2 Nifae 17–19

Faalaniga ma Matafaioi o Iesu Keriso

Aisea ua avea ai le Faaola o Iesu Keriso ma se tasi e mafai ona e faatuatuaina? I nei mataupu, ua fautuaina ai e le Alii ni tupu se toalua o e ua faamata’uina e autau malolosi e faalagolago ia te Ia. Ona vavalo ai lea o Isaia e uiga i le Faaola o Iesu Keriso, o loo lisi mai ai nisi o Ona faalaniga ma uiga auaumama. O lenei lesona ua faamoemoe e fesoasoani ia te oe e faatuatuaina Iesu Keriso e ala i le suesue ma malamalama i Ona uiga ma faalaniga.

Manatunatu i faalaniga o Iesu Keriso. O loo i ai i tusitusiga paia le silia ma le selau suafa ma faalaniga eseese e faailoa ma faamatala ai Iesu Keriso. A o faailoa mai e tagata aoga matafaioi ma faalaniga eseese o le Faaola, valaaulia i latou e atagia mai pe na faapefea ona Ia faataunuuina na faalaniga i o latou lava olaga ma i olaga o i latou o siomia i latou.

Sauniuniga a le tagata aoga: I a latou suesuega o tusitusiga paia i aso taitasi, valaaulia tagata aoga e faailoa mai soo se faalaniga o le Faaola ma mafaufau loloto po o le a le uiga o na faalaniga ma pe mafai faapefea ona latou fesoasoani ia i latou ia faalagolago atili ma alofa atili i le Faaola.

Gaoioiga e Ono Mafai Ona Aoao Ai

O le a se mea e mafai ona tatou aoao mai i faalaniga?

Mafaufau e tusi faalaniga nei i luga o le laupapa ma fai atu fesili nei.

Manatu faapea e te lei feiloai lava i tagata nei e toafa, ae ua e iloa o latou faalaniga:

• Fomai

• Taitai Leoleo

• Epikopo

• Peresitene o Tamaitai Talavou

• O fea o nei tagata e te alu i ai mo se fesoasoani pe afai e taumafai se tasi e osofa’ia oe? Afai sa i ai sau faafitauli faigata o le soifua maloloina? Mo se fautuaga faaleagaga?

• O a nisi tulaga e ono tulagaese ai le agavaa o nei tagata e fesoasoani i ai?

• E faapefea e le iloaina o o latou faalaniga ona fesoasoani ia te oe e malamalama ai i mea ua latou agavaa e fesoasoani i ai?

Faaalu sina taimi e mafaufau loloto ai i soo se tulaga po o ni luitau e te ono feagai e te manao e fesoasoani i ai.

Mafaufau e vavae le laupapa i se laina i le ogatotonu ma valaaulia tagata aoga e lisi i le tasi afa ia tulaga faigata e ono feagai ma se talavou. O le a e tusitusi i le isi afa o le laupapa i se taimi mulimuli ane o le lesona.

E tele matafaioi ma faalaniga o Iesu Keriso. Ua aoao mai e i latou taitoatasi ia i tatou se mea taua e uiga ia te Ia ma Lona tomai e fesoasoani ai ia i tatou. A o e suesue i le aso, vaavaai mo Ana faalaniga ma matafaioi ma mafaufau loloto pe faapefea ona tulaga ese Lona agavaa e fesoasoani ia te oe.

O afioga a le Alii i tupu e toalua o Iuta

A o e faamatalaina le faamatalaga lenei, mafaufau e valaaulia tagata aoga e fai ma sui o le Tupu o Aasa o Iuta, le Tupu o Resina o Suria, Le Tupu o Peka o Isaraelu, Le Tupu o Esekia o Iuta, ma le tupu o Aseria i luma o le potu. Atonu e te manao e saunia pine o igoa mo tagata taitoatasi. Atonu e valaaulia tagata aoga e fai ma sui o le Tupu o Aasa ma le Tupu o Esekia e faitau a latou fuaiupu talafeagai o i lalo.

I le taimi o Isaia, le Tupu o Aasa o Iuta ma ina ua mavae lona atalii, le Tupu o Esekia, sa feagai uma i laua ma ni tulaga faigata: sa faamata’u mai malo malolosi e osofaia i laua. I tulaga uma e lua, sa uunaia ai e le Alii ia tupu ma o latou tagata ia faalagolago ia te Ia nai lo le faia o ni tuufaatasiga ma isi atunuu. Faitau fuaiupu nei, ma vaavaai mo fasifuaitau o loo ta’u mai ai o loo valaaulia i latou e le Alii e faalagolago ia te Ia.

• 2 Nifae 17:3–7. Sa faamatauina le Tupu o Aasa e le Tupu o Resina o Suria ma le Tupu o Peka o Isaraelu, o e na fuafua e osofaia ma tuu se tupu fou i luga o le nofoalii.

• 2 Nifae 18:11–13, 17. Sa osofaia le Tupu o Esekia e Asuria ma sa iloa e le lava le malosi o lana autau e taofia ai i latou. (O le upu fouvale e faasino i le faia o se sootaga ma isi atunuu e puipuia ai i latou lava.)

• O le a se mea na e mauaina?

• Aisea e ono faigata ai i se tupu ma lona nuu ona faalagolago i le Alii nai lo le faia o se sootaga ma se isi atunuu?

• O le a se mea o le a manaomia ona latou iloa e uiga i le Alii e faalagolago ai ia te Ia?

A o faaauau pea ona e suesue, mafaufau loloto po o le a le uiga o le faalagolago i le Alii i luitau patino o loo feagai ma oe.

Faalaniga o le Faaola

I se fuaiupu na e suesueina, sa faaaoga ai e Isaia se faalaniga faapitoa mo Iesu Keriso e faapea, afai e malamalama i ai, e mafai ona fesoasoani i nei tupu ma o latou tagata ia faalagolago ia te Ia. Iloilo le 2 Nifae 18:13 ma mafaufau e faailoga lenei ulutala.

Mafaufau e tusi Iesu Keriso … i le itu avanoa o le laupapa ma fai i le vasega e faauma le fuaiupu i le faalaniga na latou maua.

O le faailoaina ma le malamalama i faalaniga o le Faaola e mafai ona fesoasoani tatou te iloa ai, alofa, ma faalagolago atili ai ia te Ia i o tatou olaga. Ina ia fesoasoani ia e malamalama i le faalaniga “Alii o Au,” vaai i le uiga o le Taiala i Tusitusiga Paia po o le Bible Dictionary.

• O le a se mea na e aoaoina e uiga ia Iesu Keriso?

• E faapefea e lenei matafaioi ona agavaa tulaga ese ai le Faaola e fesoasoani i nei tupu ma o latou tagata pe a faamatauina e isi autau?

O Valoaga a Isaia

Sa vavalo atu foi Isaia i nei tupu ma o latou tagata i le soifua mai o le Faaola ma le nofotupu i le meleniuma. Faitau le 2 Nifae 17:14–15; 19:2, 6–7, ma vaavaai mo mea na aoao mai e Isaia e uiga ia Iesu Keriso, aemaise lava Ona faalaniga.

Afai e te manao e faailoa mai nisi faalaniga faaopoopo o le Faaola o loo tusia i le Tusi a Mamona i le taimi nei, mafaufau e faitau nisi o fuaiupu nei: 1 Nifae 10:4–6; 12:18; 13:41; 15:14–15; 17:30; 19:12; 2 Nifae 1:10; 2:6, 10; 9:5, 46; 10:3, 14; 15:16. O loo i ai foi faalaniga ma mau faasino i le Taiala o Autu, Taiala i Tusitusiga Paia, ma le Faasinoupu i le Fusi Tolu, i lalo o le “Iesu Keriso.”

Valaaulia tagata aoga e o mai i le laupapa ma faaopoopo i le lisi o faalaniga o le Faaola.

Filifili se faalaniga se tasi o le Faaola e te fia iloa atili. Ona fai lea o mea ia:

• Faamatala po o le a le uiga o lenei faalaniga ia te oe. (Mafaufau e sue le ulutala i le Taiala i Tusitusiga Paia po o le Bible Dictionary. Afai e le o lisiina atu le ulutala, mafaufau e suesue se faamatalaga lautele ia Iesu Keriso ma mafaufau loloto pe faapefea ona fesootai le faalagiga na e filifilia i Lona uiga atoa ma le misiona. E mafai foi ona fesoasoani le sueina o le ulutala i se lomifefiloi masani.)

• Mafaufau i se tala pe sue se ata e faaalia ai le Faaola o loo galue i le matafaioi na e filifilia.

• Faamatala po o le a le mea ua aoao mai e le faalaniga ia te oe e uiga i le faaola, o Ona faamoemoega, Lona alofa, ma Lona mana.

• Faamatala pe faapefea e lenei matafaioi tulagaese ona agavaa ai le Faaola e fesoasoani ia te oe i lou olaga pe aisea foi e te ono faatuatuaina ai o Ia. (Atonu e aofia ai le auala ua uma ona fesoasoani ai le Faaola ia te oe i lou olaga.)

Valaaulia ni nai tagata aoga e faasoa mai mea na latou saunia e uiga i se tasi o faalaniga. O se tasi o auala o le fai atu i tagata aoga e o mai i le laupapa, li’o le ulutala na latou filifilia, ma faasoa mai o latou manatu i luma o le vasega. Mafaufau e faasoa atu foi ou lagona.

A uma, valaaulia tagata aoga e vaai i itu uma e lua o le laupapa ma fai soo se fesootaiga patino i le va o faafitauli latou te feagai ma se faalaniga o le Faaola o loo faaalia ai Lona tomai e fesoasoani ai.

Faatuatuaina o le Alii

Ae paga lea, sa filifili le Tupu o Aasa ma le toatele o tagata o Iuta e le talitonu ia Isaia ma sa lei faalagolago i le Alii mo le puipuiga. Sa osofaia lona nuu, ma e toatele na pueina ma faapologaina. (Tagai 2 Tupu 16; 2 Nofoaiga a Tupu 28.) O le Tupu o Esekia, e le pei o lona tama, na filifili e faalagolago i le Alii ma mulimuli i le fautuaga a Isaia. O le taunuuga, na puipuia e le Alii tagata i Ierusalema e ala i le auina mai o se agelu e faaumatia le autau na osofaia. (Tagai i le 2 Tupu 19:15–20, 32–35.)

Mafaufau loloto i mea ua e aoaoina ma lagonaina e uiga ia Iesu Keriso i lenei lesona. I lau api talaaga mo suesuega, tusi ai pe faapefea ona e faateleina lou faalagolago ia te Ia. E mafai ona e lisiina se faalaniga po o se matafaioi patino o ia te Ia ma pe faapefea ona e manao e faalagolago atili ia te Ia i lena matafaioi.

Manatu ma Talaaga o Faamatalaga

O le a se isi mea ua tatou iloa e uiga ia Aasa ma Esekia ma autau na la fetaiai?

I ona po o le Tupu o Aasa, sa faamata’uina ai atunuu o Isaraelu, Suria, ma Iuta e le Malo malosi tele o Asuria. Sa mananao tupu o Isaraelu ma Suria i le Tupu o Aasa o Iuta e faatasi ma i latou i se tuufaatasiga e faasaga i le malo malosi o Asuria. Ina ua musu le Tupu o Aasa e auai i le tuufaatasiga e faasaga ia Asuria, sa osofaia e Isaraelu ma Suria ia Iuta ina ia mafai ai ona tuu se isi pule i le nofoalii o Iuta o le a lagolagoina le tuufaatasiga e faasaga ia Asuria (tagai 2 Nifae 17:1, 6). Nai lo le faalagolago i le puipuiga a le Alii, sa gaoia e Aasa le faleteuoloa o le malumalu i Ierusalema ma ofoina atu na punaoa i Asuria i se taumafaiga e faatau lo latou puipuiga ma le fiafia. Peitai, sa osofaia pea e Asuria ia Iuta (tagai 2 Tupu 16:8; 2 Nofoaiga a Tupu 28:21).

I ona po o le Tupu o Esekia—o le atalii o Aasa—sa faatusa e Isaia le autau a Asuria i se vaitafe o le a lolovaia faafaatusa le laueleele o Iuta ma “oo atu ai i le ūa”—o lona uiga o puipui o Ierusalema (2 Nifae 18:8). Na faataunuuina lenei valoaga ina ua oo atu le 185,000 o fitafita a Asuria e osofai Ierusalema, ma taofia ai i puipui o le aai. O le Tupu o Esekia, e le pei o lona tama, o Aasa, na filifili e faalagolago i le Alii ma mulimuli i le fautuaga a Isaia. O le taunuuga, na puipuia e le Alii tagata i Ierusalema e ala i le auina mai o se agelu e faaumatia le autau na osofaia (Tagai 2 Tupu 19:32–35).

O le a le uiga o faalaniga o le Faaola i le 2 Nifae 19:6?

Sa faamalamalama mai e Elder Jeffrey R. Holland o le Korama a Aposetolo e Toasefululua:

O le mea moni e faapea i le faaiuga o le a i ai le malo o tauau [o Iesu Keriso] ua faamautu ai le mea o le a iloaina e le lalolagi uma i se aso—o ia o le Alii o alii ma Tupu o tupu ma o le a i ai se aso na te puleaina ai le lalolagi ma lana Ekalesia e ia lava. …

“E pei o le “Fautua Ofoofogia,” o le a avea o ia ma o tatou puluvaga, ma o tatou faufautua, e puipuia lo tatou tulaga i faamasinoga o le lagi. …

O le “Atua Malosi” ua tau mai ai se mea e uiga i le mana o le Atua, lona malosi, silisili ese aoao, ma le uunaiga le matineia. …

O le “Tama Faavavau” ua faamamafaina ai le aoaoga faavae autu o Keriso o se Tama—Foafoa o lalolagi e le masino, le Tama o le ola faaletino toefuataiina e ala i le Toetu, le Tama o le ola e faavavau mo ona atalii ma afafine na fanaua faaleagaga, ma o le Toatasi e galue mo le Tama (Elohima) e ala i le tuuina atu o le pule paia. (Jeffrey R. Holland, Christ and the New Covenant [1997], 80-81)

Galuega Faatino Faaopoopo e Aoao Mai Ai

O se isi auala e mafai ona amata ai le lesona

Valaaulia tagata aoga e tusi igoa o ni tagata se toalua i le vasega latou te matuai faamemelo lava i ai ma pe aisea i ni fasipepa eseese. Ona ao mai lea o fasipepa ma faitau atu i le vasega. Atonu e atamai le faamautinoa ua faailogaina tagata uma o le vasega i le tofia o tagata aoga e tusi mea latou te faamemelo i ai e uiga i le tagata o loo alala i lo latou agavale, faapea foi ma le filifilia o se isi tagata e toatasi. Atonu foi e te manao e tusi ni au lava faamatalaga tusitusia. Ona fai atu lea i le vasega e mafaufau loloto po o a uiga o le Faaola ua latou iloa ma faamemelo i ai, ma pe na faapefea ona aafia ai i latou. Valaaulia i latou e vaavaai mo nisi uiga o le Faaola a o latou suesueina lenei lesona.

Avea e faapei o Iesu Keriso

A uma ona suesue e tagata aoga ia faalaniga ma matafaioi a le Faaola, e mafai foi ona aoga le valaaulia o tagata aoga e mafaufau i se tasi pe lua ma mafaufau loloto pe i ai se auala talafeagai e mafai ona latou taumafai ai ia avea atili e faapei o le Faaola i lena matafaioi.

Gaoioiga faaopoopo

Afai e maua, atonu foi e te manao e fai se tasi po o mea uma e lua o se vaega o le lesona:

Matamata le vitio “Le Alii o le Filemu: Saili le Filemu Tumau e ala ia Iesu Keriso” (2:32), o loo maua i le ChurchofJesusChrist.org

Usu pe faalogologo i le viiga “O Loo Soifua Lo‘u Faaola” (Viiga, nu. 72).

Malamalama i le talaaga o aoaoga a Isaia

Afai e te lagona o le a fesoasoani le faasoa atili o le talaaga o le mea sa tupu i ona po o Isaia, faasoa atu le uluai tusiga i le Manatu ma Talaaga o Faamatalaga. Atonu e fesoasoani le tusi o ata i luga o le laupapa e pei o mea o loo mulimuli mai. A o e faasoa atu ni vaega eseese o le talaaga, e mafai ona e fetuunaia ‘aū e fai ma sui o mea o loo e faasoaina atu.