2 Nifae 20–25

Vaaiga Aoao

E toatele perofeta, e aofia ai Nifae ma Isaia, na vavalo e uiga i le 1,000 tausaga o le filemu e ta’ua o le Meleniuma—o le nofotupu o Iesu Keriso i le meleniuma. Ina ua uma ona faamamafa atu le taua o aoaoga faaperofeta, sa molimau atu Nifae e na o Iesu Keriso lava e i ai le mana e faasaoina ai tagata uma. I le 2 Nifae 26, sa ia aoao atu ai e uiga i le vaaiga loloto a le Atua, ma faamalamalama atu “ua tutusa tagata uma i le Atua” (fuaiupu 33).

Saunia e Aoao Atu

O nei faamatalaga e tuuina atu ai i faiaoga ni manatu o mea atonu e manaomia ona muai saunia mo lesona taitasi.

2 Nifae 21–24

Faamoemoega o le lesona: O lenei lesona e mafai ona fesoasoani i tagata aoga ia malamalama ma saunia ai mo le nofotupu o le Faaola i le meleniuma.

Sauniuniga a le tagata aoga: Valaaulia tagata aoga e manatunatu i mea ua latou iloa e uiga i le Meleniuma ma o mai saunia e fai ni a latou fesili atonu o i ai e uiga i ai.
Anotusi e faaali atu: O se ata o le faafouga o le Malumalu o Sate Leki; O le lisi o mau o loo faaalia i luga o le laupapa po o luga o pepa ua faapipii faataamilo i le potu
Fautuaga faafaiaoga o fesootaiga faavitio: E mafai e tagata aoga ona faaaoga le vaega o talanoaga e auina mai ai a latou fesili e uiga i le Meleniuma. E mafai foi ona vaevaeina i latou i ni vaega e tusa ai ma a latou fesili o i ai ma taapeape atu i potu e saili ai tali.

2 Nifae 25

Faamoemoega o le lesona: O lenei lesona o le a fesoasoani i tagata aoga ia malamalama ai i le ala e faasaoina ai i latou e ala i le alofa tunoa o Iesu Keriso.

Sauniuniga a le tagata aoga: Mafaufau e valaaulia tagata aoga e o mai saunia i le vasega e talanoa e uiga i se savali e uiga ia Iesu Keriso na aafia ai i latou.
Vitio: “Where Justice, Love, and Mercy Meet” (5:36)
Fautuaga faafaiaoga faavitio: Mafaufau e faaaoga se laupapa paepae po o se vaega faapena pe a valaaulia tagata aoga e faasoa mai ni fesili e uiga i le 2 Nifae 25:23. Atonu e te manao e pue se ata o le laupapa paepae ua uma ona faatumuina ma auina atu i tagata aoga e tagai i ai a o latou saili mo ni tali.

Iloilo Lou Aoaoina 2

Faamoemoega o le lesona: O lenei lesona ua faamoemoe e fesoasoani i tagata aoga e iloilo le tuputupu ae ua latou oo i ai i le taimi o a latou suesuega o le Tusi a Mamona.

Sauniuniga a le tagata aoga: Valaaulia tagata aoga e toe faamanatu nisi o mea na latou aoaoina i le 1 Nifae 16 e oo i le 2 Nifae 25 ma o mai saunia e faasoa mai mau e fiafia i ai po o upumoni taua.
Aitema: O se fā’ata
Fautuaga faafaiaoga faavitio: Pe a faamatala e tagata aoga e uiga i le Pau o Atamu ma Eva, mafaufau e fai se tala faatino lea e avea ai oe o se tagata sailiili ma ni tagata aoga se toalua e faatino matafaioi a faifeautalai o loo aoao atu. I le avea ai ma tagata sailiili, fai ni fesili e mafai ona faatagaina ai i laua e faamalamalama atili la laua autu.

2 Nifae 26

Faamoemoega o le lesona: O lenei lesona ua faamoemoe ia fesoasoani i tagata aoga ia vaai, alofa, ma taulima isi e pei ona faia e le Atua.

Sauniuniga a le tagata aoga: Valaaulia tagata aoga e fesili i o latou matua po o se uo faatuatuaina pe faapefea ona latou taumafai e vaai atu i isi e pei ona faia e le Faaola.
Anotusi e faaali atu: Ituaiga o matatioata eseese (po o ata o matatioata)
Fautuaga faafaiaoga faavitio: A suesue e tagata aoga le 2 Nifae 26:12–13, 23–33, mafaufau e faataga i latou e galulue taitoatasi mo se taimi puupuu. Ona toe aumai faatasi lea o i latou ma valaaulia i latou e lipoti mai mea na latou mauaina i ni paga po o ni vaega toalaiti. O fesili faaopoopo tulitatao o loo fautuaina atu i le lesona e mafai ona faaali atu ia mafai ai e tagata aoga ona filifili po o le fea e tali atu i ai.

Atamai i Aoaoga Faavae: 2 Nifae 26:33

Faamoemoega o le lesona: O lenei lesona o le a fesoasoani i tagata aoga e tauloto le mau faasino o le atamai i aoaoga faavae ma le fasifuaitau autu o mau mo le 2 Nifae 26:33, faamatala le aoaoga faavae, ma faaaoga mataupu faavae o le mauaina o le malamalama faaleagaga i tulaga masani o le olaga.

Sauniuniga a le tagata aoga: Valaaulia tagata aoga e tauloto le mau faasino ma le fuaitau autu o le mau: 2 Nifae 26:33, “Ua tutusa tagata uma i le Atua.” O se tasi auala e faia ai lenei mea o le faaaoga lea o le polokalama o le Atamai i Aoaoga Faavae.
Pepa e tufa atu: “Tala a George Rickford”