fānau mo e ʻOtuá

Fakahinohino ki hono Ako ʻo e Ongoongoleleí

Fānau ʻa e ʻOtuá

Ko e ʻulungaanga mahuʻinga ʻo e tokotaha kotoa pē ʻi he māmaní

Fakakaukauloto ki haʻo fuofua feʻiloaki mo ha taha peá ne pehē atu, “Fakamatalaʻi mai koe kiate au.” Ko e hā leva hoʻo fakamatlá? Ko e moʻoni ʻe makatuʻunga ia ʻi he tūkungá, ka ʻe lava ʻe he ngaahi moʻoniʻi meʻa te ke loto ke vahevahé ʻo fakahā atu ha meʻa lahi ki he anga hoʻo fakakaukau kiate koé—mo e meʻa ʻokú ke loto ke ʻilo ʻe he niʻihi kehé kiate koé.

ʻOku ʻi ai ha foʻi moʻoni ʻe taha fekauʻaki mo koe ʻoku mahuʻinga ange ia ʻi he toengá. Pea neongo he ʻikai te ke lava ʻo fakamatala ki ai ʻi hoʻo fakafeʻiloaki koé, ka ʻoku mahuʻinga ange ia ki ho tuʻungá ʻi ho hingoá, kolo tupuʻangá, pe ngaahi meʻa ʻokú ke manako aí. Ko e foʻi moʻoni ko ia ko e fānau koe ʻa e ʻOtuá. Ko hoʻo Tamaí Ia. Hangē pē ko hoʻomou maʻu ha mātuʻa ʻi he māmaní ne mou maʻu mei ai ha ngaahi ʻulungaanga fakatuʻasinó, ʻoku mou hoko foki ko ha “foha mo e ʻofefine ʻo ha mātuʻa fakalangi, pea ʻi heʻene peheé, ʻoku [mou] maʻu ha natula fakalangi pea mo ha ikuʻanga pau.”¹ ʻE kaunga fēfē ʻa e moʻoniʻi meʻa ko ʻení ki he anga hoʻo fakakaukau kiate koé? Te ne liliu fēfē e anga hoʻo vakai ki he ngaahi faingataʻa mo e faingamālie ʻo e moʻuí?

ʻOku ʻUhinga ki he hā ke Hoko ko ha Fānau ʻa e ʻOtuá?

Ko e kakai kotoa pē ko e ngaahi foha mo e ngaahi ʻofefine kinautolu ʻo ha Tamai Hēvani ʻofa. ʻI he hoko ʻa e tokotaha kotoa ko e fānau totonu ʻa e ʻOtuá, ne fakatupu fakalaumālie ʻi he maama fakalaumālié, ʻoku nau maʻu ai ha tuʻunga malava fakalangi mo taʻengata (vakai, Loma 8:16–17).

Vakai fakalūkufua ki he Tefitó: Spirit Children of Heavenly Parents

Ngaahi fakahinohino fekauʻaki ki hono ako ʻo e ongoongoleleí: ʻOtua ko e Tamaí, Palani ʻo e Fakamoʻuí, Maama Fakalaumālié

Konga 1

ʻOku ʻikai ngata pē ʻi he hoko ʻa e ʻOtuá ko Ho Tupuʻangá; ko hoʻo Tamaí Ia

fāmili ʻoku malimali

ʻOku ʻi ai ha tamai fakaemāmani ʻa e tokotaha kotoa pē, pea ʻoku ʻikai haohaoa ha taha ʻi he ngaahi tamai ko iá. Ka neongo pe ko e hā ʻetau ngaahi aʻusia mo e ngaahi tamaí mo e tuʻunga fakaetamaí ʻi he māmaní, ʻoku tau maʻu foki ha Tamai Hēvani ʻa ia ko e sīpinga kotoa ia ʻoku totonu ke maʻu ʻe ha tamai—ʻofa, poupou, fakapotopoto, taʻe-siokita, mo loto moʻoni ke ke lavameʻa. ʻOku ʻofeina koe ʻe he Tokotaha māfimafi mo nāunauʻia taha ʻi he ʻunivēsí ko ʻEne fānau pelepelengesi. ʻOkú Ne ʻafioʻi lelei koe mo ʻafioʻi kakato e meʻa ʻokú ke fiemaʻu ke ke tupulaki, fakalakalaka, mo maʻu ai ʻa e fiefia taʻengatá. Ko e ngaahi hingoa hangē ko e “Tokotaha Fungani Māʻolungá,” “Tupuʻangá,” mo e “Tuʻi Māfimafí” ʻoku ʻuhinga kotoa pē ia kiate Ia. Kae mahulu hake ʻi ha toe meʻá, ʻokú Ne finangalo ke ke ʻiloʻi Ia ko e “Tamai.”

Ngaahi meʻa ke fakakaukau ki ai

• Naʻe ʻilo ʻe Mōsese ʻi ha mata meʻa-hā-mai fakalangi ko ha foha ia ʻo e ʻOtuá. Lau fekauʻaki mo ʻene aʻusiá ʻi he Mōsese 1:1–11. Fakatokangaʻi ange foki ʻi he veesi 12–18 ʻa e founga naʻe tokoniʻi ai ʻa Mōsese ʻe he ʻilo ko ʻení ʻi he taimi naʻe feinga ai ʻa Sētane ke ʻahiʻahiʻi iá. Fakalaulauloto ki he founga ʻe lava ke tokoniʻi ai koe lolotonga e ngaahi taimi ʻo e ʻahiʻahí ʻi hono manatuʻi ko e fānau koe ʻa e ʻOtuá.

• Naʻe fai ʻe ʻEletā Palaieni K. Teila ha talanoa kau ki ha finemui naʻá ne pehē, “Ko e ʻilo maʻongoʻonga taha ia ʻoku ou maʻú, ʻa ʻeku ʻiloʻi ko ia ko e fānau au ʻa e ʻOtuá!” Laukonga fekauʻaki mo ia ʻi he “Ko e Fānau Koā Au ʻa e ʻOtuá?”² ke ʻiloʻi ʻa e ʻuhinga ʻo ʻene lea ko iá. Ko e hā naʻe hoko ai ha meʻa makehe ʻi heʻene moʻuí ʻi hono ʻiloʻi ʻa e ʻOtuá ko ʻene Tamaí? Ko e hā ha meʻa makehe ʻe lava ke hoko ʻi hoʻo moʻuí?

• Kuó ke ngaohi nai ha faʻahinga ngāue fakameaʻa pe ngāue fakaʻaati? Pe mahalo kuó ke faʻu ha meʻa hangē ko ha taimi-tēpile, patiseti, pe meʻatokoni. Fakakaukau ki he founga ʻoku kehekehe ai ho vā fetuʻutaki mo e meʻa naʻá ke faʻú mei he vā fetuʻutaki ʻo ha mātuʻa mo ha fānaú. Fakakaukau ki heni ʻi hoʻo fakalaulauloto ki he ngaahi potufolofola ko ʻení: Kalētia 4:6–7; 1 Sione 3:2. Ko e hā ʻoku mahuʻinga ai kiate koe ke ke ʻiloʻi ko ha ʻofefine pe foha koe—ʻo ʻikai ko ha fakatupu pē—ʻa e ʻOtuá?

ʻEkitivitī ki he ako mo e niʻihi kehé

• Ke akoʻi fekauʻaki mo e meʻa te tau malava ko e fānau ʻa e ʻOtuá, fakakaukau ki he founga te ke lava ai ʻo fakatātaaʻi ʻa hono maʻu ʻe he mātuʻá mo ʻenau fānaú ʻa e ngaahi ʻulungaanga fakatuʻasinó. Mahalo te ke lava ʻo fakaʻaliʻali ha ngaahi tā ʻo e mātuʻá mo ʻenau fānaú pea sio ki ha ngaahi meʻa ʻoku nau faitatau ai. Hili ia pea te ke lava ʻo lau ha ngaahi potufolofola fekauʻaki mo e ʻulungaanga ʻo e Tamai Hēvaní, hangē ko ʻení:

  • Saame 116:5

  • Luke 6:35–36

  • 1 Sione 4:7–8

  • ʻEta 3:12

  Ko e hā ha fakamoʻoni ʻo e hā atu ʻa e ngaahi ʻulungaanga ko ʻení meiate kitautolu? Te tau fakatupulaki fēfē kinautolu pea hoko ʻo tatau ange mo ʻetau Tamai ʻi Hēvaní?

Ako Lahi Ange

• Kalētia 4:6–7; Hepelū 12:9

• Russell M. Nelson, “Ngaahi Fili ki he Taʻengatá” (fakataha lotu fakaemāmani lahi maʻá e kakai lalahi kei talavoú, 15 Mē 2022), Gospel Library

• Donald L. Hallstrom, “Ko e Fānau Au ʻa e ʻOtuá,” Liahona, Mē 2016, 26–28

• Rosemary M. Wixom, “Ko Hono ʻIloʻi Hotau Natula Faka-ʻOtuá,” Liahona, Nōvema 2015, 6–8

Konga 2

Lau ʻa e Tokotaha Kotoa ko ha Fānau ʻa e ʻOtuá

kau fafine ʻoku nau fepōtalanoaʻaki

ʻOku angamaheni ʻaki e fanongo ki hono ui ʻe he kāingalotu ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní ʻa e taha kotoa ko e “tokoua” mo e “tuofefine.” Hangē ko e fakamatala ʻa Palesiteni Henelī B. ʻAealingí, ko e ngaahi leá ni “naʻe ʻikai ko ha lea fakafeʻiloaki pē ia pe fakalaulaunoa kiate kitautolu. Ko hano fakahaaʻi ia ʻo ha moʻoni taʻengata: Ko e ʻOtuá ʻa e tamai moʻoni ʻa e faʻahinga kotoa ʻo e tangatá; ʻoku tau kau kotoa ki Hono fāmili taʻengatá.”³ ʻOku maʻu ʻe he moʻoni faingofua ko ʻení ʻa e mālohi ke liliu ʻa e anga ʻetau fakafeangainga ki he niʻihi kehé. Mahalo pē ʻe kehekehe ʻetau fakakaukaú, tōʻongá, mo e fōtunga fakatuʻasinó, ka ʻoku faingofua ange ke fakahoungaʻi mo fakaʻapaʻapaʻi e ngaahi faikehekehe ko iá ʻi heʻetau manatuʻi ko e fāmili kotoa kitautolu, ʻi he talanoa fakalaumālié.

Ngaahi meʻa ke fakakaukau ki ai

• ʻOku fakamatala ʻa e Tohi ʻa Molomoná ki ha faʻahinga kakai ʻe ua—ko e kau Nīfaí mo e kau Leimaná—ʻa ia naʻe laui toʻu tangata ʻena hoko ko ha ongo fili fītaʻa. Ka naʻe ʻi ai ha ngaahi taimi naʻe ikunaʻi ai ʻe he ngaahi kulupu ko ʻení ʻenau tāufehiʻá pea nau fetauhiʻaki ko e ngaahi tuongaʻane mo e tuofāfine. Laukonga fekauʻaki mo e ngaahi aʻusia ko ʻení ʻi he Mōsaia 28:1–3; ʻAlamā 26:23–31; 27:20–24; 4 Nīfai 1:1–3, 14–18. ʻI hoʻo laukongá, fakalaulauloto ki he meʻa te ke lava ʻo fai ke tokoni ke ʻomi ʻe he Fakamoʻuí ʻa e melinó ki he fāmili ʻo e ʻOtuá.

• Mahalo he ʻikai fakafeʻiloaki atu ʻe he kakai ʻoku mou fetaulakí ko ha fānau kinautolu ʻa e ʻOtuá, ka te ke lava ʻo fakakaukau pehē kiate kinautolu ʻi hoʻomou feʻiloakí. ʻAhiʻahi fakahoko ia! Pea ko e taimi pē ʻoku ʻahiʻahiʻi ai koe ke ke fakakaukau kovi ki ha taha, fetongi e fakakaukau ko iá ʻaki ʻa e “Ko e tokotahá ni ko e fānau ia ʻa e ʻOtuá.” Fakatokangaʻi ʻa e anga ʻene liliu hoʻo ongo fekauʻaki mo e kakaí—mo e anga hoʻo fakafeangai kiate kinautolú.

ʻEkitivitī ki he ako mo e niʻihi kehé

• Fakakaukau ke fakaʻaliʻali ha ʻū tā ʻo ha kakai mei ha matakali, anga fakafonua, mo e puipuituʻa kehekehe. Talanoa fekauʻaki mo e ngaahi founga lahi ʻoku faitatau ai ʻa e kakaí. Aleaʻi ʻa e ʻuhinga ʻoku finangalo ai ʻa e ʻOtuá ke tau fakaʻapaʻapa maʻu pē mo angaʻofa ki he niʻihi kehé.

Ako Lahi Ange

• Malakai 2:10; Ngāue 17:24–29; Tokāteline mo e Ngaahi Fuakava 18:10; 76:24

• Dallin H. Oaks, “ʻOfa Ki Homou Ngaahi Filí,” Liahona, Nōvema 2020, 26–29

Ngaahi Maʻuʻanga Tokoni Kehe fekauʻaki mo Hotau Tuʻunga ko e Fānau ʻa e ʻOtuá

• Ngaahi Folofolá

• Ngaahi pōpoaki mei he kau taki ʻo e Siasí

• Ngaahi himí mo e hiva ʻa e fānaú

• Ngaahi Vitioó

• Maʻuʻanga tokoni maʻá e fānaú

Maʻuʻanga Fakamatalá

1. “Ko e Fāmilí: Ko ha Fanongonongo ki Māmani,” Gospel Library.

2. Brian K. Taylor, “Ko e Fānau Koā Au ʻa e ʻOtuá?,” Liahona, Mē 2018, 12–13.

3. Henry B. Eyring, “Ko Hono Tānaki e Fāmili ʻo e ʻOtuá,” Liahona, Mē 2017, 20.