1 Nifae 16–22

Vaaiga Aoao

E lei leva ona tuua e le aiga o Liae Ierusalema, ae tuuina atu e le Alii ia i latou se taitaiga faateleina e ala i le Liahona. Sa latou feagai ma luitau eseese i le vao, ma o le ala na tali atu ai Nifae i nei luitau ua aumaia ai ia i tatou se faataitaiga o le auala e tali atu ai i o tatou lava tofotofoga o le olaga. A o aoao atu e uiga i le faataapeapeina ma le faapotopotoina o Isaraelu, sa faaaoga e Nifae valoaga a Isaia e faaali ai o le a le faagaloina e le Alii le aiga o Isaraelu ua faataapeapeina. Sa ia aoao mai foi e tusa lava po o le a le puna o o tatou mafatiaga, ua ofoina mai e Iesu Keriso le malosi ma le faamalologa ia i latou o e saili ia te Ia.

Ia Saunia e Aoao Atu

O faamatalaga nei e tuuina atu ai i faiaoga ni manatu o mea e ao ona saunia mamao i ai mo lesona taitasi.

1 Nifae 16–18

Faamoemoega o le lesona: O lenei lesona e mafai ona fesoasoani i tamaiti aoga ia iloa ma mulimuli i le taitaiga a le Alii i o latou olaga.

• Sauniuniga a le tamaitiiti aoga: Valaaulia tamaiti aoga e matau auala e tuuina mai ai e le Alii ia i latou le taitaiga ma le taiala i le aso atoa.

• Ata: O se tasi poo le sili atu o ata o le Liahona

• Fautuaga faafaiaoga faavitio: A uma ona fatu e tamaiti aoga le siata e pei ona faatonuina i le lesona, mafaufau e valaaulia i latou e faaaoga vaega o le talanoaga po o le laupapa paepae e faasoa mai ai mea sa latou aoaoina e uiga i le Liahona. Ona mafai lea ona latou talanoaina faatasi pe faapefea ona fesootai nei upumoni i le malamalama ma le faaaogaina o le meaalofa o le Agaga Paia.

1 Nifae 16–17

Faamoemoega o le lesona: O lenei lesona e mafai ona fesoasoani i tamaiti aoga e aoao ai pe faapefea ona faatatau tusitusiga paia ma faafetaiaia luitau i le faatuatua.

• Sauniuniga a le tamaitiiti aoga: Valaaulia tamaiti aoga e faitau le 1 Nifae 19:23 ma mafaufau i le uiga o le faatusaina o tusitusiga paia ia i tatou lava.

• Vitio: “Ua Taialaina e le Alii le Malaga a Liae” (16:18; maimoa mai le faailotaimi 5:33 i le 16:18); ”Ua Poloaiina e le Alii Nifae e Fau se Vaa” (15:12; maimoa mai le faailotaimi 0:00 i le 12:07)

• Fautuaga faafaiaoga i vitio: O le tulaga faataitai i le amataga o le lesona atonu o se avanoa lelei lea e tulitatao ai pe o a mai suesuega patino o tusitusiga paia a tamaiti aoga. E sui ai le tulaga faataitai, mafaufau e tuu i luga o le lau se fesili e pei o le “O a nisi o atugaluga e masani ona i ai i talavou i le faitauina o tusitusiga paia?” ma faataga tamaiti aoga e tali mai e faaaoga ai se faigapalota faalilolilo po o se vaega o fesili-ma-tali.

1 Nifae 17–18

Faamoemoega o le lesona: O lenei lesona e mafai ona fesoasoani i tamaiti aoga ia lagona le alofa ma le lotofaafetai mo le Alii, e tusa lava po o a tulaga o loo feagai ma i latou.

• Sauniuniga a le tamaitiiti aoga: Valaaulia tamaiti aoga e sauni e faasoa mai ni aafiaga na latou maua na fesoasoani ia i latou e lagona ai le alofa sili atu ma le lotofaafetai mo le Atua.

• Vitio: “Ua Folau Atu le Aiga o Liae i le Nuu Folafolaina” (12:53; maimoa mai le faailotaimi 3:13 i le 11:31); “Ina Ia Mafai Ona Ou Aumai o Tagata Uma ia te Au” (13:42; maimoa mai le faailotaimi 3:52 i le 4:40)

• Fautuaga faafaiaoga i vitio: Mo le gaoioiga o le faatusatusaina o amioga ma uiga faaalia o Nifae ia Lamana ma Lemuelu, mafaufau e valaaulia tamaiti aoga e filifili a le o le “Malaga i le vao” po o le “Fausiaina o se vaa.” Ona tuu atu lea ia i latou e faitau fuaitau o mau e o faatasi ma a latou filifiliga ma saunia e faasoa mai mea na latou aoaoina i le vasega atoa.

1 Nifae 19–22

Faamoemoega o le lesona: O lenei lesona ua faamoemoe e fesoasoani i tamaiti aoga ia lagona le alofa o le Alii mo i latou ma tagata uma ma Lona finagalo e faapotopoto i latou ia te Ia.

• Sauniuniga a le tamaitiiti aoga: Mafaufau e fai atu i tamaiti aoga e o mai saunia e faasoa mai ni upu se lua pe tolu o le a latou faaaogaina e faamatala ai lagona o Iesu Keriso ia i latou.

• Vitio: “E i ai se Fuafuaga a le Atua mo Oe” (7:06)

Atamai i Aoaoga Faavae Iloiloga 2

Faamoemoega o le lesona: O le lesona lenei ua faamoemoeina e fesoasoani i tamaiti aoga e tauloto mau faasino ma fasifuaitau autū o mau mo nisi o fuaitau o le atamai i aoaoga faavae o le Tusi a Mamona.

Manatua: E ono manaomia ona aoaoina se lesona o le fuaitau o atamai i aoaoga faavae e suitulaga i lenei lesona toe iloilo. Tagai i le faasologa faatulagaina o lesona ua saunia e le faatonu o le eria po o le itulagi po o le taitai faamaopoopo ia mautinoa o lesona taitasi o fuaitau o le atamai i aoaoga faavae o le a aoaoina a o faagasolo vasega seminare.

• Sauniuniga a le tamaitiiti aoga: Valaaulia tamaiti aoga e manatunatu i ai ma ia saunia e talanoaina soo se fuaitau o mau na fesoasoani ia i latou i o latou olaga.

• Sapalai: E lua ni fasipepa mo tamaiti aoga taitasi e fatu ai a latou kata o manatuaga; sapalai o faatufugaga e pei o valigao po o maka

• Fautuaga faafaiaoga faavitio: A uma loa ona faia e tamaiti aoga a latou kata o manatuaga, vaevae tamaiti aoga i vaega (i paga po o ni vaega toalaiti) e faataitai ai le taulotoina o nisi o fuaitau o le atamai i aoaoga faavae i luga o ana kata. E mafai e se tamaitiiti aoga ona tuu le tasi itu o lana kata i le meapueata, ae o se isi tamaitiiti aoga po o tamaiti aoga i vaega e mafai ona faataitaia le toe faia o mea o loo i le isi itu o le kata.