Ngaahi Fakataha Alēlea ʻa e Siasí

Vakai Fakalūkufuá

ʻOku tokoni ʻa e ngaahi fakataha alēleá ke tau fekumi ki he finangalo ʻo e ʻEikí ʻi he uouangataha mo e tui. ʻOku ngāue ʻa e ngaahi fakataha alēleá ʻi he ngaahi tuʻunga kotoa pē ʻo e Siasí, ʻo kau ai e ngaahi fakataha alēlea fakalūkufuá, fakaʻēlia, fakasiteiki, fakauooti, fakakōlomu mo e ngaahi fakataha alēlea fakatakimuʻa kehé.

Ko e taumuʻa ʻo e ngaahi fakataha alēlea ʻa e Siasí ke fekumi mo maʻu ha fakahā fakalangi. Ko e ngaahi fakataha alēlea ʻa e Siasí ko ha ʻātakai ia ʻe lava ke tau maʻu ha ueʻi fakalaumālie ke faituʻutuʻuni, tokoniʻi lelei ange e fakafoʻituituí mo e ngaahi fāmilí, pea palani mo fakafekauʻaki e ngāue ʻa e Siasí.

ʻOku kehekehe e ngāue ʻa e ngaahi fakataha alēlea ʻi he Siasí mei he ngaahi faʻunga faituʻutuʻuni kehé. ʻOku ʻikai puleʻi kinautolu ʻe he tuʻutuʻuni ʻa e tokolahí pe ko e founga lelei tahá, pea ʻoku ʻikai fakahoko ʻe he takí e tuʻutuʻuní ʻiate ia pē. ʻI he taimi ʻoku ʻomi ai ha fehuʻi pe fiemaʻu ke fakakaukauʻi ʻe he fakataha alēleá, “ʻoku poupouʻi ʻa e kau mēmipa ʻo e fakataha alēleá ke nau lea moʻoni, mei heʻenau taukeí pea mei honau tuʻunga ko e kau taki ʻo e houalotú” (Tohi Tuʻutuʻuni Fika 2: Ko Hono Puleʻi ʻo e Siasí [ChurchofJesusChrist.org], 4.6.1). Hili hono fakamatalaʻi lelei ʻa e fehuʻí pe fiemaʻú, ʻoku vakaiʻi ʻe kinautolu ʻoku kau atu ki he fakataha alēleá ʻa e fakahinohino ʻa e kau taki ʻo e Siasí mo e meʻa kuo akoʻi ʻe he ʻEikí ʻi he folofolá. ʻOku nau fakakaukauʻi foki pe ko e hā e ngaahi maʻuʻanga tokoni te ne tali lelei taha e fehuʻí pe feau e fiemaʻú.

ʻOku ʻomi fakataha ʻe he ngaahi fakataha alēleá e ngaahi aʻusia mo e mahino ʻa e kakai mo ha ngaahi puipuituʻa, taukei, mo e fakakaukau kehekehe. ʻOku fakamālohia ʻe he ngaahi faikehekehe ko ʻení ʻa e fakataha alēleá, pea ʻoku totonu ke ongoʻi malu ʻa e tokotaha kotoa pē ke fakahaaʻi ʻene fakakaukaú ʻi ha laumālie ʻo e ʻofa mo e angaʻofa. ʻOku mahuʻinga hono fakahaaʻi peheé ki he taumuʻa ʻo e ngaahi fakataha alēleá, kae lava ʻe he kau takí ʻo fokotuʻu ha ʻātakai ʻoku ongona ai e taha kotoa pea fakamahuʻingaʻi ʻa e fakakaukau kotoa. ʻE lava ke maʻu ha laumālie ʻo e ueʻi fakalaumālie mo e uouangataha ʻi he fakafanongó, fakakaukauʻi ʻi he loto-fakatōkilalo e ngaahi ongo ʻa e niʻihi kehé, mo fekumi ʻa e kau mēmipa ʻo e fakataha alēleá ki he finangalo ʻo e Tamai Hēvaní (vakai, Tokāteline mo e Ngaahi Fuakava 107:27–31).

Naʻe pehē ʻe he Palōfita ko Siosefa Sāmitá ʻi haʻane fakamatalaʻi e ngaahi fakataha alēleá, ʻoku totonu ke takitaha “lea pē ʻi hono taimí pea ʻi hono feituʻu, … koeʻuhí ke maau ʻa e meʻa kotoa pē, pea ko e tangata takitaha, kimuʻa peá ne fakafepakiʻi ha meʻa ʻoku [ʻomi] ki honau ʻaó ke nau fakakaukau ki ai, ʻoku totonu ke ne fakapapauʻi te ne lava ʻo fai ha fakamaama ki he kaveingá kae ʻikai fakamafola ʻa e fakapoʻulí, pea ko ʻene fakafepakí ʻoku tuʻunga ʻi he māʻoniʻoni, ʻa ia ʻe lava pē ke fakahoko ʻeni ʻi haʻatau nofo ofi ki hono ako ʻa e fakakaukau mo e finangalo ʻo e ʻEikí, ʻa ē ʻoku fakahaaʻi mo fakafōtunga maʻu mai pē ʻe Hono Laumālié ʻa e moʻoní, ke mahino ki he tokotaha kotoa ʻoku nau maʻu ʻa e Laumālié ” (Manuscript History of the Church, vol. B-1, pp. 688–89, josephsmithpapers.org).

ʻOku ola lelei taha e ngaahi fakataha alēlea ʻa e Siasí ʻi he taimi ʻoku tuku ai ʻe he tokotaha kotoa ʻoku kau ki aí ʻene ngaahi fiemaʻu fakatāutahá pea fekumi ke ʻiloʻi e finangalo ʻo e ʻEikí—ʻi heʻenau muimui ki he naʻinaʻi ʻa ʻAlamaá: “Fealeaʻaki mo e ʻEikí ʻi he meʻa kotoa pē te ke fai, pea te ne fakahinohinoʻi koe ʻi he meʻa ʻoku leleí” ( ʻAlamā 37:37).

ʻOku ʻikai ke tuʻutuʻuni ʻe he taki ʻo e fakataha alēleá ʻa e founga ke feau ha fehuʻi kae ʻoua kuó ne fanongo ki hono aleaʻí. ʻOku “poupou [ʻa e takí] ke aleaʻi ka he ʻikai pule pē ia” pea “fai ha ngaahi fehuʻi pea mahalo mo kole ki ha kau mēmipa pau ʻe niʻihi ʻo e fakataha alēleá ke nau fai ange ha fokotuʻu.” ʻOku “fakafanongo lelei [ʻa e takí] kimuʻa peá ne toki fai ha tuʻutuʻuni. ʻOku totonu ke ohi mai ʻe he ngaahi fealēleaʻaki ko ʻení ha laumālie ʻo e tataki fakalangí” (Tohi Tuʻutuʻuni Fika 2, 4.6.1). Hili ha talatalanoa mo e kulupú, ʻe lava ke muimui e takí ki he ueʻi ʻa e Laumālié ʻo fai ha tuʻutuʻuni pe fokotuʻu ha palani ngāue ke fakakaukau ki ai e fakataha alēleá.

ʻI hono fakakaukauʻi e ngaahi fiemaʻu pe fehuʻi ʻoku pelepelengesí, ʻoku totonu ke tokanga e kau mēmipa ʻo e fakataha alēleá ke ʻoua naʻa nau aleaʻi e ngaahi fakaikiiki fakatāutahá. ʻOku ʻi ai ha meʻa ʻe niʻihi ʻe lelei taha ke tuku ia ki ha ngaahi fepōtalanoaʻaki mo e kau takí ʻoku ʻikai fakahāhāholo.

ʻOku feinga e ngaahi fakataha alēleá ke uouangataha ʻi heʻenau ngaahi tuʻutuʻuní (vakai, Mātiu 18:19; Tokāteline mo e Ngaahi Fuakava 42:3; 107:27). “Kapau ʻoku maʻu ʻe he kau mēmipa ʻo e fakataha alēleá ha ongoʻi taʻepauʻia lahi fekauʻaki mo ha tuʻutuʻuni mahuʻinga, ʻe lava pē ke tatali ʻa e [kau takí] ki ha toe fakataha alēlea ʻe taha ke toe fakakaukauʻi ai pea mo kolea ha fakamahino fakalaumālie te nau faaitaha aí.” Hili hano fai ʻe ha taki ha tuʻutuʻuni, “ʻoku totonu leva ke poupouʻi ia ʻe he kau mēmipa ʻo e fakataha alēleá ʻi he laumālie ʻo e uouangataha mo e maʻumaʻuluta” (Tohi Tuʻutuʻuni Fika 2, 4.6.1).

Lekooti e Ngaahi Ongo ʻOkú ke Maʻú

Ngaahi Tefito Fekauʻakí

Fakataha Alēlea ʻi he Langí
Ngaahi Fakataha Alēlea Fakatonutonu ʻa e Siasí
Ngaahi Fakataha Alēlea Fakafāmilí

Folofolá

Ngaahi Fakamoʻoni Fakafolofolá

Ngaahi Maʻuʻanga Tokoni Ako Folofolá

Fakahinohino ki he Hokohoko Fakamataʻitohi ʻo e Ngaahi Kaveingá, “Akonakí (nauna) Akonakiʻí (veape)”
Fakahinohino ki he Ngaahi Folofolá, “Fakataha Lahi ʻi he Langí”