Moʻui Fakafalala Pē Kiate Kitá

Vakai Fakalūkufuá

Ko e taumuʻa ʻo e moʻui fakafalala fakalaumālie mo fakatuʻasino pē kiate kitá ke hoko ʻo ngāue lelei ange maʻá e ʻEikí mo tokangaʻi e niʻihi kehé (vakai Sione 15:8). ʻOku fakaafeʻi kitautolu kotoa ʻe he Fakamoʻuí ke tau ngāue, ke tau tuʻu tauʻatāina, pea hoko ʻo hangē ko Iá. Te Ne tokoniʻi kitautolu. Kuó Ne talaʻofa: “Pea ko ʻeku taumuʻá ke tauhi ʻa ʻeku kau māʻoniʻoní, he ʻoku ʻaʻaku ʻa e ngaahi meʻa kotoa pē. Ka kuo pau ke fai ia ʻi heʻeku founga pē ʻaʻakú” (Tokāteline mo e Ngaahi Fuakava 104:15–16). ʻOku kau ʻi Heʻene foungá ʻa e ako mo e moʻui ʻaki ʻa e ngaahi tefitoʻi moʻoni ʻo e moʻui fakafalala pē kiate kitá—“ʻa e malava, tukupā, mo e feinga ke tokonaki ʻa e ngaahi fiemaʻu ʻo e moʻuí maʻata mo e fāmilí” (Tokonaki ʻi he Founga ʻa e ʻEikí: Fakanounou ki he Tohi Fakahinohino ʻa e Takí ki he Uelofeá [2009]).

ʻE tokoni hono tali mo moʻui ʻaki e ngaahi tefitoʻi moʻoni ko ʻeni ʻo e moʻui fakafalala pē kiate kitá, ke tau maʻu ʻa e ngaahi tāpuaki fakalaumālie mo fakatuʻasino kuo talaʻofa mai ʻe he ʻEikí.

Fakaʻaongaʻi e Tui kia Sīsū Kalaisí. ʻOku maʻu ʻe he ʻEikí ʻa e mālohi kotoa pē. Te Ne lava pea te Ne fakahoko ha ngaahi ʻaloʻofa ongongofua lahi ʻiate kinautolu ʻoku falala kiate Ia ʻi he meʻa kotoa pē. ʻI heʻetau ngāue ʻaki ʻa e tui kia Sīsū Kalaisí, te Ne lava ʻo fakahoko ha ngaahi mana.
Ke ke Talangofua ʻOku iku ʻa e talangofua ki he ngaahi fono, ngaahi tefitoʻi moʻoni, mo e ngaahi ueʻi fakalaumālie ʻa e ʻOtuá, ki he ngaahi tāpuaki fakalaumālié mo e fakatuʻasinó.
Ngāue. ʻOku fakaʻatā ʻe he haʻisia fakafoʻituituí mo e ngāué ʻa e ngaahi tāpuakí.
Ngāue tokoni pea faaitaha. ʻOku langaki ʻe he ngāue tokoní mo e uouangatahá ʻa Saione—ko e founga ʻeni ʻa e ʻEikí. Naʻe pehē ʻe ʻEletā Lōpeti D. Heili ʻo e Kōlomu ʻo e Kau ʻAposetolo ʻe Toko Hongofulu Mā Uá, “Ko e toki taimi pē te tau moʻui fakafalala ai kiate kitautolú, te tau toki lava moʻoni ai ʻo faʻifaʻitaki moʻoni ki he Fakamoʻuí ʻi hono tokoniʻi mo faitāpuekina e niʻihi kehé” (“Ko e Tūkunga ʻa e Ongoongoleleí ki he Uelofeá,” ʻi he Ngaahi Tefitoʻi Moʻoni Mahuʻinga ʻo e Uelofeá mo e Moʻui Fakafalala Pē Kiate Kitá [kiʻi tohi, 2009],2).

Lekooti e Ngaahi Ongo ʻOkú ke Maʻú

Ngaahi Talaʻofa Fakaepalōfitá

Kuo lea ʻaki ʻe he Kau Palesiteni ʻUluakí ʻo pehē: “ʻOku mau fakaafeʻi koe ke ako faivelenga pea mo fakaʻaongaʻi ʻa e ngaahi tefitoʻi moʻoni ko ʻení pea akoʻi kinautolu ki he kau mēmipa ho fāmilí. ʻI hoʻo fai iá, ʻe faitāpuekina hoʻo moʻuí. Te ke ako ʻa e founga ke ngāue ai ʻi ho hala ki he moʻui fakafalala lahi ange kiate kitá. ʻE tāpuakiʻi koe ʻaki ʻa e ʻamanaki leleí, melinó, mo ha fakalakalaka lahi ange.

Kātaki ʻo ʻiloʻi moʻoni ko e fānau koe ʻa ʻetau Tamai Hēvaní. ʻOkú Ne ʻofa ʻiate koe pea he ʻikai teitei liʻaki koe. ʻOkú Ne ʻafioʻi koe pea mo mateuteu ke ʻoatu e ngaahi tāpuaki fakalaumālie mo fakatuʻasino ʻo e moʻui fakafalala pē kiate kitá” (Kau Palesitenisī ʻUluakí, ʻi he Ko Hoku Fakavaʻé: Ngaahi Tefitoʻi Moʻoní, Taukeí, mo e Tōʻonga Moʻuí [2014],2).