1 Nifae 16–17

Faatinoina i le Faatuatua i Tulaga Faigata

Mafaufau i luitau na feagai ma Liae ma lona aiga ina ua tuua Ierusalema ma a o nonofo ai i le vao. O le ala na tali atu ai Nifae i ona luitau ua aumai ai ia i tatou se faataitaiga o le auala e tali atu ai i o tatou lava tofotofoga i le olaga. O lenei lesona e mafai ona fesoasoani ia te oe e aoao ai i le auala e faatusaina ai tusitusiga paia ia te oe lava ma faafetaiaia luitau ma le faatuatua.

Fesoasoani i tamaiti aoga e atiina ae tomai i suesuega. Ina ia fesoasoani i tamaiti aoga ia faamanuiaina i a latou suesuega o tusitusiga paia, taiala i latou i ni tomai ma metotia eseese o le suesueina o tusitusiga paia. Filifili tomai ma metotia e taulai atu i le fesoasoani i tamaiti aoga e valaaulia le Agaga i a latou suesuega, malamalama atili i tusitusiga paia, ma faaaoga mataupu faavae o le talalelei i o latou olaga.

Sauniuniga a le tamaitiiti aoga: Valaaulia tamaiti aoga e faitau le 1 Nifae 19:23 ma mafaufau i le uiga o le faatusaina o tusitusiga paia ia i tatou lava.

Gaoioiga e Ono Mafai Ona Aoao Ai

Mauaina o uiga i tusitusiga paia

O mea nei ua faamoemoe e fesoasoani i tamaiti aoga e mafaufau ai e uiga i le taua o le faatusaina o tusitusiga paia i o latou olaga. Atonu o se taimi lelei lea e tulitatao ai pe o a mai a latou suesuega patino o tusitusiga paia. E sui ai le tulaga faataitai, e mafai ona e amata i le fesili atu, “O a nisi o popolega e masani ona i ai i tupulaga talavou i le faitauina o tusitusiga paia?”

Vaai faalemafaufau o loo faasoa mai se tasi ia te oe latou te manatu o le faitauina o tusitusiga paia e maimau ai lo latou taimi. Latou te lagona e le aoga tele tusitusiga paia mo luitau ma faafitauli o o tatou aso.

• E faapefea ona e tali atu i lo latou popolega?

Mafaufau i au lava suesuega o tusitusiga paia ma le taua ma le faaaogaina o tusitusiga paia i lou olaga. Mafaufau i mea na faafaigata ai ona anoa tusitusiga paia ma soo se mea na fesoasoani ia te oe e manumalo ai i nei faafitauli.

Ina ia fesoasoani i ona uso e aoao mai ma faaaoga tusitusiga paia i o latou aso, na aoao mai ai e le perofeta o Nifae se lesona taua lea e mafai foi ona fesoasoani ia i tatou i a tatou suesuega o tusitusiga paia.

Faitau le 1 Nifae 19:23, ma vaavaai mo mea na aoao mai e Nifae.

• E faapefea ona e faamatalaina i au lava upu le upumoni o loo aoao mai e Nifae?

Faatusaina o tusitusiga paia ia i tatou lava

O se tasi o upumoni atonu na e faailoa mai i lenei fuaiupu o le a o tatou faatusaina tusitusiga paia ia i tatou lava, o le a tatou aoao ma manuia mai ai.

• O le a se mea ua e iloa e uiga i le faatusaina o tusitusiga paia?

• O a ni aafiaga ua e maua i le faatusaina o tusitusiga paia?

• E tusa ma le fuaiupu 23, o le a le faamoemoega o Nifae i le faitauina ma le faatusaina o upu a Isaia?

• E mafai faapefea e le faatusaina o tusitusiga paia ona fesoasoani ia te oe e te iloa ma talitonu atoatoa ai ia Iesu Keriso?

O le faatusaina o tusitusiga paia o lona uiga o le faatatau lea o mea o loo tusia ai i o tatou lava olaga.

O le faagasologa lenei e mafai ona fesoasoani i au taumafaiga e faatusaina ai tusitusiga paia i lou olaga. Faamaumau nei laasaga i lau api talaaga mo suesuega.

Faaali atu laasaga nei ina ia mafai e tamaiti aoga ona tagai i ai i le taimi atoa o le lesona.

1. Saili mo auiliiliga taua.

2. Fai ni faatusatusaga i lou olaga.

3. Saili lesona taua.

4. Fuafua le faaaogaina patino.

I lenei lesona, o le a e maua avanoa e faataitai ai le faatusaina o tusitusiga paia i lou olaga a o e suesue i nisi o mea na tutupu i le aiga o Liae i le vao.

Ua gau le aufana a Nifae

O mea nei ua faamoemoe e taiala ai tamaiti aoga i le faatusaina o tusitusiga paia ma saunia i latou e faia lenei mea e i latou lava i se taimi mulimuli ane o le lesona.

Laasaga 1: Saili auiliiliga taua

Faataitai le laasaga lenei e ala i le suesueina o le 1 Nifae 16:17–25, 30–32 ma vaavaai mo auiliiliga taua. E mafai ona aofia i nei auiliiliga tagata, nofoaga, meafaitino, faatinoga, po o mea e tutupu. Atonu foi e te manao e maimoa le “Ua Taialaina e le Alii le Malaga a Liae,” o loo maua i le ChurchofJesusChrist.org, mai le faailotaimi 5:33 i le 16:18 o se vaega o lau suesuega.

• O a ni auiliiliga taua sa e maua?

O auiliiliga atonu na e matauina e aofia ai le gau o le aufana a Nifae; o le muimui o Liae, Lamana, Lemuelu, ma atalii o Isamaeli; ua faia e Nifae se aufana fou; ma ua toe foi atu Nifae i lona tamā mo le taitaiga e uiga i le mauaina o meaai.

Laasaga 2: Fai ni faatusatusaga i lou olaga

Mafaufau i vaega o lou olaga e fesootai i auiliiliga na e faailoa mai i le laasaga ua mavae. O le fesili lenei e mafai ona fesoasoani ia te oe e faia ai le mea lenei:

• O a tulaga i lo’u olaga e talitutusa ma tulaga i nei fuaiupu?

Atonu na e faatusaina le gau o le aufana a Nifae i faigata e lei mafaufauina i lou olaga. Atonu foi na e faatusaina upu ma faatinoga a Nifae ma tagata o lona aiga i tali a tagata ina ua latou feagai ma tulaga faigata.

Laasaga 3: Iloa lesona taua

Mafaufau i mea ua e aoaoina mai tusitusiga paia e mafai ona faatatau ia te oe. Atonu foi e te mafaufau e uiga i mea ua e aoaoina e uiga i le Faaola.

• O a nisi o lesona ua e aoaoina mai le tala ia Nifae i le gausia ma le toe lipeaina o lana aufana lea e mafai ona faatatau i lou olaga?

• O le a se mea o aoao mai e lenei tala ia te oe e uiga ia Iesu Keriso?

O se tasi o upumoni atonu na e faailoa mai i lenei tala o le afai tatou te tuuina atu a tatou lava taumafaiga ma saili le taitaiga a le Alii, ona Ia fesoasoani mai lea ia i tatou i o tatou faigata.

Laasaga 4: Fuafua le faaaogaina patino

• Fuafua le faaaogaina patino e ala i le manatunatu i lou lava olaga.

• O a nisi o auala e mafai ona e faaaogaina ai lenei upumoni i lou olaga?

Mai le tele o auala e faaaoga ai lenei upumoni, atonu e te mafaufau pe faapefea ona e mulimuli i le faataitaiga a Nifae pe a e feagai ma luitau e lei faamoemoeina pe lagona le le agai i luma i le olaga. Nai lo le muimui po o le leai o se mea e faia, e mafai ona e taulamua ma agai i luma ma le faatuatua ma le talitonuga o le a fesoasoani Iesu Keriso ia te oe.

• Na faapefea ona fesoasoani le mulimuli i lenei mamanu suesue e te maua ai le uiga o lenei tala faaletusi paia?

Ua poloaiina Nifae e fau se vaa

O mea nei ua faamoemoe e fesoasoani i tamaiti aoga e faaaoga ai le tomai o le faatusaina o tusitusiga paia e i latou lava. Uunaia tamaiti aoga e faataitai muamua taitoatasi. Ona mafai lea e tamaiti aoga ona faapotopoto i ni paga po o ni vaega toalaiti e faasoa mea na latou maua.

Faasino tamaiti aoga i laasaga e fa na faaalia i le amataga o le lesona ina ia mafai ona latou faaaogaina a o galulue i latou lava.

Ina ua mavae le malaga i le vao mo le valu tausaga, sa oo mai Liae ma lona aiga i se laueleele i luga o le matafaga, lea sa latou tau’a o Nuumau ona o le tele o fualaau aina ma le meli vao iina (tagai 1 Nifae 17:4–6).

Faitau le 1 Nifae 17:5–20, 48–55; 1 Nifae 18:1–4, ma faaaoga laasaga e fa mai le amataga e fesoasoani ai ia te oe e faatusaina lenei tala i lou olaga. E mafai foi ona e maimoa i le vitio “Ua Poloaiina e le Alii Nifae e Fau se Vaa” mai le faailotaimi 0:00 i le 12:07, o loo maua i le ChurchofJesusChrist.org. Faataga le Agaga e taiala ou manatu ma suesuega. Ia taofi mai lea taimi i lea taimi e mafaufau pe faapefea ona faatusa mea o loo e aoaoina i tulaga patino o lou olaga. Faamaumau lagona uunaia e te maua.

Valaaulia tamaiti aoga e faasoa mai mea na latou maua mai laasaga taitasi e fa. E mafai foi ona e faasoa atu pe na faapefea e le faatusaina o tusitusiga paia i lou olaga ona aafia ai au suesuega o tusitusiga paia.

Manatu ma Talaaga o Faamatalaga

Aisea na faigata ai mo Nifae le fauina o se vaa?

Na aoao mai Elder David A. Bednar o le Korama o Aposetolo e Toasefululua:

O Nifae e le o se seila. Na ola a’e o ia i Ierusalema, o se aai i uta, nai lo o tuaoi o le Sami Metiteriane. E foliga mai e le tele ni mea na ia iloa pe i ai sona poto masani i meafaigaluega ma tomai e manaomia e fau ai se vaa. Atonu sa le i vaai muamua lava o ia i se vaa o folau i luga o le sami. O le mea moni, i lena taimi, sa poloaiina Nifae ma faatonuina e fausia se mea na te lei fauina muamua lava. (David A. Bednar, “Learning to Love Learning,” Ensign, Fep. 2010, 28.)

1 Nifae 17:45. O le a le uiga o le avea ma “tea atu ma le toe lagonaina”?

Na aoao mai Peresitene James E. Faust (1920–2007) o le Au Peresitene Sili:

Ae peitai … e i ai lava taimi e le mafai ona maua ai se fesootaiga i se telefoni feaveai. E mafai ona tupu lenei mea pe afai o loo i totonu o se ana po o se vanu ia le tagata o loo faaaogaina le telefoni feaveai, po o le i ai foi o se isi mea o loo faalavelaveina ai.

E faapena foi i fesootaiga faalelagi. … Atonu e i ai se mea i o tatou olaga o loo taofia ai i tatou mai le faalogo atu i le savali aua “ua le lagona e i tatou.” [1 Nifae 17:45]. E masani ona tatou tuuina atu i tatou lava i tulaga faaleagaga tatou te le lagonaina ai le Agaga—o tulaga ma nofoaga ia e taofia ai savali mai le lagi. O nisi o nei nofoaga e le maua ai ia fesootaiga e aofia ai le ita, ponokalafi, solitulafono, manatu faapito, ma isi tulaga ia e faatiga ai i le Agaga. (James E. Faust, “Pe Na E Mauaina le Savali Sao?,” Liahona, Me 2004, 67)

Gaoioiga Faaopoopo e Aoao Ai

Lesona faaopoopo mai le aufana gau

Mafaufau e fesoasoani i tamaiti aoga e faailoa mai ni lesona faaopoopo mai le aafiaga o le aufana-gau. O se tasi o auala e faia ai lenei mea o le faamamafa atu faapea e faaopoopo atu i le muimui o Lamana ma Lemuelu, sa muimui foi le Tama ia Liae. Valaaulia tamaiti aoga ia iloa le mea sa lei faia e Nifae i lenei tulaga (e lei alu o ia i lona tama, fautuaina o ia, faamaasiasi ia te ia, pe valaau atu ia te ia ia salamo, aua e le o le tiutetauave lena a Nifae) ma le mea sa ia faia (sa ia talosagaina Liae e ole atu i le Alii po o fea e finagalo o Ia latou te o i ai e saili ai meaai). O le a se mea e mafai ona tatou aoaoina mai lenei vaaiga? E faapefea ona faatatau lenei mea i la tatou sootaga ma auauna faauuina a le Alii i o tatou aso?

Faatusaina i le fanauga a Isaraelu

A o faasa’oina ona uso, sa faatusaina e Nifae le aafiaga o Mose ma le fanauga a Isaraelu i le tulaga o lona aiga. Mafaufau e valaaulia tamaiti aoga e faitau upu a Nifae i le 1 Nifae 17:21–47, ma vaavaai mo mea e talitutusa ai na aafiaga e lua. O a ni mea talitutusa e mafai ona faailoa mai e tamaiti aoga mai nei tala ma o latou lava olaga? Aisea e ono taua tele ai le manatuaina o nei aafiaga uma e lua i o tatou aso?

O le faamalosia e le Alii

Atonu e aoga mo tamaiti aoga se talanoaga o le 1 Nifae 17:3. Mafaufau e valaaulia se volenitia e faitau le fuaiupu lenei ma fai atu i tamaiti aoga e faailoa mai se upumoni o loo aoaoina ai. Atonu e faailoa mai e tamaiti aoga se mea e talitutusa ma lenei: afai tatou te tausia poloaiga, ona faamalosia lea o i tatou e le Alii ma saunia se auala mo i tatou e ausia ai mea ua Ia poloaiina ai i tatou.

Valaaulia tamaiti aoga e mafaufau pe sue se faamaoniga o lenei mataupu faavae i le tala ia Liae ma lona aiga. Valaaulia i latou e mafaufau i faamaoniga o lenei upumoni i o latou lava olaga.