1 Nifae 19–22

“Ai Lava e Galo Ia Te i Latou, A e Le Galo Lava Oe Ia Te Au”

O le a sou lagona pe a manatuaina oe e se tasi e taua ia te oe? A o aoao atu e uiga i le faataapeapeina ma le faapotopotoina o Isaraelu, sa faaaoga e Nifae valoaga a Isaia e faaali ai o le a le faagaloina e le Alii le aiga o Isaraelu ua faataapeapeina. O lenei lesona ua faamoemoe e fesoasoani ia te oe e lagona ai le alofa o le Alii mo oe ma tagata uma ma Lona finagalo e faapotopoto mai outou ia te Ia.

Valaauliaina o tagata aoga ia fefaasoaai. Sue ni taimi i le lesona pe a mafai ona e uunaia tamaiti aoga e mafaufau loloto i o latou lagona e uiga i se mea, ona fai atu lea ia i latou e faasoa mai o latou lagona pe tusi i lalo o latou lagona ona faasoa mai lea. O le tuuina atu i tamaiti aoga o se avanoa e faaleo mai ai manatu ma lagona e mafai ona fesoasoani latou te lagona atili ai le mautinoa i le faaalia o molimau.

Sauniuniga a le tamaitiiti aoga: Mafaufau e fai atu i tamaiti aoga e o mai saunia e faasoa mai ni upu se lua pe tolu o le a latou faaaogaina e faamatala ai lagona o Iesu Keriso ia i latou.

Gaoioiga e Ono Mafai Ona Aoao Ai

O le alofa o le Faaola mo i tatou

Mafaufau e amata le vasega i le usuina o se pese e faatatau i le alofa o Iesu Keriso mo i tatou, e pei o le “O Le Alofa O Le Faaola” (music.ChurchofJesusChrist.org). E mafai ona valaaulia tamaiti aoga e faasoa mai upu po o fasifuaitau mai le pese e tulaga ese ia i latou.

E i ai taimi e mafai ai e i tatou taitoatasi ona iloa ma lagona le alofa o le Atua i o tatou olaga, ae o isi taimi atonu tatou te le iloaina lava. Vaai faalemafaufau e faapea sa e talanoa ma se uo sa fai atu ia te oe na te le o mautinoa pe alofa le Atua ia te ia.

• O le a se mea e mafai ona e faasoa atu mai tusitusiga paia e mafai ona fesoasoani i lau uo?

• O a ni aafiaga e mafai ona e faasoa atu i lau uo e uiga i le ala na e iloa ai ma lagona le alofa o le Tama Faalelagi ma Iesu Keriso?

Tuu atu i tamaiti aoga sina taimi i le vasega e fai ai mea nei. Valaaulia tamaiti aoga e faamaumau nisi o o latou manatu po o fesili i se api talaaga mo suesuega ma vaavaai mo tali i le taimi o le lesona.

Mafaufau loloto i ou lava lagona e uiga i le alofa o le Atua mo oe, e aofia ai soo se fesili po o atugaluga atonu o ia te oe. A o e suesue, vaavaai mo upumoni e mafai ona fesoasoani ia te oe e malamalama atili ai ma lagona le alofa o le Tama Faalelagi ma Iesu Keriso mo oe.

Ua aoao mai Nifae e uiga i le alofa o le Faaola mo i tatou

I le 1 Nifae 19, na valoia ai e Nifae le soifuaga ma le misiona a Iesu Keriso i le lumanai. Faitau le 1 Nifae 19:7–10, ma vaavaai mo mea na aoao mai e Nifae e uiga i le ala o le a taulimaina ai Iesu Keriso i Lona taimi i le lalolagi ma le pogai o le a naunau ai o Ia e taulimaina faapena.

• O a upu po o fasifuaitau e tulaga ese ia te oe mai nei fuaiupu? Aisea?

• E faapefea e le malamalama i aoaoga i nei fuaiupu ona aafia ai ou lagona mo le Tama Faalelagi ma Iesu Keriso?

Aotele parakalafa nei pe valaaulia se tamaitiiti aoga e faasoa atu i le vasega.

Ina ua uma ona faamaumau ana lava valoaga e uiga ia Iesu Keriso, sa faasoa atu e Nifae ia valoaga mai le perofeta o le Feagaiga Tuai o Isaia e uiga i le faataapeapeina ma le faapotopotoina o Isaraelu. O nei valoaga sa taua ia Nifae ma lona aiga, o e na faataapeapeina mai lo latou nuu moni o Ierusalema ona o le amioleaga o tagata sa nonofo ai. O valoaga a Isaia na ta’u mai ai o le toatele o Isaraelu o le a lagonaina le faagaloina e le Alii i o latou tulaga faataapeapeina.

Faitau le 1 Nifae 21:14–16 ma vaavaai mo afioga a le Alii ia i latou o le a lagonaina le faagaloina.

Afai e manaomia e tamaiti aoga le fesoasoani i le fasifuaitau “o ou pa ua i ai pea i o’u luma” (1 Nifae 21:16), e mafai ona e faamalamalama atu o lenei fasifuaitau o loo ta’u mai ai o loo leoleoina ma puipuia pea e le Alii Lona nuu.

• E faapefea ona e vaaia le alofa o le Faaola o faaalia i nei fuaiupu?

• O le a se upumoni e mafai ona e ta’ua e uiga ia Iesu Keriso e faavae i mea ua e aoaoina i le asō?

  O se upumoni e tasi e mafai ona faailoa mai e tamaiti aoga o le e alofa le Alii ia i tatou ma o le a le faagaloina lava i tatou. Mafaufau e tusi lenei mea i luga o le laupapa.

• 1 Nifae 22:9–12

• 1 Nifae 22:24–25

• 3 Nifae 22:7–8

• O a nisi o tulaga e mafai ai ona faigata mo nisi tagata ona talitonu i lenei upumoni?

• O le a se mea e mafai ona fesoasoani ia i tatou e iloa lelei ai ma lagonaina le alofa o Iesu Keriso mo i tatou?

O le alofa o le Faaola ua faaalia e ala i Lona naunau e faapotopoto mai tagata ia te Ia

Sa faataapeapeina tagata o Isaraelu anamua i soo se taimi lava latou te le tapuai ai ia Ieova ma soli a latou feagaiga ma poloaiga a le Atua (tagai 2 Nifae 6:10–11; 10:3–6). E faapotopotoina le nuu o Isaraelu pe a latou o mai ia Keriso, talia Lana talalelei e ala i le papatisoga, ma tausi Ana poloaiga. Na folafola atu e le Faaola ia Isaraelu ua faataapeapeina o le a Ia le faagaloina lava i latou ma o le a Ia faapotopotoina i latou ia te Ia i aso e gata ai (tagai 1 Nifae 15:13–14; 2 Nifae 6:11; 9:1–2; 10:7–8).

Suesue ulutala o mataupu o le 1 Nifae 21 ma le 22 ia malamalama atili ai i mea o loo valoia e Isaia ma aoaoga i nei mataupu.

Suesue fuaitau o mau nei e uiga i le faapotopotoina o Isaraelu i aso e gata ai. Ia gauai atu i upu po o fasifuaitau o loo ta’u mai ai le alofa o le Alii mo Lona nuu.

Mafaufau i ni auala e faaauai ai tamaiti aoga i lenei gaoioiga suesue. O se tasi o auala o le tusi lea o mau faasino taitasi i luga o se kata e ese mai po o se tamai fasi pepa ina ia lava mo tamaiti aoga taitasi i le vasega. Valaaulia tamaiti aoga e suesue le fuaiupu o i luga o a latou pepa, faailoa mai mea o le a faia e le Alii e faapotopoto ai Isaraelu, ona fesuiai lea o a latou pepa ma se tasi o le vasega. E mafai e tamaiti aoga ona faafesuiai pepa mo ni nai taimi.

• 1 Nifae 22:9–12

• 1 Nifae 22:24–25

• 3 Nifae 22:7–8

• O a ni folafolaga na tuuina mai e le Alii i nei fuaiupu? E faapefea ona faaalia e nei folafolaga Lona alofa mo tagata uma?

• O a ni faataitaiga e mafai ona e mafaufau i ai i lou olaga po o olaga o isi ia na faapotopoto ai e le Alii tagata ia te Ia?

Afai e maua, maimoa le vitio “E i Ai se Fuafuaga a le Atua mo Oe” (7:06), o loo maua i le ChurchofJesusChrist.org, e uiga i se tamaitai talavou e igoa ia Renu Singh. Matau le ala na aapa atu ai Iesu Keriso ma fesoasoani e aumai o ia ia te Ia.

Valaaulia tamaiti aoga e faasoa mai o latou lagona, aafiaga ma molimau. Molimau atu i tamaiti aoga e uiga i le alofa o Iesu Keriso mo i latou taitoatasi ma mo tagata uma i le lalolagi.

Manatu ma Talaaga o Faamatalaga

Pe a ou agasala, pe ua ou le agavaa ea mo le alofa o le Atua?

Na aoao mai Brother Bradley R. Wilcox o le Au Peresitene Aoao o Alii Talavou:

Manatua e mafai ona iai suiga, o le salamo o se faagasologa, ma o le agavaa e le o le atoatoa. O le mea aupito sili ona taua, ia manatua e naunau le Atua ma Keriso e fesoasoani ia i tatou iinei lava ma le taimi nei lava.

Ua toatele na’uā ua tiga ona o mafutaga ua malepelepe ma motusia ma ua faigata ai ia i latou ona talitonu i le agaalofa ma le tali-tiga o le Atua. Ua latou tauivi e vaai atu i le Atua e pei ona i ai o Ia—o se Tama alofa e faafetaia’ia i tatou i o tatou manaoga ma ua silafia le ala e “avatu [ai] mea lelei ia i latou e ōle atu ia te ia.”3 Nifae 14:11]. O Lona alofa tunoa ua le na o se taui mo le agavaa. O le “fesoasoani faalelagi” lea Na Te tuuina mai e fesoasoani ia i tatou ia agavaa. Ua le na o se taui mo ē amiotonu. O le “faaeega o le malosi” Na Te tuuina mai lea e fesoasoani ia i tatou ia amiotonu [Dieter F. Uchtdorf, “O Le Meaalofa o le Alofatunoa,” Liahona, Me 2015, 107]. Tatou te le na ona savavali aga’i atu i le Atua ma Keriso. O loo tatou savavali faatasi ma i La’ua. (Bradley R. Wilcox, “O Le Agavaa E Le o le Atoatoa,” Liahona, Nov. 2021, 62, 67)

Aisea e faatusa ai e Keriso o Ia lava i se tina?

Na aoao mai Elder Dale G. Renlund o le Korama a Aposetolo e Toasefululua:

Na fesili Ieova, “Pe mafai ea ona galo i se fafine lana tama o susu, ina ia lē alofa o ia i le tama a lona manava?” E faapei ona le mafai e se tina alofa ona galo sana tama meamea, ua tautino mai foi e Ieova e faapea e sili atu ona mausali o Lona faamaoni. Na Ia faamautinoa mai, “Ioe, atonu e galo ia te i latou, ae o le a le galo ia te a’u oe. … Faauta, ua Ou togitogia oe i luga o alofilima o oʼu lima; o ou pa ua i ai pea i oʼu luma” [1 Nifae 21:15–16]. Ona sa onosa’ia e Iesu Keriso le taulaga togiola e le i’u, o lea ua Ia malamalama lelei ai ia i tatou [tagai Alema 7:11–13]. E silafia e Ia i tatou e le aunoa ma o tatou tulaga. (Dale G. Renlund, “Faapito’au Faaosolilivau,” Liahona, Me 2021, 43)

E faapefea ona tatou iloa le alofa o le Atua mo i tatou?

Na aoao mai Sister Susan H. Porter o le Au Peresitene Aoao o le Peraimeri:

E lē maua le alofa o le Atua i tulaga o ō tatou olaga, ae i Lona auai i o tatou olaga. Tatou te iloa Lona alofa pe a tatou maua le malosi e sili atu nai lo o tatou lava malosi ma pe a aumaia e Lona Agaga le filemu, mafanafana, ma le taitaiga. E i ai taimi atonu e faigata ai ona lagona Lona alofa. E mafai ona tatou tatalo ia pupula o tatou mata e vaai i Lona aao i o tatou olaga ma vaai i Lona alofa i le matagofie o Ana foafoaga. (Susan H. Porter, “O Le Alofa o le Atua: E Silisili Ona Olioli i le Agaga,” Liahona, Nov. 2021, 35)

Gaoioiga Faaopoopo e Aoao Ai

1 Nifae 19:18–19. O se faamoemoega taua o le Tusi a Mamona

I le 1 Nifae 19:18–19, na faamalamalama mai ai e Nifae lona faamoemoega autu mo le fatuina o lana talafaamaumau. Mafaufau e valaaulia tamaiti aoga e faitau nei fuaiupu ma vaavaai mo mea na aoao mai e Nifae e uiga i le mafuaaga na ia fatuina ai lana talafaamaumau.

Mafaufau e faaaoga fuaiupu nei e fesoasoani ai i tamaiti aoga ia malamalama o le faitauina o tusitusiga paia o se auala mamana e manatua ai le Faaola o Iesu Keriso i aso taitasi. Mafaufau e fai atu se tasi pe sili atu o fesili nei o se vaega o lenei talanoaga:

• E faapefea ona fesoasoani le Tusi a Mamona ia i tatou e manatua ai Iesu Keriso?

• Mafaufau i se taimi na e lagona ai le latalata atili i le Faaola ona o au suesuega o tusitusiga paia. O le a le eseesega na faia e lena mea i lou aso po o lau molimau?

• O a suiga e te lagona e tatau ona e faia i au lava suesuega patino ina ia mafai ai ona e manatua lelei le Faaola o Iesu Keriso?

Gaoioiga o le faaaogaina

I le faaiuga o le lesona, mafaufau e faasoa atu le saunoaga lenei a Elder Gerrit W. Gong o le Korama a Aposetolo e Toasefululua: “Ua valaaulia i tatou e lo tatou Faaola ia manatua pea o Ia e pei ona Ia manatua pea i tatou” (“Ia Manatua Pea o Ia,” Liahona, Me 2016, 110).

Valaaulia tamaiti aoga e mafaufau i filifiliga e mafai ona latou faia ma le loto i ai e manatua atili ai le Tama Faalelagi ma Iesu Keriso i o latou aso po o vaiaso.

1 Nifae 22:15–28. “O e amiotonu e le tatau ona matata’u”

E mafai ona aoga mo tamaiti aoga se talanoaga o aoaoga a Nifae i le afa lona lua o le 1 Nifae 22. Mafaufau e fesili atu i tamaiti aoga e talanoaina mafuaaga e lagona ai e nisi tagata le matatau i mea e tutupu i aso e gata ai. Faamalamalama atu na faaiuina e Nifae lana tusi muamua e ala i le faasoa atu o aoaoga ia e mafai ona maua ai le faamoemoe mo e amiotonu o e ola i aso e gata ai.

Valaaulia tamaiti aoga e faitau le 1 Nifae 22:15–28, vaavaai mo aoaoga e mafai ona fesoasoani ia i tatou e lagona ai le faamoemoe ma faatoilalo ai le fefe e uiga i le ola ai i aso e gata ai. Valaaulia tamaiti aoga e faasoa mai o latou manatu ma malamalamaaga.