“2 Nīfai 26: Ko e Vakai, ʻOfa, mo Fakaʻapaʻapaʻi e Niʻihi Kehé ʻo Hangē ko e ʻOtuá”, Tohi ʻa Molomoná – Tohi Lēsoni ʻa e Faiakó (2024)
“2 Nīfai 26,” Tohi ʻa Molomoná – Tohi Lēsoni ʻa e Faiakó
2 Nīfai 26
Ko e Vakai, ʻOfa, mo Fakaʻapaʻapaʻi e Niʻihi Kehé ʻo Hangē ko e ʻOtuá
ʻOku tau fehangahangai ʻi he ʻaho kotoa pē mo ha ngaahi pōpoaki mo ha fakamatala naʻe fakataumuʻa ke ne tākiekina ʻetau ngaahi ongó mo e fakakaukaú. Naʻe akoʻi ʻe Nīfai ʻi he 2 Nīfai 26, ʻa e fakakaukau ʻa e ʻOtuá. ʻOku fakataumuʻa ʻa e lēsoni ko ʻení ke tokoniʻi koe ke ke Vakai, ʻOfa, mo Fakaʻapaʻapaʻi e Niʻihi Kehé ʻo Hangē ko e ʻOtuá
Ko hono tokoniʻi e kau akó ke ongoʻi ʻoku fakamahuʻingaʻi ʻenau ngaahi tānakí. Fakaʻaliʻali ki he kau akó ʻokú ke mahuʻingaʻia ʻi heʻenau ngaahi fehuʻí mo e fakamatalá ʻaki haʻo fakafanongo fakalelei mo feinga fakamātoato ke mahinoʻi kinautolu. Fakahaaʻi ʻokú ke tokanga ʻaki hoʻo tokanga taha ki he meʻa ʻoku lea ʻaki ʻe he kau akó kae ʻikai ko e meʻa hoko te ke lea ʻakí.
Teuteu ʻa e tokotaha akó: Fakaafeʻi e kau akó ke fehuʻi ki heʻenau mātuʻá pe ko ha kaungāmeʻa falalaʻanga ʻa e founga ʻoku nau feinga ai ke vakai ki he niʻihi kehé ʻo hangē ko e Fakamoʻuí.
Ngaahi ʻEkitivitī Ako ʻe Ala Fakahokó
Ko ʻetau fakakaukaú
Makehe mei hano fakaʻaliʻali e ngaahi fakatātā ko ʻení, te ke lava ʻo ʻomi ha ngaahi matasioʻata kehekehe ki he kau akó ke ʻahiʻahiʻi pea aleaʻi e founga ʻoku liliu ai ʻe he matasioʻata takitaha ʻenau vīsoné mo e fakakaukaú. Fakakaukau ke fakaafeʻi e kau akó ke vahevahe ʻenau ngaahi aʻusia fakataautaha ʻi hono tui ha matasioʻata kehekehe pe matasioʻata vaivai pea mo e faikehekehe ʻoku hoko aí.
Vakaiʻi e ngaahi fakatātā ko ʻení pea fakakaukau ki he founga ʻoku liliu ai ʻe he ngaahi matasioʻata kehekehé ʻetau vīsoné.
-
ʻE liliu fēfē nai ʻe he ngaahi matasioʻata kehekehe ko ʻení e fakakaukau ʻa ha taha?
-
Ko e hā ha ngaahi meʻa ʻokú ne liliu e anga ʻo ʻetau vakai mo fakafeangai ki he niʻihi kehé?
Tuku ha kiʻi taimi ke ke fakakaukau ai ki he anga hoʻo vakai ki he niʻihi kehé. Fakakaukau ki he meʻa te ne fakafōtunga hoʻo fakakaukaú mo e founga ʻe lava ke ne tākiekina ai hoʻo ongo mo e tōʻonga ki he niʻihi kehé. ʻI hoʻo akó, fekumi ki ha ueʻi fakalaumālie ke ke ʻiloʻi ʻa e meʻa te ke lava ʻo fai ke mamata mo feohi ai mo e niʻihi kehé ʻo hangē ko e Fakamoʻuí.
ʻOku fakataumuʻa ʻa e lēsoni ko ʻení ke tokoniʻi koe ke ke Mamata, ʻOfa, mo Fakaʻapaʻapaʻi e Niʻihi Kehé ʻo Hangē ko e ʻOtuá
Ko e ʻulungaanga ʻa e ʻOtuá
ʻI he 2 Nīfai 26, naʻe mamata ʻa Nīfai ki he ngāue fakafaifekau ʻa e Fakamoʻuí ʻi he lotolotonga ʻo e kau Nīfaí, kae pehē ki he faiangahala mo e fakaʻauha fakaʻosi ʻo hono kakaí. Naʻá ne mamata foki ki he faiangahala ʻa e kau Senitailé ʻi he ngaahi ʻaho fakaʻosí. ʻI he tafaʻaki ʻe tahá, naʻá ne fakamamafaʻi e tokanga ʻa e ʻOtuá ki Heʻene fānaú kotoa.
Fakakaukau ki he ngaahi fehuʻi ʻe tolu ko ʻení ʻi hoʻo lau ʻa e 2 Nīfai 26:12–13, 23–33:
ʻOange ha taimi lahi ki he kau akó ke ako ʻa e 2 Nīfai 26:12–13, 23–33, pea fakakaukau ke fakaafeʻi kinautolu ke fakaʻilongaʻi e ngaahi foʻi lea mo e ngaahi kupuʻi lea ʻoku nau tali e ngaahi fehuʻi ko ʻení. Fokotuʻu ha ʻātakai ʻapasia ʻe lava ke faiako ai ʻa e Laumālié. Te ke lava ʻo tā ha fasi māmālie lolotonga hoʻo lue takai he lokí ʻo ʻeke fakalongolongo ki he kau akó pe ko e hā e meʻa ʻoku nau ako, ongoʻi, pe fakaʻilongaʻi ʻi heʻenau akó.
ʻE ala tokoni ke fakaʻaliʻali e ngaahi fehuʻí lolotonga e laukonga ʻa e kau akó.
-
Ko e hā e anga ʻo e vakai mo e ongo ʻoku maʻu ʻe he ʻOtuá ki Heʻene fānaú?
-
ʻOkú Ne fakahaaʻi fēfē ʻení?
-
Ko e hā Hono finangalo ki he founga ʻoku tau vakai mo fakafeangai ai ki he niʻihi kehé?
Hili hono ako ʻe he kau akó e ngaahi akonaki ʻa Nīfai kau ki he ʻulungaanga ʻo e ʻOtuá, fakaafeʻi kinautolu ke vahevahe ʻa e meʻa naʻa nau akó. ʻE ala tokoni e ngaahi fehuʻi ko ʻení, fakataha mo ha ngaahi fehuʻi vakaiʻi kehe, ke poupouʻi e fevahevaheʻakí. Pe ko hono lisi ʻe he kau akó ʻi he palakipoé e ngaahi moʻoni fekauʻaki mo e ʻOtuá naʻa nau akó pea aleaʻi ʻa e ʻuhinga mo e mahuʻinga ʻo e ngaahi meʻá ni.
-
Ko e hā ha ngaahi foʻi lea, kupuʻi lea, pe ngaahi tefitoʻi moʻoni naʻá ke fakaʻilongaʻi te ne lava ʻo tali e ngaahi fehuʻí? Ko e hā hono ʻuhingá?
-
Ko e hā naʻá ke ako pe ongoʻi fekauʻaki mo e ʻulungaanga ʻo e ʻOtuá?
-
ʻE tākiekina fēfē ho vā fetuʻutaki mo e ʻOtuá ʻi hoʻo manatuʻi e ngaahi tefitoʻi moʻoni ko ʻeni fekauʻaki mo Iá? Te ne tākiekina fēfē nai hoʻo tōʻonga ki he niʻihi kehé?
Mahalo kuo fakatokangaʻi ʻe he kau akó ha ngaahi moʻoni kehekehe fekauʻaki mo e ʻulungaanga ʻo e ʻOtuá. Fakakaukau ke fehuʻi ange ki he kau akó pe ko e hā ʻoku ʻuhingamālie ai e ngaahi tefitoʻi moʻoni ne nau maʻú pea fakahikihikiʻi kinautolu ʻi heʻenau ngaahi fakakaukaú. ʻE fakatefito e konga hoko ʻo e lēsoni ko ʻení ʻi he foʻi moʻoni ʻi he veesi 33 “ʻoku tatau ʻa e kakai fulipē ʻi he ʻao ʻo e ʻOtuá.” ʻE tokoni ʻeni ki he kau akó ke teuteu ke fakaʻaongaʻi e potufolofola ko ʻení ʻi he founga akoako fakataukei fakatokāteline ʻi he lēsoni ko ʻení.
Fakatokangaʻi naʻe fakaʻilongaʻi ʻe Nīfai ʻi he 2 Nīfai 26:33, ha niʻihi fakafoʻituitui kehekehe ʻaki ʻene fakatauhoa kinautolu ʻi ha ngaahi kulupu kehekehe. ʻE ala tokoni e ngaahi fehuʻi ko ʻení ke mahino lelei ange kiate koe e ngaahi meʻa ko ʻení. ʻE lava ke ke hiki e ngaahi fakaʻuhinga ko ʻení ʻi hoʻo folofolá ʻi he tafaʻaki ʻo e vēsí.
-
Pōpulá: Ko ha hopoate.
-
Hītení: Ko ha taha ʻoku ʻikai tui ki he ʻOtuá.
-
Siú mo e Senitailé: Ko ha kupuʻi lea ʻoku ʻuhinga kiate kinautolu kotoa ʻoku kau ki he fale ʻo ʻIsilelí mo kinautolu ʻoku ʻikaí.
Ko ha potufolofola fakataukei fakatokāteline ʻa e 2 Nīfai 26:33. Fakakaukau ke fakaʻilongaʻi e ngaahi potufolofola fakataukei fakatokāteliné ʻi ha founga makehe koeʻuhí ke faingofua hoʻo maʻu kinautolú. Te ke maʻu ha faingamālie ʻi he lēsoni hokó ke akoako fakaʻaongaʻi e tokāteline ʻoku akoʻi ʻi he potufolofola ko ʻení ki ha fehuʻi pe tūkunga.
-
Ko e hā ha faikehekehe ʻe hoko kapau naʻe tali mo moʻui ʻaki ʻe he māmaní e ngaahi ngaahi akonaki ʻi he veesi 33?
Fakaʻaongaʻi ha kiʻi taimi ke fakalaulauloto ai ki hoʻo fakakaukaú, kau ai ʻa e ongo ʻokú ke maʻú mo hoʻo tōʻonga ki he niʻihi kehé, ʻi hono fakafehoanaki ki he fakakaukau ʻa e ʻOtuá mo e anga ʻEne ongo mo e fakafeangai ki he niʻihi kehé.
Ko e founga ʻe taha ke tokoni ki he kau akó ke fakafehoanaki e anga ʻenau fakafeangai ki he niʻihi kehé ki he founga ʻa e ʻOtuá ko hono toe fakalea ʻe he kau akó e ngaahi fehuʻi ʻoku vahevahe ʻe Nīfai ʻi he 2 Nīfai 26:25–28 ke fakaʻaongaʻi kiate kinautolu. Hangē ko ʻení, “ʻOku ou ʻai nai ke ongoʻi ʻe he kakaí ʻoku ou fiemaʻu ke nau mavahe meiate au? pe ke ʻikai moihū mo au? Pe ʻoku ou fakamahalo ʻoku ʻikai totonu ke nau maʻu ʻa e angalelei ʻa Sīsū Kalaisí?”
ChurchofJesusChrist.org
ʻE lava ke tokoni e ngaahi fehuʻi mo e palakalafi ko ʻení ke fakafuofuaʻi ʻe he kau akó ʻenau ngaahi ongo mo e tōʻonga ki he niʻihi kehé pea fakaʻaongaʻi leva e meʻa ʻoku nau akó. ʻE lava ke lekooti ʻe he kau akó ʻi heʻenau tohinoá pe aleaʻi ʻenau tali ki he ngaahi fehuʻí.
-
Te ne takiekina fēfē nai koe ke ke manatuʻi e fakakaukau mo e ngaahi ongo ʻa e ʻOtuá ki he kakai kotoa pē?
-
Ko e hā ha ngaahi founga ʻokú ke fai lelei ai ʻi hoʻo vakai mo feohi mo e niʻihi kehé ʻo hangē ko ia ʻe fai ʻe he Tamai Hēvaní mo Sīsū kiate kinautolú?
-
ʻE tokoni fēfē hono manatuʻi e ngaahi akonaki fekauʻaki mo e ʻEikí ʻi he 2 Nīfai 26:33 ke ke vakai, ʻofa, mo fakaʻapaʻapaʻi e niʻihi kehé ʻo hangē ko e ʻOtuá?
ʻI he ngaahi ʻaho siʻi ka hokó, feinga ke fakatokangaʻi ʻa e anga hoʻo vakai, ongoʻi, pea mo fakafeangai ki he niʻihi kehé. Fakafanongo ki he ngaahi ueʻi mei he Laumālie Māʻoniʻoní pea fekumi ki he tokoni ʻa e ʻEikí ke fai ha faʻahinga liliu pē ʻoku fiemaʻu ke ke ʻofa ai mo fakaʻapaʻapaʻi e niʻihi kehé ʻo hangē ko e ʻOtuá.