Teuteu Tāú

Vakai Fakalūkufuá

Ko e teuteu tāú ko ha ʻulungaanga ia ʻo e fakaʻapaʻapa mo e angatonu ʻi he valá, fōtungá, leá, mo e ʻulungāngá. Kapau ʻoku tau teuteu taau, he ʻikai ke tau tohoakiʻi mai ha tokanga taʻetotonu kiate kitautolu. Ka ʻoku tau feinga ke “fakaongoongolelei ʻa e ʻOtuá ʻi [hotau] sinó, pea ʻi [hotau] laumālié” (1 Kolinitō 6:20; vakai foki, 1 Kolinitō 6:19).

Lekooti e Ngaahi Ongo ʻOkú ke Maʻú

Valá mo e Fōtungá

Kapau ʻoku ʻikai ke tau fakapapauʻi pe ʻoku taau hotau valá pe fōtungá, ʻoku totonu ke tau fehuʻi loto pē, “Te u ongoʻi fiemālie nai ʻi hoku fōtungá kapau ne u ʻi he ʻao ʻo e ʻEikí?” Mahalo te tau ʻeke kiate kitautolu ha fehuʻi tatau fekauʻaki mo ʻetau leá mo e ʻulungāngá: “Te u lea ʻaki nai e ngaahi leá ni pe kau atu ki he ngaahi ʻekitivitī ko ʻení kapau naʻe ʻi ai ʻa e ʻEikí?” ʻE lava ke tataki kitautolu ʻe heʻetau tali totonu ki he ngaahi fehuʻi ko ʻení ke tau fakahoko ha ngaahi liliu mahuʻinga ʻi heʻetau moʻuí. Kuo faleʻi maʻu mai pē kitautolu ʻe he kau palōfitá ke tau teunga taau. ʻOku makatuʻunga ʻa e faleʻi ko ʻení ʻi he moʻoni, ko e sino ʻo e tangatá ko e fakatupu toputapu ia ʻa e ʻOtuá. Kuo pau ke tau fakaʻapaʻapaʻi hotau sinó ko ha meʻaʻofa ia mei he ʻOtuá. Te tau lava ʻo fakahaaʻi ki he ʻEikí ʻoku tau ʻiloʻi ʻa e pelepelengesi hotau sinó, ʻo fakafou ʻi hotau valá mo e fōtungá.

ʻOku fakahaaʻi ʻe hotau valá ko hai kitautolu. ʻOkú ne ʻoatu ha ngaahi pōpoaki fekauʻaki mo kitautolu, pea ʻokú ne tākiekina ʻetau tōʻonga mo e niʻihi kehé. ʻI he taimi ʻoku tau teuteu lelei ai mo teunga tāú, te tau lava ʻo fakaafeʻi e takaua ʻo e Laumālié pea fakaʻaongaʻi ha ivi tākiekina lelei ki he niʻihi ʻoku tau feohí.

Ko e uho ʻo e fekau ke moʻui tāú ko ha mahino ia ki he mālohi toputapu ʻo e fakatupú, ʻa e malava ko ia ke ʻomi ha fānau ki he māmaní. ʻOku toki fakaʻaongaʻi pē ʻa e mālohi ko ʻení ʻi he vahaʻa ʻo e husepānití mo e uaifí. ʻE lava ke fakaʻaiʻai ʻa e ngaahi holi mo e ngaahi tōʻonga ʻokú ne maumauʻi e fono ʻa e ʻEikí ki he angamaʻá, ʻe he vala fakahāhā mo fakatupu fakakaukau fakasekisualé, ʻa ia ʻoku kau ai ʻa e talausese mutu nounoú mo e piva nounoú, vala ʻoku manoʻó, mo e sote ʻoku ʻikai ke ne ʻufiʻufi ʻa e keté.

Makehe mei he fakaʻehiʻehi mei he vala ʻoku fakahāhaá, ʻoku totonu ke tau fakaʻehiʻehi mei he vala, fōtunga, mo e ākenga ʻo e ʻulú ʻoku fuʻu tōtuʻá. ʻOku totonu ke tau maʻa mo maau maʻu pē ʻi he teungá, teuteú, mo e tōʻongá, ʻo ʻikai fakalālāfuaʻa pe taʻetaau. ʻOku totonu ke ʻoua te tau maumauʻi hotau fōtungá ʻaki ʻa e ngaahi tā-tataú pe tui fakaavaava ʻo e sinó. ʻOku totonu ke tui ʻe he kakai fefine ʻoku nau fie fakaava honau telingá, ha hoaʻi hau pē ʻe taha.

Leá mo e ʻUlungāngá

Hangē ko hotau valá mo e teuteú, ʻoku fakahaaʻi ʻe heʻetau leá mo e ʻulungāngá hotau angá. ʻE lava ke ʻi ai ha ivi tākiekina lahi ʻo ʻetau ngaahi leá mo e tōʻongá, kiate kitautolu mo e niʻihi kehé. ʻOku totonu ke tau fakahaaʻi kitautolu ʻi he lea maʻa, lelei, langaki moʻui pea ʻi he ngaahi ngāue ʻokú ne ʻomi ʻa e fiefiá kiate kinautolu ʻoku tau feohí. ʻOku fakaiku ʻetau feinga ke molumalu ʻetau leá mo e ngāué, ki ha tataki mo ha fakafiemālie lahi ange mei he Laumālie Māʻoniʻoní.

ʻOku totonu ke tau fakaʻehiʻehi mei he lea ʻulí mo hono fakaʻaongaʻi taʻeʻapasia ʻo e huafa ʻo e ʻEikí ʻoku angamaheni ʻaki ʻi he māmaní, pea ʻoku totonu ke tau matuʻuaki ha faʻahinga ʻahiʻahi pē ke kau ʻi ha tōʻonga ʻoku fuʻu tōtuʻa pe taʻefeʻunga. ʻOku hanga ʻe he natula taʻeʻapasia ʻo e faʻahinga lea mo e tōʻonga peheé ʻo fakavaivaiʻi ʻetau malava ke maʻu e ngaahi ueʻi fakalongolongo ʻa e Laumālie Māʻoniʻoní.