauniuniga o le lesona o se vaega o lenei talanoaga.

E mafai ona fesoasoani lenei lesona ia te oe e tauloto ai mau faasino ma fasifuaitau autu o mau mo fuaitau o le atamai i aoaoga faavae o le a e suesueina i lenei tausaga. O le taulotoina o nei mau faasino ma fasifuaitau e mafai ona fesoasoani ia te oe i lou olaga ma au taumafaiga e faasoa atu ai ou talitonuga i isi. O loo i lalo se lisi o fuaitau muamua e 12 o le atamai i aoaoga faavae o le Tusi a Mamona ma a latou fasifuaitau autu o mau.

Ina ia fesoasoani ia te oe e fuafua pe fia fuaitau o le atamai i aoaoga faavae e faamamafa i lenei lesona, mafaufau i le taimi o loo avanoa ma manaoga o tamaiti aoga. Faaali atu le siata lenei ina ia mafai ona faasino i ai tamaiti aoga seia maea ona faia a latou kata.

Fuaitau ma Fasifuaitai Autu Muamua e 12 o le Atamai i Aoaoga Faavae

Mau Faasino	Fasifuaitau Autu o Mau
Mau Faasino 1 Nifae 3:7	Fasifuaitau Autu o Mau “O le a ou alu ma fai mea ua poloaiina e le Alii.”
Mau Faasino 2 Nifae 2:25	Fasifuaitau Autu o Mau “Na pa’ū Atamu ina ia i ai tagata; ma ua i ai tagata, ina ia latou maua le olioli.”
Mau Faasino 2 Nifae 2:27	Fasifuaitau Autu o Mau “Ua latou saoloto e filifili le saolotoga ma le ola e faavavau … pe … [o] le faatagataotauaina ma le oti.”
Mau Faasino 2 Nifae 26:33	Fasifuaitau Autu o Mau “Ua tutusa tagata uma i le Atua.”
Mau Faasino 2 Nifae 28:30	Fasifuaitau Autu o Mau O le Atua e “tuu atu i le fanauga a tagata lea fuaitau ma lea fuaitau, o lea mataupu ma lea mataupu.”
Mau Faasino 2 Nifae 32:3	Fasifuaitau Autu o Mau “Ia taumamafa fiafia i afioga a Keriso; aua faauta, o afioga a Keriso o le a ta’u mai ai ia te outou mea uma e tatau ona outou faia.”
Mau Faasino 2 Nifae 32:8–9	Fasifuaitau Autu o Mau “E ao ina outou tatalo e le aunoa.”
Mau Faasino Mosaea 2:17	Fasifuaitau Autu o Mau “Pe a outou auauna atu i o outou uso a tagata, ua nao lo outou auauna atu lava lea i lo outou Atua.”
Mau Faasino Mosaea 2:41	Fasifuaitau Autu o Mau “O i latou o e e tausi i poloaiga a le Atua … e faamanuiaina i latou i mea uma.”
Mau Faasino Mosaea 3:19	Fasifuaitau Autu o Mau “[Tuu] ese le tagata natura ma [avea] ma tagata paia e ala i le togiola a Keriso le Alii.”
Mau Faasino Mosaea 4:9	Fasifuaitau Autu o Mau “Ia talitonu i le Atua; … ia talitonu ua ia te ia le poto uma.”
Mau Faasino Mosaea 18:8–10	Fasifuaitau Autu o Mau Ia “papatisoina i le suafa o le Alii, o se molimau … ua outou ulu atu i se feagaiga faatasi ma ia.”

Kata o manatuaga

Fetuunai faatonuga nei e faatatau i fuaitau o le atamai i aoaoga faavae o le a suesueina i lenei lesona. O tamaiti aoga o loo i ai masini faatekinolosi e mafai ona faaaoga se polokalama e fatu ai ni kata. A leai, tufa ni fasi pepa se lua i tamaiti aoga taitoatasi mo lenei gaoioiga.

Faaaoga se taimi e fatu ai se seti o kata o manatuaga e mafai ona e faaaogaina i le taualumaga o le tausaga. Tuu le mau faasino o le atamai i aoaoga faavae i le tasi itu o kata taitasi ma le fasifuaitau autu o le mau i le isi itu. Fatu ni kata o manatuaga mo fuaitau muamua uma e 12 o le atamai i aoaoga faavae o loo lisi atu i le siata.

Afai e manaomia, faaaoga faatonuga nei e fesoasoani ia te oe e fatu ai au kata o manatuaga:

Mafaufau e faaali faatonuga nei mo tamaiti aoga e faasino atu i ai a o latou fatu a latou kata o manatuaga.

Laasaga 1: Fatu ni kata se 12

I le faaaogaina o se itu atoa o se fasipepa, tusi se laina agai i lalo i le ogatotonu o le pepa e fatu ai ni koluma se lua. Ona tusi lea o ni laina faalava se lua i le isi itu o le pepa e fatu ai ni pusa se tolu e tutusa le lapopoa o koluma taitasi, ma e maua ai ni pusa se ono. Tagai i le ata lenei mo se faataitaiga o foliga o lau itulau:

Liliu le pepa ma toe fai le mea lava lea e tasi i lena itu. Toe fai le faagasologa lenei i se isi fasipepa e fatu ai pusa e 12 o loo e manaomia.

Laasaga 2: Tusi mau faasino o le atamai i aoaoga faavae i le tasi itu

I le tasi itu o au pepa e lua, tusi se mau faasino mai le siata i pusa taitasi. E faaopoopo atu i le mau faasino, e mafai foi ona e tusia se ata faigofie e fesoasoani ia te oe e manatua ai le fasifuaitau autu o le mau.

Laasaga 3: Tusi fasifuaitau autu o mau i le isi itu

Liliu au pepa, ma tusi i pusa taitasi le fasifuaitau autu o le mau e fetaui ma le mau faasino i le isi itu.

Laasaga 4: Oti ese au kata

Oti pusa taitasi na e fatuina i ni kata.

Mafaufau e vaevae tamaiti aoga i ni paga e faaaoga ai a latou kata e amata ai ona tauloto nisi po o mau uma o le atamai i aoaoga faavae ma fasifuaitau autu o mau. E mafai e tamaiti aoga ona feauauai e suesueina e le tasi o le isi, faaaoga seti uma o kata e lua e fai ai se taaloga faafetaui, pe fai se isi gaoioiga.

E mafai foi ona e valaaulia tamaiti aoga e faitau nisi po o fuaitau uma o mau o le atamai i aoaoga faavae i a latou tusitusiga paia.

• O a fuaitau ma fasifuaitau autu o mau e te lagona e aupito sili ona aoga mo oe e tatau ona taulotoina? Aisea?

• O a nisi o upumoni o loo aoao mai e nei fuaitau e uiga i le Faaola ma Lana talalelei?