2 Nifae 16

“Ua Paia, Ua Paia, Ua Paia Lava, le Alii”

Na i ai sau aafiaga na faigata ona faamatala i upu? Atonu e moni lena mea mo Isaia ina ua ia tusi e uiga i le vaai i le Alii i Lona mamalu atoa. Ina ia fesoasoani e talanoaina lenei aafiaga, sa faaaoga ai e Isaia le gagana faafaatusa e faamatala ai le mana o le Alii ma le paia ma lagona patino o Isaia o le le atoatoa. Sa faamamaina o ia e le Alii mai ana agasala ma valaauina o ia e avea ma perofeta. O lenei lesona e mafai ona fesoasoani ia te oe e iloa ai le gafatia e le Alii ona faamagalo ma faamama oe.

Fesoasoani i tagata aoga ia malamalama i fuaitau faigata o tusitusiga paia. O le aoaoina o tagata aoga i le talaaga faasolopito po o le aganuu faatasi ai ma lomifefiloi, tusi lesona a tagata aoga, ma isi fesoasoaniga mo le suesueina o tusitusiga paia e mafai ona tatala ai se malamalama sili atu i gagana ma faatusa faatusi paia. Uunaia tagata aoga ia onosai ma ia talosagaina le fesoasoani mai le Alii a o latou saili ia malamalama i Lana afioga.

Tapenaga mo tagata aoga. Valaaulia tagata aoga e mafaufau loloto i le fesili lenei: O le a le mea e finagalo se Atua alofa ia tatou malamalama i ai pe a tatou lagona e le lava lo tatou lelei?

Gaoioiga e Ono Mafai Ona Aoao Ai

O le pule ma le mamalu o Iesu Keriso

O nisi perofeta ma isi na maua le avanoa e vaai ai ia Iesu Keriso i Lona mamalu matagofie uma.

• O a nisi o mafuaaga na asiasi mai ai le Alii i tagata eseese i le talafaasolopito atoa o le lalolagi?

Mafaufau e valaaulia tagata aoga e lisi ni nai faataitaiga o taimi na faaali atu ai le Alii i tagata. Faaali atu ni ata e mafai ona fesoasoani i tagata aoga e manatua ai. Atonu foi e te manao e fai atu i tagata aoga e mafaufau pe o a aafiaga e sili ona latou mananao e oo i ai.

O Le Liuaina, saunia e Carl Bloch

O Keriso i le Laueleele o Nuumau, saunia e Simon Dewey

O Le Uluai Faaaliga, saunia e Walter Rane

O Iesu Keriso ua Faaali atu i le Perofeta o Iosefa Samita ma Oliva Kaotui, saunia e Walter Rane

• O a ni manatu po o ni lagona e te ono oo i ai i le afioaga o le Alii?

Sa vaai Isaia i le Alii i Lona mamalu atoa ina ua valaauina o ia o se perofeta. Sa ia faamaumauina lenei aafiaga ma sa faaaofia ai e Nifae i ana tusitusiga. (Tagai Isaia 6 ma le 2 Nifae 16.)

E ui o loo tusia le lesona i tusitusiga paia o loo faitauina i ni vaega laiti, ae o le isi filifiliga o le valaaulia lea o tagata aoga e faitau le 2 Nifae 16:1–8 e faaaoga atili ai le faaaliga vaaia i le taimi e tasi.

Faitau le 2 Nifae 16:1–4, ma vaavaai pe na faapefea ona faamatala e Isaia mea sa ia vaaia. Ona sa faaaoga e Isaia le gagana faafaatusa e faamatala ai lona aafiaga, o faamalamalamaga nei atonu e aoga:

O faamatalaga nei e mafai ona faaalia pe faamalamalama atu i le vasega.

• Lau: O le vaega pito i lalo o le ofu talaloa o le Alii, lea e mafai ona faatusa i Lana amiotonu, mana, ma le mama a’ia’i. E taua le vaaia e Isaia ua “faatumulia ai le malumalu” (2 Nifae 16:1).

• Serafi: O tagata agelu e auauna atu i faamasinoga a le Atua (tagai Bible Dictionary, “Seraphim”). O apaau o le serafi o se faatusa o lo latou mana e gaoioi ai pe galulue ai (tagai i le Mataupu Faavae ma Feagaiga 77:4).

• Asu po o le Ao: E masani lava o se faatusa o le afio ai o le Atua (tagai Esoto 19:18; Faaaliga 15:8).

• O a upu po o fasifuaitau mai nei fuaiupu e fesoasoani e te malamalama ai i le mamalu o le Alii?

• O le a sou manatu i ni ou lagona pe ana e vaai i lenei mea?

Faitau le 2 Nifae 16:5 e iloa ai le tali a Isaia i le vaai atu i le Alii.

Valaaulia tagata aoga e faasoa mai mea na latou maua. Afai e aoga, mafaufau e fai atu le fesili nei:

• O a upu po o fasifuaitau e fesoasoani e te malamalama ai sa iloa e Isaia ana agasala ma vaivaiga?

• O a nisi o mafuaaga atonu e lagona ai e tagata i ona po nei le le mama po o le le agavaa i luma o le Atua?

  E mafai ona fesoasoani se lesona faatino i tagata aoga e mafaufau ai pe faapefea ona tatou vaai ia i tatou lava a o tatou o mai i le Atua. Mafaufau e faatusatusa se ie paepae sinasina ma se ie uaa samasama i le aluga o taimi, pe o se ie palapala foi. E mafai foi ona e faatusatusaina se malamalama itiiti ma se malamalama susulu. Fesoasoani i tagata aoga ia iloa o le eseesega e manino pe a tuufaatasia ni mea faitino se lua ma e mautinoa lava e mama pe sili atu le malamalama nai lo le isi.

• O a ni auala e mafai ona lelei mo i tatou le iloaina o o tatou sese a o tatou latalata atili atu i le Alii?

E aveese ma le loto i ai e le Alii a tatou agasala

Faitau le 2 Nifae 16:6–7, ma vaavaai mo le isi mea na tupu ia Isaia. Atonu e fesoasoani le manatua o fatafaitaulaga sa faaaoga i aso anamua i tapuaiga i le malumalu.

• E faapefea ona e aoteleina mea na tutupu?

• O le a sou manatu i le mea e ono faatusa i ai lenei mea?

Mafaufau i le aafiaga o Isaia i le fatafaitaulaga ma pe mafai faapefea ona aoao atu e uiga i le faamagaloga o agasala ma le mama e ala i le Togiola a Iesu Keriso.

• O le a sou manatu na faapefea ona aafia Isaia i le aveeseina e le Alii o ana agasala?

• O a ni upumoni o fesoasoani nei fuaiupu ia oe e malamalama ai e uiga i le Alii?

O se upumoni e tasi e mafai ona tatou aoaoina o le, e i ai i le Alii le mana e faamamaina ai i tatou.

E i ai taimi, atonu tatou te le manatua ai ma lagonaina le taua o lenei upumoni. Sa faasoa mai e Brother Bradley R. Wilcox o le Au Peresitene Aoao o Alii Talavou ia upu a se alii talavou na ia ta’ua o Damon. Sa faasoa mai e lenei alii talavou manatu ma lagona sa ia te ia e uiga i ana agasala.

Sa tusia e Damon: … “Sa ou lagonaia pea lava le maasiasi faapea ou te lē mafai ona faasa’oina ni mea. … Ua tonu ia te a’u ua onomea lava ia te a’u le lagonaina o le lofituina i taimi uma. Ua ou manatu atonu ua inoino le Atua ia te a’u ona sa ou le loto e galue malosi ma solipalaina lenei faaosoosoga ma tumau ai. Ou te tuua i se vaiaso ma o nisi taimi o se masina, ona ou toe fo’i a lea ma mafaufau, “O le a le lava so’u lelei, o le a la le aoga o le taumafai?” (Bradley R. Wilcox, “O Le Agavaa E Le o le Atoatoa,” Liahona, Nov. 2021, 62)

• Aisea e ono maua ai e se alii talavou e pei o Damon nei manatu?

Vaai faalemafaufau e faapea, sa e maua le avanoa e fesoasoani ai i se tasi e pei o Damon. Mafaufau i le aafiaga o Isaia. Ma le isi, mafaufau i mea ua e iloa patino e uiga i le Faaola e mafai ona e faasoa atu. Tusi i lalo mea e mafai ona fesoasoani. E mafai foi ona e sueina soo se mau po o faamatalaga mai taitai o le Ekalesia e mafai ona e faaaogaina i lau faamalamalamaga. E mafai ona fesoasoani faataitaiga nei:

• Isaia 1:18

• Mosaea 26:30

• Eteru 12:27

Na aoao mai Elder Dieter F. Uchtdorf o le Korama a Aposetolo e Toasefululua:

E le manaomia e le Atua ni tagata e le pona. Na te sailia i latou o e o le a ofoina atu o latou “loto ma se mafaufau malie” [Mataupu Faavae ma Feagaiga 64:34], ma o le a Ia faia i latou ia “atoatoa ia Keriso” [Moronae 10:32–33]. (Dieter F. Uchtdorf, “Five Messages That All of God’s Children Need to Hear” [Faigalotu a le Iunivesite o Polika Iaga, Aok. 17, 2021], 3, speeches.byu.edu)

O se vaaiga fou

Faitau le 2 Nifae 16:8 e vaai ai i le mea na faia e Isaia ina ua uma ona faamamaina e le Alii.

• O le a sou manatu na faapefea e le aafiaga o Isaia i le faamamaina ona aafia ai lana tali i le fuaiupu 8?

Ina ua mavae lenei faaaliga vaaia, sa auauna atu ma le loto i ai Isaia i le Alii. I le aluga o nai tausaga na sosoo ai, sa ia fesoasoani ai e taiala tagata o Iuta. O aoaoga ma tusitusiga a Isaia ua musuia ai tagata e le mafaitaulia, ma sa sili atu ona sii mai o ia e le Faaola nai lo se isi lava perofeta.

Na suia foi Damon. Faatasi ai ma se fesoasoani a se taitai o le Ekalesia, sa iloa ai e Damon e lei silasila ifo le Alii ia te ia i se faamasinoga ita ae i le alofa mutimutivale, ma le manao e fesoasoani ia te ia ia faaleleia atili. Faitau upu a Damon ina ua ia maua se vaaiga fou e uiga i le Atua:

Fai mai Damon: … O le taimi nei ua matuai itiiti atu le taimi ou te faaaluina e inoino ai ia te a’u lava ona o mea sa ou faia, ma ua tele na’uā le taimi ou te alofa ai ia Iesu ona o mea sa Ia faia mo au.” (Bradley R. Wilcox, “O Le Agavaa E Le o le Atoatoa,” Liahona, Nov. 2021, 62)

• Na faapefea e aafiaga o le Togiola, alofa, ma le faamagaloga a le Faaola ona uunaia ai lou olaga?

Mafaufau loloto i le fesili lenei a o e faaiuina lau suesuega o lenei mataupu:

• O le a sou manatu o le a se mea e mafai ona e faia ia loloto atili ai lou lagonaina o le alofa ma le faamagaloga a le Faaola i lou olaga?

Manatu ma Talaaga o Faamatalaga

2 Nifae 16:1. O ai na vaai i ai Isaia?

Na molimau uma Ioane ma Nifae e faapea o le Alii na vaai i ai Isaia o le Iesu Keriso i le muai olaga (tagai Ioane 12:41; 2 Nifae 11:2–3). E le gata i lea, ua molimauina foi e isi perofeta se vaaiga faapena (tagai Faaaliga 4:1–11; Mataupu Faavae ma Feagaiga 110:1–5).

2 Nifae 16:5–8. Aisea na tuu ai e le agelu se malala vevela i laugutu o Isaia?

Ina ua fai mai Isaia, “Oi talofa ia te aʼu! ona ua faaumatia aʼu” (2 Nifae 16:5), sa ia faailoa mai sa ia lagonaina le le agavaa e i ai i luma o le Alii. O le malala lea na tuu e le serafi i laugutu o Isaia o se faatusa o le mama a’ia’i, faamamaina, ma le faamagaloina e ala ia Iesu Keriso. Sa ta’u atu foi ia Iosefa Samita ua faamagaloina ana agasala ina ua valaauina o ia e le Alii (tagai Mataupu Faavae ma Feagaiga 20:2, 5–6; tagai foi “Circa Summer 1832 History,” The First Vision [2020], ChurchofJesusChrist.org).

2 Nifae 16:9–10. O le a se mea ua tatou iloa e uiga i tagata na valaauina Isaia e talai atu i ai?

Na ta’u atu e le Alii ia Isaia o le a teena e tagata le tele o ana upu. Sa latou fai mai e faalogo ma vaai, ae sa latou filifili e le taliaina le agaga o le savali. Sa talai atu e Isaia le savali a le Alii, ma tali atu ai tagata mo mea sa latou aoaoina ae sa lei taliaina.

E mafai faapefea ona ou aloese mai le lotovaivai pe a ou iloaina o’u vaivaiga?

Na aoao mai e Sister Michelle D. Craig o le au Peresitene Aoao o Tamaitai Talavou:

E tatau ona tatou taliaina ni lagona o le lē faamalieina faaleagaga ia e valaau mai ia i tatou i se auala maualuga atu, ae ia iloa ma aloese mai mea taufaasese a Satani—e faavaivailoto. … E mafai ona tatou filifili e savavali i ala maualuluga atu ia e taitai atu ai i tatou e saili mo le Atua ma Lona filemu ma le alofa tunoa, ia po o lo tatou faalogo atu ia Satani, o lē e osofaia i tatou i savali ia o le a lē taitai lava le lelei. … O lo tatou lē faamalieina e mafai ona faaleagaga—pe faataumaoi. (Michelle D. Craig, “Lagona Lē Mautonu,” Liahona, Nov. 2018, 53)

Gaoioiga Faaopoopo e Aoao Ai

2 Nifae 16:3. Ua tumu le lalolagi atoa i le mamalu o le Alii

Ina ia fesoasoani i tagata aoga e talanoaina le mamalu o Iesu Keriso, mafaufau e talanoa e uiga ia te Ia o le Foafoa o lenei lalolagi matagofie. E mafai e tagata aoga ona faasoa mai po o ai tusiata latou te faamemelo i ai ma faaali atu nisi o a latou faatufugaga. O le saunoaga lenei mai ia Peresitene M. Russell Ballard o le Korama a Aposetolo e Toasefululua e mafai ona faaaoga e talanoa ai e uiga i mea e faamemelo i ai tagata aoga e uiga i foafoaga a le Atua.

“O nisi taimi tatou te lagona ai le faaaloalo tele ma le migao mo le atamai fatufatuai e pei ona faaalia i faatufugaga maoae po o musika. O le a le tele o le mea e tatau ona tatou faaaloalo i le mana ma le mamalu o lo tatou Foafoa Paia?” (M. Russell Ballard, “The Handiwork of God,” New Era, Mat. 2006, 5; tagai foi M. Russell Ballard, “God’s Love for His Children,” Ensign, Me 1988, 58)

2 Nifae 16:8. A o faamamaina i tatou e le Alii, tatou te lagonaina se manao e auauna atu ia te Ia

A uma ona faitau le 2 Nifae 16:8 mafaufau e fesili atu, “Aisea e te manatu ai o lo tatou naunautaiga e faia mea e finagalo ai le Atua ia i tatou e faateleina a o faamagaloina i tatou mai a tatou agasala?” Valaaulia tagata aoga e iloilo lo latou naunautaiga e fai le mea ua poloaiina ai i latou e le Atua e ala i le fuaina le leoa o i latou lava i se fua faatatau o le 1 i le 10 (faatasi ai ma le 10 o le naunau tele ma le 1 o le le loto i ai). Ona fai atu lea ia i latou e mafaufau loloto pe mafai faapefea e soo se agasala, fefe, po o nisi mafuaaga ona taofia i latou mai le naunau atili e fai mea e finagalo ai le Atua ia i latou.