“ʻOtua ko e Tamaí,” Ngaahi Tefitó mo e Ngaahi Fehuʻí (2023)
Fakahinohino ki hono Ako ʻo e Ongoongoleleí
ʻOtua ko e Tamaí
Ko e Tamai ʻo hotau laumālié, ʻa ia ʻoku ʻofa haohaoa ʻiate kitautolú
ʻOku fakamatalaʻi ʻi he tohi ʻa Fakahaá ʻa e ʻOtua ʻoku ʻafio ʻi ha nofoʻa fakaʻeiʻeiki ko ha tuʻi (vakai, Fakahā 3:21; 4:2, 10; 5:1). Ka te tau lava foki ʻo fakakaukau kiate Ia ʻi ha founga fakataautaha. ʻI Heʻene hoko ko ʻetau Tamai Hēvani ʻofá, ʻokú Ne tokanga moʻoni mai kiate kitautolu: ki heʻetau ngaahi ongó, aʻusiá, ʻamanakí, mo e fakaʻānauá. Naʻe tohi ʻe he kau mēmipa ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē, “Ko e meʻa mahuʻingá, ʻi he kotoa e ngaahi huafa fakalāngilangi mo fakaʻapaʻapa kuo ʻoange maʻá e [ʻOtuá], kuó Ne kole mai ke tau ui Ia ko e Tamai.”1
Ko Hai ʻa e Tamai Hēvaní?
Ko e ʻOtua ko e Tamaí ko ha Taha Aoniu Ia, ʻoku tau tui mo lotu ki ai. Ko e tupuʻanga Ia ʻo e palani ʻo e fakamoʻuí mo e hakeakiʻí. Ko e ʻOtuá ko e Tamai Ia ʻa hotau ngaahi laumālié pea ʻoku ʻofa ʻiate kitautolu. Ko ʻEne ngāué mo Hono nāunaú ke “fakahoko ʻa e moʻui taʻe-faʻa-mate mo e moʻui taʻengata ʻa e tangatá” (Mōsese 1:39). ʻOkú Ne haohaoa, maʻu e mālohi kotoa pē, mo tokaimaʻananga ʻa e meʻa kotoa. ʻOkú Ne “maʻu ha sino ʻo e kakano mo e hui ʻoku ongoʻingofua tatau mo e sino ʻo e tangatá” (Tokāteline mo e Ngaahi Fuakava 130:22).
Vakai fakalūkufua ki he tefitó: ʻOtua ko e Tamaí
Ngaahi fakahinohino fekauʻaki ki hono ako e ongoongoleleí: Toluʻi ʻOtuá, Children of God (Fānau ʻa e ʻOtuá), Premortal Life (Moʻui he Maama Fakalaumālié), Worship God the Father (Hū ki he ʻOtua ko e Tamaí), Moʻui Taʻengatá
Konga 1
Te Tau Lava ʻo ʻIloʻi ʻa e ʻOtuá
ʻI he pō naʻe mamahi ai ʻa e Fakamoʻuí ʻi Ketisemaní, naʻe lotu ʻa Sīsū Kalaisi ki he Tamai Hēvaní ʻo pehē: “Pea ko ʻeni ʻa e moʻui taʻengatá, ko ʻenau ʻilo koe ko e ʻOtua moʻoni pē tahá, mo Sīsū Kalaisi, ʻa ia naʻá ke fekaú” (Sione 17:3). Koeʻuhí ʻoku ʻofa ʻa e ʻOtuá ʻiate kitautolu, ʻokú Ne fakaafeʻi ai kitautolu ke tau ʻiloʻi Ia ke tau lava ʻo maʻu ʻa e moʻui taʻengatá. Ko e lahi ange ʻetau ako ki he ʻulungaanga ʻo e Tamai Hēvaní, ko e lahi ange ia ʻetau fie hoko ʻo hangē ko Iá.
Ngaahi meʻa ke fakakaukau ki ai
-
Ko e hā ʻokú ke ʻilo fekauʻaki mo e Tamai Hēvaní? Te ke lava ʻo ako ha niʻihi pe kotoa ʻo e ngaahi potufolofola ko ʻení, ʻo kumi e ngaahi meʻa kuo fakahā fekauʻaki mo Iá:
-
Naʻe folofola ʻa e ʻEiki ko Sīsū Kalaisí, “Ko au ko e halá, mo e moʻoní, pea mo e moʻuí; ʻoku ʻikai haʻu ha tangata ʻe taha ki he Tamaí, kae ʻiate au” (Sione 14:6), pea, “Haʻu, ʻo muimui ʻiate au” (Mātiu 19:21). Ko e hā ʻoku akoʻi atu ʻe he ngaahi potufolofola ko ʻení ʻe tokoni atu ʻi hoʻo feinga ke ʻiloʻi ʻa e ʻOtua ko e Tamaí?
ʻEkitivitī ki he ako mo e niʻihi kehé
-
Naʻa mo e fānau īkí te nau lava ʻo maheni mo e ʻOtua ko e Tamaí pea ongoʻi vāofi mo Ia. Te mou lava ʻo hivaʻi ha ngaahi hiva hangē ko e “Fānau Au ʻa e ʻOtua” (Ngaahi Himí, fika 193), “ʻOku Moʻui ʻEku Tamaí” (Ngaahi Himí, fika 194), pe “Akoʻi Au ke U ʻEva he Māmá” (Ngaahi Himí, fika 196). Hili iá pea aleaʻi ʻa e meʻa ʻoku nau ako fekauʻaki mo e Tamai Hēvaní mei he ngaahi hiva ko ʻení.
Ako Lahi Ange
-
“ʻOtua ko e Tamai Taʻengatá,” Ngaahi Akonaki ʻa e Kau Palesiteni ʻo e Siasí: Siosefa Sāmita (2007), 43–51.
-
Jeffrey R. Holland, “The Grandeur of God,” Liahona, Nov. 2003, 70–73
Konga 2
Ko e Ngaahi Foha mo e Ngaahi ʻOfefine Fakalaumālie Kotoa Kitautolu ʻo e ʻOtuá
Neongo ʻoku lahi e faikehekehe ʻi he fāmili ʻo e tangatá, ka ko e foʻi moʻoni ʻe taha ʻoku nau taha aí ko e fānau kotoa kitautolu ʻa ha Tamai Hēvani ʻofa (vakai, Hepelū 12:9). “Ko e kakai kotoa pē—ʻa e tangata mo e fefine—naʻe fakatupu ia ʻi he tatau ʻo e ʻOtuá. Ko e tokotaha fakafoʻituitui kotoa pē ko e foha mo e ʻofefine ia ʻo ha mātuʻa fakalangi, pea ʻi heʻene peheé, ʻoku maʻu ai ʻe he tokotaha kotoa pē ha natula fakalangi pea mo ha ikuʻanga pau” (“Ko e Fāmilí: Ko ha Fanongonongo ki Māmani,” Gospel Library).
ʻOku finangalo ʻa e ʻOtuá ke maʻu ʻe Heʻene fānaú kotoa ha fiefia tuʻuloa ʻi he moʻuí ni pea maʻu ʻa e tāpuaki ʻo e nofo mo Iá ʻo aʻu ki he nofo taʻengatá.
Ngaahi meʻa ke fakakaukau ki ai
-
ʻOku foaki mai ʻe he ʻOtuá ha ngaahi tāpuaki fungani kuo talaʻofa ki he kau faivelengá ʻa ia ʻoku ope atu ʻi he meʻa ʻoku malava ke mahino kiate kitautolú (vakai, 1 Kolinitō 2:9–10). Kuó Ne vahevahe ha ngaahi fakaikiiki lahi fekauʻaki mo e ngaahi tāpuaki ko ʻení ʻi he folofolá. Te ke lava ʻo ako ʻa e Tokāteline mo e Ngaahi Fuakava 76:50–70 pea kumi ha niʻihi ʻo e ngaahi tāpuaki ʻoku fakatatali maʻanautolu ʻoku muimui ki he ʻOtuá.
-
Fakakaukau ke mamata ʻi he “Earthly Father, Heavenly Father” (3:59). ʻE ʻomi fēfē ʻe hotau ngaahi fatongia fakafāmili ʻi he māmaní kiate kitautolu ha kiʻi ʻilo ki he meʻa ʻoku finangalo ʻa e ʻOtuá ke tau aʻusiá?
ʻEkitivitī ki he ako mo e niʻihi kehé
-
Ako e Sēnesi 1:26–27. Ko e hā ha ngaahi meʻa ʻoku tau faitatau ai mo e ʻOtuá? Ko e hā ʻoku tokoni ai ke ʻiloʻi ʻoku ʻikai ngata pē ʻi heʻetau hoko ko e fānau fakalaumālie ʻa e ʻOtuá ka naʻe fakatupu foki hotau sino fakamatelié ʻi Hono tataú?
Konga 3
Te ke Lava ʻo Fakamālohia Ho Vā Fetuʻutaki mo e Tamai Hēvaní
Taimi lahi, ʻi heʻetau fie vāofi ange mo e kau mēmipa ʻo e fāmilí pe ngaahi kaungāmeʻá, ʻoku tau fakahoko ha ngaahi meʻa mo kinautolu hangē ko e talanoá, feohi fakatahá, mo e maʻu ha mahino lelei ange kiate kinautolú. ʻOku finangalo ʻa e Tamai Hēvaní ke tau ofi kiate Ia—pea ʻokú Ne finangalo ke ofi mai kiate kitautolu. Ko ʻEne fakaafe ʻeni kiate kitautolú: “ʻUnuʻunu mai kiate au pea te u ʻunuʻunu atu kiate kimoutolu” (Tokāteline mo e Ngaahi Fuakava 88:63). Fakakaukauloto ki he ʻuhinga ko ia ko e Tokotaha māfimafi taha ʻi he ʻunivēsí ʻokú ne fie fetuʻutaki mo kitautolu pea ʻunuʻunu ke ofi mai kiate kitautolu.
Kuo taʻofi meiate kitautolu ʻetau manatu ki heʻetau moʻui ʻi he maama fakalaumālié mo e ʻOtuá. Ka naʻe fakamatala ʻa Palesiteni ʻEselā Tafu Penisoni ʻo pehē “ʻoku ʻikai ha meʻa te ne fakaʻohovaleʻi lahi ange kitautolu ʻi heʻetau fou atu ʻi he veilí ki he tafaʻaki ʻe tahá ka ko hono fakatokangaʻi e lelei ʻo ʻetau ʻiloʻi ʻetau Tamaí pea mo ʻetau maheni mo Hono fofongá”2
Ngaahi meʻa ke fakakaukau ki ai
-
ʻOku lahi ha ngaahi founga te tau lava ai ʻo kamata pea fakamālohia hotau vā fetuʻutaki mo e Tamai Hēvaní. Te ke lava ʻo ʻahiʻahiʻi ha niʻihi ʻo e ngaahi fakakaukau naʻe akoʻi ʻi he ngaahi potufolofola ko ʻení:
ʻEkitivitī ki he ako mo e niʻihi kehé
-
Fakakaukau ke kole ki he niʻihi kehé ke nau kumi ha meʻa ʻe taha ʻi he lokí ʻokú ne fakafofongaʻi ha meʻa te ne lava ʻo fakamālohia hotau vā fetuʻutaki mo e Tamai Hēvaní. Kole ange ke nau vahevahe ʻa e meʻa ne nau maʻú mo e meʻa ʻokú ne fakafofongaʻí. Aleaʻi fakataha ha meʻa te mou lava kotoa ʻo ngāueʻi ʻa ia te ne ʻomi ke mou ofi ange ai ki he ʻOtuá.
Ako Lahi Ange
-
Dale G. Renlund, “Ke u Tohoakiʻi ʻa e Kakai Fulipē Kiate Au,” Liahona, Mē 2016, 39–42
-
Neill F. Marriott, “Nofo Maʻu ʻi he ʻOtuá pea Fakaleleiʻi ʻa e Maumaú,” Liahona, Nōvema 2017, 10–12