Moʻui Fakamatelié

ʻOku ʻuhinga ʻa e moʻui fakamatelié ki he vahaʻataimi mei he fanauʻi maí ki he mate fakatuʻasinó. ʻOku faʻa ui ʻeni ko e tuʻunga hono uá. ʻOku fakataha hotau laumālié mo hotau sinó, ʻo tau maʻu ai ʻa e ngaahi faingamālie ke tupulaki mo fakalakalaka ʻi ha ngaahi founga naʻe ʻikai malava ia ʻi heʻetau moʻui ʻi he maama fakalaumālié. Ko e konga ko ʻeni ʻo ʻetau moʻuí ko ha taimi ia ke tau ako ai ʻo fakamoʻoniʻi kitautolu, ke tau fili ke haʻu kia Kalaisi, pea mo teuteu ke taau mo e moʻui taʻengatá. Ko ha toe taimi foki ia te tau lava ai ʻo tokoni ki he niʻihi kehé ke fekumi ki he moʻoní mo maʻu ha fakamoʻoni ki he palani ʻo e fakamoʻuí.

Naʻe akoʻi mai ʻe Palesiteni Tieta F. ʻUkitofa, “ʻI heʻetau foua ko ia e veilí mo hū mai ki he moʻui fakamatelié ni, naʻa tau ʻiloʻi ai he ʻikai ke tau toe manatuʻi e moʻui kimuʻá. ʻE ʻi ai e fakafepakí mo e faingataʻá pea mo e ʻahiʻahí. Ka naʻa tau ʻiloʻi foki ʻa hono mahuʻinga fau ke maʻu ha sino fakamatelié. Naʻa tau ʻamanaki te tau ako leva ke fai e ngaahi fili totonú, matuʻuaki e ʻahiʻahi ʻa Sētané, pea toe foki ki heʻetau Mātuʻa ʻofeina ʻi he Langí.”