Ako ʻo e Tokāteliné
Ngaahi Puleʻanga ʻo e Nāunaú
ʻE toetuʻu ʻa e kakai fulipē makatuʻunga ʻia Sīsū Kalaisi mo ʻEne feilaulau fakaleleí. Hili ʻetau toetuʻú, te tau tuʻu ʻi he ʻao ʻo e ʻEikí ke fakamaauʻi kitautolu ʻo fakatatau mo ʻetau ngaahi holí mo e ngaahi tōʻongá. Te tau takitaha maʻu ha feituʻu nofoʻanga taʻengata ʻi ha puleʻanga pau ʻo e nāunau ʻoku feʻunga mo ʻetau ngāué. ʻOku ʻi ai ha ngaahi nāunau ʻe tolu: ko e nāunau fakasilesitialé, nāunau fakatelesitialé, pea mo e nāunau fakatilesitialé.
Vakai Fakalūkufuá
ʻE toetuʻu ʻa e kakai fulipē makatuʻunga ʻi he Fakalelei ʻa Sīsū Kalaisí. Hili ʻetau toetuʻú, te tau tuʻu ʻi he ʻao ʻo e ʻEikí ke fakamaauʻi kitautolu ʻo fakatatau mo ʻetau ngaahi holí mo e ngaahi tōʻongá. Te tau takitaha maʻu ha feituʻu nofoʻanga taʻengata ʻi ha puleʻanga pau ʻo e nāunau ʻoku feʻunga mo ʻetau ngāué. Naʻe akoʻi ʻe he ʻEikí ʻa e tefitoʻi moʻoni ko ʻení ʻi Heʻene folofola, “ʻI he fale ʻo ʻeku Tamaí ʻoku ai ʻa e ngaahi nofoʻanga ʻoku lahi” (Sione 14:2).
ʻOku ʻi ai ha ngaahi nāunau ʻe tolu: ko e nāunau fakasilesitialé, nāunau fakatelesitialé, pea mo e nāunau fakatilesitialé. Ko e nāunau te tau maʻú ʻe makatuʻunga ia ʻi he lahi ʻetau uluí ʻa ia ʻoku hā ʻi heʻetau talangofua ki he ngaahi fekau ʻa e ʻEikí. ʻE makatuʻunga ia ʻi he founga naʻá ke “maʻu [ai] ʻa e fakamoʻoni ʻo Sīsuú” (Tokāteline mo e Ngaahi Fuakava 76:51; vakai foki, Tokāteline mo e Ngaahi Fuakava 76:74, 79, 101).
Lekooti e Ngaahi Ongo ʻOkú ke Maʻú
Puleʻanga Fakasilesitialé
Ko e puleʻanga fakasilesitialé ʻa e māʻolunga taha ʻi he ngaahi puleʻanga ʻe tolu ʻo e nāunaú. Ko kinautolu ʻoku nau ʻi he puleʻanga ko ʻení te nau nofo ʻo taʻengata ʻi he ʻao ʻo e ʻOtua ko e Tamaí pea mo Hono ʻAlo ko Sīsū Kalaisí. ʻOku totonu ke hoko ʻeni ko hoʻo taumuʻa: ke maʻu ʻa e nāunau fakasilesitialé pea mo tokoniʻi e niʻihi kehé ke nau maʻu foki ʻa e tāpuaki maʻongoʻonga ko iá. ʻOku ʻikai ke maʻu ʻa e taumuʻa peheé ʻi ha feinga lelei pē taha; ko ha ola ia ʻo e māʻoniʻoni ʻi he moʻuí kotoa mo e faivelenga ʻi he taumuʻá.
Ko e puleʻanga fakasilesitialé ko ha feituʻu ia kuo teuteuʻi maʻanautolu kuo nau “maʻu ʻa e fakamoʻoni ʻo Sīsuú” pea “kuo fakahaohaoaʻi ʻia Sīsū ko e fakalaloa ʻo e fuakava foʻoú, ʻa ia naʻá ne fakahoko ʻa e fakalelei haohaoa ko ʻení ʻi he lilingi hono taʻataʻa ʻoʻoná” (Tokāteline mo e Ngaahi Fuakava 76:51, 69). Ke maʻu ʻa e meʻafoaki ko ʻení, kuo pau ke tau maʻu ʻa e ngaahi ouau ʻo e fakamoʻuí, tauhi ʻa e ngaahi fekaú, pea fakatomala mei heʻetau ngaahi angahalá. Ki ha fakamatala fakaikiiki fekauʻaki mo kinautolu te nau maʻu ʻa e nāunau fakasilesitialé, vakai ki he Tokāteline mo e Ngaahi Fuakava 76:50–70; 76:92–96.
ʻI Sānuali 1836, naʻe maʻu ai ʻe he Palōfita ko Siosefa Sāmitá ha fakahā ʻa ia ne fakalahi ai ʻene ʻilo kau ki he ngaahi fiemaʻu ke maʻu ai e nāunau fakasilesitialé. Naʻe fakaava ʻa e ngaahi langí kiate ia, pea naʻá ne mamata ki he puleʻanga fakasilesitialé. Naʻá ne ofo ʻi heʻene mamata ki hono taʻokete ko ʻAlaviní ʻi aí, neongo naʻe mālōlō ʻa ʻAlavini ʻoku teʻeki ke ne maʻu ʻa e ouau ʻo e papitaisó. (Vakai, Tokāteline mo e Ngaahi Fuakava 137:1–6.) Pea naʻe ongo mai ʻa e leʻo ʻo e ʻEikí ki he Palōfita ko Siosefá:
“Ko kinautolu kotoa pē kuo nau pekia, ka naʻe teʻeki ai ke nau maʻu ha ʻilo ki he ongoongolelei ko ʻení, ʻa ia naʻa nau mei tali ia ʻo kapau naʻe fakaʻatā ke nau kei moʻui, te nau hoko ko e kau ʻea-hoko ki he puleʻanga fakasilesitiale ʻo e ʻOtuá;
“Pea mo kinautolu kotoa pē foki ʻa ia te nau pekia mei he taimi ko ʻení ʻo faai atu, ka ʻoku teʻeki ai ke nau maʻu ha ʻilo ki he ongoongolelei ko iá, ʻa ia naʻa nau mei tali ia ʻaki honau lotó kotoa, te nau hoko foki mo kinautolu ko e kau ʻea-hoko ki he puleʻanga ko iá;
“He ko au, ko e ʻEikí, te u fakamāuʻi ʻa e tangata kotoa pē ʻo fakatatau ki heʻenau ngaahi ngāué, pea fakatatau ki he ngaahi holi ʻo honau lotó” (Tokāteline mo e Ngaahi Fuakava 137:7–9).
Naʻe lave ʻa e Palōfita ko Siosefá fekauʻaki mo e fakahā ko ʻení ʻo pehē, “Naʻá ku mamata foki ko e fānau iiki kotoa pē kuo nau pekia, ka ʻoku teʻeki ai ke nau taʻu motuʻa feʻunga ke ʻekeʻi meiate kinautolu ʻa ʻenau ngaahi ngāué, ʻoku fakamoʻui mo kinautolu ʻi he puleʻanga fakasilesitiale ʻo e langí” (Tokāteline mo e Ngaahi Fuakava 137:10).
ʻOku tau ako mei ha fakahā ʻe taha ki he Palōfita ko Siosefá, ʻoku ʻi ai ha ngaahi tuʻunga ʻe tolu ʻi he puleʻanga fakasilesitialé. Ke hākeakiʻi kitautolu ʻi he tuʻunga māʻolunga tahá pea hokohoko atu ki he taʻengata ʻi he ngaahi vā fetuʻutaki fakafāmilí, kuo pau ke tau hū ki he “fuakava foʻou mo taʻengata ʻo e malí” pea tauhi totonu ki he fuakava ko iá. Ko hono fakalea ʻe tahá, ʻoku fie maʻu ʻa e mali temipalé ki hono maʻu ʻa e tuʻunga māʻolunga taha ʻo e nāunau fakasilesitialé. (Vakai, Tokāteline mo e Ngaahi Fuakava 131:1–4.) Ko kinautolu kotoa pē ʻoku nau moʻui taau ke hū ki he fuakava foʻou mo taʻengata ʻo e malí, te nau maʻu ʻa e faingamālie ko iá, pe ʻi he moʻui ko ʻení pe ʻi he moʻui ka hokó.
Puleʻanga Fakatelesitialé
Ko kinautolu ʻoku nau maʻu ʻa e nāunau fakatelesitialé te nau “maʻu mei he ʻao ʻo e ʻAló, kae ʻikai mei he fonu ʻo e Tamaí. Ko ia, ko e ngaahi sino fakatelesitiale ʻa kinautolu, kae ʻikai ko e ngaahi sino fakasilesitiale, ʻo nau faikehekehe ʻi he nāunau ʻo hangē ko e faikehekehe ʻa e māhiná mo e laʻaá” (Tokāteline mo e Ngaahi Fuakava 76:77–78). Ko e angamahení, ko e niʻihi fakataautaha ʻi he puleʻanga fakatelesitialé ko ha kakai lelei “naʻe fakakuihi ʻe he olopoto ʻo e tangatá” (Tokāteline mo e Ngaahi Fuakava 76:75). ʻE fakakau ʻi he kulupu ko ʻení ʻa e kau mēmipa ʻo e Siasí naʻe “ʻikai ke nau toʻa ʻi he fakamoʻoni ʻo Sīsuú” (Tokāteline mo e Ngaahi Fuakava 76:79). Ke ako lahi ange fekauʻaki mo kinautolu te nau maʻu ʻa e nāunau fakatelesitialé, vakai ki he Tokāteline mo e Ngaahi Fuakava 76:71–80, 91, 97.
Puleʻanga Fakatilesitialé
ʻE tuku ʻa e nāunau fakatilesitialé maʻá e niʻihi fakafoʻituitui ʻoku “ʻikai te nau tali ʻa e ongoongolelei ʻa Kalaisí, pe ko e fakamoʻoni ʻo Sīsuú” (Tokāteline mo e Ngaahi Fuakava 76:82). ʻE maʻu ʻe he niʻihi fakafoʻituitui ko ʻení ʻa honau nāunaú hili hono huhuʻi kinautolu mei he fale fakapōpula fakalaumālie ʻa ia ʻoku faʻa ui ko helí (vakai, Tokāteline mo e Ngaahi Fuakava 76:84; Tokāteline mo e Ngaahi Fuakava 76:106). ʻOku maʻu ha fakamatala fakaikiiki kiate kinautolu te nau maʻu ʻa e nāunau fakatilesitialé ʻi he Tokāteline mo e Ngaahi Fuakava 76:81–90, 98–106, 109–112.
Ko e Malaʻiá
ʻOku ʻi ai ha kakai ʻe niʻihi he ʻikai ke nau taau ke nau nofo ʻi ha faʻahinga puleʻanga ʻo e nāunaú. ʻE ui kinautolu “ko e ngaahi foha ʻo e malaʻiá” pea ʻe pau ke nau “kātakiʻi ha puleʻanga ʻa ia ʻoku ʻikai ko e puleʻanga ʻo e nāunau” (Tokāteline mo e Ngaahi Fuakava 76:32; 88:24). ʻE hoko ʻeni ko e tuʻunga kiate “kinautolu ʻoku nau ʻiloʻi ʻa e mālohi [ʻo e ʻOtuá], pea kuo ngaohi ʻa kinautolu ke nau maʻu iá, pea nau tuku ke ikunaʻi ʻa kinautolu ʻi he mālohi ʻo e tēvoló, pea ke fakaʻikaiʻi ʻa e moʻoní pea angatuʻu ki he mālohi [ʻo e ʻOtuá]” (Tokāteline mo e Ngaahi Fuakava 76:31; vakai foki, Tokāteline mo e Ngaahi Fuakava 76:30, 32–49).
Ngaahi Tefito Fekauʻakí
Ngaahi Folofolá
Ngaahi Fakamoʻoni Fakafolofolá
Ngaahi Maʻuʻanga Tokoni Ako Folofolá
-
Fakahinohino ki he Ngaahi Folofolá, “Nāunau Fakasilesitialé,” “Nāunau Fakatilesitialé,” “Nāunau Fakatelesitialé”
-
-
Fakahinohino ki he Ngaahi Folofolá, “Nāunaú, Ngaahi”
-
Ngaahi Pōpoaki mei he Kau Taki ʻo e Siasí
Ngaahi Maʻuʻanga Tokoni Fakaakó.
Ngaahi Tohi Lēsoni Akó
Ngaahi Akonaki ʻa e Kau Palesiteni ʻo e Siasí
Ngaahi Maʻuʻanga Tokoni Ki Hono Akoʻí
Ngaahi Fokotuʻutuʻu Ki Hono Akoʻí
Mītiá