“2 Nīfai 9:1–26: ʻKo Ha Fakalelei Taʻefakangatangata,’” Tohi ʻa Molomoná – Tohi Lēsoni ʻa e Faiakó (2024)
“2 Nīfai 9:1–26,” Tohi ʻa Molomoná – Tohi Lēsoni ʻa e Faiakó
2 Nīfai 9:1–26
“Ko Ha Fakalelei Taʻefakangatangata”
Naʻe akoʻi ʻe Sēkope e kakai Nīfaí fekauʻaki mo e ngaahi tūkunga ʻoku fehangahangai mo e faʻahinga kotoa ʻo e tangatá koeʻuhí ko e Hinga ʻa ʻĀtama mo ʻIví. Naʻá ne fakamoʻoni ko Sīsū Kalaisi pē mo Hono mālohi huhuʻí ʻe toki lava ai ʻe he faʻahinga ʻo e tangatá ʻo ikunaʻi ʻa e mate fakalaumālié mo fakatuʻasinó. ʻE lava ke tokoniʻi koe ʻe he lēsoni ko ʻení ke ke ongoʻi houngaʻia lahi ange ʻi he fatongia ʻo Sīsū Kalaisí ʻi hono tokoniʻi kitautolu ke tau ikunaʻi e angahalá mo e maté.
Tokoniʻi e kau akó ke nau ako ke falala kia Sīsū Kalaisi. Kuo pau ke ʻilo mo ongoʻi ʻe he kau akó ʻa e mālohi ʻe lava ke foaki ʻe he Fakamoʻuí koeʻuhí ko ʻEne Fakaleleí. Ko ia ai, ʻoku totonu ke tokoniʻi ʻe he kau faiakó ʻa e kau akó ke mahino kiate kinautolu ʻa e founga ke nau falala fakataautaha ai kia Sīsū Kalaisí. Te nau lava ʻo fai ʻeni ʻi heʻenau feinga ke fakatomalá, fekumi ki ha fakamolemolé, pea falala te Ne lava ʻo tokoniʻi kinautolu ʻi heʻenau moʻui fakaʻahó mo e ngaahi faingataʻá.
Teuteu ʻa e tokotaha akó: Fakakaukau ke fakaafeʻi e kau akó ke ako ʻa e 2 Nīfai 9:1–26. Te nau lava ʻo fakaʻilongaʻi ʻi ha founga ʻe taha ʻa e meʻa ʻe hoko kiate kitautolu ka ne taʻeʻoua ʻa e Fakalelei ʻa Sīsū Kalaisí, pea te nau lava ʻo fakaʻilongaʻi ʻi ha founga kehe ʻa e meʻa ʻe lava ke hoko kiate kitautolu koeʻuhí ko Sīsū Kalaisi mo ʻEne Fakaleleí.
Ngaahi ʻEkitivitī Ako ʻOku Ala Fakahokó
Ko ha tūkunga faingataʻa
ʻOku fakataumuʻa e talanoa ko ʻení ke tokoni ki hono teuteuʻi ʻo e kau akó ke ako fekauʻaki mo e fatongia ʻo e Fakamoʻuí ʻi hono fakahaofi kitautolu mei he angahalá mo e maté.
Fakalaulauloto ki haʻo tali ki he ngaahi tūkunga ko ʻení:
Naʻe tanumia ʻi he ʻaho 5 ʻo ʻAokosi 2010, ha kau keli malala Silei ʻe toko 33 ʻi he holo ʻa e maka ʻi loto he keliʻanga malalá. Naʻa nau nofo maʻu pē ʻi ha kiʻi feituʻu siʻisiʻi naʻe malu pea ʻi he luo keliʻanga ʻi laló, naʻe fute ʻe 2,300 (mita ʻe 700) hono loloto ki lalo fonuá.
Naʻe hangē kuo mole ʻa e ʻamanakí ʻi honau tūkungá. Naʻa nau mamaʻo mei ʻapi mo e fāmilí ʻaki ha meimei vaeua ʻe taha ʻo ha maile ʻo ha maka ʻi ʻolunga naʻe ʻikai faʻa ueʻi, pea naʻe siʻi ʻenau meʻakaí mo e vaí. Neongo naʻa nau maʻu ʻa e ʻū meʻangāué mo e ʻiló, ka koeʻuhí ko e holo ngofua ʻa e keliʻangá naʻe ʻikai ke nau lava ʻo fakahaofi ʻa kinautolu. Ko honau faingamālié pē taha, ke ʻiloʻi mo fakahaofi kinautolu. (Connie Goulding, “Ko e Feinga ke Fakahaofí,” Liahona, Sune 2015, 63)
-
Kapau naʻá ke ʻi he tūkunga ko ʻení, ko e hā ha ngaahi fakakaukau pe ongo naʻá ke mei maʻu?
-
Ko e hā ha ngaahi meʻa ʻoku fiemaʻu ke fakahaofi kitautolu mei ai ʻa ia he ʻikai ke tau lava ʻo ikunaʻi ʻiate kitautolu pē?
Koeʻuhí ko e Hinga ʻa ʻĀtama mo ʻIví, te tau aʻusia kotoa ʻa e mate fakatuʻasino mo fakalaumālié. ʻOku ʻuhinga ʻa e mate fakalaumālié ki he mavahe mei he ʻOtuá ʻa ia ʻoku tau aʻusia ko ha ola ʻo e angahalá.
Lau ʻa e 2 Nīfai 9:10, ʻo kumi e meʻa naʻe fakafehoanaki ʻe Sēkope ki ai ʻa e mate fakatuʻasinó mo fakalaumālié.
-
ʻOkú ke pehē ko e hā naʻe fakamatalaʻi ai ʻe Sēkope ʻa e maté (mate ʻa e sinó) mo heli (mate ʻa e laumālié ko e ola ʻo e angahala ʻoku teʻeki fakatomalaʻí), ko ha “fuʻu meʻa fakamanavaheé”?
Fakakaukau pe naʻe mei fēfē ʻa e moʻuí kapau naʻe ʻikai fakahaofi kitautolu mei he mate fakatuʻasinó mo fakalaumālié. Fakakaukau ki he founga te ke lava ai ʻo fetuʻutaki ki ha taha ʻa ʻetau fuʻu fiemaʻu vivili ha Huhuʻi ke fakahaofi kitautolu mei he mate fakatuʻasinó mo fakalaumālié. ʻI he hokohoko atu hoʻo akó, fakalaulauloto ki he ongo ʻokú ke maʻu kia Sīsū Kalaisí, ʻa ia ʻokú Ne tokoniʻi kitautolu ke tau ikunaʻi e ngaahi tūkunga ko ʻení ʻo fakafou ʻi Heʻene Fakaleleí.
Ko e akonaki ʻa Sēkope kau ki he fatongia ʻo e Fakamoʻuí ʻi hono fakahaofi kitautolu mei he angahalá mo e maté
Fakakaukau pe ʻe lelei taha ke ako ʻe he kau akó e ngaahi veesi ko ʻení pea fakakakato ʻa e sātí fakakalasi, fakakulupu, pe fakafoʻituitui. ʻE ala tokoni ke fakaʻaongaʻi fakataha e ngaahi founga ko ʻení. ʻE ala tokoni foki ke ke fakakakato hoʻo sātí kimuʻa pea kamata e kalasí kae lava ke ke mateuteu ke fai ha tokoni mo ha ngaahi fakakaukau ki he kau akó ʻi heʻenau akó.
Tā ha saati mo e ngaahi kaveinga ko ʻení ʻi hoʻo tohinoa akó. Ako e ngaahi veesi ʻoku hiki fakataha mo e kōlomu takitaha pea lekooti hoʻo ngaahi fakakaukaú ʻi hoʻo sātí. Hokohoko atu hono tānaki ha ngaahi fakakaukau ki hoʻo sātí lolotonga e lēsoní.
|
Kapau naʻe ʻikai ha Fakamoʻui … (2 Nīfai 9:7–9) |
Koeʻuhí ʻoku ʻi ai ha Fakamoʻui … (2 Nīfai 9:10–13) |
|---|---|
Fakakaukau ke tānaki atu hoʻo ngaahi fakakaukau kehé ki hoʻo sātí.
Why We Need a Savior
What would life be like without a Savior? There would be no joy, no forgiveness, no hope for the future. This Christmas, learn more about the hope, peace and happiness our Savior Jesus Christ can bring into our lives at christmas.mormon.org.
Hili hano maʻu ʻe he kau akó ha taimi feʻunga ke nau ako aí, fakahoko ha fealeaʻaki fekauʻaki mo e meʻa naʻa nau akó. Fakakaukau ke fai ha ngaahi fehuʻi hangē ko ʻení ko ha konga ʻo hoʻomou fealēleaʻakí:
-
Ko e hā ha ngaahi fakakaukau pe ongo naʻá ke maʻu fekauʻaki mo Sīsū Kalaisi ʻi hoʻo ako e ngaahi veesi ko ʻení?
-
Ko e hā ha meʻa naʻá ke ako fekauʻaki mo e meʻa ʻe ala hoko kiate kitautolu kapau naʻe ʻikai ha Fakamoʻui?
-
Ko e hā naʻá ke ako fekauʻaki mo e meʻa naʻe fakafaingamālieʻi ʻe he Fakamoʻuí koeʻuhí ko ʻEne Fakaleleí?
Ko ha foʻi moʻoni ʻe taha ʻokú ne fakamatalaʻi fakanounou e ngaahi akonaki ʻa Sēkope ʻi he ngaahi veesi kuó ke akó, ʻoku tokoniʻi kitautolu ʻe Sīsū Kalaisi ʻo fakafou ʻi Heʻene Fakaleleí, ke tau ikunaʻi ʻa e angahalá mo e maté.
-
ʻE liliu fēfē nai hoʻo moʻuí ʻi hono maʻu ha mahino ki he foʻi moʻoni ko ʻení?
Fakakaukau ke ke vahevahe ha sīpinga fakataautaha kimuʻa pea fakaafeʻi e kau akó ke vahevahe ʻenau tali ki he fehuʻi ko ʻení.
ʻE ala ʻaonga foki ke huluʻi ha taha ʻo e ngaahi vitiō ʻi he “Fakamatala Fakamahinó mo e Puipuituʻá” ʻi he ʻuluʻi tohi “ʻE liliu fēfē ʻetau moʻuí ʻe he ʻilo ki hono ikunaʻi ʻe Sīsū Kalaisi ʻa e angahalá mo e maté?”
-
Ko e fē ha taimi naʻe mahuʻingamālie taha ai kiate koe ʻa e ʻilo ki hono ikunaʻi ʻe Sīsū Kalaisi ʻa e angahalá mo e maté?
Ko e fili ke tali ʻa e fakahaofí
Fakamanatu e talanoa ʻo e kau keli malala Sileí mei he konga kimuʻa ʻo e lēsoní. ʻI hoʻo ako fekauʻaki mo e toenga ʻo honau talanoá, fakakaukau ki he ngaahi meʻa ʻoku faitatau ai ʻenau aʻusiá mo hotau fakahaofi mei he mate fakatuʻasinó mo fakalaumālié.
Fakakaukau ke fakaʻaliʻali ange ʻa e palakalafi ko ʻení, pea fakaafeʻi ha tokotaha ako ke ne lau leʻolahi ia.
Naʻe lahi hake he uike ʻe uá ʻa e nofo ʻa e kau keli malalaá ʻi lalo fonuá pea toki maʻu ʻe he kau faifakahaofí ha founga ke fakaaʻu ai kiate kinautolu ha meʻakai, vai, mo ha ʻū naunau. Hili ha meimei māhina ʻe ua mei ai, naʻe faifai pea lava ʻe he kau faifakahaofi moʻuí ʻo fakaava ha fakamanava lahi feʻunga ke tukutuku hifo ai ha kiʻi meʻa fuopotopoto te ne lava ʻo fakahaofi taha taha hake ʻaki ʻa e kau keli malalá. Naʻe hū tautau toko taha ʻa e kau keli malalá ki he meʻa fuopotopotó peá ne falala ki he palaní pea mo e kau faifakahaofí ke fakahaofi ia. Hili ha ʻaho fakakātoa ʻe 69 ʻo e tanumia ʻa e kau keli malalá, naʻe fakahaofi kotoa kinautolu (vakai, Connie Goulding, “Ko e Feinga ke Fakahaofí,” Liahona, Sune 2015, 63–65).
-
Ko e hā ha ngaahi faitatau ʻokú ke sio ki ai ʻi he talanoa ko ʻení pea mo hono fakahaofi kitautolu ʻe he Fakamoʻuí mei he angahalá mo e maté?
-
Ko e hā haʻo fakakaukau kapau naʻe taʻeloto ha taha ʻo e kau keli malala naʻe nofo ʻi lalo fonuá ke heka ki he meʻa fuopotopotó? Ko e hā hono ʻuhingá?
Neongo ko e fakahaofi mei he mate fakaesinó ko ha meʻaʻofa ia ʻoku foaki ʻe he Fakamoʻuí ki he faʻahinga kotoa pē ʻo e tangatá, ka ko hotau fakahaofi mei he mate fakalaumālié ʻoku makatuʻunga ia ʻi hotau ngaahi lotó mo e angafaí.
Fakakaukau ke tautau toko ua pe fakakulupu iiki e kau akó ke lau e ngaahi veesi ko ʻení mo aleaʻi e ngaahi fehuʻi ʻoku fekauʻaki mo iá.
Lau ʻa e 2 Nīfai 9:21–24 ʻo kumi e ngaahi fili kuo pau ke tau fai kae lava ke fakahaofi kitautolu ʻe he Fakamoʻuí mei he mate fakalaumālié. Fakakaukau ke lekooti ha toe ngaahi fakakaukau ʻokú ke maʻu fekauʻaki mo e Fakamoʻuí ʻi he kōlomu hono ua ʻo hoʻo sātí.
-
Ko e hā naʻá ke ako fekauʻaki mo e meʻa kuo pau ke tau fai maʻá e Fakamoʻuí ke fakahaofi ai kitautolu mei he mate fakalaumālié?
-
ʻOkú ke pehē ko e hā ʻoku “ʻikai lava ʻo fakamoʻui [ai kitautolu] ʻi he puleʻanga ʻo e ʻOtuá” kapau he ʻikai ke tau fai e ngaahi meʻa ko ʻení?
Fakakaukau ʻi ha ngaahi mōmeniti siʻi ki he meʻa naʻá ke ako he ʻahó ni fekauʻaki mo Sīsū Kalaisi pea mo e meʻa kuó Ne fai maʻaú. Mahalo te ke fie hiki ha faʻahinga fakakaukau pe ongo ʻokú ke maʻu pe fakakau ai hoʻo houngaʻia ʻi hotau Fakamoʻui ʻofá.
Fakaʻosi e lēsoní ʻaki hano vahevahe hoʻo fakamoʻoni kia Sīsū Kalaisi mo ʻEne Fakaleleí. Poupouʻi e kau akó ke fekumi ki he ngaahi tāpuaki ko Sīsū Kalaisi pē te Ne lava ʻo foakí ʻaki ʻenau feinga ke muimui kiate Ia ʻi he toenga ʻo ʻenau moʻuí.