2 Nifae 21–24

O Le Meleniuma

Vaai faalemafaufau pe faape’ī le olaga pe ana faapea e leai se amioleaga i le lalolagi. E i ai se aso o le a faapea ai le lalolagi. O le a tupu i le taimi o le nofotupu o Iesu Keriso i le meleniuma. E toatele perofeta, e aofia ai Nifae ma Isaia, na vavalo e uiga i le 1,000 tausaga o le filemu e ta’ua o le Meleniuma. O lenei lesona e mafai ona fesoasoani ia te oe e malamalama ma saunia ai mo le nofotupu o le Faaola i le meleniuma.

O le taulai atu ai i le Tama Faalelagi ma Iesu Keriso. Pe a filifili po o a upumoni po o mataupu faavae e fesoasoani ai i tagata aoga ia iloa, vaavaai mo mea o le a fesoasoani ia i latou e o mai ai ia Iesu Keriso. E mafai ona fesoasoani le Agaga Paia ia te oe atoa ma ē aoao ia iloa upumoni e uiga i le Faaola ma Lona mana togiola i mataupu faavae, poloaiga, ma aoaoga faaperofeta taitasi.

Sauniuniga a le tagata aoga: Valaaulia tagata aoga e manatunatu i mea ua latou iloa e uiga i le Meleniuma ma o mai saunia e fai ni a latou fesili atonu o i ai e uiga i ai.

Gaoioiga e Ono Mafai Ona Aoao Ai

O le lumanai

E mafai e tagata aoga ona tusi a latou tali i fesili nei i luga o le laupapa pe talanoaina i ni vaega toalaiti.

• O a nisi o mea taua e tutupu i le lumanai e te tulimatai atu i ai? Aisea?

• O a ni ou lagona pe a e mafaufau e uiga i nei mea e tutupu?

• O le a se mea o e faia e saunia ai?

O Le Meleniuma

O se tasi o mea taua e tupu i le lumanai o le Meleniuma.

Faalogo ma le totoa i auala e tali ai tagata aoga i fesili nei. Mafaufau e lisi i luga o le laupapa ia fesili a tagata aoga. Nai lo le tali sao atu ia i latou, faamalosiau i tagata aoga e saili tali a o latou suesue.

Fetuunai le lesona e tusa ai ma tali latou te tuuina mai. Mo se faataitaiga, afai e toatele tagata aoga e tutusa a latou fesili, e mafai ona outou sueina le tali o se vasega. O tagata aoga e i ai ni fesili talitutusa e mafai ona tuu i ni vaega e sue faatasi ai tali.

• O le a se mea ua e iloa e uiga i le Meleniuma? O a ni au fesili e uiga i ai?

Na tusi le perofeta o Nifae e uiga i aso e gata ai ma faaaofia ai le tele o valoaga a Isaia e uiga i aso e gata ai. Na valoia e Isaia le faatafunaga o Asuria ma Papelonia o se faatusa o le faatafunaga i le Afio Mai Faalua (tagai 2 Nifae 20; 23). Sa ia valoiaina foi le Toefuataiina o le talalelei e faatomua ai le nofotupu o Iesu Keriso i le meleniuma. O ana valoaga e tumu i faatusa ma ata faatusatusa e faaopoopoina ai le loloto i lo tatou malamalama e uiga i le Meleniuma.

Faitau valoaga nei mai ia Nifae ma Isaia ma vaavaai mo faamatalaga o le Meleniuma.

Mafaufau e tuu faataamilo i le potu ni pepa o i ai mau faasino nei ma valaaulia tagata aoga e savavali solo ma faitau ia fuaitau eseese. O se isi filifiliga o le valaaulia lea o tagata aoga e tusi ni ata i se api faamaumau mo suesuega po o luga o le laupapa ia nisi o mea o loo faamatalaina i nei fuaiupu.

A manaomia, fesoasoani i tagata aoga ia malamalama i mau. Mo se faataitaiga, e mafai ona e faailoa atu o manuvaefa e nonofo faatasi e aunoa ma le fetaua’i e faatusa i tulaga o le filemu (tagai 2 Nifae 21:6–7) pe o vai e ufitia ai le sami e faatusa i le malamalama o le Alii e ufitia ai le lalolagi (tagai 2 Nifae 21:9).

• 1 Nifae 22:24–26

• 2 Nifae 21:6–9

• 2 Nifae 22:1–6

• 2 Nifae 24:3, 7

• Mai nei faamatalaga, o le a sou manatu, o le a ese faapefea lou olaga i le Meleniuma?

• O a ni faamatalaga e uiga i le Faaola na e mauaina? O a ni mea ua latou aoao mai ia te oe e uiga ia te Ia?

O se tasi o upumoni ua tatou aoao mai nei mau e faapea, o le a nofotupu Iesu Keriso i le lalolagi i le amiotonu ma le filemu i le taimi o le Meleniuma.

Vaai faalemafaufau pe faape’ī le ola ai i le taimi o le Meleniuma—pe a nofotupu le Faaola i le amiotonu ma le filemu. Manatunatu pe mafai faapefea e le filemu o le Faaola ona faamanuiaina lou olaga.

Na faamatala e Peresitene Dallin H. Oaks o le Au Peresitene Sili se isi faamanuiaga o le Meleniuma:

O le nofofua, lē fanau, maliu, ma le tete’a ua le taulau ai faamoemoega ma tolopo ai le faataunuuina o faamanuiaga folafolaina. … Ua folafola mai e le Alii e faapea i le faavavau, e leai se faamanuiaga o le a faafitia mai i ona atalii ma afafine o ē tausia poloaiga, faamaoni i a latou feagaiga, ma naunau i mea e tonu.

O le tele o mea faoesea e sili ona taua o le olaga faaletino o le a faatulaga tonu i le Meleniuma, o le taimi lea mo le faataunuuina o mea uma e le atoatoa i le fuafuaga sili o le fiafia mo fanau agavaa uma a lo tatou Tama. Tatou te iloa o le a moni lena mea i sauniga o le malumalu. Ou te talitonu o le a moni foi i sootaga faaleaiga ma aafiaga. (Peresitene Dallin H. Oaks, “The Great Plan of Happiness,” Ensign, Nov. 1993, 75)

• O le a le mea ua aoao mai e lenei faamatalaga ia te oe e uiga i le Tama Faalelagi ma Iesu Keriso?

• O le fea o faamanuiaga o le Meleniuma e sili ona e manao i ai? Aisea?

• I le taimi o le lesona, o a tali na e maua i au fesili e uiga i le Meleniuma?

Afai o loo saili pea tagata aoga mo tali i a latou fesili, faasino atu i latou i le mea e mafai ona latou maua ai se tali. O nisi nei o fuaitau e mafai ona fesoasoani: Mataupu Faavae ma Feagaiga 29:11; 88:110; 101:26–34; Mataupu Faavae o le Faatuatua 1:10. Tagai foi i le “Meleniuma” i le Taiala i Tusitusiga Paia po o Autu o le Talalelei.

Sauniuniga mo le Meleniuma

I le 2020, na amata ai faafouga i le Malumalu o Sate Leki. Na saunoa mai Elder Gary E. Stevenson o le Korama a Aposetolo e Toasefululua e uiga i nei faafouga. Vaavaai pe na faapefea ona ia faatusatusaina i latou [faafouga] i o tatou lava olaga. Matamata le vitio “O Se Faavae Lelei mo Aso Atalī,” o loo maua i le ChurchofJesusChrist.org, mai le faailotaimi 14:51 i le 15:26, pe faitau le faamatalaga o loo i lalo.

O le faamoemoega faamaoni o taitai o le Ekalesia ia saofaga ia faafouga maoae o le Malumalu o Sate Leki i le faataunuuga o le manao o Polika Iaga ia vaai “i le malumalu o fauina i se faiga o le a tumau ai e oo i le meleniuma.” I tausaga a oo mai, sei o tatou avea nei faaleleiga ua faia i le Malumalu o Sate Leki e uunaia ma musuia ai i tatou, o ni tagata taitoatasi ma aiga, ina ia faapena foi i tatou—i se faatusatusaga—ina “ia fauina i se auala o le a tumau ai e oo i le meleniuma.” (Gary E. Stevenson, “O Se Faavae Lelei mo Aso Atalī,” Liahona, Me 2020, 51–52)

• O le a sou manatu i le uiga o le “ia fauina i se auala o le a tumau ai e oo i le meleniuma”?

Mafaufau e toe faasino atu i mea e tutupu i le lumanai o loo tulimatai atu i ai tagata aoga ma talanoaina mea o loo latou faia e saunia ai mo ia mea . Ona talanoaina lea o auala e saunia ai mo le Meleniuma.

E ono aoga mo tagata aoga le tali o fesili nei i a latou api faamaumau mo suesuega.

• Pe a e mafaufau i le nofotupu o le Faaola i le meleniuma, o le a sou lagona?

• O le a se mea e mafai ona e faia i le taimi nei e saunia ai mo le Meleniuma?

• O a ni luitau e ono feagai ma oe a o e faia nei sauniuniga?

Manatu ma Talaaga o Faamatalaga

Mata o le a na o tagata O Le Ekalesia a Iesu Keriso o le Au Paia o Aso e Gata Ai o le a i ai i le lalolagi i le taimi o le Meleniuma?

Na aoao mai Peresitene Iosefa Filitia Samita (1878-1972):

O nisi tagata o le Ekalesia e i ai se manatu sese faapea a oo mai le meleniuma o le a tafiesea tagata uma mai le lalolagi vagana ai tagata amiotonu o le Ekalesia. E le o le tulaga lena. O le a i ai le faitau miliona o tagata … o ituaiga uma, ma talitonuga uma, e faatagaina pea e nonofo i luga o le fogaeleele, ae o i latou ia o e sa ola i ni olaga mama, o i latou o e ua saoloto mai le amioleaga ma le piopio. …

Peitai, mulimuli ane, o le malamalama o le Alii o le a ufitia ai le lalolagie faapei ona ufitia e vai le sami. Ae o le a manaomia le talaiina o le talalelei, pe a uma ona aumaia o le meleniuma, seia oo ina liua pe mavae atu tagata uma. (Iosefa Filitia Samita, Doctrines of Salvation, 1:86–87)

O le tusiga “Who Will Be on the Earth during the Millennium, and What Will They Be Doing?” (New Era, Iuni 2014, 41) e mafai ona fesoasoani e tali isi au fesili e uiga i le Meleniuma.

O le a faape’ī le olaga i le Meleniuma?

Na aoao mai Peresitene Polika Iaga (1801–1877):

O le Meleniuma o loo aofia ai i lenei— loto o tagata uma i le Ekalesia ma le Malo o le Atua ua faatasia; o le Malo ua faateleina i le faatoilaloina o mea uma e faatautee atu i lepuleaga o le lagi, ma ua fusifusia Satani, ma ua faamaufaailogaina o ia. O isi mea uma o le a i ai e pei ona i ai nei, tatou te aai, feinu, ma fai o tatou lavalava. …

I le Meleniuma, pe a faavaeina le Malo o le Atua i le lalolagi i le mana, mamalu ma le atoatoa, ma o le afaatoilaloinale puleaga a le amioleaga lea ua leva ona i ai, o le a maua ai e le Au Paia a le Atua le avanoa e fausia ai o latou malumalu, ma o lo latou ulu atu i ai i totonu o le a avea lea e pei o poutu i malumalu o le Atua [tagai Faaaliga 3:12], ma o le a latou faia ai tiute faaositaulaga mo o latou aiga ua maliliu. Ona tatou vaaia ai lea o a tatou uo ua latalata mai, ma atonu o nisi sa tatou masani ai iinei. … Ma o le a tatou mauaina faaaliga ina ia tatou iloa ai ma le manino o tatou augatuaa e tau atu lava i le Tama o Atamu ma le Tina o Eva, ma o le a tatou ulu atu i totonu o malumalu o le Atua e faia galuega mo i latou. Ona faamauina ai lea o [fanau] i [matua] seia oo lava ina fesootai aiga ma ua atoatoa e tau atu lava ia Atamu, ina ia i ai se sootaga atoatoa o le Perisitua mai lava ia Atamu e oo atu i iuga o le lalolagi.

O le galuega lenei a le Au Paia o Aso e Gata Ai o le a fai i le Meleniuma. (Aoaoga a Peresitene o le Ekalesia: Polika Iaga [2007], 333–4.)

Mata o le a i ai pea Le Ekalesia a Iesu Keriso o le Au Paia o Aso e Gata Ai i le Meleniuma?

Na folafola mai e Peresitene Russell M. Nelson:

O le a le aveesea ai lava le Ekalesia mai lona tulaga, e oo lava i le Meleniuma. (Russell M. Nelson, “Le Faavae Malosi,” Liahona, Me 2002, 76)

1 Nifae 22:26. E mafai faapefea ona leai se mana o Satani?

Na aoao mai Peresitene Spencer W. Kimball (1895–1985):

Pe a noatia Satani i se aiga e tasi—pe a noatia Satani i se olaga e tasi—ua amata le Meleniuma i lena aiga, i lena olaga. (Aoaoga a Spencer W. Kimball, ed. Edward L. Kimball [1982], 172)

Gaoioiga Faaopoopo e Aoao Ai

2 Nifae 21. O le asiasiga a Moronae ia Iosefa Samita

Faaali atu se ata o le asiasiga a Moronae ia Iosefa Samita. Faamalamalama atu e faapea ina ua faaali atu Moronae ia Iosefa Samita i le aso 21 o Setema, 1823, sa ia sii maia le Isaia 11, o le 2 Nifae 21 foi lea (tagai Talafaasolopito o Iosefa Samita 1:40). Valaaulia tagata aoga e suesue le 2 Nifae 21 ma vaavaai mo valoaga atonu na anoa ia Iosefa Samita ma fesoasoani e saunia o ia mo lana misiona faaperofeta.

2 Nifae 21. O le tatupu, le pogai, ma le a’a

O lenei gaoioiga e mafai ona fesoasoani i tagata aoga e iloa ai pe faapefea ona faaaoga tusitusiga paia e malamalama ai i tusitusiga paia. Valaaulia tagata aoga e suesue le 2 Nifae 21:1–5, 10 ma sue le tatupu, le pogai, ma le a’a. Ona valaaulia lea o tagata aoga e suesue le Mataupu Faavae ma Feagaiga 113:1–6, ma vaavaai mo le faauigaga o nei faatusa.

2 Nifae 21:10–12. O se tagavai mo atunuu

Mafaufau e aumai se fu’a i le vasega ma talanoaina pe mafai faapefea e se fu’a ona faailo le mea e faapotopoto ai. Faamalamalama atu o se tagavai o se fu’a.

Faitau le 2 Nifae 21:10–12, ma vaavaai mo mea o le a faia e le Alii e ala mai ia Iosefa Samita ma le talalelei toefuataiina.

Talanoaina pe faapefea ona pei le talalelei toefuataiina o se tagavai. Mafaufau i auala e mafai ona tatou valaaulia ai tagata e o mai ia Keriso e ala i Lana talalelei toefuataiina.

2 Nifae 22:2. Faatuatuaina o Iesu Keriso

Valaaulia tagata aoga e faasoa mai po o a ni uunaiga ua latou maua mai lenei fuaiupu. Fai atu ni fesili tulitatao eseese e fesoasoani ai i tagata aoga e faasoa mai o latou lagona e uiga i le Faaola. Mo se faataitaiga: E mafai faapefea ona avea Iesu Keriso ma se punavai o le malosi mo se talavou? O a ni auala e mafai ona tatou faaali atu ai lo tatou faatuatuaina o Iesu Keriso? E mafai faapefea e le faatuatuaina o Iesu Keriso ona fesoasoani tatou te faatoilalo ai le fefe?