“Loto-houngaʻia,” Ngaahi Tefitó mo e Ngaahi Fehuʻí (2023)
Vakai Fakalūkufuá
Loto-houngaʻia
Ko e loto-houngaʻiá ko ha ongoʻi fakahounga mo e fakamālō koeʻuhí ko e ngaahi tāpuaki pe lelei kuo tau maʻú. ʻOku meimei ke tau fiefia mo mālohi fakalaumālie ange ʻi heʻetau tanumaki ha ʻulungaanga ʻo e loto-houngaʻiá. ʻOku totonu ke tau fakahaaʻi maʻu pē ʻetau houngaʻia ki he ʻOtuá koeʻuhi ko e ngaahi tāpuaki ʻokú Ne ʻomi maʻatautolu mo e niʻihi kehé ʻi he ngaahi ngāue angaʻofa ʻoku nau fai maʻatautolú.
Kuo ʻosi talaʻofa ʻe he ʻEikí, “Ko ia ia ʻokú ne tali ʻa e ngaahi meʻa kotoa pē ʻi he loto-fakafetaʻí ʻe ngaohi ia ke nāunauʻia.” Ko e loto-houngaʻiá ko ha ʻulungaanga fakatupulaki mo langaki moʻui. ʻOku faʻa fiefia ange ʻa e kakaí ʻi heʻenau maʻu e houngaʻiá ʻi honau lotó. He ʻikai lava ke tau ʻita, loto-tāufehiʻa, pe laumālie taʻeʻofa ʻi heʻetau houngaʻiá.
ʻOku totonu ke tau houngaʻia ʻi he ngaahi tāpuaki fakaʻofoʻofa ʻoku ʻatautolú mo e ngaahi faingamālie kāfakafa ʻoku tau maʻú. Te tau lava ʻo fakamālō ki heʻetau mātuʻá, fāmilí, ngaahi kaungāmeʻá, mo e kau faiakó. ʻOku totonu ke tau fakahaaʻi ʻetau houngaʻia ki he tokotaha kotoa pē kuó ne tokoniʻi kitautolu ʻi ha faʻahinga founga.
ʻOku totonu ke tau fakamālō ki heʻetau Tamai Hēvaní koeʻuhi ko ʻEne angalelei kiate kitautolú ʻaki hono fakamoʻoniʻi Hono toʻukupú ʻi he meʻa kotoa pē, ʻo fakamālō kiate Ia ʻi he meʻa kotoa pē kuó Ne foaki maʻatautolú, tauhi ʻEne ngaahi fekaú, mo tokoniʻi ʻa e niʻihi kehé. ʻOku totonu ke tautautefito ʻetau fakamālō kiate Iá koeʻuhi ko Hono ʻAlo ʻOfaʻanga ko Sīsū Kalaisí, ko e sīpinga maʻongoʻonga ʻa e Fakamoʻuí, ko ʻEne ngaahi akonakí, ko Hono toʻukupu tokoni mo fakatupulakí, pea mo ʻEne Fakalelei taʻefakangatangatá.
Kanotohi Fekauʻakí
-
Maʻuʻanga tokoni maʻá e fānaú