Iloilo Lou Aoaoina 2

1 Nifae 16–2 Nifae 25

O lenei lesona ua faamoemoe e fesoasoani ia te oe e iloilo ai le tuputupu ae ua e oo i ai i le taimi o au suesuega o le Tusi a Mamona.

Faamanatuina atu i tagata aoga o a latou sini patino: I le avea ai o se vaega o le polokalama a Tamaiti ma le Autalavou, atonu na fatuina e tagata aoga ni sini faaleagaga, faaleagafesootai, faaletino, ma faaleatamai e fesoasoani ai ia i latou ia avea atili e faapei o le Faaola. Valaaulia e le aunoa tagata aoga e manatunatu pe mafai faapefea e upumoni o loo latou aoaoina i le seminare ona fesoasoani e ausia ai a latou sini.

Sauniuniga a le tagata aoga: Valaaulia tagata aoga e toe faamanatu nisi o mea na latou aoaoina i le 1 Nifae 16 e oo i le 2 Nifae 25 ma o mai saunia e faasoa mai mau e fiafia i ai po o upumoni taua.

Gaoioiga e Ono Mafai Ona Aoao Ai

Manatunatu i le aoaoina o le talalelei

Ua faamoemoe lenei lesona e fesoasoani i tagata aoga e iloilo (1) sini na latou faatuina, (2) lo latou gafatia e faamatala ai aoaoga i le Tusi a Mamona, po o le (3) auala o loo ua suia ai o latou uiga, naunautaiga, ma le gafatia e ola ai i le talalelei. O le suesuega a le vasega o le 1 Nifae 16 e oo i le 2 Nifae 25 atonu ua faamamafaina ai isi upumoni nai lo o upumoni i nei gaoioiga. Afai o lea, e mafai ona fetuunai gaoioiga e faaaofia ai na upumoni.

Ina ia fesoasoani i tagata aoga ia iloa le taua o le manatunatu i lo latou alualu i luma faaleagaga a o latou suesueina le Tusi a Mamona, aumai se fā’ata. Valaaulia tagata aoga e talanoaina pe mafai faapefea ona aoga le vaai atu ia i latou lava (vaaia o mea o i o latou tua, vaaia o o latou lava ata lafoia, ma isi mea). Ona valaaulia lea o i latou e mafaufau i le tāua o le manatunatu e uiga i ai ma le iloiloina o a latou suesuega o le talalelei ma a latou filifiliga. Mafaufau e fai atu fesili e pei o nei:

• O a ni itu e lelei ai le i ai o se fā’ata?

• E mafai faapefea e le vaai ia i tatou lava i se fā’ata ona talitutusa ma le mafaufau e uiga, faapea ai ma le iloiloina o lo tatou aoaoina o le talalelei?

Manatunatu i le alualu i luma faaleagaga

O lenei vaega o le lesona ua faamoemoe e fesoasoani i tagata aoga e toe manatunatu ai i o latou aafiaga i le sailia ma le faatinoina o faaaliga mai le Tama Faalelagi a o latou suesueina le Tusi a Mamona.

Manatunatu i uunaiga ma lagona mai le Agaga Paia atonu na e mauaina i le suesueina o le Tusi a Mamona. E tele auala atonu na fesootai mai ai le Agaga Paia ia te oe. Mo se faataitaiga, atonu na tosina atu lou mafaufau i ni fuaiupu patino ma e lagonaina ai se manao e faailogaina i latou. Atonu na i ai ni ou lagona o le filemu po o le alofa. Atonu na e faitauina ma lagonaina le musuia e faatino [se amioga] i se auala faapitoa pe na mauaina se tali i se fesili sa ia te oe.

Faaali atu fesili nei ina ia mafai e tagata aoga ona mafaufau loloto i ai i le vave latou te loto iai. Atonu e fesoasoani foi le valaaulia o tagata aoga e tusifaamaumau a latou tali i ni fesili se lua pe tolu i a latou api faamaumau mo suesuega.

• O a tala po o fuaitau mai le Tusi a Mamona ua fesoasoani ia te oe e iloa ai le ala e fesootai mai ai le Tama Faalelagi i Ana fanau?

• O a ni manatu po o ni lagona na e oo i ai i le seminare po o au suesuega patino i lenei tausaga?

• O le a se mea ua e faia e sailia ai faaaliga mai le Tama Faalelagi?

• O le a se mea e mafai ona e faia e sailia ai faaaliga ma saunia ai e iloa faaaliga pe a oo mai?

• Na faapefea ona e faatinoina uunaiga na e mauaina?

Valaaulia tagata aoga naunautai e faasoa mai nisi o a latou tali, pe a talafeagai ai, i le vasega. E mafai foi ona faasoa mai tagata aoga i ni paga po o ni vaega toalaiti.

Faamatala le Pau o Atamu ma Eva ma le Togiola a Iesu Keriso.

Mo le gaoioiga lenei, mafaufau e valaaulia tagata aoga e galulue ma se tasi o le vasega e tuuina atu ai i paga taitasi e filifili se tasi o autu faatusilima i le parakalafa e sosoo ai.

Vaai faalemafaufau o oe o se faifeautalai ma o loo oulua sauniuni ma lau soa e aoao atu se tasi e uiga i le Pau. Ua oulua filifili e tatau i se tasi o oulua ona aoao atu e uiga i le Pau ma ona aafiaga i tagata ae o le isi e tatau ona aoao atu e uiga i le auala e fesoasoani ai le Faaola ia i tatou e faatoilalo aafiaga o le Pau.

Faaaoga mau e fesoasoani ia te oulua e faamalamalama ai le autu na lua filifilia. E ono fesoasoani le toe faamanatu o le 2 Nifae 2:17–27; 9:6–12; 10:23–25, faamatalaga i lau api faamaumau mo suesuega, po o le “Pau o Atamu ma Eva” i Autu o le Talalelei (topics.ChurchofJesusChrist.org) e fesoasoani ai ia te oe e sauni e faasoa atu.

Valaaulia tagata aoga e faasoa mai mea na latou saunia ia latou paga po o le vasega atoa. Pe mafaufau e valaaulia tagata aoga e auina atu a latou faamalamalamaga i se tasi i o latou aiga, se uo, po o se taitai o le Ekalesia.

O o’u lagona e uiga ia Iesu Keriso

O lenei vaega o le lesona ua faamoemoe e tuuina atu i tagata aoga e manatunatu ai i o latou lagona e uiga ia Iesu Keriso.

Tuu atu i tagata aoga se taimi e faitau ma manatunatu ai e pei ona fautuaina mai i le parakalafa lenei. Atonu e te mafaufau e tata lemu ni viiga migao e uiga i le Faaola e pei o le “Ou Te Tu ma Ofo” (Viiga, nu. 193) po o le “O Le Alofa o le Faaola” (Viiga, nu. 113).

O loo molimau le Tusi a Mamonae uiga ia Iesu Keriso. Manatunatu i mea ua e aoaoina pe suesueina e uiga i le Faaola. Toe faamanatu mataupu ua e suesueina, e pei o le 1 Nifae 19, 2 Nifae 9, ma le 2 Nifae 25. E mafai foi ona e vaavaai mo fuaitau na e makaina. Atonu e aoga le toe faamanatu o mea na e tusia i lau api faamaumau mo suesuega, aemaise lava tusiga o loo i ai ou lagona e uiga ia te Ia.

• Tusi se solo po o se tusi i le Faaola e faailoa atu ai ou lagona ia te Ia. Mafaufau e faaaoga upu po o fasifuaitau mai tusitusiga paia po o le faasino atu o fuaitau o mau.

• Tuufaatasi se lisi o upu e faamatala ai ou lagona e uiga i le Faaola. Ia aofia ai nisi o faamatalaga mai tusitusiga paia. Fatu se ao o upu, pe tusi upu i luga o fasi pepa taitasi ma mafaufau e tautau i totonu o lou potu po o se isi nofoaga o le a e vaai soo i ai.

• Tusi se ata o se mea e fesoasoani ia te oe e faailoa atu ai ou lagona e uiga i le Faaola.

A lava le taimi, tuu atu i tagata aoga e faasoa mai mea na latou fatuina ina ia mafai ona latou faailoa mai a latou molimau e uiga i le Faaola. Mafaufau foi e valaaulia tagata aoga e faasoa atu a latou fatufatuga i o latou aiga po o isi. E mafai foi ona e faasoa atu lau molimau i lou talisapaia o le Faaola.