Ko e Siasi Moʻoni mo Moʻui Pē Tahá

ʻE lava ke tau ʻunu ʻo ofi ange kia Sīsū Kalaisi ʻi he fekumi ki ha tali ki heʻetau ngaahi fehuʻí kapau te tau fakaʻaongaʻi ʻa e ngaahi tefitoʻi moʻoni ʻoku falalaʻangá. ʻOku mahuʻinga ke maʻu ha mahino ki he founga hono maʻu ʻo e fakahaá ʻi he taimi ʻoku fekumi ai ki ha ngaahi talí. Vakai ki he tefito, “ʻIloʻi ko e Fakahaá ko ha Founga Ngāue Ia” ke vakaiʻi ha ngaahi tokoni lahi ange ki hono tali ʻo e ngaahi fehuʻí.

Vakai Fakalūkufuá

Talu mei he kamataʻanga hono Fakafoki Mai ʻo e ongoongoleleí ʻo aʻu mai ki he lolotongá ni, mo hono fakapapauʻi mai ʻe he kau taki ʻo e Siasí ko e kakai kotoa pē ko e fānau ʻa e ʻOtuá. ʻOku ʻofa mo finangalo ʻetau Tamai Hēvaní ke tāpuekina kotoa ʻEne fānaú.

ʻOku ʻikai ke tala ʻe he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní ko kinautolu pē ʻoku maʻu ai e leleí mo e moʻoní. ʻOku taʻefaʻalaua ha kakai ʻi he funga ʻo e māmaní ʻoku nau hoko ko e faʻifaʻitakiʻanga ʻo e faitotonú mo e loto-leleí. Pea ʻe lava ke maʻu ʻa e ngaahi tefitoʻi moʻoni ʻoku moʻoni mo leleí ʻi he ngaahi tui fakalotu mo e ngaahi founga fakaʻēfika kehekehe ʻi he funga ʻo e māmaní. ʻOku tau takitaha maʻu ʻa e totonu ke tui mo moihū ʻo fakatatau mo hono tataki kitautolu ʻe hotau konisēnisi fakafoʻituituí (vakai, Ngaahi Tefito ʻo e Tuí 1:11).

ʻI he taimi tatau, ʻoku maʻu ʻe he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní ha fekau makehe mei he ʻOtuá ke foaki ʻa e kakato ʻo e ongoongolelei ʻo Sīsū Kalaisí ki he māmaní. Naʻe fakahā ia ʻe he ʻEikí Tonu ko e “siasi moʻoni mo moʻui pē taha ʻi he funga ʻo e māmaní kotoa” (Tokāteline mo e Ngaahi Fuakava 1:30). ʻOku kau ʻi he pōpoaki ʻo e ongoongolelei ʻoku tau vahevahé ha ngaahi moʻoni mahuʻinga kuo fakafoki mai ʻa ia ʻoku ʻikai ke maʻu ʻi ha toe feituʻu kehe fekauʻaki mo e ʻOtuá pea mo ʻetau fetuʻutaki mo Iá. ʻOku toe maʻu foki ʻe he Siasí ʻa e mafai ʻo e lakanga fakataulaʻeikí mei he ʻOtuá ke fakahoko ʻa e ngaahi ouau ʻa ia ʻoku tau hū ai ki ha vā fetuʻutaki fuakava mo Ia.

ʻOku tui mo fakamoʻoni ʻa e Kāingalotu ʻo e Siasí ʻoku ʻomi ʻe hono moʻui ʻaki e ongoongolelei kuo fakafoki maí ha fiefia ʻoku tuʻuloá, ʻokú ne fakamoʻui e ngaahi nunuʻa ʻo e angahalá, mo teuteuʻi e fānau ʻa e ʻOtuá ke toe nofo ʻi Hono ʻaó.

Ngaahi fakahinohino fekauʻaki mo hono ako ʻo e ongoongoleleí:

“Ko e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní”
“Ko Hono Fakafoki Mai ʻo e Ongoongoleleí”
“Ngaahi Fuakavá mo e Ngaahi Ouaú”

Ko e Tali ki Hoʻo Ngaahi Fehuʻí

ʻOku founga fēfē ʻa e vakai ʻa e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní ki he ngaahi tukufakaholo fakalotu kehé?

ʻOku mau tui ʻoku ueʻi fakalaumālie ʻe he ʻOtuá ʻa e kakai lelei ʻo e ngaahi tui fakalotu mo e tui kotoa pē. Naʻe pehē ʻe he Kau Palesitenisī ʻUluakí ʻi he 1978: “Naʻe maʻu ʻe he kau taki lotu maʻongoʻonga lahi ʻo e māmaní hangē ko Mohāmeti, Konifiusiasi, pea mo e Kau Fokotuʻu Lotu Foʻoú, pea pehē ki he kau filōsefa hangē ko Sōkolotesi, Palato, mo ha niʻihi kehe, ha konga ʻo e maama ʻa e ʻOtuá. Naʻe foaki kiate kinautolu ʻe he ʻOtuá ha ngaahi moʻoni fekauʻaki mo e anga ʻo e tangatá ke lava ʻo fakamaamaʻi ʻaki ʻa e ngaahi puleʻangá kakato pea ke ʻohake ha tuʻunga mahino ʻoku toe māʻolunga ange ki he kakaí fakafoʻituitui.” ʻOku mau kau fakataha mo e kakai tui mo loto-lelei ʻi he funga ʻo e māmaní ke fakamālohia e tukui koló, tokangaekina ʻa kinautolu ʻoku faingataʻaʻiá, mo fakahoko e ngāue ʻa e ʻOtuá ʻi he māmaní.

ʻOku fakamahuʻingaʻi ʻe he Kāingalotu ʻo e Siasí ha faʻahinga “meʻa ʻoku māʻoniʻoni, fakaʻofoʻofa, pe ongoongo lelei pe feʻunga mo hono vīkivikiʻí” ʻi he ngaahi siasi mo e ngaahi tukufakaholo fakalotu kehe ʻi he māmaní. Naʻe akoʻi ʻe Palesiteni Kōtoni B. Hingikelī, “ʻOku mau pehē ʻi he laumālie ʻo e ʻofa, ʻomi mo kimoutolu ʻa e meʻa kotoa pē ʻoku mou maʻú ʻa e leleí mo e moʻoní ʻa ia kuó ke maʻu mei ha faʻahinga maʻuʻanga tokoni pē, pea mou omi ʻo vakai pe te mau lava ʻo tānaki atu ki ai.”

ʻOku ʻuhinga ki he hā ʻa e pehē ko e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní ko e “siasi moʻoni mo moʻui pē tahá”?

ʻOku tataki ʻa e Siasí ʻe Sīsū Kalaisi, ʻa ia ʻokú Ne fakahā Hono finangaló ʻi hotau kuongá ki he kau palōfita moʻuí mo e kau taki kehe kuo tataki fakalaumālié. ʻOku fakaʻatā ʻe he hokohoko ʻo e fakahā mei he Fakamoʻuí ke fakafeʻungaʻi ʻa e Siasí mo e langí pea mo tupulaki foki—ke hoko ko ha siasi moʻoni mo moʻui fakatouʻosi. ʻOku tupulaki mo liliu ʻa e ngaahi meʻa moʻui kotoa pē. Naʻe pehē ʻe Palesiteni Lāsolo M. Nalesoni: “Ko ha kau fakamoʻoni kitautolu ki ha ngāue ʻo hono fakafoki mai ʻo e ongoongoleleí. Kapau ʻokú ke pehē kuo kakato hono fakafoki mai ʻo e Siasí, ʻokú ke vakai pē ko e ki he kamataʻangá. ʻOku kei lahi fau ha ngaahi meʻa ke hoko mai.”

ʻOku ʻomi ʻe he ongoongolelei kuo fakafoki mai ki he Siasi ʻo e ʻEikí ha ʻilo mo e moʻoni ʻoku ʻikai ke maʻu ia ʻi ha toe feituʻu kehe. ʻOkú ne ʻomi ha faingamālie fakafoʻituitui ki he mālohi fakamāʻoniʻoniʻi ʻo e ʻOtuá ʻo fakafou ʻi he Laumālie Māʻoniʻoní pea mo e fakamoʻui mo e hakeakiʻi ʻo e fāmili ʻo e ʻOtuá ʻo fakafou ʻi he ngaahi ouau ʻo e lakanga fakataulaʻeikí. Naʻe fakahā ʻe he ʻEikí ʻi he Tokāteline mo e Ngaahi Fuakava 1:30, ko e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní ʻa e “siasi moʻoni mo moʻui pē taha ʻi he funga ʻo e māmaní kotoa, ʻa ia ko au, ko e ʻEikí, ʻoku ou leleiʻia lahi aí, ʻa ia ko e lea ki he siasí fakakātoa kae ʻikai ki he tangata fakafoʻituituí.”

ʻOku fiemaʻu nai ke ke hoko ko ha mēmipa ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní kae toki fakamoʻui koe?

ʻI heʻemau hoko ko e kāingalotu ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, ʻoku mau tui kuo teuteu ʻe he ʻOtuá ha founga ke maʻu ai ʻe Heʻene fānaú kotoa ʻa e fakamoʻuí tuʻunga ʻi he Fakalelei ʻa Hono ʻAlo ko Sīsū Kalaisí. ʻE fakahaofi ʻa e tokotaha kotoa pē mei he maté ʻo fakafou ʻi he Toetuʻu ʻa Sīsū Kalaisí. ʻOku toe akoʻi lahi ange ʻe ha mata meʻa-hā-mai nāunauʻia naʻe fakahā ki he Palōfita ko Siosefa Sāmitá ʻe maʻu ʻe he fānau kotoa ʻa e ʻOtuá ha puleʻanga ʻo e nāunaú ʻi he hili ʻa e Toetuʻú.

ʻOku fakapapauʻi mai ʻe he ngaahi akonaki ko ʻení ʻa e māfimafi ʻo hotau ʻOtua ʻofá ke fakahaofí mo ʻEne finangalo moʻoni ke fai iá. ʻOku foaki mai ʻe he ʻOtuá kiate kitautolu ʻa e meʻa kotoa pē ʻokú Ne maʻú. Ka kuo pau ke tau fili ke tali ʻa e ngaahi tāpuakí ni. Ke maʻu ʻa e hakeakiʻí, ʻa e kakato ʻo e nāunau ʻoku foaki mai ʻe he ʻOtuá, kuo pau ke tau fai ha ngaahi fuakava mo Ia, tali ʻa Sīsū Kalaisi mo ʻEne ongoongoleleí, feinga ke moʻui ʻo fakatatau mo e ngaahi akonaki mo e sīpinga ʻa Sīsuú, pea fakatomala ʻi he loto-fakatōkilalo mei heʻetau ngaahi angahalá ʻi he taimi ʻoku tau tōnounou aí. ʻOku maʻu ʻe he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní ʻa e mafai mei he ʻOtuá ke ʻoatu ʻa e ngaahi fuakava mo e ngaahi ouau ʻo e ongoongolelei ʻo Sīsū Kalaisí ʻa ia ʻokú ne teuteuʻi kitautolu ki he nāunau māʻolunga taha ʻi he puleʻanga fakasilesitiale ʻo e ʻOtuá.

Ko e moʻoni, ko e tokolahi taha ʻo e fānau ʻa e ʻOtuá ʻi he hisitōlia ʻo e māmaní kuo teʻeki ai pē ke nau hoko ko ha mēmipa ʻo e Siasi ʻo Sīsū Kalaisí. Ko hono moʻoní, ko e tokolahi taha ʻo e kakai kuo nau moʻui ʻi he māmaní naʻe teʻeki ai pē ke nau fanongo ʻia Sīsū Kalaisi. Ka ʻoku ʻi ai ha kakai lelei taʻefaʻalaua—ʻi he toʻu , tui fakalotu, mo e anga fakafonua kotoa pē ʻi he māmaní—ʻoku nau fakafōtunga ʻa e anga faka-ʻOtuá ʻi heʻenau moʻuí. ʻE maʻu ʻe he tokotaha kotoa pē ha faingamālie, ʻi he moʻuí ni pe moʻui ka hokó, ke akoʻi kiate ia ʻa e kakato ʻo e ongoongoleleí pea mo tali pe fakasītuʻaʻi hono ngaahi ouaú mo e ngaahi fuakavá (vakai, Tokāteline mo e Ngaahi Fuakava 138:30–35, 57–59).

Ko e hā e ʻuhinga ʻoku ʻikai ke tali ai ʻe he Siasí ʻa e papitaiso ʻa e kau tui faka-Kalisitiane kehé?

Hili ha taimi nounou mei hono fokotuʻu ʻo e Siasi ʻo Sīsū Kalaisí ʻi he 1830, naʻe fifili ʻa kinautolu naʻe ʻosi papitaiso kimuʻá pe ʻoku fiemaʻu nai ke nau toe papitaiso ʻi he Siasi foʻou ne toki fakafoki maí. Ko e talí, naʻe fakahā mai ʻe he ʻEikí ʻo fakafou ʻia Siosefa Sāmita ʻa e fiemaʻu ke papitaiso ʻaki ʻa e mafai ʻo e lakanga fakataulaʻeikí ʻa ia kuó Ne fakafoki maí. Neongo ʻoku fakaʻapaʻapaʻi ʻe he Siasí ʻa e taumuʻa māʻoniʻoni ʻa e kau Kalisitiane kehé ʻi heʻenau ngaahi papitaiso kimuʻá, ka ʻoku tau muimui ki he akonaki ko ʻení he ʻahó ni.

ʻOku ʻi ai nai ha “kakai kuo fili” ʻa e ʻOtuá?

Ko ha fānau ʻofeina kotoa kitautolu ʻa e ʻOtuá. ʻOku akoʻi ʻe he folofolá ʻoku fakahoko ʻe he ʻOtuá ha ngaahi fuakava mo ʻEne fānaú ke fakaafeʻi kinautolu ke fehaʻiʻaki ʻi ha vā fetuʻutaki ʻoku taʻengata mo Iá. ʻOku tau ʻilo mei he Tohi Tapú, naʻe fokotuʻu ʻe he ʻOtuá ʻEne fuakava mo ʻĒpalahamé, ʻo fakahā ai ʻe tāpuekina ʻa e māmaní kotoa ʻo fakafou ʻi he fāmili ʻo ʻĒpalahamé (vakai, Sēnesi 17:1–7; 22:17–18). Naʻe fakafoʻou ʻa e fuakava ko ʻení ʻi he fānau ʻIsilelí, ko e hako ʻo ʻĒpalahamé (vakai, Sēnesi 28:10–15). Neongo naʻe mahino ki he kakai ʻi he kuonga kehekehe ʻi hono kotoa ʻo e hisitōliá ko e fuakavá ni naʻe fakangatangata pē ki ha hako pau, ka naʻe fakahā ʻe he ʻEikí ki Heʻene kau ʻAposetoló “ʻoku ʻikai filifilimānako ʻa e ʻOtuá ki he kakaí: ka ʻokú ne maʻu maʻana ʻa ia ʻoku manavahē kiate iá, mo faitotonu, ʻi he puleʻanga kotoa pē.”

Naʻe hoko hono Fakafoki Mai ʻo e ongoongoleleí ʻia Siosefa Sāmitá ko hano fakafoʻou ia ʻo e fuakava taʻengata ʻa e ʻOtuá ʻi he ngaahi ʻaho fakaʻosí. Ko ha taha pē ʻokú ne fili ke fakahoko ha fuakava mo e ʻEikí ʻi he mafai totonú, ʻokú ne hoko ko ha konga ʻo Hono kakai ʻo e fuakavá. Hangē ko e folofola ʻa e ʻOtuá kia ʻĒpalahamé, “Ko kinautolu kotoa pē ʻe tali ʻa e Ongoongolelei ko ʻení ʻe … lau ʻa kinautolu ko ho hako.” Koeʻuhí ko ʻenau fili ke muimui ʻia Sīsū Kalaisí, ʻoku nau hoko ai ko ha “kakai kuo fili …, ko e kau taulaʻeiki fakaʻeiʻeiki, ko e kakai māʻoniʻoni, ko e kakai kuo fakatau [ʻo fakatolonga].”

Ko e hā e fakakaukau ʻa e Siasí ki he tauʻatāina fakalotú?

ʻOku makatuʻunga e palani ʻa ʻetau Tamai Hēvaní ki he fakamoʻuí ʻi heʻetau malava ke fili maʻatautolú, ʻo hoko ai e tauʻatāina fakalotú ko ha tefitoʻi moʻoni mahuʻinga ʻo e ongoongolelei ʻo Sīsū Kalaisí.

Naʻe talu hono fakamahuʻingaʻi ʻe he Kāingalotu ʻo e Siasí ʻa e tauʻatāina fakalotú talu mei he ngaahi fuofua ʻaho naʻe kamata mai ai ʻa e Siasí. Naʻe akoʻi ʻa Siosefa Sāmita ʻe heʻene aʻusia ʻi he taimi naʻe fakamamahiʻi ai ia ʻe he fakatangá mo e fetāʻakí ke ne taukaveʻi ʻa e tauʻatāina fakalotú, ʻo ʻikai ngata pē maʻá e Kāingalotu ʻo e Siasí kae maʻá e kakai kotoa pē. Naʻá ne tapou ki he Kāingalotú ke “[toʻo ʻaupito] meiate kitautolu ʻa e tōʻonga filifilimānako kotoa pē mo e ʻikai loto ke tali e ngaahi fakakaukau fakalotu ʻa ha tangata.” Naʻá ne akoʻi ko e “totonu taʻe-fakakounaʻi ʻa e tangatá ke fakakaukau ʻo fakatatau ki heʻene fiemālié [mo] lotu ʻo fakatatau ki heʻene fiemaʻú” ko e “ʻuluaki fono ia ʻo e meʻa kotoa pē ʻoku toputapú.”

ʻOku fakapapauʻi mai ʻe he kau taki ʻo e Siasí he ʻahó ni ʻa e mahuʻinga ʻo hono fakaʻatā ʻa e kakai kotoa pē ke nau “lotu, pe ʻe anga fēfē, pē ʻe fai ʻi fē, pe ko e hā te nau lotu ki aí.” ʻI ha lea ʻa Palesiteni Tāleni H. ʻOakesi ki he kakai tui kotoa pē, naʻá ne tapou ai ʻo pehē: “ʻI he ʻofa mo e fefakaʻapaʻapaʻaki kuo akoʻi mai ʻe he ngaahi fekau fakalangí, ʻoku fiemaʻu ke tau kumi ha ngaahi founga ke tau feakoʻaki ai mo toe fakamālohia ʻa e ngaahi tukupā angamaheni ʻoku nau pukepuke fakataha kitautolu mo paotoloaki ʻa e ngaahi sōsaieti kehekehé. ʻOku totonu ke tau ʻaʻeva uouangataha ʻi he hala ʻo e tauʻatāina fakalotú maʻá e kakai kotoa pē, kae kei fakaʻaongaʻi pē ʻa e tauʻatāina ko iá ke tulifua ʻetau ngaahi tui fakalotu makehé.”

Ako lahi ange

Dallin H. Oaks, “Ko e Fiemaʻu ke ʻi ai ha Siasí,” Liahona, Nōvema 2021, 24–26
Russell M. Nelson, “Ko e Hingoa Totonu ʻo e Siasí,” Liahona, Nōvema 2018, 87–89
J. Devn Cornish, “ʻOku Tau ʻUhinga ki he Hā ʻi Heʻetau Pehē ʻOku Moʻoni ʻa e Siasí?,” Liahona, Sune 2024, 17–21