Iloiloga 4 o le Atamai i Aoaoga Faavae

Faaaoga Fuaitau o Mau o le Atamai i Aoaoga Faavae

Tatou te faaaogaina tusitusiga paia i o tatou olaga e ala i le faaaogaina o aoaoga faavae ma mataupu faavae o loo i ai e fesoasoani ai ia i tatou ia avea atili e faapei o le Tama Faalelagi ma Iesu Keriso. O lenei lesona ua faamoemoe e fesoasoani ia te oe e faaaoga le aoaoga faavae ua aoaoina i fuaitau eseese o le atamai i aoaoga faavae o le Tusi a Mamona.

Uunaia o tagata aoga e faataitai le ola ai i le talalelei. Pe a oo ina faaaoga e tagata aoga le talalelei i o latou olaga i lea aso ma lea aso, o le a ono sili atu ona faatumauina ma loloto lo latou tuputupu ae faaleagaga. Faasoa atu ni faataitaiga o le auala na e faaaogaina ai upumoni o le talalelei ma faamanuiaga na maua mai ai. Valaaulia e le aunoa tagata aoga e faaaoga upumoni i o latou lava olaga.

Sauniuniga a le tagata aoga: Valaaulia tagata aoga e sauni e faasoa mai se fuaitau o le mau e sili ona fiafia i ai ma tau mai pe aisea ua avea ai o se tasi o mau e sili ona latou fiafia i ai. E mafai ona e fai atu ia i latou e faaaofia ai pe faapefea ona faaaogaina i o latou olaga. Atonu e fesoasoani le fai atu i ni nai tagata aoga e o mai saunia e faasoa mai.

Gaoioiga e Ono Mafai Ona Aoao Ai

E ono manaomia ona aoaoina se lesona o le fuaitau o le atamai i aoaoga faavae e suitulaga i le lesona lenei. Tagai i le faasologa o le aluga [o lesona] ua saunia e le faatonu po o le taitai faamaopoopo o la outou eria po o le risone ina ia mautinoa o lesona taitasi o fuaitau o le atamai i aoaoga faavae o le a aoaoina a o faia vasega seminare.

E i ai se eseesega e faia ai?

Mafaufau e amata le vasega i le faasoa atu o se tasi o fuaitau o mau e sili ona e fiafia i ai. Ona fai atu lea o fesili nei i tagata aoga:

• E i ai se fuaitau o se mau e sili ona e fiafia i ai? Aisea na avea ai ma se mau e sili ona fiafia i ai?

E masani lava, o fuaitau e sili ona taua ia i tatou o fuaitau ia tatou te faaaogaina i o tatou lava olaga. Mo se faataitaiga, e mafai ona latou taliina se fesili faigata, aumaia ia i tatou le toafilemu i se taimi luitauina, pe fesoasoani e fausia a tatou molimau.

Faitau le saunoaga lenei mai ia Peresitene Russell M. Nelson pe matamata i le “Peresitene Nelson—Ua Aoao i Tatou e Tusitusiga Paia e uiga ia Iesu Keriso” (0:59), o loo maua i le ChurchofJesusChrist.org.

E mafai ona tatou ō i tusitusiga paia. Latou te aoao mai i tatou e uiga ia Iesu Keriso ma Lana talalelei, le silisili ese o Lana Togiola, ma le fuafuaga sili o le fiafia ma le togiolaina a lo tatou Tama. O le faatofuina i aso taitasi i le afioga a le Atua e taua tele mo le ola faaleagaga, aemaise lava i nei aso o le faatupulaia o suiga faigata. Pe a tatou taumamafa i afioga a Keriso i aso taitasi, o le a ta’u mai e afioga a Keriso ia i tatou le auala e tali atu ai i faigata tatou te le’i mafaufauina o le a tatou fetaia’i. (Peresitene Russell M. Nelson, “Faalogo ia te Ia,” Liahona, Me 2020, 89)

• O le a se mea e tulaga ese ia te oe mai le saunoaga a Peresitene Nelson?

O mau faasino o le atamai i aoaoga faavae ma fasifuaitau autu o mau o le Tusi a Mamona.

O le faaaogaina o mau o lona uiga ua tatou faailoaina fuaitau o mau e fetaui ma o tatou manaoga, ona faatino lea o mea o loo aoao mai e na fuaitau ia i tatou. Ina ia fesoasoani e te malamalama i lenei faagasologa, faitau tulaga faataitai nei:

Nai lo le faaaogaina o tulaga faataitai nei, mafaufau e tuu tagata aoga i ni vaega toalaiti. Fai atu ia i latou e tusi i se fasipepa ni faafitauli se lua pe tolu po o ni luitau e taatele i le autalavou. Ona valaaulia lea o tagata aoga e fesuiai a latou pepa ma se isi vaega.

• E i ai se faaiuga faigata a Guillermo e fai ma ua fefe ne’i ona faia le filifiliga sese.

• O loo tauivi Maggie e tausia se poloaiga faapitoa.

Faitau mau faasino nei o le atamai i aoaoga faavae ma fasifuaitau autu o mau o le Tusi a Mamona. Vaavaai mo mau e te manatu e mafai ona aoga ia Guillermo po o Maggie. Afai e te manatu e mafai ona fesoasoani se fuaitau faapitoa, ia mautinoa e faitau le fuaitau atoa ae le na o le fuaitau autu o le mau o loo lisi atu i lalo.

Afai na fesuiai pepa a tagata aoga ma se isi vaega, e mafai ona latou sailia le siata lenei mo fuaitau o le a fesoasoani i se tasi o feagai ma faafitauli po o luitau na oo ia i latou.l Mafaufau e faaali atu le siata a o galulue tagata aoga i lenei gaoioiga.

Mau Faasino	Fasifuaitau Autu o Mau
Mau Faasino 1 Nifae 3:7	Fasifuaitau Autu o Mau “O le a ou alu ma fai mea ua poloaiina e le Alii.”
Mau Faasino 2 Nifae 2:25	Fasifuaitau Autu o Mau “Na pa’ū Atamu ina ia i ai tagata; ma ua i ai tagata, ina ia latou maua le olioli.”
Mau Faasino 2 Nifae 2:27	Fasifuaitau Autu o Mau “Ua latou saoloto e filifili le saolotoga ma le ola e faavavau … pe … [o] le faatagataotauaina ma le oti.”
Mau Faasino 2 Nifae 26:33	Fasifuaitau Autu o Mau “Ua tutusa tagata uma i le Atua.”
Mau Faasino 2 Nifae 28:30	Fasifuaitau Autu o Mau O le Atua e “tuu atu i le fanauga a tagata lea fuaitau i luga o lea fuaitau, ma lea mataupu i luga o lea mataupu.”
Mau Faasino 2 Nifae 32:3	Fasifuaitau Autu o Mau “Ia taumamafa fiafia i afioga a Keriso; aua faauta, o afioga a Keriso o le a taʼu mai ai ia te outou mea uma e tatau ona outou faia.”
Mau Faasino 2 Nifae 32:8–9	Fasifuaitau Autu o Mau “E ao ina outou tatalo e le aunoa.”
Mau Faasino Mosaea 2:17	Fasifuaitau Autu o Mau “Pe a outou auauna atu i o outou uso a tagata, ua nao lo outou auauna atu lava lea i lo outou Atua.”
Mau Faasino Mosaea 2:41	Fasifuaitau Autu o Mau “O i latou o e e tausi i poloaiga a le Atua … e faamanuiaina i latou i mea uma.”
Mau Faasino Mosaea 3:19	Fasifuaitau Autu o Mau “[Tuu] ese le tagata natura ma [avea] ma tagata paia e ala i le togiola a Keriso le Alii.”
Mau Faasino Mosaea 4:9	Fasifuaitau Autu o Mau “Ia talitonu i le Atua; … ia talitonu ua ia te ia le poto uma.”
Mau Faasino Mosaea 18:8–10	Fasifuaitau Autu o Mau Ia “papatisoina i le suafa o le Alii, o se molimau … ua outou ulu atu i se feagaiga faatasi ma ia.”

E mafai faapefea ona fesoasoani tusitusiga paia?

Afai e fesuiai pepa a tagata aoga, nai lo le fai atu o fesili nei, valaaulia i latou e faasoa mai fuaitau na latou maua i le vaega na faafesuiai a latou pepa.

• O a fuaitau o le atamai i aoaoga faavae e mafai ona fesoasoani ia Guillermo po o Maggie? Aisea?

• O le a se mea e ono faia e Guillermo ma Maggie ona o upumoni o loo aoao mai i nei fuaiupu?

A o faasoa mai tagata aoga, faamamafa atu e le na o le tasi se tali sa’o; e tele mau e mafai ona fesoasoani i auala eseese.

Faaaogaina o tusitusiga paia i o tatou olaga

Mafaufau loloto po o a manaoga po o luitau o ia te oe. Atonu e te manaomia se fesoasoani i le aoga, se mafutaga ua faaleleia ma ou matua po o nai ou tei, faatuatua atili ia Keriso ia salamo, po o le onosai. Fatu sau lisi o mea faigata po o luitau i lau api faamaumau mo suesuega. Taumafai e faaaofia ai soo se mea e oo mai i le mafaufau.

Filifili se tasi o manaoga po o luitau na e tusia.

Faitau i fuaitau autu o mau o le atamai i aoaoga faavae ma faailoa mai i latou e ono taulimaina ou manaoga, faigata, po o luitau. E tele fuaitau o le atamai i aoaoga faavae e ono mafai ona fesoasoani. Saili le taitaiga a le Tama Faalelagi ao e suesue.

O uunaiga po o faamatalaga talitutusa nei e ono mafai ona fesoasoani i tagata aoga. E mafai ona e tusia uunaiga i luga o le laupapa mo tagata aoga e filifili ai po o lē fea e mafai ona latou faaaogaina.

• O lē fea fuaitau autu o mau o le atamai i aoaoga faavae na e filifilia?

  1. E mafai ona fesoasoani lenei fuaiupu ia te a’u i o’u luitau e ala i le …

  2. O lenei fuaiupu e fesoasoani ou te malamalama pe mulimuli ai i le Tama Faalelagi ma Iesu Keriso e ala i le …

  3. Ou te talitonu o le ola ai i upumoni o i nei fuaiupu e mafai ona aumaia ai ia te au le fiafia aua …

Faaiu i le faafetai atu i tagata aoga mo o latou manatu faaalia, aemaise lava i latou na faasoa mai a latou fuaiupu anoa i le amataga o le vasega.