Lea ʻo e Potó

Vakai Fakalūkufuá

Kuo fakahā ʻe he ʻOtuá ʻa e Lea ʻo e Potó ko ha fekau ia ke ʻaonga fakatuʻasino mo fakalaumālie ki Heʻene fānaú.

Naʻe maʻu ʻe he Palōfita ko Siosefa Sāmitá ʻa e fakahā ko ʻení ʻi he ʻaho 27 ʻo Fēpueli, 1833, pea ʻoku lekooti ia ʻi he vahe 89 ʻo e Tokāteline mo e Ngaahi Fuakavá. ʻI he fakahā ko ʻení, ʻoku akoʻi ai ʻe he ʻEikí ʻa e ngaahi founga ki he moʻui leleí. ʻOkú ne tapui foki ha ngaahi meʻa ʻe niʻihi ʻa ia ʻoku ʻikai lelei ki he sino ʻo e tangatá.

Naʻe fakahā ʻe he ʻEikí ʻi he Lea ʻo e Potó, ko e ngaahi meʻatokoni ʻeni ʻoku leleí:

Fuaʻiʻakaú mo e ngaahi ʻakau iiki ʻoku fakamoʻuí, kau ai ʻa e vesitapoló, ʻa ia ʻoku totonu ke fakaʻaongaʻi “ʻi he anga-fakapotopoto mo e fakafetaʻi” (vakai Tokāteline mo e Ngaahi Fuakava 89:10–11).
Ko e kakano “ʻo e fanga manú mo e fanga manupuna ʻo e ʻataá,” ʻa ia ʻe “ngāue fakasiʻisiʻi ʻaki ia” (vakai Tokāteline mo e Ngaahi Fuakava 89:12–13).
Ko e kēlení hangē ko e uité, laisé, mo e ʻoté “ko e falalaʻanga ʻo e moʻuí” (vakai Tokāteline mo e Ngaahi Fuakava 89:14–17).

Na‘e fakahā mai e he ʻEikí ʻi he Lea ʻo e Potó ko e ngaahi meʻa ko ʻení ʻoku fakatuʻutāmaki:

Inu kavamālohí (vakai Tokāteline mo e Ngaahi Fuakava 89:5–7).
Tapaká (vakai Tokāteline mo e Ngaahi Fuakava 89:8).
Tī mo e kofí (vakai, Tokāteline mo e Ngaahi Fuakava 89:9; kuo akoʻi mai ʻe he kau palōfita ʻi he ngaahi ʻaho kimui ní ʻoku ʻuhinga ʻa e “inu velá,” ʻi hono tohi ʻi he veesi ko ʻení ki he tī mo e kofí).

ʻOku talaʻofa mai ʻe he ʻEikí ʻa e tupulaki ʻi he moʻui leleí, potó, ʻiló, mo e maluʻí kiate kinautolu ʻoku talangofua ki he Lea ʻo e Potó (vakai Tokāteline mo e Ngaahi Fuakava 89:18–21).

Talu mei hono fakafe‘iloaki maí, kuo akoʻi ʻe he kau palōfitá ʻa e mahuʻinga ʻo e muimui ki he Lea ʻo e Potó. ‘Ikai ngata aí, kuo nau akoʻi ʻa e kāingalotu ʻo e Siasí ke nau fakaʻehiʻehi mei he ngaahi meʻa ʻokú ne holoki ʻa e fakakaukau leleí pe ʻa ia ʻoku fakatuʻutāmaki pe faingamālie lahi ke maʻunimā ai, ʻo tatau ai pē pe ʻoku fakalao pe taʻefakalao. Hangē ko ʻení, ʻoku hanga ʻe he ifi tapaká, ngāue hala ʻaki ʻo e faitoʻo ʻoku ʻomi ʻe he toketaá, mo e fakaʻaongaʻi ʻo e maliuaná ki he fakafiefiá ʻo maumauʻi ʻa e ngaahi akonaki ʻa e Siasí (vakai Tohi Tuʻutuʻuni Fakakātoá: Ko e Ngāue ʻi he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimuí Ní [2020], 38.7.8; “Fakamatala fekauʻaki mo e Lea ʻo e Potó,” ʻAokosi 15, 2019, newsroom.ChurchofJesusChrist.org). Kuo ako‘i ʻe he kau palōfitá ʻoku totonu ke tau muimui foki ki he ngaahi founga moʻui leleí ʻo hangē ko e kai moʻui leleí, fakamalohisino maʻu pē, moʻui maʻa totonú, mo e mālōlō feʻungá.

Lekooti e Ngaahi Ongo ʻOkú ke Maʻú