Taulaʻeiki Siʻí

Vakai Fakalūkufuá

Ko e lakanga fakataulaʻeikí ko e mālohi mo e mafai ia ʻo e ʻOtuá. Ko e taulaʻeiki siʻí ko ha tuʻunga ia ʻi he Lakanga Taulaʻeiki Faka-ʻĒloné. ʻOku kamata ʻi Sānuali ʻo e taʻu ʻoku hoko ai e taʻu 16 ʻa e kau talavou moʻui tāú ʻa e malava ke fakanofo kinautolu ki he lakanga taulaʻeiki siʻí—ko ha lakanga ʻoku nau maʻu kae ʻoua kuo nau maʻu e Lakanga Taulaʻeiki Faka-Melekisētekí. ʻOku fakanofo foki e houʻeiki tangata lalahi ne toki papitaisó ki he taulaʻeiki siʻí hili ha taimi nounou mei honau papitaisó.

ʻOku fokotuʻutuʻu e kau taulaʻeiki siʻí ki he ngaahi kōlomu ʻi honau uōtí mo e koló. ʻOku hoko e pīsopé pe palesiteni fakakoló ko e palesiteni ʻo e kōlomu taulaʻeiki siʻí pea ʻoku kau atu ki heʻenau fakataha alēleá, ʻo akoʻi kinautolu ki he ngaahi fatongia ʻo honau lakangá (vakai, Tokāteline mo e Ngaahi Fuakavá 107:87–88).

ʻOku maʻu ʻe he taulaʻeiki siʻí ʻa e ngaahi fatongia kotoa ʻo ha tīkoni mo e akonaki. ʻOkú ne toe maʻu foki e ngaahi fatongia ko ʻení (vakai, Tohi Tuʻutuʻuni Fika 2: Ko Hono Puleʻi ʻo e Siasí, 8.1.1.3):

ʻOkú ne fakahoko ʻa e sākalamēnití ʻaki haʻane ngāue ʻi he tēpile sākalamēnití mo fakahoko ʻa e lotu tāpuakiʻi ʻo e sākalamēnití (vakai, Tokāteline mo e Ngaahi Fuakava 20:46, 77, 79; vakai foki, Tohi Tuʻutuʻuni Fika 2, 20.4.3).
Te ne “malanga, akonaki, fakamatala, naʻinaʻi, … mo ʻaʻahi ki he fale ʻo e kāingalotú takitaha, pea naʻinaʻi kiate kinautolu ke nau lotu ʻaki ʻa e leʻó pea ʻi he liló ʻo fai ʻa e ngaahi fatongia fakafāmili kotoa pē” (Tokāteline mo e Ngaahi Fuakava 20:46–47).
ʻI hano fakamafaiʻi ʻe he pīsopé, te ne fakahoko ʻa e papitaisó, foaki ʻa e Lakanga Taulaʻeiki Faka-ʻĒloné, mo fakanofo ʻa e kau tīkoní, kau akonakí, mo e kau taulaʻeiki siʻí (vakai, Tokāteline mo e Ngaahi Fuakava 20:46, 48).
ʻOkú ne fakahoko e papitaiso maʻá e kau pekiá ʻi he temipalé.
ʻOkú ne tokoni ki he kau pīsopelikí ʻi he ngaahi founga kehe ʻoku fenāpasi mo hono lakanga ko ha taulaʻeiki siʻí.