Laulanu Fakamatakalí mo Fakafonuá

Vakai Fakalūkufuá

Ko e niʻihi fakafoʻituitui kotoa pē ko e fānau kinautolu ʻo e ʻOtuá mo ha konga ʻo Hono fāmili fakalangí (vakai, “Ko e Fāmilí: Ko ha Fanongonongo ki Māmani”). ʻI heʻetau hoko ko ʻEne fānaú, ʻoku tau maʻu kotoa ha ivi fakalangi mo mahuʻinga ʻi Hono ʻaó. ʻOku akoʻi ʻe he folofolá naʻe hanga ʻe he ʻOtuá ʻo “ngaohi … ʻi he toto pē taha ʻa e ngaahi kakai kotoa pē” (Ngāue 17:26), pea “tatau ʻa e kakai fulipē” kiate Ia (2 Nīfai 26:33). ʻOku ʻikai ke Ne ʻofa ʻi ha matakali pe anga fakafonua ʻo laka ange ʻi ha matakali ʻe taha.

Ko e ongoongolelei ʻo Sīsū Kalaisí maʻá e fānau kotoa ʻa e ʻOtuá. ʻOku akoʻi ʻe he Tohi ʻa Molomoná ʻoku fakaafeʻi ʻe he ʻEikí “ʻa kinautolu kotoa pē ke nau haʻu kiate ia ʻo maʻu ʻi heʻene angaleleí; pea ʻoku ʻikai te ne taʻofi ha tokotaha ʻoku haʻu kiate ia, pe ko ha ʻuliʻuli pe hinehina, pe ko ha pōpula pe tauʻatāina, pe ko ha tangata pe fefine” (2 Nīfai 26:33). ʻOku makatuʻunga hotau tuʻunga mo e ʻOtuá ʻi heʻetau tauhi mateaki kiate Ia mo ʻEne ngaahi fekaú, kae ʻikai ko e lanu ʻo hotau kilí, ko hotau hakó, pe ngaahi ʻulungaanga kehé.

Koeʻuhí ko e fānau kitautolu ʻo e ʻOtuá, ko e ngaahi tokoua, tuongaʻane mo e tuofāfine kotoa pē kitautolu. Kuo fekauʻi kitautolu ʻe he ʻOtuá ke tau “feʻofaʻaki” (Sione 13:34–35). ʻI he talanoa fakatātā ʻo e Samēlia leleí, naʻe akoʻi ʻe Sīsū Kalaisi ko e fekau ko ia ke ʻofa ki hotau kaungāʻapí, ʻoku ope atu ia ʻi he ngaahi faikehekehe ʻo e hakó, anga fakafonuá, mo e tui fakalotú (vakai, Luke 10:25–37). Naʻe fakafōtunga ʻe he Fakamoʻuí ʻa e akonaki ko ʻení. Naʻá Ne “faʻa feʻaluʻaki ʻo fai lelei” (Ngāue 10:38), ʻo akoʻi mo fakamoʻui e kakai mei he ngaahi puipuituʻa kehekehe.

ʻI he feinga ke muimui ki he ngaahi akonaki mo e sīpinga ʻa e Fakamoʻuí, ʻoku fakahalaiaʻi ai ʻe he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní ʻa e laulanu fakamatakali mo fakafonua ʻi ha faʻahinga founga pē. Kuo akonaki ʻa Palesiteni Lāsolo M. Nalesoni ʻo pehē: “ʻOku ui mai ʻa e Tupuʻanga ʻo kitautolu kotoá ke tau liʻaki e ngaahi tōʻonga laulanu ki ha faʻahinga haʻofanga pē ʻo e fānau ʻa e ʻOtuá. ʻOku fiemaʻu ke fakatomala ha taha pē ʻiate kitautolu ʻoku laulanu ki ha matakali kehe!” (ʻi he “President Nelson Shares Social Post about Racism and Calls for Respect for Human Dignity,” June 1, 2020, newsroom.ChurchofJesusChrist.org).

Naʻe toe akoʻi foki ʻe Palesiteni Nalesoni ʻoku totonu ko e kāingalotu ʻo e Siasí ke nau “taaimuʻa ʻi hono siʻaki ʻa e ngaahi ʻulungaanga mo e tōʻonga ʻo e faifakamāú.” Naʻá ne pehē, “ʻoku ou kole atu ke tau poupouʻi ʻa e fakaʻapaʻapá ki he kotoa ʻo e fānau ʻa e ʻOtuá” (“Tuku ke Lāngilangiʻia ʻa e ʻOtuá,” Liahona, Nōvema 2020, 94). ʻI he mahino kiate kitautolu ʻa e “tuʻunga Fakaetamai totonu ʻo e ʻOtuá, … ʻoku ueʻi kitautolu ʻe he mahino ko iá mo holi mālohi ke tau langa ha ngaahi hala fakakavakava ʻo e ngāue fakatahá kae ʻikai ko ha ngaahi ʻā vahevahe” (ʻi he “‘All Are Equal,’ Prophet Proclaims at ‘Be One’ Celebration,” Church News, June 1, 2018; vakai foki, Tohi Tuʻutuʻuni Fakakātoa: Ko e Ngāue ʻi he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní,, 38.6.14).

Naʻe fakamatala ʻe he Palōfita ko Siosefa Sāmitá ko ha tangata ko ia ʻoku “fakafonu ʻaki e ʻofa ʻa e ʻOtuá, ʻoku ʻikai fiemālie ia hono tāpuakiʻi ʻataʻatā pē hono fāmilí, ka ʻoku feʻaluʻaki ʻi he funga ʻo e māmaní ʻo fiefia ke tāpuakiʻi ʻa e faʻahinga kotoa ʻo e tangatá” (Ngaahi Akonaki ʻa e Kau Palesiteni ʻo e Siasí: Siosefa Sāmita [2007], 381). ʻOku feinga ʻa e Siasí mo hono kāingalotú ke muimui ki he tefitoʻi moʻoni ko ʻení ʻi he meʻa kotoa pē ʻoku nau fakahokó, kau ai hono vahevahe ʻo e ongoongolelei ʻo Sīsū Kalaisí mo e kakai kotoa pē, talitali lelei ʻa e taha kotoa ke kau ʻi he ngaahi houalotu ʻa e Siasí, pea mo hono tokangaʻi ʻo kinautolu ʻoku faingataʻaʻiá.

Lekooti e Ngaahi Ongo ʻOkú ke Maʻú

Ngaahi Tefito Fekauʻakí

Faikehekehe mo e Uouangataha ʻi he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní
ʻOfá
Uouangatahá

Ngaahi Folofolá

Ngaahi Fakamoʻoni Fakafolofolá

Ngaahi Pōpoaki mei he Kau Taki ʻo e Siasí

Ngaahi Maʻuʻanga Tokoni Fakaakó

ʻI he Ongoongó

“President Nelson Shares Social Post about Racism and Calls for Respect for Human Dignity,” Newsroom

“Prophet Joins NAACP Leaders in Call for Racial Harmony in America,” Newsroom

“‘All Are Equal,’ Prophet Proclaims at ‘Be One’ Celebration,” Church News