1 Nifae 17–18

“Sa Ou Tepa Taulai Ae i Lo’u Atua”

O le a tofu i tatou uma ma tofotofoga ma mafatiaga i o tatou olaga. O nisi o le a oo mai o se taunuuga o a tatou lava mea sese pe na o lo tatou ola ai i se lalolagi pa’ū ma lē atoatoa. E pei ona oo ia Nifae i lana malaga atoa i le nuu folafolaina, o nisi o tofotofoga ma mafatiaga e afua ona o le faaaoga sese e i latou o siomia i tatou lo latou faitalia. E tusa lava po o le a le punavai o o tatou mafatiaga, ua ofoina mai e Iesu Keriso le malosi ma le faamalologa ia i latou o e saili ia te Ia. O lenei lesona e mafai ona fesoasoani ia te oe e lagona ai le alofa ma le lotofaafetai mo le Alii, e tusa lava po o a tulaga o loo feagai ma oe.

Malamalama i manaoga o le aoaoina o tamaiti aoga. Saili ia malamalama i manaoga o le aoaoina o tagata taitoatasi i lau vasega. O le a fesoasoani lenei mea ia te oe e tuuina atu ai ni aafiaga e aoao ai e fetaui ma o latou manaoga ma mafai ai e tagata taitoatasi ona aoao i ni auala eseese. E mafai ona aofia ai le faaaogaina o fesoasoani vaaia, galuega faavaega, po o suesuega faaletagata lava ia. Ia nofouta i tamaiti aoga e i ai ni luitau faapitoa o le aoaoina.

Sauniuniga a le tamaitiiti aoga: Valaaulia tamaiti aoga e sauni e faasoa mai ni aafiaga na latou maua na fesoasoani ia i latou e lagona ai le alofa sili atu ma le lotofaafetai mo le Atua.

Gaoioiga e Ono Mafai Ona Aoao Ai

E faapefea ona e tali atu?

Pe ua e matauina ni auala eseese e tali atu ai tagata i nisi taimi i ni tulaga talitutusa faapena? Faitau tala faataitai nei ma mafaufau e uiga i nisi o auala eseese e mafai ona tali atu ai tagata o loo i ai i tala faataitai.

Faaaoga mea nei pe fai nisi tala faataitai e fesoasoani ai i tamaiti aoga e talanoaina auala eseese e tali atu ai i faigata po o tofotofoga.

Sa alu Guillermo i le fomai o mata ona sa nenefu lana vaai. Sa ta’u atu e le fomai ia te ia ua maua o ia i se ma’i e le taatele lea o le a tauaso atoa ai o ia i totonu o se tausaga.

Sa ita le tuagane o Layla ma tulei o ia, ma mafua ai ona manu’a lona tapuvae. Sa tatau ona taalo o ia i le taaloga siamupini a lana au, ae o lea ua le mafai ona tamoe o ia.

• O a nisi o auala eseese e ono tali atu ai tagata o i ai i nei tala faataitai i o latou tulaga faigata?

• O le a sou manatu o a nisi o mafuaaga e tali atu ai tagata i ni auala lelei pe le lelei i tofotofoga latou te oo i ai?

Vaaiga a Nifae

A o e suesueina le Tusi a Mamona, atonu na e matauina se eseesega i le amioga ma uiga faaalia o Nifae e faatusa ia Lamana ma Lemuelu, e ui lava ina sa latou mafatia i le tele o ia lava puapuaga. Ia gauai atu i lenei eseesega a o e suesue i fuaiupu nei.

Mo le gaoioiga suesue lenei, e mafai e tamaiti aoga ona faitau le faatusatusaga muamua ma se paga, ona fesuiai lea o paga mo le isi vaega o fuaiupu. E faapena foi, e mafai e tamaiti aoga ona talanoaina fesili nei i paga, vaega toalaiti, po o se vasega a o lei suesueina mea na tutupu i le 1 Nifae 18.

Malaga i le Vao:Faatusatusa le tala a Nifae i le 1 Nifae 17:1–3 i le mea na fai mai ai Lamana ma Lemuelu i le 1 Nifae 17:20–22.

Fauina o se Vaa:Faatusatusa le tali a Nifae i le 1 Nifae 17:8–9, 15 i le tali atu a Lamana ma Lemuelu i le 1 Nifae 17:17–18.

Filifili pe o le a le auala sili e faaauai ai tamaiti aoga i se talanoaga o mea sa latou faitauina. E mafai ona fesoasoani fesili nei i lenei talanoaga:

• O a ni manatu po o ni lagona na oo ia oe ao e faatusatusaina upu ma faatinoga a Nifae ia Lamana ma Lemuelu?

• O le a se mea na e matauina e uiga i le sootaga a nei tagata taitoatasi ma le Atua?

E tofu i tatou uma ma taimi tatou te tali lelei atu ai i tulaga faigata, ma o isi taimi, e le lelei tele ai. Mafaufau pe masani ona e amio e pei o Nifae pe faapei o Lamana ma Lemuelu pe a e feagai ma ni tulaga faigata. A o faaauau pea ona e suesue, vaavaai mo aoaoga e mafai ona fesoasoani ia te oe e tali atu ai i auala e sili atu ona lelei pe a e feagai ma faigata po o tofotofoga.

Ua folau atu Liae ma lona aiga i le laueleele folafolaina

Ina ua maea ona fauina e Nifae ma ona uso le vaa, sa poloaiina e le Alii ia Liae ma lona aiga e amata ona folau atu i le nuu folafolaina (tagai 1 Nifae 18:1–8).

Faitau le 1 Nifae 18:9–21, ma vaavaai mo nisi o faigata na oo i ai i lenei malaga. A o e suesue, faaauau pea ona faatusatusa amioga ma uiga o Nifae ia Lamana ma Lemuelu. Atonu foi e te manao e maimoa le vitio “Ua Folau Atu le Aiga o Liae i le Nuu Folafolaina” mai le faailotaimi 3:13 i le 11:31, o loo maua i le ChurchofJesusChrist.org.

• O le a se mea e tulagaese ia te oe mai lenei tala?

• Matau le mea na faamauina e Nifae i le fuaiupu 16. Afai e maua sou avanoa e fesili atu ai ia te ia ni fesili e uiga i ana amioga i lenei fuaiupu, o le a se mea e te fesili atu ai ia te ia?

• O le a sou manatu e faapefea ona ia tali mai i au fesili?

Na faasoa mai e Elder Dale G. Renlund o le Korama a Aposetolo e Toasefululua se mafuaaga e tasi na mafai ai e Nifae ona tali atu i le ala na ia tali atu ai i le taimi o ona faigata.

Ona sa laua mamao ese mai le Faaola, sa muimui ai Lamana ma Lemuelu, sa faatupu vevesi, ma sa lē faatuatua. Sa laua lagona le le talafeagai o le olaga ma e sa agavaa i laua i le alofatunoa o le Atua. I se eseesega, ona sa ia latalata atu i le Atua, masalo sa iloa e Nifae o le a sili ona le talafeagai le olaga mo Iesu Keriso. E ui ina sa matua amiotonu lava, ae o le a sili ona mafatia le Faaola.

O le faateleina o lo tatou latalata atu ia Iesu Keriso i mafaufauga ma manatu o o tatou loto, o le faateleina foi lena o lo tatou talisapaiaina o Lona puapuagatia le sala, o le faateleina foi lena o lo tatou lotofaafetai mo le alofa tunoa ma le faamagaloga, ma o le faateleina foi lena o lo tatou mananao atili ia salamo ma avea e faapei o Ia. (Renlund, “Ina Ia Mafai Ona Ou Aumai o Tagata Uma Ia te A’u,” Liahona, Me 2016, 40)

• O le a se upumoni ua e aoaoina mai le saunoaga a Elder Renlund e mafai ona fesoasoani ia te oe i ou tofotofoga?

Mafaufau e faasoa atu le upumoni lenei pe afai e lei faailoa maia e tamaiti aoga se mea talitutusa e i latou lava.

O se tasi upumoni atonu na e faailoa maia o le pe a tatou latalata atu ia Iesu Keriso, e mafai ona tatou lagona le alofa ma le lotofaafetai mo Ia e oo lava i taimi faigata.

• Aisea e te manatu ai o le a sili atu ona tatou lagonaina le alofa ma le lotofaafetai mo Iesu Keriso pe a tatou latalata atili atu ia te Ia?

Afai e mafai ona faaaoga e tamaiti aoga le fesoasoani i le taliina o le fesili na muamua atu, mafaufau e fai atu nisi fesili e pei o le “O le a se mea ua faia e le Alii mo oe ua e maua ai le lotofaafetai mo Ia?” po o le “O anafea na e lagona faapitoa ai le lotofaafetai mo le Faaola?”

Mafaufau e faaali atu fesili nei ma valaaulia tamaiti aoga e tusi a latou tali i se tasi pe sili atu i a latou api faamaumau mo suesuega. Ona valaaulia lea o ni volenitia e faasoa mai ni o latou manatu.

• E faapefea ona e iloa atonu ua e taumamao ese mai le Alii? O le a se mea e mafai ona e faia e taofia ai lena taumamao?

• O le a se mea na fesoasoani ia te oe e faalatalata atili ai ia Iesu Keriso?

Mafaufau e tuu atu i tamaiti aoga se taimi e mafaufau loloto ai ma tatalo le leoa e uiga i lo latou lagona latalata i le Tama Faalelagi ma Iesu Keriso ma faamaumau soo se manatu po o uunaiga na latou maua i le taimi o lenei lesona i a latou api talaaga mo suesuega. O le parakalafa o loo i lalo o se tasi lea o auala e mafai ai ona e faia lenei mea.

Manatu ma Talaaga o Faamatalaga

1 Nifae 18:11, 17-19. Aisea ua faatagaina ai e le Atua Lamana ma Lemuelu e faatupuina ia mafatiaga?

Sa aoao mai Peresitene Dallin H. Oaks o le Au Peresitene Sili:

E seasea faatapulaa e le Atua le faitalia o soo se tasi o Ana fanau e ala i le faalavelave e tetee atu i nisi ma mo le toomaga o isi. Ae Na te faamamaina avega o o tatou mafatiaga ma faamalosia i tatou ia gafatia i latou. … Na te le taofia foi faalavelave uma, ae Na te tali mai i a tatou tatalo ia faaliliueseina ai … pe faavaivaia ai foi o latou aafiaga. …

I faafeagai uma faaletino, ua tatou maua ai le faamautinoaga a le Atua o le a Ia “faapaiaina [o tatou] puapuaga mo [lo tatou] manuia” (2 Nifae 2:2). (Dallin H. Oaks, “Faafeagai o Mea Uma,” Liahona, Me 2016, 117)

E le tatau lava ona faauigaina lenei mea e faapea e le manatu mai le Tama Faalelagi i o tatou mafatiaga, aemaise lava pe a oo mai i sauaga faatautala.

Ua faamoemoeina i tatou e le Alii ina ia faia mea uma tatou te mafaia e taofia ai sauaga faatautala ma ia puipuia ma fesoasoani atu ia i latou ua afaina ai. E leai se tasi e faamoemoeina e onosaia amioga sauā faatautala.

E le tatau lava ona tafitafiese lipoti e uiga i sauaga faatautala. E tatau i tagata uma ona tali atu ma le agaalofa ma faaeteete i tagata ua afaina ai faapea ma o latou aiga. O i latou ua aafia i sauaga faatautala e tatau ona lagonaina ma lagolagoina. (Autu o le Talalelei, “Sauaga Faatautala,” topics.ChurchofJesusChrist.org

Pe o le a mafai ea ona ou alofia tulaga faigatā ona o le faatuatua i le Atua?

Na aoao mai Elder Jeffrey R. Holland o le Korama a Aposetolo e Toasefululua:

O le faatuatua o le faalagolago lea i le Atua i taimi lelei ma taimi leaga, e tusa lava pe aofia i lena mea sina puapuaga seia oo ina tatou vaaia Lona aao [laveai] o faaalia mo i tatou. E ono faigata lena mea i lo tatou lalolagi i nei aso pe a talitonu le toatele o le lelei aupito maualuga i le olaga o le alo’ese lea mai puapuaga uma, ma e leai se tasi e tatau ona tiga i soo se mea. Ae o lena talitonuga o le a le taitaia lava i tatou i le “fua o le tumu o Keriso.” [Efeso 4:13]. (Jeffrey R. Holland, “Faatalitali i le Alii,” Liahona, Nov. 2020, 116)

Pe mafai ea ona ou maua pea le olioli pe a feagai ma tulaga faigatā?

Na aoao mai Peresitene Russell M. Nelson:

O’u uso e ma tuafafine pele, o le olioli o tatou lagonaina e itiiti lava se mea e faatatau i tulaga o tatou olaga ao mea uma o loo faatatau i le taulaiga o o tatou olaga.

Afai o le taulaiga o tatou olaga e i le fuafuaga o le faaolataga a le Atua … ma ia Iesu Keriso ma Lana talalelei, e mafai ona tatou lagona le olioli e tusa lava po o a mea o tutupu—pe le o tutupu foi—i o tatou olaga. (Russell M. Nelson, “Olioli ma le Ola ai Faaleagaga,” Liahona, Nov. 2016, 82)

Gaoioiga Faaopoopo e Aoao Ai

O se isi amataga i le lesona: Lelei pe leaga?

Mafaufau e aumai pe faaali atu ni ata o mea e ono i ai ni manatu tetee o tamaiti aoga, e pei o se au taaalo tauva i le lotoifale, meaai, musika, ma isi mea faapena. Fai atu i tamaiti aoga e finau ma le faaaloalo pe o na mea e lelei pe leaga ma pe aisea foi. Fesili atu i le vasega pe aisea e eseese ai manatu o tagata e uiga i mea lava e tasi, ma pe faamaonia na mea e faatatau i aafiaga. Mai lenei talanoaga, faailoa atu faatusatusaga o Nifae ia Lamana ma Lemuelu.

1 Nifae 18:9. “Sa amata ona latou sisiva, ma pepese, ma tautatala ma le le migao tele”

Faamatala atu ua lapataia i tatou e taitai o le Ekalesia e uiga i upu tatou te fai, o ituaiga musika tatou te faalogologo i ai, ma auala tatou te sisiva ai. Mafaufau e faitau parakalafa talafeagai mai itulau 20–23 o le Mo Le Malosi o le Autalavou (tamaitusi, 2011).

Talanoa ma le vasega ni auala e mafai ai e musika, siva, ma lauga lē talafeagai ona aafia ai le olaga o se tagata.

1 Nifae 18:8–23. Nifae o se faatusa o Keriso

Fesoasoani i tamaiti aoga ia iloa le Faaola i lenei tala e ala i le valaaulia o i latou e mafaufau i auala e mafai ai e Nifae ona fai ma sui o le Faaola o Iesu Keriso. Mafaufau i tulaga nei:

O mea e tutusa ai	Nifae	Iesu Keriso
O mea e tutusa ai Atalii e alofagia	Nifae 1 Nifae 3:6-8	Iesu Keriso Mataio 3:17
O mea e tutusa ai Inosia ma teena e ona uso	Nifae 1 Nifae 18:10	Iesu Keriso Ioane 7:5; 15:24–25
O mea e tutusa ai Saisaitia e ē amioleaga	Nifae 1 Nifae 18:11	Iesu Keriso Mataio 27:2
O mea e tutusa ai Teenaina o se pule amiotonu	Nifae 1 Nifae 18:10	Iesu Keriso Ioane 19:15
O mea e tutusa ai Mafatiaga ma le loto i ai	Nifae 1 Nifae 18:11, 16	Iesu Keriso Luka 22:42
O mea e tutusa ai O le Atua Faaeaina i ona puapuaga	Nifae 1 Nifae 18:16	Iesu Keriso Mataupu Faavae ma Feagaiga 19:19
O mea e tutusa ai E faalagolago le aiga ia te ia e manumalo ai	Nifae 1 Nifae 18:20–22	Iesu Keriso 2 Nifae 9:6–9
O mea e tutusa ai Faasaoina uma mai le oti	Nifae 1 Nifae 18:22–23	Iesu Keriso 1 Korinito 15:22